“¿Tunteñma am, ahuem Jehová, mülei tañi huiraral quellun mu, fei tami allcünon? ¿Tunteñma am mülei tañi ngillatual tami montulafiel quehuan dungu mu, fei tami chumnon?” (Habacuc 1:2, 3). Tüfa ñi feipiel Habacuc fütra cuifi mu, quiñe cüme huentru ayühuelquefilu ta Chau Ngünechen. Huelu Habacuc ñi llellipun, ¿pengelpei mai ñi maneluuquenon Jehová mu? ¡Femlai llemai! Chau Jehová pengeleleyu ñi puhual ti antü ñi ngehuenoal cutrancahun (Habacuc 2:2, 3).

Cutrancahulmi cam cutrancaule quiñe tami pu che, feipiafuimi chi: “¿Chumngelu am fente alüñmai Chau Dios taiñ quelluaeteu? Chumlai rume taiñ cümelcaletual”. Huelu ngüneduamnge Biblia ñi feipin: ‘Ñidol müte aporiauquelai ñi femal tañi feipicünuelchi dungu chumngechi quiñequentu raquiduamquei ñi mupiquenon ñi dungu, huelu mai ñochi piuquengei ta eimün meu, fei ayülenolu am inei no rume ñi layal, huelu com che ñi huiñoraquiduamtual ta Ngünechen meu’ (2 Pedro 3:9).

¡Pichilehuei ñi femal tüfa! Jesús feipi ñi müleal pu che ngüneduamlu fillque dungu ñi rupayal afaelchi antü mu (Mateo 24:3-42). Famülque mu rüf tripamequei com ñi feipiel Jesús, tüfa cüme pengeli ñi pichilehuen Chau Ngünechen ñi apümcayafiel ti huesaque dungu. *

¿Chumai Chau Dios ñi apümcayafiel taiñ cutrancaucülen? Miyaupalu tañi Fotüm Mapu mu, pengeli tañi Chau ñi elueteu nehuen tañi quelluafiel pu che, fei ñi cutrancahuenoal engün. Raquiduamnge quiñeque dungu pengelquelu tüfa.

Fütraque nüyün, cürüftucu mahun ca fillque femngechi dungu: Jesús ca ñi pu discipulo amulelu nometu Galilea ñi lafquen meu, triparumei quiñe fütra cürüf, fei ti reu lafquen trilcafconmequei ti farcu meu. Feichi mu Jesús ca tañi Chau pengelingu ñi pepi ngüneniefiel ti cürüf, mahun ca fillque femngechi dungu (Colosenses 1:15, 16). Fei Jesús feipifi müten ti lafquen: “¡Ñücüfnagnge! ¡Tüngnagnge!”. ¿Chum tripai tüfa? “Fei ti cürüf tüngnagi ca itrocom fente cüme ñücüfcülehuetui” (Marcos 4:35-39).

Fillque cutran: Pu che cüme quimniefui Jesús ñi tremolfiel pu trauma, cüntro, pu lalatuquelu, pu nielu lepra cutran ca caquerume cutran nielu. Femi llemai, “Jesús com mongeltufi ti pu cutran” (Mateo 4:23, 24; 8:16; 11:2-5).

Filla dungu: Feichi nehuen tañi elueteu ñi Chau, Jesús elufi iyael fentren che, pichin iyael niefulu rume. Epu rupa huiriconcülei Biblia mu Jesús tañi femün tüfa (Mateo 14:14-21; 15:32-38).

Lan dungu: Feichi nehuen tañi elueteu ñi Chau, Jesús huiñomongeltufi ta cüla che. Quiñe tüfa engün meli antü lalerquefulu. Tüfa pengeli ñi fente nehuen-ngen Chau Jehová tañi apümafiel ti lan dungu (Marcos 5:35-42; Lucas 7:11-16; Juan 11:3-44).