Chumngechi ñi feipiel ta Jesús, huall mapu püle amuldungungequei “tati cümeque dungu Chau Dios ñi ngünenietual ta mapu” (Mateo 24:14). Biblia mu, ti lifru Daniel feipiquei Chau Ngünechen ñi loncolen tüfachi Gobierno mu. Daniel capitulo 2 nütramcaquei ñi hueluquentu ngünenieal fütraque gobierno, hune coni Babilonia ca puhui famülque meu mülechi gobierno. Versiculo 44 feipicünui chem dungu tañi rupayal:

“Ngünechen huenu mu mülelu elcünuai quiñe ngünenien [gobierno], chumcaunorume apümcangelayai. Ca tüfachi ngünenien elcünungelayai caque troquiñche mu. Atemcayafi ca apümcayafi com tüfachi caquelu pu ngünenien, ca quisu müten chumcaunorume aflayai”.

Femngechi Biblia feipicünui Chau Ngünechen ñi Gobierno apümafi pu che tañi gobierno, femngechi tañi cümelcaletual com pu che mapu meu. Ngünenietule Chau Dios, ¿chumlerputuai taiñ mongen? Ngüneduamaiñ cümeque dungu ñi feipicünuel ta Chau Dios, tüfa pürüm femtripayai.

• HUEICHAHUELAYAI TA CHE

  Salmo 46:9: “Apümcaniefi ti hueichan itrocom Mapu mu. Huatrocafi ti arco ca catrücayafi pu huaiqui; cütral mu lüpümyefi hueichan carreta”.

  Famülque mu, ti pepiluhun ca plata ñi nieel pu che adcünungequei tañi deumangeal hueichahue. Huelu, ¿doi cümepelayafui mai pu che tañi cüdahual ñi quelluafiel ta caquelu? ¡Felei llemai! Tüfachi dungu rüf tripayai Ngünechen ngünenietule ti mapu.

• CUTRANHUELAYAI PU CHE

  Isaías 33:24: “Inei no rume feipilayai: ‘Iñche cutrancülen’”.

  Cüpalechi antü mu pu che niehuelayai piuque cutran, cancer, diabetes ca chem cutran no rume. Duamfalngehuelayai pital ca lahuentun dungu. Com che cüme feletuai mapu mu.

• FILLAHUELAYAI PU CHE

  Salmo 72:16: “Fentren iyael müleai tüfachi mapu meu; huente huincul cütu huefpayai ti fün”.

  Mapu hulai fentren iyael, femngechi com pu che llohuai tunte tañi duamnieel. Feimu inei no rume ngüñühuelayai ca entrihuelayai.

• AFAI CUTRANTUN, HUEÑANCÜN CA LAN

  Apocalipsis 21:4: “Chau Ngünechen com liftuñmayafi tati pu che ñi cülleñu. Ngehuelayai lan, afai ta hueñancün, ngüman ca cutrantun. Ngehuetulai ti cuifi huesaque dungu”.

   Pu che afnoachi mongen nieai mapu mu quiñe cüme mülehuengetule. Tüfa ñi feipicünuel taiñ poyen Chau Jehová.

¿Chumngentufimi taiñ ngüneduampeel? Cüme dungu fel piafuimi. Fentren che allcütulu Biblia ñi feipin ñi chumlerpual ta mongen, ayüfal dungu troquiquefingün, huelu müte feyentuquelaingün. “¿Chumngechi fel tüfa?” piqueingün, “quiñe che no rume turpu niequelai afnoachi mongen”.

Ti culpan ca lan dungu mu, pu che afquentu rupaquei huesaque dungu, cutrancauquei ca hueñancüquei. Feimu huimtulelu am engün, “felei ta mongen, ¿chumngeafui cai?” piquei. Huelu Chau Jehová deumaeteu iñchiñ, ayüquelafui taiñ femngechi feleal.

Chau Ngünechen quimeltuqueiñmeu fente ñi manelfalngen tañi feipicünuel, feimu feipi: “Femngechi feleai tañi feipin tripalu tañi hun mu. Femtripayai petu ñi huiñotunon iñche mu, rüfcünu, femtripayai chem dungu rume tañi ayünieel, ca femngechi rüf tripayai tañi huercüel” (Isaías 55:11).

Biblia ca feipi Chau Ngünechen coilatuquelai (Tito 1:2). Deu ngüneduampeiñ fentren cümeque dungu ñi feipicünuel Jehová cüpalechi antü mu, feimu duamfali taiñ ramtuhual: “Pu che, ¿rüf niepeafui mai afnoachi mongen mapu mu? Taiñ llohual Chau Dios ñi feipicünuel, ¿chem mülei taiñ femal?”. Amulelmi tami papeltuafiel tüfachi chillca quimürpuafuimi.