¡MÜNA CÜME DUNGU TATI! Taiñ Fütra Chau feipicünui taiñ eluaeteu rumel mongen fau mapu mu. Huelu fentren che müte feyentuquelai tüfa, doi mai “femngechi felei müten, mongeleiñ ca laqueiñ” piqueingün. Caquelu che feyentuquelai taiñ rumel mongeleal mapu mu, doi mai “laliyiñ rumel mongen nieaiñ huenu meu” piqueingün. Eimi cai, ¿chem piafuimi?

Ngüneduamnge chem ñi quimeltuqueel Biblia tüfachi ramtun: pu che, ¿elcünungepei mai tañi afnoachi mongen nieal? ¿Chem pengelquei tañi chumngechi deumangeel? Chau Dios deumafilu pu che ca ti mapu, ¿chumngechi ayüniefui ñi chumleal? ¿Chumngelu laquei com pu che?

Chau Ngünechen deumai itrofill mongen mülelu mapu mu. Huelu, ¿chumngelu am doicülei pu che? Biblia feipi Ngünechen deumafi pu che quisu ñi adentun mu (Génesis 1:26, 27). Feimu pu che elungei ñi inayentuafiel ñi chumngen ta Chau Ngünechen, fei quisu reque piuqueyecheafui ca üdeafuingün norngenochi dungu.

Pu che müten elungei tañi raquiduamal ca ngüneduamal chem ñi cümen ca chem ñi cümenon. Cafei pu che müten quimürpuafui ca hueniyerpuafui ta Chau Ngünechen. Adquintufiel mu iñchiñ com ñi deuman ta Chau Ngünechen, afmatulehuequeiñ. Ca müna ayühuelqueiñmu ngürecayal, ülcantual ca entual nütram. Felei, iñchiñ müten femngechi deumangeiñ, feimu trürlaiñ ta caquelu mongen mülelu mapu mu.

Raquiduamnge chumngechi Chau Dios ñi deumafiel pu che. Quisu elufi ñi amulerpual tañi quimün ca ñi doi cüme chengerpual caque antü mu. ¿Chumal am? ¿Re tañi mongeleal pu che 70 cam 80 tripantu müten? ¡Femlai tati! Chau Dios femngechi deumacünufi pu che ñi ayüucüleal ca rumel mongeleal mapu meu.

Quiñeque che feipiquei Chau Dios ayüquelafui taiñ rumel mongeleal mapu mu. Feipingequei pu che elngei mapu mu ñi ngüchaltucungeal müten, femngechi ñi dullingeal inei ñi mülepual huenu mapu mu. Feingele, Chau Ngünechen ñi duam mu mülei huesaque dungu mapu mu piafuiñ. Huelu femngechi femngelai taiñ Huenu Chau. Doi mai Biblia feipi ñi chumngen ta Chau Ngünechen: “Nor dungu mu amuquelu am com tañi rüpü. Ngünechen ta manelfalngei, norngenochi dungu femquelai; nor piuquengei ca huesañmauquelai” (Deuteronomio 32:4).

Biblia cüme quimfalcünuquei chumngechi ayüniei Chau Dios ñi chumleal ta mapu. Tüfa feipi: “Tati huenu mapu ngen-ngei Jehová, huelu tati  mapu elufi ta huentru ñi pu yall” (Salmo 115:16). Felerquei mai, Chau Dios müna cüme deumafi ti mapu tañi rumel müleal com pu che ca elcünui com ñi duamnieel engün tañi ayüucüleal ca rumel mongeleal (Génesis 2:8, 9).

“Tati huenu mapu ngen-ngei Jehová, huelu tati mapu elufi ta huentru ñi pu yall” (Salmo 115:16).

Biblia ca cüme pengelquei chumngechi ayüniei Chau Dios ñi chumleal pu che. Quisu feipifi tati hunen curehuen mülelu mapu mu: “Nieaimu rume fentren püñeñ. Apolfimün ta mapu ca quisu ngünetunieafimün ca ngen-ngeaimün [...] itrocom ti pu culliñ huinolquiyauquelu mapu meu” (Génesis 1:28). ¡Müna cüme cüdau elungerqueingu tati! Elfalcünungei ñi ngüneituafiel ti cüme mülehue cheu ñi mülequefel ca puhulafiel com mapu mu. Rüfcünu mai, Adán engu Eva ca ñi pu cüpanche rumel mongelerqueafulu engün mapu mu, deumangerquelai ñi mülepual huenu mu.

Biblia feipi quiñe cüme püllü fel ñi deumael ta Chau Ngünechen, feita eluhui ñi caiñetuafiel Chau Dios ñi ayüqueel ellaca mu, fei Huecüfü pingetui. ¿Chumi am?

Huecüfü ngüchaltucufi Adán engu Eva ñi caiñetuafiel ta Chau Ngünechen. Tati Huecüfü feipicafi reque: ‘Eimu dulliafuimu chem ñi cümen ca ñi cümenon, Chau Dios rücüqueimumeu reque tüfachi cüme dungu’. Fei Adán ca Eva quiñehui tati Huecüfü engu tañi caiñetuafiel ta Chau Ngünechen. ¿Chum tripai ñi femün engu? Rupalu chi antü laingu chumngechi ñi feipieteu ta Ngünechen. Feimu elungehuelai ñi afnoachi mongen nieal quiñe cüme mülehue mapu mu (Génesis 2:17; 3:1-6; 5:5).

Adán ca Eva ñi caiñetufiel ta Ngünechen huesalcaqueiñmu fantepu mu. Biblia feipi: “Quiñe huentru [Adán] ñi femün mu coni ta culpan mapu meu. Fei ti culpan cüpali lan dungu. Com pu che culpafengetui, feimu ti lan dungu com che meu puhui” (Romanos 5:12). Pu che feipiquei: “Chau Ngünechen eli taiñ layal, ¡quimfalngelai ñi femün!”. Huelu rüfngelai ñi feipiqueel engün, laqueiñ Adán ca Eva ñi culpan mu engu.

Chau Ngünechen caiñetungelu rume, femürpuai tañi ayünieel ellaca mu. Feimu tañi piuqueyechen ca ñi nor piuquengen mu adcünui chumngechi taiñ montulaeteu culpan ca lan dungu mu. Apostol Pablo feipi: “Ti culpan, ¿chumngechi culliqueiñmeu? Elcünueiñmeu taiñ layal. Huelu Chau Ngünechen elueiñmu rumel mongen taiñ Ñidol Cristo Jesús meu” (Romanos 6:23). Fente taiñ piuqueyenieteu ta Chau Ngünechen, “hulcünui tañi quiñen Fotüm [Jesús]. Femngechi tuchi feyentule quisu meu, apümcangelayai. Huelu mai nieai rumel mongen” (Juan 3:16). Jesús ayühun mu lapalu am mapu mu, huiñoleltufi pu che com tañi ñamümel Adán. a

Chumül müten femtripayai Chau Ngünechen tañi feipicünuel, fei quiñe cüme mülehuengetuai ta mapu. Eimi ca müleafuimi feiti mu, huelu cümeafui com tami piuque mu inanieal Jesús ñi feipin: “Pichi rupachi conhue meu conpuaimün. Alü rupai ti conhue ca ti rüpü yequefilu ta che ñi apümcangeal. Fei fentren che conpuquei feichi conhue mu. Huelu mai, pichi rupai ti conhue ca cüdaungei ñi inangeal ti rüpü yequefilu ta che ñi rumel mongeleal, fei pichin che pequei tüfachi rüpü” (Mateo 7:13, 14). Eimi dulliafuimi ñi chumlerpual tami mongen, fei ¿chumaimi cai?