¿Chumngelu duamnieiñ Chau Dios tañi Reino?
Jehová pingei Chau Dios. Ellaca mu, deumafi tati hunen epu che, tüfa Adán ca Eva pingei, Dios müten piuqueyenquechi ngüneniequefi engu. ¿Chumngechi quimiyiñ tüfa? Elufi quiñe cüme mülehue ñi müleam engu, Edén pingelu. Cafei elelfi fentren iyael ñi nieal ca elufi quiñe falin cüdau ñi femal engu (Génesis 1:28, 29; 2:8, 15). Adán ca Eva eluufule ñi ngünenieaeteu Chau Dios, cüme feleafuingu, fei iñchiñ ca femngechi cüme feleafuiñ.
Tati hunen epu che eluulai ñi ngünenieaeteu Dios.
Biblia nütramcai quiñe cüme püllüfel huesa püllüngetui, tüfa Satanás ca Huecüfü pingetui. Fei dalluntucufi ta Chau Dios chumngechi ñi ngünequefiel pu che. Femngechi feipicai reque ta Huecüfü: “Pu che quisutu ngüneule, fei inanofile Chau Dios ñi ngülam, doi ayüucüleafui”. Huecüfü femngechi raquiduamelfi ta Adán engu Eva, fei tüfa engu feyentui. Quiñehuingu Huecüfü engün ñi caiñetuafiel ta Chau Dios ñi ngünenieel (Génesis 3:1-6; Apocalipsis 12:9).
Adán engu Eva eluulai ñi ngünenieaeteu Chau Dios, fei ¿chem huesaque dungu mu rupaingu? Mülehuelaingu Edén mu, fei cüme felen ca rumel mongen niehuetulai engu (Génesis 3:17-19). Huelu, ¿quisu engu müten huesa rupaingu? Femlai, huesalcafi com tañi pu cüpanche. Biblia feipi Adán ñi duam mu, “coni ta culpan mapu meu. Fei ti culpan cüpali lan dungu” (Romanos 5:12). Culpalu cai ta che, cangelu huesa dungu rupaquei, Biblia feipi: ‘Pu che ngüneniefi caquelu pu che, fei quiñentrür ñi huesalcalerpual engün’ (Eclesiastés 8:9). Felei llemai, rume huesa tripaquei.
PU CHE ELUHUI ÑI QUISUTU NGÜNENIEAL
Nemrod caiñetufi ta Chau Jehová.
Biblia nütramcai quiñe huentru, Nemrod pingelu. Fei ayüquelafui ta Chau Jehová ñi ngünenieafiel pu che, feimu eluhui quisu ñi ngünenieal, fei tati hunen che femlu tüfa. Fütra cuifi ca fantepu meu, tati pu che allmalltuquei tañi autoridad ñi huesaque dungu femal. Ngüneduamnge ñi feipin tati lonco ülmen Salomón, fütra cuifi feipi: “Pefiñ ñi ngüman pu huesalcangelu, inei no rume yafültucuquelaeyu engün. Fei tüfachi pu che tañi huesalcamequeteu niefui autoridad” (Eclesiastés 4:1).
Cuifi reque, ca femngechi felerpui ti dungu famülque mu. Feichi 2009 tripantu, tati troquiñche Naciones Unidas pingelu feipi: “Fentren huesaque gobierno mülei, feimu fente huesalcalerpuquei ti dungu mapu mu”.
¡MÜLEI CÜMEQUE DUNGU!
Com iñchiñ duamnieiñ taiñ cüme ngüneniengeal. Feitachi dungu llemai taiñ feipicünueteu Chau Dios.
Chem gobierno no rume quelluquelafi pu che ñi cüme feleal.
Huenu mu elcünui tañi Reino, cam gobierno. Tüfa apümcayafi com pu che ñi gobierno, fei “quisu müten chumcaunorume aflayai” (Daniel 2:44). Feitachi Reino ñi elcünuel ta Chau Dios iñchiñ llellipuqueiñ ti padrenuestro pingechi llellipun (Mateo 6:9, 10). Huelu Chau Dios loncocünufi quiñe saquin püllü ñi ngünenieal tañi Reino mu. Tüfa ca checünuupai fütra cuifi, ¿inei am chi?
Eimi ca ayüafuimi
FILLQUE RAMTUN BIBLIA MU
Ngünechen tañi Reino, ¿yeniengequepei mai ta piuque meu?
Quiñeque Biblia feipilei: “Tamün piuque mu mülei Chau Dios ñi Reino”. ¿Chem cüpa feipi?
