Kom iñchiñ trürngelaiñ. Fey fill antü rakiduamliyiñ müten chem dungu mu taiñ trürngenon kakelu che mu, weda rakiduamürpuafuiñ kidu engün mu, illamkayafuiñ kütu. Femngechi rakiduamliyiñ kellulayaeiñmu taiñ duamtucheal.

“Inaye ayüwkeaymün tati ayüwkülelu mew ka inaye ngümakeaymün tati pu ngümakelu mew” (ROMANU 12:⁠15).

¿Chem küpa kimeltuy? Tüfachi ngülam pengeli ñi fente falin-ngen duamtuafiel ñi chum duamkülen kakelu che.

Duamtufiliyiñ kiñe che, kimtukuaiñ chumngechi rupalen chi pu che, ka femngechi dungu rupakeiñ. Feymu chuchi tuwün chengeafuy rume, iñchiñ taiñ familia reke trokinieafiyiñ. Fewmu rakiduamliyiñ chem dungu mu trürngeiñ kakelu che mu, küme trokituafiyiñ engün.

Kafey duamtufiliyiñ ta kakelu che, yamnieafiyiñ. Ngüneduamaiñ ñi rupan kiñe domo Anne Marie pingelu, Senegal mapu mu. Kidu tañi trokiñ mapu mew, tati pu che illamkakefi kiñe trokiñche, fey tüfachi domo ka femngechi illamkafi engün. Welu tüfachi domo eluwi ñi duamtucheal. Kidu feypi: “Pefiel ñi fente kutrankawmeken feyti trokiñche, rakiduamün: ‘¿Chum duamküleafulu iñche femngechi rupafuli?’. Tüfa kimeltuenew tañi doy kümelu trokiwnoal ta kakelu mew” pi tati domo. Feymu llemay, eluwliyiñ taiñ küme kimafiel ñi rupameken tati pu che, duamtuafiyiñ ka küme trokituafiyiñ.

Rakiduamnge kiñe trokiñche tami weda trokifiel. Fey fewla rakiduamnge chem dungu mu tami trürkülen kidu engün mu. Ramtuwnge:

• “Mülen mu tañi familia engün, ¿chum duamkeyngün?”.

• “Fütra küdawlu engün, ¿chum duamkeyngün?”.

• “Küme rupalu tañi weni engün, ¿chum duamkeyngün?”.

• “Allkütun mu engün ñi musica, ¿chum duamkeyngün?”.

Fewla eymi ramtuwnge:

• “Illamkangeli, ¿chum duamküleafun?”.

• “Kiñe che weda rakiduamle iñche mu petu tañi kimnoetew rume, ¿chum duamküleafun iñche?”.

• “Koneltulefuli feychi trokiñche mu, ¿ayüpeafun may tañi weda trokingeal?”.