“Iñchiñ apümafuiñ com huesaque dungu, fei com pu che cüme feletuai” piquei quiñeque che. Eimi cai, ¿ca femngechi raquiduamqueimi? Com huesaque dungu ñi rupamequen Mapu mu, trürümfalngeafui ta quiñe che cutrancülelu. Re lahuentungequelai ñi pichi cümeletual müten, doi mai lahuentungequei ñi cutranhuenoal.

Taiñ cüme adümafiel tüfa, ngüneduamaiñ ñi rupan quiñe huentru Tom pingelu. Quisu cutrani, fei lai. ¿Chumngelu? Quiñe doctor feipi: “Hue cutrancülelu Tom, inei no rume ngüneduamlai chumngelu ñi cutrancülen” pi. Felei, Tom re lahuentungefui ñi pichi cümeletual müten.

Pu che, ¿ca femngechi fempelai ñi apümafiel huesaque dungu Mapu mu? Raquiduamnge tüfa: pu gobierno hulquei fillque ley, pepicafi pu soltau ca com püle tucui camara ñi peafiel pu huesalcamequelu. Com tüfa cuñiutucuquefi pu che, huelu apümquelafi huesaque dungu. ¿Chumngelu? Pu che tañi piuque mu niei huesaque dungu müten, feimu amulei tañi huesalcamequen.

Ngüneduamnge ñi rupan ta Daniel, quiñe huentru Sudamérica mapu mu mülelu. Cheu ñi mülen quisu doi pofrelerpuquei pu che, fei feipi: “Cüme felefuiñ cuifi. Inei no rume llicalafui ñi saltiangeal. Huelu fantepu fill püle pütrülei pu huesalcamequelu. Fente ñi doyelcülen ti dungu, fentren che diñmatuquei caquelu che tañi nieel, ca yamniequelafi pu che ñi mongen ca tañi ngen-ngeel”.

Tüfa ñi rupan quiñe huentru Oriente Medio mapu mu mülefulu. Ñi mapu mu mülefui caiñetuhun, feimu lefmahui cañpüle. Fei hula chillcatui ta Biblia. Fei feipi: “Cheu ñi cüpan iñche, com pu familia, tati gobierno ca tati pu religioso feipifingün pu huechequeche: ‘Hueichafengelmün, falin che pingeaimün’. ¡Taiñ pu caiñe ca femngechi feipingei! Feimu falilai maneluhual pu gobierno mu pin”.

Biblia feipi:

• ‘Pichichengei müten ta huentru niequei huesa raquiduam’ (Génesis 8:21).

• “Tati piuque doi ngünencachefengei chem dungu mu rume, ca ngünefalngelai. ¿Inei am rüf quimnieafeyu?” (Jeremías 17:9).

• “Piuque mu tripaquei huesaque raquiduam, langümuhun, ñihualuhun, pod cudumuhun, hueñen, dalluntucun dungu” (Mateo 15:19).

Pu che pepi ngünenielai huesaque dungu tañi piuque ca tañi raquiduam mu, fei huesalcaquefi ta caquelu. Doi mai feichi huesaque dungu mülelu pu che tañi piuque meu doyelürpuquei, feimu mülei fentren huesaque dungu Mapu mu (2 Timoteo 3:1-5). Fantepu mu fentren quimün niei pu che, ca fillque chemcün mu doi nütramcauquei. Huelu, ¿chumngelu fente cüdaungei apümafiel huesaque dungu? Pu che, ¿cüme elcünutuafui ti dungu Mapu mu? ¿Cüme felepetuafuiñ mai?

Itrocom pu che eluufule cai ñi cüme chengeal, ¿cüme felepeafuiñ mai Mapu mu? Iñchiñ taiñ chengen mu femlayafuiñ llemai. ¿Chumngelu?

Biblia feipi: “Tati pu che [...] ngen-ngelai ñi adcünual quisu tañi trecan no rume engün” (Jeremías 10:23). Felei llemai, ngen-ngelaiñ taiñ  ngünenieafiel caquelu pu che. Raquiduamnge tüfa: iñchiñ deumangelaiñ taiñ mongeleal lafquen mu, pu challhua reque. Ca femngechi deumangelaiñ taiñ ngünenieafiel ta caquelu che.

Inaduamnge tüfa: ¿ayüquepei mai pu che ñi feipingeal chumngechi yenieal tañi mongen? Quiñe che feipingelu: “Felei ñi ancanentupüñeñal pu domo”, cam “famngechi norümafimi tami pu pichiqueche”. ¿Ayüquepei mai pu che ñi femngechi feipingeal? ¡Femlai tati! Caquerumei ñi raquiduam pu che fillque dungu mu. Femngechi quimfali ñi rüfngen Biblia ñi feipin, iñchiñ ngen-ngelaiñ taiñ ngünenieafiel ta caquelu pu che. Fei, ¿inei quelluafeiñmu?

Chau Ngünechen quelluafeiñmu llemai. Ngünechen duamtuchequelai piquei quiñeque che. Huelu femlai. Quisu deumaeiñmu, feimu duamnieiñmu tati. Fei hulquei cümeque ngülam Biblia meu. Adümliyiñ ñi chem pilen Biblia, doi cüme quimaiñ taiñ chumnoafel, ca adümaiñ chumngelu fente huesalcai pu che cuifi mu. Quiñe quim huentru Alemania mapu mu tuulu feipi: “Pu che ca pu gobierno chem no rume quimürpuquelai pu cuifique che ñi huesa femün meu, feimu cüme elcünutulaingün tañi mongen”. ¿Rüfngei no am tañi feipin?

Jesús feipi: “Ñi femün nor dungu quiñe che, quimfali tañi quimchengen” (Lucas 7:35). Pu quimchengelu inaniequei ñi feipiel Isaías 2:22: “Fentecünuunge tami maneluuquen pu che meu, femngechi cümelcaleaimi”. Feimu inanieliyiñ feichi ngülam, maneluulayaiñ pu che tañi cüme elcünutual ti dungu Mapu mu. Tüfa ñi rupan quiñe huentru Norteamérica mapu mu mülelu. Tañi huaria mu mülei caiñetuhun, fei feipi: “Fentren politico ayüquei ñi norümal ti dungu, huelu mupiquelai ñi feipicünuel. Müna huesa tripai ñi femquen pu politico, tüfa pengeli ñi rüfngen Biblia ñi quimün” pi tati huentru.

Deu ngüneduampeiñ ñi rupan ta Daniel, quisu ca feipi: “Fill antü, ‘pu che ngen-ngelai ñi ngünenieafiel ta caquelu’ piquen tañi raquiduam mu. Pu che maneluuquei ñi cüdau mu ca ngülümquei plata banco mu, femquei com tüfa ñi cüme feleal deu füchale cam cushele. Huelu refalta maneluuquei, fei huesa duamcülei tati” pi Daniel.

Biblia quelluqueiñmu taiñ maneluunoal coilaque dungu mu. Cafei eluqueiñmu maneluhun. Ngüneduamaiñ tüfa.