Tati troquiñche Naciones Unidas pingelu yafültucuquefi itrocom pu che ñi hueluconque quelluhual, yamniehual ca ñi huesalcanoafiel ti Mapu. ¿Chumngelu? Quiñe huentru cüdauquelu Naciones Unidas mu, feipi: “Fente huesalcangei ta Mapu, mülei alün troquiñche huesalcachequelu, mülei illamcahun, hueichan (aucan), fentren che lefmauquei ñi mapu mu, mülei troquiñche llicalcachequelu ca mülei tul cutran. Com tüfa ruparupangei huall Mapu mu”.

Caquelu che huldunguquei ñi müleal quiñe gobierno müten com Mapu meu. Epu cuifi huentru femngechi raquiduamquefuingu, ti quim huentru Italia mapu tuulu, Dante pingei, cafei tati cientifico Albert Einstein pingei. Dante feipiquefui com pu troquiñ mapu quiñeucülele, müleafui cüme felen Mapu mu. Dante femngechi pengelcünui ñi feipin ta Jesús: “Chem gobierno rume quiñeucülenole, huesa tripayai” (Lucas 11:17).

Ti Segunda Guerra Mundial mu, fentren che lai epu bomba atomica mu. Rupalu tüfa, Albert Einstein huirintuculelfi quiñe carta tati troquiñche Asamblea General de las Naciones Unidas. Quisu feipi: “Tati troquiñche Naciones Unidas pürüm cüme elcünutupe ti dungu Mapu mu, femngechi quiñe gobierno müten mülele, com pu che cüme feleai”.

Huelu pu ngüneniealu feichi fütra gobierno mu, ¿re nor dungu fempeafui mai? ¿Cüme elcünupetuafui mai ti dungu Mapu mu? Cam, ¿inayentuafuingün müten caquelu che ngünenielu? Tüfachi ramtun raquiduameleiñmu ñi feipin quiñe quim huentru lord Acton pingelu, “pu che doi autoridad niele, doi huesaque chengetuquei” pi.

Feimu duamfalngei com pu che ñi quiñeucüleal, fei tañi rüf cüme feleal. Huelu, ¿chumafuiñ taiñ diturpual tüfa? ¿Maneluhuafuiñ ñi femngeal? ¡Femafuiñ llemai! Biblia feipi com pu che quiñeucüleai ca cüme feleai. ¿Chumngechi femai tüfa? Pu che tañi gobierno ñi duam mu no, huelu mai Chau Dios ñi gobierno ñi duam mu llemai. Quisu am deumafilu itrofill mülelu, felei ñi ngünenieafiel Mapu. Feimu ti Biblia feipi “Chau Dios ñi ngünenietual ta mapu”, Ngünechen ñi Gobierno ca pingequei (Lucas 4:43).

Jesús raquiduampelai feichi Gobierno mu quimeltufilu tañi pu discipulo ñi llellipual: “Cüpape tami ngünenietual mapu. Chumngechi ñi femngequen tami ayüqueel huenu meu, ca femngechi femngepe mapu mu” (Mateo 6:9, 10). Felei, feichi Gobierno mu pu huesañmangelu tañi ayünieel femngehuelayai, doi mai Chau Dios tañi ayünieel femngeai.

Biblia ca feipi Chau Dios ‘huenu mu ngünenietuai ta mapu’ (Mateo 5:3, nota). ¿Chumngelu? Feichi Gobierno mülei ta huenu mu, huelu ngünenieafi pu che mülelu Mapu mu. ¡Müna cüme dungu ta tüfa! Feichi Gobierno duamnielayai chem plata no rume, fei impuesto cullihuelayaiñ rume.

¿Chumngechi adcünungei tüfachi Gobierno? Chau Dios elfalcünufi ta Jesús ñi ngünenieal. Tüfa ñi feipiel Biblia Jesús mu:

• “Elfalcünungei lonco ülmencüleal. [...] Alün-ngequetuai tañi gobierno ca aflayai tañi cüme felen” (Isaías 9:6, 7).

•   “Quisu elungei ñi ngünenieal, püramyengeal ca lonco ülmen-ngeal, femngechi ñi serfiaeteu com pu che, chem tuhun-ngele rume ca chem quehun dungule rume. Tañi ngünenien turpu aflayai” (Daniel 7:14).

• “Taiñ Chau Ngünechen ca tañi Cristo deu ngüneniemequei tati pu che mapu meu mülelu” (Apocalipsis 11:15).

Fei, chumngechi ñi quimeltuel Jesús feichi llellipun mu, tüfachi Gobierno femai Chau Ngünechen ñi ayünieel Mapu meu. Feichi mu com pu che quimelelngeai chumngechi cuidayafiel ti Mapu ñi cümeletual.

Doi mai, tüfachi Gobierno quimeltuafi itrocom che Chau Dios ñi ngülam. Tati pu che huichuque püntüulayai ca caiñetuulayai. Cafei Biblia feipi: “Huesalcalayaingün, ca chem huesa dungu no rume femlayaingün [...]; rüfcünu llemai, tati Mapu apoleai Jehová ñi quimün meu chumngechi tati co tacuquei ti lafquen” (Isaías 11:9).

Feichi mu itrocom pu che quiñeucüleai ca cüme feleai Mapu mu, tüfa ñi femquenon tati troquiñche Naciones Unidas. Felei llemai, itrocom pu che “rüf ayüucüleaingün ñi mülen fentren tüngün” (Salmo 37:11). Amulechi antü mu, inei no rume acordalayai ñi mülequefel langümchen, hueichan ca filla, cafei inei no rume “huesalcalei taiñ Mapu” pihuelayai. Huelu tüfa, ¿chumül rupayalu? Chau Dios ñi Gobierno, ¿chumül ngünenieafi Mapu? ¿Chumngechi femai tüfa? ¿Chumafuiñ taiñ cümelcayaeteu? Feula inaduamaiñ.