Tami raquiduam, tami feyentun ca tami huimtun, com tüfa quelluaimu tami femngechi chengeal.

Cüme quimuhulmi ineingen ta eimi, eluucülelayaimi caquelu hueche tami ngünencayaeteu.

Adrian feipi: “Quiñeque che quiñe maniqui reque feleingün. Quisutu dulliquelaingün rume chem ñi tucutuhual”.

Courtney feipi: “Quimürpun ñi incañpeafiel ti cümeque dungu cüdaungefule rume. Tañi hueni cüme femle ca yamniefile tañi feyentun, fei quimnien ñi rüf cüme hueningen”.

BIBLIA ÑI NGÜLAM: “Inayentuhuelayafimün fantepu meu mülechi pu che. Doi mai huecünutumün tamün raquiduam” (Romanos 12:2).

Tami quimuhual ineingeimi feula ca chem che tami ngerpual cüpalechi antü mu, ngüneduamuunge tami cümeque huimtun, chem tami cüdautuqueel tami femal ca tami feyentuqueel. Inaduamnge tüfachi ramtun.

Tami cümeque huimtun: “¿Chem quimün ca adümuhun nien? ¿Chem am tañi cüme femquen? ¿Cüme ngünenieuquen? ¿Temprano puuquen cheu tañi puhuafel? ¿Cüdaufe chengen? ¿Cüme piuquengen?”.

QUIÑE NGÜLAM: Cüdautulmi tami ngüneduamuhual tami cümeque huimtun, quelluen pifinge tami chau, ñuque cam quiñe cüme hueni.

BIBLIA ÑI NGÜLAM: “Caque quiñeque che ngüneduamuupe quisu tañi femün. Fei ayühuai quisu tañi dungu mu, trürümuulayai caquelu che engu” (Gálatas 6:4).

Chem tami cüdautuqueel: “¿Chuchi dungu meu doi cüme femtuafun? ¿Chem dungu meu cüdautuquen ñi nor chengeal? ¿Chem dungu meu doi mülefui ñi quim ngünehual?”.

BIBLIA ÑI NGÜLAM: “‘Iñchiñ culpaquelaiñ’ feipiliyiñ, quisu ngünencaumequeiñ” (1 Juan 1:8).

Tami feyentuqueel: “Tañi mongen mu, ¿chem quimeltun inaquen? ¿Chumngelu? ¿Feyentuquen Dios meu? ¿Chumngelu feyentuquen Dios ñi mülen? ¿Chem dungu norngenolu troquiquefiñ? ¿Chumngelu? ¿Chem raquiduamquen ti cüpalechi antü mu?”.

BIBLIA ÑI NGÜLAM: “Adümngechi raquiduam cuñiutucunieaimu, ca quim ngüneduamün montulnieaimu” (Proverbios 2:11).