Pu chau, pu ñuque mülei ñi femal tañi quimeltun, femngechi ñi inayentufalngeal. Ti chau quintumengele ruca mu, feipiafui chi tañi fotüm “ngelai ñi chau” piafiel, huelu ti chau ellcaucülei ruca mu. Fei hula tati chau “coilatuquelayaimi” pilayafui tañi fotüm, tati chau hune coilatui.

David feipi: “Pu chau feipiafui tañi pu yall: ‘Femnge iñche tañi feipin’ piafui. Huelu ca dungu femtule hula pu chau, feyentulayafeyu tañi yall. Pu pichiqueche esponja reque felei, ngüneduamniequei com tañi peel ca tañi allcütun. Quimeltufiliyiñ quiñe dungu, huelu ca dungu femliyiñ, pürüm ngüneduamaiñmu, fei ramtuaiñmu chumngelu taiñ femün”.

BIBLIA ÑI NGÜLAM: “‘Hueñelayaimi’ piqueimi, huelu ¿hueñequeimi?” (Romanos 2:21).

Pu pichiqueche ca huechequeche hualloñmaeliyu rume fentren che, doi inayentuquefi ñi chumquen tañi chau ca ñuque. Feimu pu chau, pu ñuque hunelei ñi quimeltuafiel tañi pu pichiqueche ñi amuleal ti cüme rüpü mu. Huelu inayentufalngepe ñi femün engu.

Nicole feipi: “Quiñeque mu allcütunienoeteu troquiafuiñ taiñ pu püñeñ, huelu peniequeiñmu chem chumal. Feimu femnoliyiñ taiñ feipiquen, pürüm müten feipiafeiñmu eimi femimi tüfa, eimi femlayaimi piqueen”.

BIBLIA ÑI NGÜLAM: “Tati nielu huenu mu cüpachi quimün [...] cüme piuque femfaluuquelai” (Santiago 3:17).

Ngüneduamuunge. Ramtuhuafuimi: “¿Chumngechi dunguquefiñ tañi afcadi ca tañi pu pichiqueche? ¿Chem am ta pequen ta television mu? ¿Chumngei tañi pu hueni? ¿Duamtuquefiñ caquelu che? ¿Ayüafun tañi pu yall, tañi pu püñeñ iñche femngealu?”.

Christine feipi: “Iñchiu tayu curehuen feipiquelafiyu tayu pu püñeñ ñi femal iñchiu tayu femquenoel”.

Perdonaen piaimi. Pu pichiqueche quimnieingün ñi culpafe chengen tañi pu chau. Feimu huelulcalmi, perdonaen piafimi tami afcadi ca tami pu pichiqueche, femngechi quimeltuafimi tami pu pichiqueche ñi nor chengeal ca ñi ñom piuquengeal.

Robin feipi: “Huelulcauliyiñ, mülei taiñ entudungual, ca perdonaen piafuiñ. Iñchiñ femnoliyiñ, taiñ pu püñeñ ca femlayaingün”.