Quiñeque che estudiaquei ñi rupan pu layeluulu, huelu caquerumei ñi rupan engün. Feimu, ¿feipiafuiñ ñi pichi hueñancülen müten quiñeque che cam ñi ellcacünuquen ñi mülen tañi piuque mu? Femlai. Cümelcayafeyu quiñe che ñi feipial tañi hueñancülen, huelu caquelu dungu ca quelluafeyu. ¿Chumngelu (chemu)? Caquerumei pu che ñi huimtun, tañi chumngechi chengen, tañi rupan ca chumngechi ñi lan tañi piuqueyenieelchi che.

Pu perdefilu quiñe tañi pu che quimlayafui chem tañi rupayal ca chumngechi ñi duamcüleal. Huelu epe com pu che rupaquei tüfachi dungu. Ngüneduamafiyiñ:

Calerumequei ñi chum duamcülen. Pu layeluulu ngümaquei, hueñancütuquefi ti che lalu ca hueñancürumequei. Doyelchi mai, acordaquefilu ti che cam peumayefilu. Ellaca mu huitralehueafui ti che, rüfngelai tati piafui chi. Quiñe domo Tina pingelu nütramcai ñi chum duamcülen larumelu tañi füta: “Ellaca mu, quimlafun chem chumal. Pepi ngümalafun rume. Fente tañi hueñancülen pepi neyülafun. Pepi loncontuculafun chem tañi rupamequen”.

Fill raquiduamcülei, illculei ca culpantucuuquei. Quiñe huentru Iván pingelu feipi: “Tañi fotüm Eric lai nielu 24 tripantu. Tañi domo Yolanda iñchiu rume illculequefuyu. Turpu raquiduamquelafuyu tayu illcuchefengen, feimu afmatulehueyu. Culpantucuuquefuyu, fei ramtuuquefuyu ‘¿pepi quelluafuyu mai ta Eric?’ piquefuyu”. Alejandro fentreñma cutrancülei tañi domo, fei larpui. Quisu ca culpantucuuquefui. Feipi: “Ellaca mu, raquiduamün ñi huesa chengen iñche. Feimu Chau Dios cutrancaqueneu piquefun. Huelu culpantucufiñ reque ta Chau Dios tañi rupamequen, feimu huesa duamün”. Cafei ti huentru Kostas pingelu taiñ nütramcael hunen troquiñ mu, feipi: “Quiñeque mu illcutuquefun ta Sofía tañi lan mu, fei hula hueñancüquefun tañi femngechi duamcülen. Sofía culpalai tañi lan mu”.

Cüdaungei ñi cüme raquiduamal. Quiñeque mu pu layeluulu ñi raquiduam calerumetuquei cam cangechilei. Raquiduamafui ñi allcütufiel, pefiel cam uhuamtufiel ti che lalu. Cafei ti layeluulu cañpüle miyahuafui ñi raquiduam. Tina feipi: “Quiñeque mu petu nütramcamequelu quiñe che iñchiu, tañi raquiduam cañpüle mülerquefui. Raquiduamtucuniefun com ñi rupan lalu tañi füta. Pepi cüme raquiduamlafun, feimu hueñancülequefun”.

Re ayüniei ñi quisuleal. Ti layeluulu quiñeque mu cüme duamcülequelai caquelu che engu. Kostas feipi: “Ayülafun ñi müleal tati pu curehuen engün, huelu ca ayülafun ñi müleal pu nienolu afcadi engün”. Yolanda, Iván tañi domo, feipi: “Caquelu che ñi huesa dungu trürümfal-lai iñchiu tayu rupan mu, feimu cüdautuquen ñi allcütufiel tañi feipin engün. Caquelu che nütramcaleyumu fente ñi cümelcalen tañi püñeñ engün. Ayühun fei engün meu, huelu ca hueñancülquefeneu tañi feipin. Amulecai ti mongen piquefuyu, huelu rüfcünu afeluucülefuyu tayu rupamequen tüfachi dungu mu”.

Tremolelai. Fentren che layeluulu ngüñüquelai, motriquei, trongliquei cam pepi umauquelai. Aarón nütramcai ñi rupan quiñe tripantu deu lalu tañi chau: “Pepi umauquelafun, treperumequefun, raquiduamquefun tañi chau ñi lan mu. Fillque pun feichi hora mu femngechi rupaquefun”.

 Alejandro feipi ñi cutranrumequen, huelu quimngelafui chumngelu. Fei feipi: “Amuquefun doctor mu tañi ngüneduamaeteu, tremolecaimi piquefeneu. Fei raquiduamün tañi cutrancülen ñi layeluhun mu”. Rupalu ta antü Alejandro cutranhuelai, huelu cümecünui ñi pemefiel ti doctor. Ti layeluulu ñi cuerpo yafüngehuequelai, feimu doyelafui tañi nieelchi cutran cam cutranrumeafui.

Cüdautuquei ñi femal duamfalchi dungu. Iván feipi: “Lalu Eric, mülefui taiñ feipiafiel quisu ñi pu hueni, pu familia, tañi jefe ca tati huentru tañi arrendaleteu ñi ruca. Duamfalngefui ñi femal fentren tramites. Cafei mülefui ñi raquiduamal taiñ chumafiel Eric ñi chemcün. Duamfalngefui taiñ cüme raquiduam nieal, huelu cansalefuiñ, yafüngehuelafuiñ ca nehuencülelafuiñ”.

Caquelu che doi cüdautuquei ñi femal quiñeque dungu ñi femquefel tati che lalu. Femngechi rupai Tina. Fei feipi: “Tañi füta yem adniequefui taiñ cuenta banco mu ca caquelu dungu nüucülelu plata mu. Huelu feula iñche mülefui ñi femal. Tüfa doi fill raquiduameleneu. ¿Pepi femafun chi? piquefun”.

Chumngechi ngüneduampeiñ, fill cüdaungechi dungu mu rupaquei pu layeluulu. Feimu turpu cümelcaletulayan piafui quiñeque che. Felei, rume cutrantupiuqueafui pu layeluulu. Huelu quimfiel chem dungu ñi rupayafel, quelluafeyu engün. Com che rupaquelai com tüfachi dungu mu. Cafei pu layeluulu yafüluhuafui chi quimlu ñi huesalcanon chumngechi tañi duamcülen.

¿Chem rupayafuimi? Puhuai ti antü tami fente hueñancülehuenoal. Ñochiquechi cümelcaletuaimi. Huelu, ¿turpu hueñancülehuetulayaimi cam acordahuelayafimi tami piuqueyen che lalu? ¡Felelai! Ñochiquechi aftuai tami hueñancün. Huelu acordarumelmi tami che lalu cam puule quiñe saquin antü, hueñancüafuimi. Fentren layeluulu rupalu ta antü, cüme duamcülequetui, fei pepi huiño femtuquei tañi nieelchi duam. Tami femal tüfa, rume quelluafeimu tami familia cam tami pu hueni. Ca mülei tami yafüluhual.

¿Tunteñmayai tami hueñancün? Quiñeque che ñoquiquechi hueñancülehuelai rupalu quiñeque cüyen. Doi fentren che cüme duamtuquei rupalu quiñe cam epu tripantu. Caquelu che doi alüñmaquei ñi hueñancün. a Alejandro feipi: “Iñche cüla tripantu rume cutrantupiuquelefun”.

Ñom piuquengeaimi. Raquiduamaimi tami chumal quisuque antü mu müten ca matucauquelayaimi tami cüme duamtual. Loncontucunieaimi: puhuai ti antü, fei cutrantupiuquelelayaimi. Huelu, ¿chumafuimi tami cüme duamtual fei tami alüñma hueñancülenoal? Peafiyiñ.