Pu peñi Betel mu mülelu doi quiñe tripantu mu nehuentu cüdahuingün ñi deumayafiel ti estacion de radio WBBR pingelu, tüfa deumangei Nueva York huaria mu. Hune pepicafingün mapu, liftufingün, fei hula deumaingün quiñe fütra ruca ñi müleam pu cüdahualu ca quiñe pichi ruca cheu ñi elngeal tati equipo. Aflu ti cüdau, pu peñi eluhuingün trapümal com ñi duamnieel engün ñi amuldungual radio mu. Huelu chaftuafuingün engün fentren dungu.

Pu peñi rume cüdautuingün ñi anümafiel tati antena, tüfa medi 91 metro ca mülefui ñi anümngeal rangi epu orcon mamüll medilu 61 metro. Ellaca mu, pepi femlafuingün, huelu Jehová ñi quellun mu cüme tripai chi cüdau. Ti peñi Calvin Prosser, cüdauquefulu feichi mu, feipi: “Ellaca mu cüme tripafemfule ti cüdau, quisutu saquihuafuiñ” pi taiñ peñi. Huelu pu peñi femlaingün, doi mai püramyefingün Jehová tañi quellueteu mu, huelu ca chaftuingün cangelu cüdaungechi dungu.

Dungual radio mu rume huengefui ca cüdaungefui ñi ngillangeal ti duamnieelchi equipo. Femfulu rume, pülle püle pu peñi peingün pu equipo quiñe che ñi deumael ca ngillalaingün quiñe microfono, doi mai pünefingün quiñe telefono ñi microfono. Quiñe pun febrero mu, pu peñi ayüfuingün ñi probayafiel tati equipo. Duamniefuingün chem ñi feipial radio mu, feimu eluhuingün ñi ülcantual. Quiñe tati peñi, Ernest Lowe pingelu, acordai quiñe ayüfalchi dungu ñi rupan feichi antü, petu ülcantumequelu engün, mütrümeyu tati juez Rutherford. b Radio mu allcütulefui,  fei mülefui Brooklyn huaria mu, 25 kilometro camapulefui.

Ti peñi Rutherford feipieyu engün: “Fentecünumün, huaqueñcüleimün quechan ñarqui reque”. Pu peñi yehueingün, fei pürümquechi chongümfingün ti equipo. Huelu quimtucuingün ñi cüme tripan tati equipo, feimu pepicaucülefuingün ñi püneafiel ti radio.

Feichi 24 conchi febrero 1924 mu, tati hunen rupa ñi amuldungun pu peñi radio mu. Feichi antü mu, ti peñi Rutherford feipi ti estacion de radio quelluaiñmu ñi femürpual Jesús taiñ elfalcünueteuchi cüdau. Ca quelluafi com che tañi ngüneduamal ta Biblia ca ñi quimtucual chem antü mu taiñ mülen.

Feiti ti hunen amuldungun radio mu masiao cüme tripai, Jehová ñi troquiñche 33 tripantu mu amuldungui tüfachi radio mu.

Julio 1924 mu, pu Chillcatuquelu Biblia nierpuingün ti fütra trahun Columbus huaria mu, fillque troquiñ mapu mu cüpai pu Chillcatuquelu Biblia. Allcütupaingün hueupin caque quehun dungun mu, arabe, gringo dungun, frances, aleman, griego, hungaro, italiano, lituano, polaco, ruso, fillque escandinavo quehun ca ucraniano. Quiñeque che allcütuingün quiñeque hueupin radio mu. Cafei pu peñi pedifingün quiñe diario ñi huirintucual caque antü chem ñi feipingen ti fütra trahun mu.

Jueves 24 conchi julio mu, doi quechu mil peñi ca lamngen amuldunguingün huaria mu, cheu ñi femmequen engün ti fütra trahun. Hulingün epe 30 mil lifru ca patacaque che eluhui ñi chillcatual Biblia. Ti revista The Watch Tower feipi feichi antü “ti doi ayühun-ngechi antüngei”.

Viernes 25 conchi julio mu, quiñe hueupin ñi hulel peñi Rutherford papeltui quiñe papel quimfalcünulu ñi huesa femün pu loncolechi religioso. Feipi pu politico, pu religioso ca pu empresario “catrütuquefingün pu che ñi quimal Chau Dios ñi ngünenietual ta mapu ca ñi cümelcayafiel tati pu che”. Quisu ca feipi ñi huesa femün tüfachi pu huentru, fei engün “quelluntuquefingün ti Sociedad de Naciones” ca feipingün tüfachi troquiñche mu Chau Dios ngüneniequefi tati mapu. Pu Chillcatuquelu Biblia duamniefuingün ñi nehuen piuquecünuhual tañi amuldungucheal feichi huercün dungu.

Quiñe troquiñ The Watch Tower mu feipi: “Tüfachi fütra trahun yafültucuñmafi ñi feyentun  pu peñi ca pu lamngen ca quellufi engün ñi nehuen piuquecünuhual tañi amuldungual catrütungefulu rume engün”. Quiñe peñi amulu ti fütra trahun mu, Leo Claus pingelu, feipi: “Deu rupalu ti fütra trahun, eluucüleiñ taiñ yeal tüfachi huercün dungu com taiñ lof mu”.

Octubre mu pu Chillcatuquelu Biblia eluhuingün ñi hulal ti tratado gringo dungun Ecclesiastics Indicted (Eclesiásticos denunciados), tüfa mu huiringefui ñi feipin ti peñi Rutherford. Quiñe pichi huaria mu Oklahoma mapu meu, ti peñi Frank Johnson fentepui ñi hulal ti tratado cheu ñi huercüngen ñi amuldungual, huelu petu mülefui ñi esperayal 20 minuto ñi yengerpayal. Feiti mu mülefui quiñeque che ñi illcutueteu tañi amuldungun mu, feimu ti peñi mülefui ñi ellcaucüleal, feimu conpui quiñe püllelechi iglesia mu. Ti iglesia huellilei, ngelai che, feimu elcünui tratado caque huancu mu ca ti pastor ñi Biblia mu. Pürümquechi tripai ti iglesia mu. Petu nielu tiempo cai, rumei ca epu iglesia mu tañi ca elcünual tratado.

Ti peñi Frank matu huiñoi cheu ñi yerpayaeteu pu peñi ca pu lamngen. Petu ñi acunon engün, ellcahui quiñe bencinera mu, llihuatuniefi feichi pu che ñi illcutunieteu. Fei engün rupaingün auto mu, huelu ti peñi Frank pengelai. Deu amutulu feichi pu che, acui pu peñi ca pu lamngen ca yepatufingün taiñ peñi.

Quiñe tati pu peñi feipi: “Tripatualu ti pichi huaria mu rupaiñ ti cüla iglesia püle, huecuntu caque cüla iglesia mu mülefuingün epe 50 che, quiñeque papeltumequefingün ti tratado, caquelu pengelelfingün tati pastor. Yochi tripaiñ mañumfiyiñ Jehová taiñ quellueteu mu taiñ amuldungual ca taiñ huesalcangenoal”.

Caquelu troquiñ mapu meu pu Chillcatuquelu Biblia ca nehuen piuquecünuhuingün tañi amuldungual. Francia norte mu, ti peñi Józef Krett amuldungulelfi pu minero cüpalu Polonia mapu mu. Pepicai ñi hulal quiñe hueupin feipialu “Pichiñma mu pu layelu huiñomongetuai”. Pu peñi ca pu lamngen mangelfilu pu che ñi amual ti trahun mu, ti sacerdote mülelu feichi huaria mu feipifi tati pu che ñi amunoal. Huelu feyentungelai ñi feipin, doi quechu mil che amui, ti sacerdote cütu. Ti peñi Krett feipifi tati sacerdote ñi incañpehual ñi feyentuqueel, huelu pilai. Fentepuulu ñi hueupin, ti peñi Krett eluyefi pu che com tañi publicacion ñi nieel, ngüneduamfi pu che ñi ayünieel ñi doi quimafiel tati Biblia (Amós 8:11).

África mu ti peñi Claude Brown amui ñi amuldungual Costa de Oro mu, feula Ghana pingequei feichi mapu. Ti peñi huli fentrenque hueupin ca huli publicacion, femngechi alün che quimürpufi ti rüf dungu. Quiñe huentru allcütulu John Blankson pingequefui, petu chillcatuquefui ñi cüdahual farmacia mu, fei pürümquechi ngüneduami ñi pefiel ti rüf dungu. John feipi: “Ti rüf dungu rume ayühuleneu ca quimelelfiñ ti rüf dungu fentren che cheu ñi chillcatulen”.

John papeltulu ta Biblia, quimi ti Trinidad pingechi quimeltun rüf dungu no. Fei hula, quiñe antü amui quiñe iglesia mu ñi ramtuafiel tati sacerdote. Ti sacerdote illcui, huirareleyu, feipieyu: “Eimi ta cristianongelaimi, Huecüfü mu tuhuimi, tripange tüfa meu”.

John puutulu tañi ruca mu, huirilelfi quiñe carta tati sacerdote, feipifi ñi incayafiel ti Trinidad caquelu che ñi adquiñ meu. Feimu ti sacerdote huercüfi ta John ñi amual cheu ñi chillcatuquen ñi nütramcayafiel tañi profesor. Ti profesor ramtueyu ñi rüfngen tañi huirilelfiel tati sacerdote.

 “Femün llemai, ñidol” feipi ta John.

Ti profesor feipifi ta John ñi huirilelafiel ti sacerdote ñi perdonayaeteu. Feimu John huirifemi:

“Ñidol, perdonaen piafimi ti sacerdote pieneu tañi profesor. Iñche perdonaen piayu, eimi feipilmi tami quimeltumequen coilaque dungu”.

Ti profesor afmatulehuei ca feipieyu: “John, ¿feichi dungu huirilelafimi?”.

“Mai, ñidol. Fei müten huiriafun” pi ta John.

“Huemünentungeaimi ti escuela mu, ti gobierno quelluntucuquefi tüfachi sacerdote ñi religion. Eimi femngechi chaftudunguniefilmi, mülenaglayaimi ti escuela mu” feipieyu ti profesor.

John feipi: “Profesor, quiñeque mu iñchiñ entendenoliyiñ chem tami quimeltuquen, iñchiñ ramtuafuiñ ta eimi, ¿felelai no am chi?”.

“Mai, femqueimün llemai” pieyu ti profesor.

John feipi: “Ca femngechi rupai, profesor. Ti sacerdote quimeltumequelu Biblia mu, iñche ramtufiñ, huelu quisu huiñoldungulaeneu, feimu ¿chumngelu huirilelafuiñ tañi perdonayaeteu?”.

John huemünentungelai ca huercülafi ti carta.

Epe afchi 1924 tripantu mu, ti revista The Watch Tower feipi: “Maneluhun mu feipiafuiñ David reque: ‘Eimi eluaen nehuen tañi hueichayal’ (Salmo 18:39). Tüfachi tripantu rume cüme tripai chi cüdau Jehová tañi quellun mu. Jehová tañi pu poyequeteu ayühunquechi amuldunguingün ti cümeque dungu”.

Afchi tripantu mu, pu peñi ca eluhui ñi entual cangelu estacion de radio. Tüfa deumangei Chicago huaria mu, Estados Unidos mapu mu. Tüfachi radio WORD pingei, mapudungun mu cüpa feipi DUNGUN. Tüfachi radio mu amuldunguingün Chau Dios ñi dungun, feimu tuculelngei feichi üi. Feula pünefingün doi cümechi equipo, femngechi doi alün camapulechi pu che allcütuafuingün Chau Dios ñi dungun, Canadá mu mülechi pu che cütu.

Feichi 1925 tripantu mu, Jehová quellufi tañi troquiñche ñi doi cüme adümafiel ñi feipin Apocalipsis capitulo 12. Quiñeque cüme lloulafingün, fentecünuingün ñi cüdahuelafiel Jehová, huelu fentren caquelu cüme lloufingün ti dungu, ¿chumngelu? Doi cüme adümfingün chem ñi rupan huenu mu, tüfachi dungu rume falin-ngefui Jehová ñi pu che mu mapu meu.