1. ¿Chem dungu femi Jesús com iñchiñ mu?

 NGELAI quiñe che no rume fente quellulu Jesús reque. Mülepalu mapu mu, Jesús femi afmatufalchi dungu tañi quelluafiel fentren che (Luc. 9:12-17). Ca huli tañi mongen iñchiñ mu, tüfa tati doi falin regalo taiñ elueteu (Juan 15:13). Huiñomongetulu, amulei taiñ quelluqueteu. Jesús llellipufi Jehová fei tañi nehuen mu taiñ quimeltuaeteu ca yafültucuaeteu (Juan 14:16, 17, nota; 16:13). Taiñ trahun mu Jesús pepicaqueiñmu taiñ quimeltucheal Biblia ca ñi quelluafiel pu che ñi inayafiel ta Jesús (Mat. 28:18-20).

2. ¿Inei engün am “pu adümuhun-ngechi huentru” ñi feipin Efesios 4:7, 8?

² Jesús ca quiñe falin regalo elueiñmu. Apostol Pablo feipi Jesús püralu huenu mu, “huli fillque adümuhun-ngechi huentru” (papeltunge Efesios 4:7, 8). Pablo feipi Jesús huli tüfachi pu huentru ñi quelluafiel fillque dungu mu pu trahunche (Efes. 1:22, 23; 4:11-13). Famülque mu, ¿inei am tüfachi pu huentru? Quiñeque engün pu siervo ministerial, pu loncolelu ca pu huitran-ngepaquechi loncolelu. a Fei engün culpafe chengeingün, huelulcauqueingün (Sant. 3:2). Huelu Jesús adnieyu engün taiñ quelluaeteu, feimu quiñe regalo reque feleingün.

3. ¿Chumngechi quelluafuiñ pu adümuucülechi huentru? Feipinge quiñe pengelün dungu.

³ Jesús eluqueiñmu tüfachi adümuucülechi huentru ñi yafültucuafiel pu trahunche (Efes. 4:12). Huelu com iñchiñ quelluntucuafuiñ ñi femürpual tüfachi falinque  cüdau. Raquiduamnge tüfa mu: petu deumangelu quiñe Trahunhue Ruca, quiñeque quelluntucuafuingün ñi deumayal ti cüdau, huelu caquelu quelluafui pu deumarucafe. Eluafui iyael ca chem tañi duamnieel engün. Ca femngechi pu siervo ministerial, pu loncolelu ca pu huitran-ngepaquechi loncolelu elungei falinque cüdau, huelu com iñchiñ quelluafuiñ taiñ feipin ca taiñ femquen mu. Peaiñ chumngechi cümelcaqueiñmu iñchiñ ñi cüdau feitachi pu peñi, ca peaiñ chumngechi pengelafuiñ taiñ mañumcülen fei engün ñi cüdau mu ca taiñ mañumniefiel ta Jesús.

PU SIERVO MINISTERIAL QUELLUQUEINGÜN

4. Ti hunen siglo mu, ¿chumngechi quelluquefui pu siervo ministerial?

⁴ Hunen siglo mu, quiñeque huentru üitungequefui ñi siervo ministerialngeal (1 Tim. 3:8). Tüfa engün peno feipi Pablo tañi quelluchequen (1 Cor. 12:28). Pu siervo ministerial femquefuingün fillque cüdau ñi quelluafiel pu loncolelu, femngechi pu loncolelu ñi eluhual tañi quimeltucheal ca yafültucucheal. Pu siervo ministerial quelluquefuingün ñi copiangeal Chau Dios ñi Dungu ca ngillacayal chem ñi duamnieel ñi copiangeal.

5. ¿Chem cüdau femqueingün pu siervo ministerial famülque mu?

⁵ Fachantü, ¿chem cüdau femquei pu siervo ministerial trahunche mu? (1 Ped. 4:10). Quiñeque mu, raquiafuingün ti plata trahunche mu, adcünuafuingün cheu ñi amuldungungeal ca ti trahunche ñi nieal publicacion ca pünefingün audio ca video trahun meu. Adcünuchequeingün trahun meu ca quelluqueingün ñi cüme elcünungetual ti Trahunhue Ruca. Com tüfachi cüdau duamfalngei ñi cümelcaleal ti trahunche (1 Cor. 14:40). Quiñeque engün hulquei hueupin ti trahun rangiñ semana cam afchi semana mu. Ca quellufingün ti loncolelu ti troquiñche mu amuldunguquelu. Ca quiñeque mu, ti loncolelu feipiafui quiñe siervo ministerial tañi compañaeteu ñi yafültucuafiel quiñe peñi, lamngen.

6. ¿Chumngelu falintuqueiñ pu siervo ministerial ñi cüdau?

⁶ ¿Chumngelu falintuqueiñ pu siervo ministerial ñi cüdau? Ngüneduamaiñ ñi feipin epu lamngen. Ti lamngen Beberly b Bolivia mapu tuulu feipi: “Pu ministerial ñi duam mu cüme amulequei ti trahun. Fei engün ñi cüdau mu ülcantuqueiñ, huiñoldunguqueiñ, cüme allcütuqueiñ hueupin ca pequeiñ video ca adentun. Petu amulelu ti trahun, cuñiutucuqueiñmu ca quellufingün pu conectaucülelu internet mu ñi cüme allcütuafiel ti trahun. Aflu ti trahun, quelluqueingün ñi liftual ti Trahunhue Ruca, raquiafiel hulngequeelchi plata, ca ngüneduamqueingün taiñ nieel ti duamnieelchi publicacion. Rume mañumquefiñ engün” pi. Lamngen Leslie Colombia mapu mu tuhui, ca tañi füta loncolei. Feipi: “Tañi füta rume quellueyu pu siervo ministerial. Quellunofule engün, tañi füta doi cüdau nieafui. Mañumquefiñ engün eluucülelu ñi cüdahual com piuque mu” pi. ¿Mañumcülenoafulu cai iñchiñ? (1 Tim. 3:13).

7. ¿Chumngechi pengelafuiñ taiñ mañumniefiel pu siervo ministerial? (Ca inaduamnge ti adentun).

⁷ Cümei taiñ falintuafiel pu ministerial ñi cüdau, huelu fei ca müten no. Biblia ca feipi: “Pengelqueaimün tamün mañumcülen” (Col. 3:15). Femngechi femi  peñi Kristofer Finlandia mapu tuulu: “Quiñe pichi tarjeta cam mensaje huirintuculelfiñ quiñe troquiñ Biblia, feipifiñ chumngechi yafültucueneu chem tañi feipin ca femün meu” pi. Peñi Pascal ca tañi domo Nueva Caledonia mapu mu, ngillatuñmaquefi pu ministerial. Peñi Pascal feipi: “Llellipun mu mañumquefiyu ta Chau Jehová pu ministerial trahunche mu ñi quelluafiel ca nehuentucuafiel engün” pi. Chau Jehová allcütuquei tüfachi llellipun, feiti trahunche cümelcangei (2 Cor. 1:11).

PU LONCOLELU NEHUENTU CÜDAUQUEINGÜN

8. Biblia feipi pu loncolelu nehuentu cüdahuingün hunen siglo mu, ¿chumngelu cai? (1 Tesalonicenses 5:12, 13).

⁸ Hunen siglo mu, pu loncolelu nehuentu cüdauquefuingün (papeltunge 1 Tesalonicenses 5:12, 13; 1 Tim. 5:17). Hunelefuingün ñi adnieafiel ti trahun ca dulliquefuingün ñi chem chumal ti trahunche. Ca piuqueyen mu ngülamtufingün pu peñi, pu lamngen ñi nehuencüleal engün (1 Tes. 2:11, 12; 2 Tim. 4:2). Yafüluuquefuingün ñi cüme hueniyeafiel ta Jehová ca duamtunieafiel tañi pu che (1 Tim. 3:2, 4; Tito 1:6-9).

9. Fantepu meu, ¿chem cüdau femquei pu loncolelu?

⁹ Fantepu mu, pu loncolelu rume cüdauqueingün. Fei engün amuldunguqueingün (2 Tim. 4:5). Inayentufali ñi amuldungun com piuque meu, adniefingün cheu ñi amuldungual ti trahunche, pepicaqueiñmu taiñ amuldungual ca quimeltucheal. Cafei piuqueyenquechi juzgachequeingün nor dungu meu. Fütra culpale quiñe peñi cam lamngen, quelluquefingün ñi cüme hueniyeutual Jehová engu, ca quelluqueingün ñi lifcüleal ti trahunche (1 Cor. 5:12, 13; Gál. 6:1). Doyelchi mai, camañquefingün reque pu peñi, pu lamngen (1 Ped. 5:1-3). Pepicaqueingün cümeque hueupin, eluuqueingün ñi cüme quimafiel pu peñi, pu lamngen ca pemequefingün ñi yafültucuafiel. Cafei quiñeque loncolelu quelluntucuqueingün ñi deumayal ca cüme elcünungetual Trahunhue Ruca. Adcünuqueingün fütraque trahun. Quiñeque coneltuqueingün ti Troquiñ Huentru ñi Quellual pu Cutrancülelu Pital mu, caquelu quelluqueingün ti Troquiñ Pemequefilu pu Pitalconcülelu, ca caque cüdau femqueingün. Rume cüdauqueingün iñchiñ taiñ duam mu.

10. ¿Chumngelu falintuquefiyiñ pu loncolelu?

¹⁰ Jehová feipicünui pu loncolelu taiñ cüme cuidayaeteu, femngechi taiñ llicalenoal (Jer. 23:4). Femngechi rupai quiñe lamngen Johanna pingelu Finlandia mapu mu. Rume quellueyu pu loncolelu cutranlu tañi ñuque. Feipi: “Cüdautuquen tañi entual tañi chum duamcülen. Quiñe loncolelu, iñche müte cüme quimlafiñ, huelu cüme allcütueneu, ngillatui ca Jehová piuqueyeimu pieneu. Com acordalafiñ tañi chem pieteu, huelu rüf tüngduamcületun. Feichi antü tañi doi duamniefiel quellu, Jehová ta huercüleleneu ti loncolelu” pi. ¿Eimi cai? ¿Chumngechi quellueimu pu loncolelu?

11. ¿Chumngechi mañumafuiñ pu loncolelu ñi cüdau? (Ca inaduamnge ti adentun).

¹¹ Jehová ayüquei iñchiñ taiñ pengelelafiel pu loncolelu tunte taiñ piuqueyeniefiel fente ñi cüdahun engün (1 Tes. 5:12, 13). Quiñe lamngen Henrietta pingelu, Finlandia mapu mu, feipi: “Pu loncolelu ayühunquechi quelluchequeingün. Huelu quiñeque mu duamngemequeingün,  pichi cansalefuingün ca chaftuquefingün cüdaungechi dungu. Feimu quiñeque mu, feipiquefiñ quiñe loncolelu: ‘Feipiayu quiñe dungu: eimi cüme loncolelungeimi’”. Quiñe lamngen Sera pingelu Turquía mapu mu feipi: “Pu loncolelu duamnieingün yafüluhun ñi amuleal tañi cüdau, feimu huirintuculelquefiñ tarjeta, mangelquefiñ ipayal ruca mu ca amuldunguquen fei engün mu”. ¿Mülepei mai quiñe loncolelu tami doi mañumniefiel? Pengelelafimi tunte tami mañumcülen (1 Cor. 16:18).

TATI PU SUPERINTENDENTE YAFÜLTUCUQUEFI PU TRAHUNCHE

12. ¿Ca chem huentru elcünui Jesús ñi yafültucuafiel pu trahunche? (1 Tesalonicenses 2:7, 8).

¹² Jesús ca huli caquelu adümuucülechi huentru. Hunen siglo mu, Jesús adcünufi pu loncolelu Jerusalén mu ñi dullial quiñeque huentru ñi huitrancontuafiel pu trahunche. Fei tüfa ta Pablo, Bernabé ca caquelu huentru (Hech. 11:22). Fei engün, pu ministerial ca pu loncolelu reque, yafültucuquefingün pu trahunche (Hech. 15:40, 41). Fei engün quiñepülecünuingün quisu ñi duamnieel, cuñihun mu tucuingün ñi mongen, femngechi ñi quimeltucheal ca yafültucucheal (papeltunge 1 Tesalonicenses 2:7, 8).

13. ¿Chem cüdau mülei ñi femal pu huitran-ngepaquechi loncolelu?

¹³ Pu huitran-ngepaquechi loncolelu fill püle miyauquei ñi huitrancontuafiel pu trahunche. Quiñeque mu, alüque mapu amuqueingün tañi puhual trahunche mu. Fill semana pepicauqueingün tañi hulal fillque hueupin. Pemequefi pu peñi, pu lamngen tañi yafültucuafiel. Ca adniequefi fillque trahun ñi amuldungual, ti trahun pu loncolelu engün ca adniequefi ti trahun pu precursor engün. ¿Ca chumqueingün? Ca pepicaquefingün ti escuela ñi amual pu precursor ca pepicaqueingün  ti trahun ñi amual com pu precursor circuito mu mülelu. Cafei Betel elfalcünueyu quiñeque falinque cüdau, quiñeque müchai müten mülei ñi femal engün.

14. ¿Chumngelu falintuquefiyiñ ti cüdau ñi femquen pu superintendente?

¹⁴ Ñi fente cüdauquen pu huitran-ngepaquechi loncolelu, ¿chumngechi quellungequei ti trahunche? Quiñe peñi Turquía mu feipi: “Huitrancontupaeteu mu tati superintendente, quelluqueneu tañi doi quelluafiel pu peñi ca pu lamngen. Fentren superintendente quimfiñ, huelu com engün eluucülei tañi allcütuaeteu, quiñe no rume feipiquelaeneu tañi pepi nütramcanoaeteu” pi. Johanna, taiñ nütramcapeel parrafo 10 mu, tripai ñi amuldungual quiñe superintendente engu, huelu tripatulaeyu quiñe che no rume, feipi: “Rume piuquentucuniequefiñ feichi antü. Pichiñma mu tañi epu lamngen cañpüle huiñamtuhuingu, müna echamenofiñ engu. Huelu ti superintendente piuqueyenquechi quellueneu. Raquiduameleneu fachantü camapuleafuiñ taiñ familia iñchiñ, huelu ti hue mapu mu doi nieaiñ tiempo taiñ quiñentrür müleal” pi taiñ lamngen. Iñchiñ ca femngechi ayühunquechi acordaquefiyiñ taiñ pu huitran-ngepaquechi loncolelu (Hech. 20:37–21:1).

15. 1) ¿Chumngechi pengelelafuiñ taiñ mañumniefiel pu huitran-ngepaquechi loncolelu? (3 Juan 5-8; ca inaduamnge ti adentun). 2) Pu peñi nielu elfal cüdau trahunche mu tañi domo, ¿chumngelu falintuafiyiñ? Ca, ¿chumngechi femafuiñ? (Inaduamnge ti huichulechi dungu “ Falintuafiyiñ fei engün ñi pu domo”).

¹⁵ Ti apostol Juan feipifi ta Gayo ñi cüme llohuafiel pu peñi huitrancontuquefilu pu trahunche. Feipifi: “Eluafimi chem tañi duamnieel, tami chumal mülei ñi ayühuelafiel ta Chau Ngünechen”  (papeltunge 3 Juan 5-8). ¿Ca chumngechi iñchiñ femafuiñ? Feipiafuiñ ti superintendente tañi imeal taiñ ruca mu. Ca amuaiñ fillque trahun ñi femqueel ti superintendente ñi amuldungual feichi semana. Peafiyiñ chumngechi Leslie taiñ nütramcapeel pengeli tañi mañumcülen. Feipi: “Feipifiñ ta Jehová tañi eluafiel com tañi duamnieel ti superintendente. Tañi füta iñchiu ca huirintuculelquefiyu ta carta tayu feipiafiel tunte tayu quellueteu”. Loncontucuaiñ, pu superintendente ca rupaqueingün huesaque dungu iñchiñ reque ca cansaqueingün. Cutranqueingün ca huesa duamcüleingün quiñeque mu, feimu llellipuquefingün Jehová tañi quelluaeteu. Feimu yafültucufiliyiñ taiñ feipin mu, elufiliyiñ pichiquen regalo, huiñoldungungeafui reque ti superintendente ñi llellipun (Prov. 12:25).

DOI DUAMNIEIÑ “ADÜMUHUN-NGECHI HUENTRU”

16. ¿Chem ramtuhuafui tati pu peñi? (Proverbios 3:27).

¹⁶ Com püle pu trahunche duamniei “adümuhun-ngechi huentru”, quiñe regalo reque felelu. Eimi peñi fautizaucülelmi, ¿eluucüleimi tami quellual? (papeltunge Proverbios 3:27). ¿Nehuentu cüdaucüleimi tami siervo ministerialngerpual? Siervo ministerialngelmi, ¿raquiduamqueimi tami loncolerpual trahunche mu? c ¿Cüme adcünuafuimi tami amual ti Escuela ñi Pepicangeam pu Amuldunguquelu Ngünechen ñi Gobierno? Feichi escuela pepicayaimu ca quelluaimu tami doi cüdahuelafiel ta Jesús. Pepi femnoalu troquihulmi, llellipuafimi ta Jehová. Feipiafimi tami eluaeteu nehuen tami femürpual chem cüdau rume elungelmi (Luc. 11:13; Hech. 20:28).

17. Ñi fente cüdaucülen pu huentru Jesús ñi elcünuel, ¿chem pengeleiñmu?

¹⁷ Pu “adümuhun-ngechi huentru” tañi elcünuel ta Jesús nehuentu cüdaucüleingün. Tüfa pengeli Jesús taiñ com adnieteu afaelchi antü mu (Mat. 28:20). Taiñ Lonco Ülmen piuqueyenieiñmu, cüme piuquengei, quimniei com taiñ duamnieel, fei eluqueiñmu cümeque huentru taiñ quelluaeteu. Com iñchiñ, ¿müna mañumcülepelaiñ? Quintuaiñ chumngechi taiñ pengelelafiel. Rumel mañumafiyiñ ta Jehová, quisu ta eluqueiñmu “com tati cümeque dungu ca com tati tutengelu” (Sant. 1:17).