1. ¿Chem falin dungu mülei tañi dullial com pu che?

 FACHANTÜ com che mülei tañi dullial chem ñi chumal engün. ¿Quelluntucuafingün ta Jehová? Cam ¿quelluntucuafingün ta Huecüfü, Chau Dios ñi huesa caiñe? Dullile engün ñi poyeafiel Jehová, rumel mongen nieaingün, huelu femnole engün apümcangeaingün (Mat. 25:31-33, 46). Ti “fütra cutrancahun” mu, com che marcacünungeai reque. Feichi marca pengelai taiñ mongetripayal cam taiñ apümcangeal (Apoc. 7:14; 14:9-11; Ezeq. 9:4, 6).

2. 1) Ñi feipin Hebreos 10:35-39, ¿chumngechi quelluqueiñmu? 2) ¿Chumngechi quelluqueiñmu Apocalipsis pingechi lifru?

² (Papeltunge Hebreos 10:35-39). Eimi deu inaniefilmi Jehová tañi Gobierno, cümecünuimi. Ca ayüquepelaimi tami quelluafiel ta caquelu ñi ca femngechi femal engün. Tami femal tüfa, ñi feipin ti lifru Apocalipsis quelluafeimu. Feitachi lifru feipieiñmu chem ñi rupayal com pu pinolu ñi poyeafiel ta Jehová ca feipieiñmu chumngechi ñi cümelcangeal com pu inaniefilu Jehová tañi Gobierno. Rume falin-ngei taiñ estudianieafiel ñi feipin Apocalipsis, feita quelluaiñmu taiñ serfinieafiel ta Jehová. Ca quelluaiñmu taiñ yafültucuafiel ta caquelu tañi serfiafiel ta Jehová ca tañi famentuunoal engün quisu mu.

3. ¿Chem peaiñ tüfachi troquiñ mu?

³ Tüfachi troquiñ mu peaiñ epu dungu. ¿Chem dungu mu rupayai pu poyequefilu ta Jehová? Ca ¿chumngeai pu inaquefilu tati quelü huapo culliñ ñi feipin Apocalipsis lifru?

4. Ti apostol Juan, ¿inei pefi huenu mu?

⁴ Tati apostol Juan pei epu troquiñqueche inaquefilu Jehová tañi Gobierno ca elungeingün tañi rumel mongeleal. Tati hunen troquiñche mu coneltulei 144.000 che (Apoc. 7:4). Fei engün mülequefui Mapu meu ca yengeingün huenu mu tañi ngünenieafiel ta Mapu Jesús engün (Apoc. 5:9, 10; 14:3, 4). Juan pefi ñi huitralen engün Jesús engün, Sion pingechi huincul mu (Apoc. 14:1).

5. ¿Chem dungu mu rupayaingün tati pu dullinque cristiano petu mülelu Mapu mu?

⁵ Tati pu apostol ñi antü mu ca fachantü mu, dulliniengerpui fentren che ñi coneltual pu 144.000 che mu (Luc. 12:32; Rom. 8:17). Juan feipingei petu ñi acunon ti fütra cutrancahun, pichin tüfachi troquiñche petu mülehueai Mapu mu. Tüfachi dullinque cristiano marcacünungeaingün reque, tüfa pengeli Jehová ñi cüme llohuaeteu engün (Apoc. 7:2, 3; 12:17). Fei ti fütra cutrancahun mu, acurumeai ti antü ñi yengerumetual ta huenu mu. Fei engün quiñeucületuai engün feitachi deu mülepuchi dullinque cristiano huenu meu. Feitachi 144.000 dullinque cristiano ngünenietuafi ta Mapu Jesús engün, Jehová tañi Gobierno mu (Mat. 24:31; Apoc. 5:9, 10).

6, 7. 1) ¿Ca chem troquiñche pei Juan? Ca ¿inei engün am? 2) ¿Chemu am com iñchiñ mülefui taiñ falintuafiel ñi feipin Apocalipsis 7?

⁶ Juan deu pefilu ti troquiñche mülepulu huenu mu, ca pefi ta “fentren pu che”. Feitachi ca troquiñche raquifal-lafui (Apoc. 7:9, 10). ¿Inei engün am feitachi pu che? Juan feipingei: “Fei tüfa engün tati rupayelu ti fütra cutrancahun meu, tati cüchayelu tañi tacuhun ca fülangeltufilu reque tañi maneluhun meu tati Cordero ñi hutrulelchi mollfüñ meu” (Apoc. 7:14). Deu rupale engün ti fütra cutrancahun mu, feitachi troquiñche mületuaingün Mapu mu ca cüme feletuaingün (Sal. 37:9-11, 27-29; Prov. 2:21, 22; Apoc. 7:16, 17).

⁷ Tati pu dullinque cristiano ca tati pu mülealu Mapu mu, mülefui taiñ falintuafiel ti capitulo 7 Apocalipsis lifru mu. ¿Chemu? Re cümeque dungu cüpayai tati epu troquiñche mu, ayüucüleaiñ taiñ quelluntucual Jehová tañi Gobierno. ¿Ca chem feipieiñmu Apocalipsis ti fütra cutrancahun mu? Peafiyiñ (Mat. 24:21).

8. ¿Chumngechi conai ti fütra cutrancahun? Ca ¿chumai epe com tati pu che?

⁸ Tati pu gobierno lefcontuafi tati Fütra Babilonia, adentulelu com pu coilaque religion (Apoc. 17:16, 17). Femngechi conai ti fütra cutrancahun. Conle tüfa, ¿fentren pu che eluupeai mai tañi serfiafiel ta Jehová? Femlayai llemai. Ñi feipin Apocalipsis capitulo 6, feichi antü mu pu serfiquenofilu ta Jehová maneluhuai pu gobierno mu ca tati pu negociaquelu mu, fütraque huincul reque felelu, fei tañi quelluaeteu. Quelluntucunolu engün am Jehová tañi Gobierno mu, quisu caiñe troquiaeyu (Luc. 11:23; Apoc. 6:15-17).

9. Ti fütra cutrancahun mu, ¿chemu tati pu che afmatulehueai Jehová tañi pu che mu? Ca ¿chumngeai Jehová ñi pu che?

⁹ Fütra cutrancahun mu tati pu che  poyequenofilu ta Jehová afmatulehueai Jehová ñi pu che mu. ¿Chumngelu? Quisu tañi troquiñche müten serfinieafi ta Jehová ca eluulayaingün ñi quelluntucuafiel ti “huapo huesa culliñ” (Apoc. 13:14-17). Fente tañi nehuencülen engün, tati pu caiñetuquefilu ta Jehová illcutuaeyu engün. Feimu fillque gobierno quiñehuaingün tañi caiñetuafiel Jehová ñi pu che com Mapu meu mülelu. Tüfachi troquiñque gobierno quiñeucülealu, Gog tuulu Magog mapu mu pingei Biblia meu (Ezeq. 38:14-16).

10. Ñi feipin Apocalipsis 19:19-21, ¿chumai Jehová caiñetungele tañi pu che?

¹⁰ ¿Chumai am Jehová caiñetungele tañi pu che? Ti Biblia feipi Jehová rume illcuai (Ezeq. 38:18, 21-23). Ti capitulo 19 Apocalipsis lifru mu feipi Jehová huercüafi tañi Fotüm ñi incañpeafiel tañi troquiñche ca quehuayafiel tañi pu caiñe. Jesús quisulelayai, compañnieaeyu tati pu cümeque püllü ca pu 144.000 (Apoc. 17:14; 19:11-15). ¿Chumngechi afai feitachi hueichan? Com tati che ca troquiñche caiñetuquefilu ta Jehová apümcangeaingün (papeltunge Apocalipsis 19:19-21).

11. ¿Chem am tati doi falin-ngechi dungu ñi feipiel Apocalipsis?

¹¹ ¿Chumletuai com tati pu mongetripalu feitachi hueichan mu? Com tati pu che Mapu mu ayüucületuai. Huenu mu, ca ayüucületuaingün apümcangele tati Fütra Babilonia. Huelu mülei ca dungu tañi doi ayühulaeteu (Apoc. 19:1-3). ¿Chem am ta tüfa? Tüfa tati doi falin-ngechi dungu tañi feipiel Apocalipsis: “tati Cordero tañi mafün” (Apoc. 19:6-9).

12. ¿Chumül am femngeai tati Cordero ñi mafün? (Apocalipsis 21:1, 2).

¹² ¿Chumül am femngeai ti mafün? Com tati pu 144.000 müleputuaingün huenu mu petu tañi acunon Armagedón pingechi hueichan. Huelu feichi mu femngelayai tati Cordero ñi mafün (papeltunge Apocalipsis 21:1, 2). Tati mafün femngeai rupale hula ti Armagedón hueichan, apümcangele com Jehová tañi pu caiñe (Sal. 45:3, 4, 13-17).

13. ¿Chem rupayai tati Cordero ñi mafün mu?

¹³ ¿Chem rupayai tati Cordero ñi mafün mu? Quiñe mafün mu, quiñe nofio ca quiñe nofia trahuuquei. Ca femngechi tati Cordero ñi mafün mu, ti rey Jesús quiñehuai tati 144.000 che engün, quiñe nofia reque felelu. Rupale ti mafün, Jesús ca tati 144.000 ngünenietuai ti Mapu huaranca tripantu mu (Apoc. 20:6).

14, 15. Apocalipsis 21 mu, ¿chem dungu mu trürümngei pu 144.000? (Inaduamnge ti adentun hunen pagina mu).

¹⁴ Apocalipsis capitulo 21 mu, pu 144.000 trürümngei quiñe huaria mu, fei “tati hue Jerusalén” pingelu (Apoc. 21:2, 9). Feichi huaria niei “mari epu cura tañi nehuentuucülemum, cheu tañi huiriconcülemum tati Cordero tañi mari epu apostol ñi üi”. Afmatulehuepelai ta Juan ñi pefiel mu tañi üi huiriconcülelu feitachi cura mu (Apoc. 21:10-14; Efes. 2:20).

¹⁵ Tüfachi huaria chaflai chem huaria mu no rume. Ti doi falin rüpü ti huaria mu re orongei. Ti mari epu puerta, mari epu perla ürque. Tati cura tañi  nehuentuucülemum tati malal, adelcalei itrofill adque cura meu. Cafei ti huaria cuadraucülei (Apoc. 21:15-21). Juan ngüneduami tati huaria ngelai quiñe ngillatuhue ruca no rume, ¿chumngelu? Quisu feipi: ‘Tati itrocom pepiluhun niechi Ngünechen tati Cordero engu mülelu am tüfei meu. Tati huaria duamlai antü no rume ca cüyen no rume tañi pelontuaeteu, Ngünechen tañi alofün am pelontunieteu, ca tañi cüdetuhue fei tüfei tati Cordero’ (Apoc. 21:22, 23). Com tati coneltulelu ti hue Jerusalén mu, Jehová engün mu ta müleai. Feimu duamhuelayaingün quiñe ngillatuhue ruca (Apoc. 22:3, 4). Cafei ti Hunen Lonco Sacerdote, feita Jesús, adnieafi engün ñi poyeafiel ta Jehová (Heb. 7:27). Feimu feipingei Jehová ca Jesús ti ngillatuhue ruca quechileingu.

16. Ngünenietule Jesús Mapu mu, ¿chem cümeque dungu llohuai pu che?

¹⁶ Pu dullinque cristiano raquiduamün mu feitachi huaria mu müna ayüuqueingün. Huelu tati pu mülealu Mapu mu ca ayüucüleafuingün, ¿chumngelu? Jesús ngünenietule ti Mapu, ti hue Jerusalén fentren cümeque dungu cüpalai. Juan pei feitachi cümeque dungu quiñe leufü reque felei hulquelu mongen. “Ca epuñpüle tati leufü meu, tremcülei tati mongen hulquechi anümca”. Ca tati anümca ñi tapül ‘cümei tañi tremolngetuam tati pu che’ (Apoc. 22:1, 2). Com pu che mongelealu Mapu mu llohuaingün com feitachi cümeque dungu. Ca com pu feyentulelu Chau Dios mu culpanchengehuelayaingün, cutranhuelayai ta che ca hueñancühuelayai (Apoc. 21:3-5).

17. Ngünenietule Jesús Mapu mu, ¿inei engün am cümelcangeaingün? (Apocalipsis 20:11-13).

¹⁷ ¿Inei engün am llohuai com feitachi cümeque dungu? Hunelu mu, com pu mongetripayalu Armagedón hueichan mu ca pu pichiqueche choyüalu ti hue Mapu mu. Huelu fei engün müten no. Apocalipsis capitulo 20 mu feipicünungei ñi huiñomongetual pu layelu (papeltunge Apocalipsis 20:11-13). ¿Inei engün am huiñomongetuai Mapu mu? Huiñomongetuai tati pu  “norngechi che”, tüfa tati pu poyequefilu ta Jehová cuifi mu. Ca huiñomongetuai pu “norngenochi che”, tüfa tati pu che quimnofilu ta Jehová feimu poyelafingün (Hech. 24:15, TNM; Juan 5:28, 29). Huelu, ¿huiñomongetupeai mai com che? Femlai. Pu pinolu ñi poyeafiel ta Jehová petu tañi lanon, huiñomongetulayai. Fei engün elungei ñi quimafiel ta Jehová huelu famentufingün, feimu mülelayaingün ti hue Mapu mu (Mat. 25:46; 2 Tes. 1:9; Apoc. 17:8; 20:15).

18. Rupale ti huaranca tripantu, ¿chumletuai ta che?

¹⁸ Afle hula ti huaranca tripantu, com che mülealu Mapu mu culpanchengehuelayaingün. Inei no rume cutrancauhuelayai Adán ñi culpan mu (Rom. 5:12). Rupale ti huaranca tripantu, com che mülealu Mapu mu huiñomongetuaingün reque. ¿Chumngelu? Culpanchengehuelayaingün (Apoc. 20:5).

19. Neicümngetule Huecüfü, ¿chumai pu che?

¹⁹ Jesús püntütripalai Jehová mu, rulpafeteu rume Huecüfü huesaque dungu mu. Cüpalechi antü mu rupale ti huaranca tripantu, Huecüfü neicümngetuai fei ca quiñe rupa rulpayafi com che huesaque dungu mu. Rupale tüfa, pu che ¿poyeniepeafingün mai ta Jehová, Jesús reque? (Apoc. 20:7). Pu che püntütripanolu Jehová mu llohuaingün afnoachi mongen ca rüf lifreletuaingün (Rom. 8:21). Huelu com che caiñetufilu Jehová, trür apümcangeaingün Huecüfü ca tañi huesaque püllü engün (Apoc. 20:8-10).

20. Rupan inaduamfilu eimi ñi feipin Apocalipsis, ¿chumngechi troquihuimi?

²⁰ Rupan papeltufilu eimi ñi feipin Apocalipsis, ¿chumi tami piuque? ¿Ayühulqueimu tami papeltufiel chem ñi rupayal cüpalechi antü mu? ¿Ayüqueimi tami mangelafiel caquelu pu che ñi poyeafiel Jehová? (Apoc. 22:17). Deu inaduamfilu iñchiñ chem ñi rupayal cüpalechi antü mu, rume ayüucülepelaiñ. Feipiafuiñ ti apostol Juan reque: “Felepe mai. ¡Cüpange, Ñidol Jesús!” (Apoc. 22:20).