TROQUIÑ ÑI CHILLCATUNGEAL 22
Jehová ñi quimün rume quelluqueiñmu
‘Jehová hulquei quimün’ (PROV. 2:6).
ÜLCANTUN 89 Allcütufilmi ta Chau Dios, cümelcangeaimi
¿CHEM QUIMAIÑ? *
1. Com iñchiñ, ¿chumngelu duamnieiñ Chau Dios ñi quimün? (Proverbios 4:7).
PETU tami femnon quiñe falin dungu, hune llellipuquefimi Jehová tami eluaeteu quimün (Sant. 1:5). Ti rey Salomón feipi: “Tati quimün, fei tati doi falin dungu” (papeltunge Proverbios 4:7). Salomón feipilai ti quimün cüpalu huentru mu, huelu mai cüpalu Jehová mu (Prov. 2:6). Huelu Chau Ngünechen ñi quimün, ¿quellupeafeiñmu mai taiñ chaftuafiel huesaque dungu? Femafui llemai. Feitachi troquiñ mu peaiñ tüfa.
2. ¿Chumafuiñ taiñ quim chengeal?
2 ¿Chem quelluafeiñmu taiñ quim chengeal? Inaduamafuiñ ca inayafuiñ ñi quimeltuel epu huentru rume quimün nielu: Salomón ca Jesús. Biblia feipi Chau Dios elufi fentren quimün ta Salomón ca ñi cüme ngüneduamal com dungu (1 Rey. 4:29). Ca Jesús doi quim huentrungefui, inei mu rume trürümfal-lafui (Mat. 12:42). Biblia mu feipicünungei Jesús mu: ‘Jehová ñi nehuen quelluaeyu ñi quim chengeal ca nieal adümuhun’ (Is. 11:2).
3. ¿Chem peaiñ tüfachi chillcatun mu?
3 Chau Dios elufi ta Salomón ca Jesús fentren quimün, feimu fei engu cümeque ngülam hulqueingu. Tüfachi chillcatun mu, peaiñ cüla ngülam taiñ cüme raquiduamal plata ca ti cüdau mu. Ca femngechi taiñ rume falilu troquiunoal ca falinolu troquiunoal.
CÜME RAQUIDUAMAIÑ TI PLATA MU
4. ¿Chumngechi mongen niequefui Salomón ca Jesús?
4 Salomón rume ricungefui ca niequefui quiñe elangechi ruca (1 Rey. 10:7, 14, 15). ¿Jesús cai? Niequelafui quiñe ruca no rume ca niequelafui fentren chemcün (Mat. 8:20). Huelu Salomón ca Jesús niequefuingu Jehová ñi quimün. Feimu, cüme raquiduamquefuingu ti plata mu.
5. Salomón, ¿chem raquiduamquefui ti plata mu?
5 Salomón feipi ti plata quelluchequei (Ecl. 7:12). Nieliyiñ plata, ngillacafuiñ chem taiñ duamtunieel ca taiñ ayüqueel. Huelu Salomón ricungefulu rume, inaduamürpui ñi mülen caquelu dungu doi falilu ta plata mu. Por ejemplo, Salomón huirintucui: “Doi falin-ngei cüme üitun chengeal ta ricu chengeal” (Prov. 22:1). Salomón ca feipi tati pu che rume falintuquefilu ta plata müte ayüucülequelai tañi nieel mu (Ecl. 5:10, 12). Salomón ca feipi taiñ rume falintunoafiel ti plata, ti plata am afrumeafui (Prov. 23:4, 5).
Taiñ nieelchi falinque chemcün, ¿catrütuqueiñmu taiñ serfiafiel Jehová? (Inaduamnge parrafo 6 ca 7). *
6. ¿Chem raquiduamquefui Jesús ti plata mu? (Mateo 6:31-33).
6 Jesús ayüquefui ñi iyal cümeque iyael ca ñi pütocoal (Luc. 19:2, 6, 7). Ti hunen afmatufalchi dungu ñi femün ta Jesús, deumai quiñe cüme pulcu (Juan 2:10, 11). Ca feichi antü lalu Jesús, quiñe falin tacun yeniefui (Juan 19:23, 24). Femfulu rume, Jesús eluulai ñi doyümafiel ta plata. Jesús feipifi tañi pu inanieteu: ‘Inei rume ta poyelayafui epu ülmen huentru tañi mür cüdahuelafiel. Poyengelayafui ta Ngünechen ca fentren chemcün’ (Mat. 6:24). Jesús feipi doyümniefiliyiñ taiñ cüdahuelafiel ta Jehová, quisu eluaiñmu com taiñ duamnieel (papeltunge Mateo 6:31-33).
7. ¿Chumngechi quellueyu Daniel tañi hune quintunoafiel ti plata?
7 Fentrenque taiñ pu peñi ca lamngen müna quellueyu ñi chem pin Jehová ti plata mu. Peafiyiñ chem pi taiñ peñi Daniel curengenolu. “Huechelelu ta iñche, eluhun tañi serfiafiel ta Jehová”. Nienolu am fentrenque chemcün, feimu Daniel elcünuquei tañi tiempo ca pepiluhun Jehová ñi troquiñche mu. Daniel ca feipi: “Repentiuquelan tañi dulliel mu. Fentren plata nieafun chi rume cüdauli. Huelu nielayafun chi cümeque hueni tañi nieel ta fachantü, ca ayüucülelayafun. Tañi serfiquefiel mu Jehová, müna ayühulqueneu”. Hunelu mu quintufiliyiñ ta Jehová, quisu cümelcayaiñmu.
CÜME RAQUIDUAMAIÑ TI CÜDAU MU
8. ¿Chemu feipiafuiñ Salomón ñi cüme raquiduamquen ti cüdau mu? (Eclesiastés 5:18, 19).
8 Salomón feipi nehuentu cüdaucüleliyiñ, ayüucüleafuiñ, “fei ta quiñe yehun reque felei cüpalu Chau Dios mu” pi ta Salomón (papeltunge Eclesiastés 5:18, 19). Salomón huirintucui: “Fillque cüdau ñi nehuentun meu femqueel pu che, cümelcangequei” (Prov. 14:23). Quisu quimniefui feitachi dungun ñi rüfngen. Quisu cüme cüdaufengefui: deumafi ruca, anümcafi ta ofad, anümcafi fentren flor, deumafi fütraque estanque ca fütraque huaria (1 Rey. 9:19; Ecl. 2:4-6). Tañi femngechi cüdau müna ayühulqueyu. Huelu Salomón quimniefui tañi rüf ayüucüleal ca duamnieafui tañi cüdahuelafiel ta Jehová. Femngechi femi. Por ejemplo, Salomón regle tripantu mu adniefui ñi cüme deumangeal Jehová tañi ngillatuhue ruca (1 Rey. 6:38; 9:1). Salomón fillque cüdau femfulu rume, raquiduami ñi doi falin-ngen taiñ serfiafiel ta Jehová. Salomón feipi: “Deu allcütungelu com tüfachi dungu, quimürpuafuimi tüfa: rume yamniefinge tati rüfngechi Ngünechen ca inaniefinge tañi huercün dungu” (Ecl. 12:13).
9. Jesús, ¿chumngechi pengeli tañi doyümquenofiel ti cüdau?
9 Jesús ca cüme cüdaufengefui. Quisu huechengelu carpinterongefui (Mar. 6:3). Femngechi quelluquefui tañi chau. Feimu tañi chau ca ñuque mañumtupelafeyu. Jesús culpanchengelafui, fei cüme cüdauquepelafui. Feimu fentren che peno deumafalquepelaeyu chem rume. Müna ayüquepelafui tañi cüdau. Cüme cüdaufengefulu rume ta Jesús, huelu doyümquefi tañi cüdahuelafiel ta Jehová (Juan 7:15). Feimu Jesús amuldunguyaulu, feipifi tati pu che: “Poyequefilmün tati afquechi iyael, huelu mai tamün poyeafel tati rumel mülequechi iyael fei tamün eluafeteu rumel mongen” (Juan 6:27). Jesús ca feipi taiñ ngülümal falinque dungu huenu meu (Mat. 6:20).
¿Chumafuiñ taiñ cüdahual huelu taiñ elcünunoal Jehová ñi dungu? (Inaduamnge parrafo 10 ca 11). *
10. Cüme cüdaufengeliyiñ, ¿chem rupayafui?
10 Cüme inafiliyiñ Chau Dios ñi cümeque ngülam, cüme raquiduamcüleaiñ ti cüdau mu. Iñchiñ taiñ cristianongen, feipingequeiñ taiñ cüme cüdaufengeal (Efes. 4:28). Taiñ jefe cüdau mu, peñmaqueiñmu taiñ manelfalngen ca taiñ cüme cüdauquen. Cafei feipiafeiñmu taiñ falintuñmaqueteu chumngechi taiñ cüdauquen. Fei iñchiñ raquiduamafuiñ chi taiñ doi cüdahual, femngechi taiñ jefe ñi cüme raquiduamal pu testigo mu. Femliyiñ, cuñihun-ngeafui. ¿Chumngelu? Nielayafuiñ ta tiempo taiñ müleal taiñ familia iñchiñ ca taiñ cüdahuelafiel ta Jehová. Feimu, mülefui taiñ cacünutual taiñ raquiduam, fei taiñ doyümafiel tati doi falin-ngechi dungu.
11. ¿Chem quimürpui taiñ peñi William?
11 Quiñe hueche peñi, William pingelu, niequefui quiñe jefe testigongelu. Ñi femquefel William tañi jefe quellueyu ñi cüme raquiduamal ti cüdau mu. William feipi: “Tañi jefe rume cüdauquefui ca cüme cüdaufengefui. Feimu cüme yeuquefui caquelu che engu. Rupan cüdaulu tarde, tañi jefe elcünuquefui tiempo ñi müleal tañi pu che mu ca ñi poyeafiel Jehová. Fei iñche feipiafun tañi jefe rume ayüucülequei”. *
RUME FALILU TROQUIULAYAIÑ CA FALINOLU TROQUIULAYAIÑ
12. 1) Salomón, ¿chumngechi chengefui? 2) ¿Chumürpui ta Salomón?
12 Serfifilu ta Jehová cuifi, Salomón ñom piuquengefui. Huechengelu ta Salomón, cüme femquelafui quiñeque dungu quisu ñi duam mu. Feimu llellipuquefui ta Jehová tañi quelluaeteu (1 Rey. 3:7-9). Ellaca mu, reycünungelu ta Salomón, llicalefui tañi mallmahurpunoal. Quisu huirintucui: “Mallmangele ta che, troncüai llemai. Doi cümelu troquiule ta che, mutrurai llemai” (Prov. 16:18). Huelu rupachi antü mu, Salomón mallmahurpui, fei eluhui ñi famentuafiel com tañi huercüqueel ta Jehová. Por ejemplo, ti Ley feipifui quiñe rey judio no rume “ngelai ñi nieal fentren domo, fei ñi huesalcalenoal ñi piuque” (Deut. 17:17). Salomón feyentulafi ti ley, fei pütrün domo nierpui poyequenofilu ta Jehová (1 Rey. 11:1-3). Salomón “iñche turpu püntütripalayan Jehová mu” pipelai. Rupachi antü mu, Salomón püntütripai Jehová mu. Tañi huesa femün mu, huesaque dungu contueyu (1 Rey. 11:9-13).
13. ¿Chem quimürpuafuiñ Jesús mu?
13 Jesús ca femngechi ñom piuquengefui. Mülelu tañi Chau engu huenu mu, Jesús fentren falinque dungu femürpui. Por ejemplo, ‘quisu meu ta Ngünechen deumai itrocom tati mülelu huenu ca nag Mapu meu’ (Col. 1:16). Fautizangelu ta Jesús, acordapelai com tañi femürpuel mülequefulu tañi Chau engu (Mat. 3:16; Juan 17:5). Huelu Jesús mallmaulai feitachi dungu mu. Jesús doi cümelu troquiulai caquelu che mu, turpu. Doi mai, feipifi tañi pu discipulo: ‘Cüpalan tañi poyengeal, huelu mai cüpan tañi poyecheal, ca ñi hultucual tañi mongen femngechi ñi lifrenentuafiel ta com che ñi culpan meu’ (Mat. 20:28). Jesús ca feipi ñi femquenon chem no rume quisu ñi pin mu. Huelu mai, tañi Chau tañi feipieteu (Juan 5:19). Felei llemai, Jesús ñom piuquengefui, inayentufali.
14. ¿Chem quimeltueiñmu Jesús ñi feipin?
14 Jesús quimeltufi tañi pu discipulo ñi raquiduamnoal tañi falinon engün. Quiñe rupa, Jesús feipifi engün Chau Dios raquiniefi com ñi cal lonco engün (Mat. 10:30). ¿Chem quimeltueiñmu tüfa? Jehová rume falintuqueiñmu iñchiñ. Tüfa yafültucuqueiñmu. Raquiduamnge tüfa: Chau Jehová elueiñmu taiñ cüdahuelafiel ca taiñ rumel müleal tüfachi Mapu mu. Feimu turpu raquiduamlayaiñ taiñ falintuquenoeteu ta Jehová.
Mallmauliyiñ, ¿chem cümelcan lloulayaiñ? (Inaduamnge parrafo 15). *
15. 1) Quiñe rupa, ¿chem feipi La Atalaya? 2) Ti adentun pagina 24 mu, ¿chem cümeque dungu nielayafuiñ mallmauliyiñ?
15 Quiñe rupa, La Atalaya feipi: “Doi falin che troquiulayaiñ, femngechi taiñ mallmaunoal. Huelu ca femngechi raquiduamlayaiñ taiñ falinon, femngechi taiñ huesa duamnoal. Mülei taiñ quimtucual quiñeque dungu femafuiñ, caquelu dungu femlayafuiñ”. Quiñe lamngen feipi: “Iñche huesa che no, huelu ti doi cüme chengelan. Quiñeque dungu cüme femquen. Caquelu, müte cüme femquelan. Com che ta felequei”. * Rume cümei taiñ femngechi raquiduamal.
16. Jehová, ¿chumngelu eluqueiñmu cümeque ngülam?
16 Jehová Biblia mu eluqueiñmu cümeque ngülam. Müna piuqueyequeiñmu ca ayüquei taiñ ayüucüleal (Is. 48:17, 18). Famülque mu, fentren che rume falintuquefi tati plata, ti cüdau, ca mallmauquei. Fei fentren huesaque dungu mu conquei. Iñchiñ doyümniefiliyiñ Chau Jehová ñi dungu, femngechi huesaque dungu mu conlayaiñ ca rume ayüucüleaiñ. Feimu llemai, pengelaiñ taiñ quim chengen ca ayühulafiyiñ ta Jehová (Prov. 23:15).
ÜLCANTUN 94 Mañumcüleiñ Ngünechen ñi Dungu mu
^ Salomón ca Jesús müna quim chengequefuingu, tañi quimün ñi niequeel engu Jehová mu cüpai. Tüfachi troquiñ mu, peaiñ cümeque ngülam ñi feipiel Salomón ca Jesús taiñ cüme raquiduamal ti plata ca ti cüdau mu. Ca peaiñ taiñ rume falilu troquiunoal ca falinolu troquiulayaiñ. Ca peaiñ quiñeque peñi ca quiñeque lamngen ñi inafiel feitachi cümeque ngülam ca ñi rume quellueteu.
^ Inaduamnge ti troquiñ “Cómo disfrutar del trabajo duro” tripalu La Atalaya 1 conchi febrero cüyen, 2015 tripantu mu.
^ Inaduamnge ti troquiñ “La Biblia nos ayuda a sentirnos satisfechos” tripalu La Atalaya 1 conchi agosto, 2005 tripantu mu.
^ ¿CHEM PENGELI TI ADENTUN? Juan ca Tomás epu hueche. Mür trahuluuqueingu quiñe trahun mu. Juan ayüquefui tañi liftucayafiel müten tañi auto. Tomás pünequefi tañi auto ñi yeafiel pu peñi ca pu lamngen amuldungun mu ca trahun mu.
^ ¿CHEM PENGELI TI ADENTUN? Juan rume cüdauquei tardengefule rume. Quisu chumquei rume ñi ayühulafiel tañi jefe. “Tarde cüdahuaimi” pielieyu, femquei. ¿Chumi cai Tomás? Compañfi quiñe loncolelu ñi yafültucumeafiel quiñe lamngen. Tomás ca cüdauquei, huelu feipifi tañi jefe quiñeque tarde ñi cüdaunoal femngechi ñi serfiafiel Jehová.
^ ¿CHEM PENGELI TI ADENTUN? Juan mallmaucümequei, quisu mu müten raquiduamquei. Huelu Tomás hunentucuquefi ta Jehová. Tañi hueque hueni engün cüdauqueingün ñi cüme elcünungetual quiñe Fütra Trahunhue Ruca.
