Üdehun mu tati pu che caiñetuchequei, huesalcachequei ca illcutuchequei.

Quiñe che fillque dungu meu üdechequei. Fei ti üdechequelu üdequefingün tati pu che chem huesa dungu femnolu rume engün. Doi mai üdequefingün tañi ca tuhunchengen mu cam trürngenolu cai quisu engün mu. Pu üdengequelu huesaque che troquingequei. Falinolu, quimnolu troquingequei. Ca tati pu che raquiduamafui quisu engün ñi duam meu rupaquei huesaque dungu. Fei ti pu che üdechequelu, ¿ca rupapelai huesaque dungu meu? ¿Illamcangei chi cam norngenochi dungu femngequei chi? Fei tañi femngechi rupan meu peno üdechequei.

Quiñeque mu tati pu che üdeuqueingün petu tañi quimüunon rume. Quiñeque mu tati pu che inayentuñmaquefi ñi raquiduam tañi pu hueni cam tañi pu che. Fei quiñe che üdefile quiñe troquiñche, pichiñma mu tañi familia cam tañi pu hueni ca üderpuafuingün tüfachi troquiñche.

Cüdaungelai ñi üdehual ta pu che, feimu mülequei fentren üdehun Mapu meu. Huelu mülei ca dungu pengelquelu chumngelu ñi üdeuquen pu che. Biblia feipi cheu tuhui ti üdehun. Inaduamafiyiñ.

TATI ÜDEHUN TUULAI TATI PU CHE MEU. Fei ¿cheu chi tuhui ti üdehun? Fütra cuifi meu quiñe püllü huenu meu Satanás cam Huecüfü feipingetulu, caiñetufi ta Chau Dios. Tati Huecüfü “eluulu müten ñi huesa femal langümchefengerpui”. Satanás “fei quiñe coilatufe. Quisu meu tripaquei com coilaque dungu”, feimu ngüchaltucuquefi tati pu che ñi üdehual ca caiñetuhual (Juan 8:44, TNM; 1 Juan 3:11, 12). Biblia feipi tati Huecüfü re huesa femquei ca huesa piuquengei ca illcufengei (Job 2:7; Apocalipsis 12:9, 12, 17).

TATI PU CHE ÑI CULPAFENGEN MU PÜRÜM ÜDEUCHEQUERPUI. Tati hunen huentru Adán pingelu inafi ñi huesa femün ta Satanás. Fei Adán tañi femün meu com pu che culpafechengerpui (Romanos 5:12). Adán tañi hunen fotüm Caín pingelu, üdehun mu langümfi tañi peñi Abel (1 Juan 3:12). Famülque mu, petu mülehuei fentren che piuqueyechefengelu ca cutranpiuqueyechefengelu. Huelu fentren che tañi culpafechengen meu, eluucülequei ñi quisutu duamuhual, ütrirchefengeal ca mallmapiuquengeal. Fei tañi femngechi chengen meu doi üdeuquei pu che (2 Timoteo 3:1-5).

TATI PU CHE DOI ELUUCÜLEQUEI ÑI ÜDEAFIEL TATI PU CHE TRÜRNGENOLU AM QUISU ENGÜN MU. Tüfachi Mapu meu ngüchaltucungequei ta che ñi femal huesaque dungu, feimu mülei doi üdehun. ‘Com tüfachi chüf mapu ngüneniefi tati Huecüfü’, feimu tati pu che üdeuquei, lucatuuquei, illamcauquei ca yamüuquelai (1 Juan 5:19).

Biblia re quimeltuquelai cheu ñi tripan ti üdehun, doi mai quimeltuquei chumngechi ñi apümngeal.