Huesaque dungu rupalmi, ayüafuimi tami quelluaeteu quiñe cüme hueni. Alünque che rupan mu huesa dungu “Chau Ngünechen duamtulaeneu, chumquelai rume”, piquei. Huelu fei ta rüfngelai. Chau Jehová fentren dungu femquei taiñ cüme feleal. Cafei pichiñma mu cüme elcünutuai ti dungu mapu meu. ¿Chumngechi femai ta tüfa?

¿Inei tuhulquei com huesaque dungu? Biblia feipi: “Com mapu müleyechi pu che ngünenieyu ti Huecüfü” (1 Juan 5:19). Feichi “Huecüfü”, Satanás pingei. Jesús feipi Satanás fei “tati ngünenielu tüfachi mapu” (Juan 12:31). Huecüfü tuhulquei com huesa dungu. Jehová apümcayafi tati Huecüfü, fei com huesaque dungu ta mülehuetulayai. ¿Chumngechi femai tüfa?

Jesús meu, Chau Jehová huehuafi “ta Huecüfü, feiti nielu pepiluhun ñi langümcheal” (Hebreos 2:14; 1 Juan 3:8). Biblia pengeli Huecüfü quimniei “ñi pichilehuen tañi antü” petu tañi apümcangenon (Apocalipsis 12:12). Cafei, Jehová apümafi com pu huesalcamequelu (Salmo 37:9; Proverbios 2:22).

Apümcangele hula ti huesaque dungu mülelu mapu mu, Chau Jehová mupitripayai ñi ayünieel mapu mu ca pu che mu. Fei ¿chumletuaiñ mai?

Cüme feleaiñ. Biblia feipi: “Pu ñomngelu ngen mapu ngeai engün, ca rüf ayüucüleaingün ñi mülen fentren tüngün” (Salmo 37:11).

Nieaiñ fentren cüme iyael. Biblia feipi: “Fentren iyael müleai tüfachi mapu meu; huente huincul cütu huefpayai ti fün” (Salmo 72:16).

Nieaiñ cümeque cüdau ca cümeque ruca. Biblia feipi: “Deumarucayaingün, ca fei mu müleaingün, anümaingün ofad ca iñmuaingün ñi fün”. Jehová feipi “tañi dullinche ayühuaingün ñi deumael quisu ñi cuhu mu” (Isaías 65:21, 22).

¿Ayüafuimi femngechi feleal? Pichiñma mu, itrocom iñchiñ femngechi mongeleaiñ.

Fantepu mu, com pu che cutranquei ca laquei. Huelu felehuetulayai tati. Pichiñma mu, Chau Ngünechen ñi ayünieel mupitripayai. Quisu eluñmai Jesús ñi layal, “femngechi tuchi feyentule quisu meu, apümcangelayai. Huelu mai nieai rumel mongen” (Juan 3:16). Rupale tüfa, ¿chumletuaiñ mai?

Cutranhuelayaiñ. Biblia feipi: “Inei no rume feipilayai: ‘Iñche cutrancülen’. Tati pu che mülealu mapu mu, huiñoduamtungeai tañi huelulcan engün” (Isaías 33:24).

Lahuelayaiñ. Biblia feipi: “Tati Ñidol Ngünechen Jehová lümüafi tati lan dungu, ca liftuñmayafi engün tañi cülleñu ñi ange meu” (Isaías 25:8).

Aflayai taiñ mongen. Biblia feipi: “Ngünechen hulquei tati rumel mongen, Cristo Jesús meu, iñchiñ taiñ Ñidol” (Romanos 6:23).

Com pu layelu, huiñomongetuai. Jehová huiñomongeltuafi “pu norngechi che ca pu norngenochi che” (Hechos 24:15). Huiñomongetule engün, Jesús tañi duam mu, tañi lan mu, perdonangeaingün ñi culpan.

Chau Jehová, ¿chumngechi huechurpuai com tüfa?

Chau Ngünechen, huenu mu elcünui ñi Gobierno, ca dullifi ta Jesús ñi loncoleal fei mu. Femngechi, Chau Jehová femtripayai ñi ayünieel ta mapu ca pu che mu (Salmo 110:1, 2). Jesús feipifi tañi pu inanieteu ñi famngechi ngillatuafiel taiñ Huenu Chau: “Cüpape tami ngünenietual mapu” (Mateo 6:9, 10).

Chau Jehová ñi Gobierno, com mapu ngünenieai ca apümcayafi com cutrancahun. ¡Tüfa tati doi cüme Gobierno ñi müleafel! Feimu Jesús com ñi nehuen mu quimeltufi ta pu che “cümeque dungu Chau Ngünechen ñi ngünenietual mapu”, ca feipifi tañi pu discipulo ñi ca femngechi femal (Mateo 4:23; 24:14).

Jehová fente piuqueyenieiñmu, feimu feipicünui ñi femtripayal com tüfachi afmatufal dungu. Tüfa yafültucueiñmu taiñ quimafiel, fei fülconcüleal quisu mu. Femngechi femliyiñ, ¿chumngechi cümelcangeafuiñ? Cüpalechi troquiñ ngüneduamngeai ta tüfa.