Deu quimiyiñ fentren dungu Chau Ngünechen mu, feimu feula “quimafuiñ llemai ta Ngünechen”, piafuiñ. Biblia mu, quimpeiñ quisu ta Jehová pingei, ca doi quimfalngequei ñi piuqueyefengen. Cafei inaduampeiñ ñi chumün cuifi ca chem chumai taiñ cüme feleal. Huelu petu mülei fentren dungu taiñ quimafel Chau Dios mu. ¿Chumngechi quelluafeiñmu tüfa?

Quintufiliyiñ ta Chau Dios, quisu eluaiñmu taiñ fülconal quisu meu (1 Crónicas 28:9). Feimu quintufiliyiñ, doi quimafiyiñ fei doi hueniyeafiyiñ llemai. ¡Müna cüme dungu ta tüfa! (Salmo 25:14). Ngüneduamaiñ chumngechi cümelcayafeiñmu hueniyeafiel ta Jehová.

Rüf ayüucüleaiñ. Biblia mu, Jehová “taiñ ayühun-ngechi Chau Ngünechen” ca feipingei (1 Timoteo 1:11). Fülconcüleliyiñ quisu meu ca inayentufiliyiñ, rüf ayüucüleaiñ, tremoleaiñ ca cüme duamcüleaiñ (Salmo 33:12). Cafei, huesaque dungu mu conlayaiñ, cüme mongen yenieaiñ ca cüme yeucüleaiñ pu che engün, femngechi ayüucüleaiñ. Feimu famngechi feipiaiñ: “Iñche cai, cümei ñi fülconcülen Ngünechen mu” (Salmo 73:28).

Caque quiñeque iñchiñ duamtunieaiñmu Jehová. Quisu feipicünueiñmu: “Ngülamtuayu iñche ñi adquiñ mu” (Salmo 32:8). ¿Chem pin ta tüfa? Jehová eluqueiñmu caque quiñeque iñchiñ com taiñ duamnieel (Salmo 139:1, 2). Feimu cüme hueniyefiliyiñ, quisu incanieaiñmu llemai.

Rume cüme mongen nieaiñ. Fantepu meu, Jehová quelluqueiñmu taiñ ayüucüleal ca cüme duamcüleal. Huelu fei ca müten no. Quisu elueiñmu quiñe maneluhun (Isaías 48:17, 18). Biblia feipi: “Ñi nieal engün rumel mongen, mülei tami quimaeteu engün, tati quiñen rüfngechi Ngünechen, ca ñi quimafiel ta Jesucristo, eimi tami huercüfiel” (Juan 17:3). Fantepu meu cüdaungechi dungu ta rupaqueiñ, feimu taiñ maneluhun “nülcühue farcu reque felei taiñ mongen mu”, nehuentucuqueiñmu (Hebreos 6:19).

Ngüneduampeiñ quiñeque dungu taiñ quelluaeteu doi quimafiel ta Ngünechen, fei taiñ doi cüme hueniyeafiel. Huelu ca pütrün dungu mülei. Tami doi quimal, nütramcayafuimi quiñe Dunguquelu Ineingen Jehová cam conafuimi ti sitio jw.org mu.