AFLAYAI CHE

¿Chem pi ta Biblia? Chau Dios ‘ngünam deumalafi ti Mapu, doi mai deumafi tañi müleam tati pu che’ (ISAÍAS 45:18).

AFLAYAI TI MAPU

¿Chem pi ta Biblia? “Tati Mapu rumel mülecayai” (ECLESIASTÉS 1:4).

¿CHEM QUIMELTUEIÑMU? Biblia feipi turpu teifücangelayai tati Mapu, rumel müleai che feiti mu. Huelu, ¿chumngelu ñi feipiel ta Biblia ñi afal ti Mapu?

RAQUIDUAMNGE TÜFA MU: Biblia trürümfi femngechi dungu ñi rupayal Noé ñi antü mu reque. Feichi antü mu, ti Mapu apolefui re huesaque dungu mu (Génesis 6:13). Huelu Noé nor huentrungefui, feimu Dios montuleyu ca tañi familia. Huelu ti huesaque che com apümngeingün ti fütra mangin co mu. Feimu Biblia feipi: “Tati fütra mangin co meu apümcangei ta mapu meu mülechi mongen” (2 Pedro 3:6). Noé ñi antü mu apümcangelai tati Mapu, doi mai tati huesaque che ta apümngei. Ca femngechi ñi feipin ta Biblia ti Mapu ñi afal. Tüfa feipilai tañi rüf afal ta Mapu, doi mai feipilei tañi afal ta huesaque che ca com huesaque dungu.

COM HUESAQUE DUNGU AFAI

¿Chem pi ta Biblia? “Ca pichin antü mu, ti huesaque che ngehuetulayai engün; eimi puuquintuaimi cheu ñi mülequefel, huelu mülehuetulayai engün üye meu. Huelu pu ñomngelu ngen Mapu ngeai engün, ca rüf ayüucüleaingün ñi mülen fentren tüngün” (SALMO 37:10, 11).

¿CHEM QUIMELTUEIÑMU? Rupalu ti fütra mangin co Noé ñi antü mu, afi tati huesaque che. Huelu rupalu ti tripantu, ca mülerputui huesaque che. Pichilehuei Dios tañi apümafiel com ta huesaque che, feula hula rüf folilnentungeaingün. Feimu chumngechi ñi feipin ta Biblia: “Ti huesaque che ngehuetulayai engün”. Dios tañi Gobierno apümafi com tati huesaque dungu. Tüfachi Gobierno huenu mu mülelu, com norngechi che ta ngünenieafi huall Mapu mu.

RAQUIDUAMNGE TÜFA MU: ¿Chem chumpeai chi tati pu che ñi gobierno? ¿Quellupeafingün mai Dios ñi Gobierno? Biblia feipi femlayaingün, doi mai caiñetuafingün ta Chau Dios tañi Gobierno. ¡Müna huesa! (Salmo 2:2). ¿Chem dungu rupapeai chi? Chau Dios ñi Gobierno apümafi com pu che ñi gobierno, huelu quisu ñi Gobierno “chumcaunorume aflayai” (Daniel 2:44). ¿Chumngelu ngehuelayai pu che ñi gobierno?

¿Chem pi ta Biblia? “Tati pu che trecalelu, ngen-ngelai ñi adcünual quisu tañi trecan no rume engün” (JEREMÍAS 10:23).

¿CHEM QUIMELTUEIÑMU? Ti pu che ta deumangelai quisu tañi ngünehual engün. Ca femngechi, nielaingün adümuhun ñi ngünenieafiel caquelu pu che ñi niehuenoal huesaque dungu.

RAQUIDUAMNGE TÜFA MU: Quiñe lifru feipi: “Ti pu che ñi gobierno nielai nehuen ñi apümafiel ti filla ca ngüñün ca cutran, aucan ca quehuatun dungu, ca fütraque nüyün ca fütraque cürüftucu mahun” (Britannica Academic). Ca femngechi feipi ti lifru: “Quiñeque che raquiduamquei mülele quiñe gobierno müten Mapu mu, fei hula afafui com huesaque dungu”. Huelu com pu gobierno quiñeule rume engün, amuleafui ñi ngüneniengen ti Mapu culpafe pu che mu. Nielaingün nehuen ñi apümafiel ti huesaque dungu. Dios tañi Gobierno müten niei ta nehuen com tañi apümafiel tati huesaque dungu.

Biblia feipi ti norngechi che ngelai ñi llicaleal ñi epe aculen ñi afal ti huesaque dungu. Doi mai ayühun-ngei ñi fülcülepan Chau Dios tañi Gobierno, re cümeque dungu tañi mületual.

¿Chumül acupeai tüfa? Cüpalechi troquiñ mu peafiyiñ tüfa, chem pin ta Biblia.