Ti apostol Pablo kimniefuy ñi fente kuñiwün-ngen Weküfü ñi welulkakünuelchi dungu, welu kiñeke kristiano ngüneduamlafuyngün tüfa. Korintio waria mu, kiñeke peñi ka lamngen newenkülelu ñi mupiltun trokiwingün, feymu rakiduamkefuyngün ñi ngünenkanoaetew ti Weküfü (1 Korintio 10:12). Feymew Pablo ngüfetufi pu kristiano: “Welu llükaduamkülen chumngechi ta weküfü ngünenkafi ta Eva, eymün ka femngechi ngünenkangealu trokiniewiyiñ, fey tamün rakiduam famtripatuael Cristo tañi rüf küme dungu mew” (2 Korintio 11:3).

Pablo ñi feypin kimeltukeeiñmew taiñ upewtuleal ka kidutu maneluwnoal. Tami ngünenkanoaetew Weküfü ñi welulkakünuelchi dungu, müley tami kimal tunte ñi kuñiwün-ngen, fey kuñiwtukuwaymi.

Tati welulkakünuelchi dungu mu, ngünenkangekey pu che ka ngünenieñmangekey ñi rakiduam ka ñi femün. Tati welulkakünuelchi dungu koneltuley “ti koyla dungu, kakünuafiel ti rupan, ngünenkan dungu, weda rakiduamelafiel pu che, ngünenieafiel ñi rakiduam”. Tüfachi dungu “norngelay ka wedalkachekey” (Propaganda and Persuasion).

Ti welulkakünuelchi dungu, ñochikechi ngünenierpuafeiñmew taiñ rakiduam, ka ngüneduamlayafuiñ rume, feymu rume kuñiwün-ngey. Kiñe gas reke feley taiñ langümafetew, welu taiñ pepi penofiel ka nümütunofiel rume. Kiñe wentru chillkatukelu pu che ñi chumken, Vance Packard pingelu, feypi: “Ngüneduamlayafuiñ rume tunte taiñ kontupaetew” taiñ  femken mu ti welulkakünuelchi dungu. Kakelu wentru adümuwkelu feypi, ti welulkakünuelchi dungu mu tati pu che femkey rume kuñiwün-ngechi dungu ka wedwedkawkey, feymew langümürpukeyngün fillke trokiñche, ngüchaltukukeyngün weychan ka kayñetukefingün pu che tañi religion mu kam ñi tuwün mew (Easily Led—A History of Propaganda).

Tati pu che ngünenkayafeiñmew tañi welulkakünuelchi dungu mew, feymu ¡doyelchi may ti Weküfü ngünenkayafeiñmew! Kidu afkentu ngüneduamniekey pu che ñi femken. Kafey ngüneniemekey “kom tüfachi chüf mapu”, feymu chem dungu mew rume ñi ngünenieel ngüchaltukuafuy pu che ñi feyentual tañi koylake dungu (1 Juan 5:19; Juan 8:44). Kafey tañi welulkakünuelchi dungu mew ngünenkañmafi fentren che ñi rakiduam, feymu Biblia üytufi “tati ngünenkakefilu kom mapu mew mülechi pu che” (Apokalipsi 12:9; 2 Korintio 4:4). Feymu, ¿chumngechi kuñiwtukuwafuymi?

Jesus kimeltuy chumngechi taiñ kon-noal ti welulkakünuelchi dungu mu, kidu feypi: “Kimafimün tati rüf dungu, fey ti rüfngechi dungu lifrekünutuaeymünmew” (Juan 8:31, 32). Kiñe rüf weychan mew, tati pu kayñe kimelkeyngün koylake dungu, femngechi ñi ngünenkayafiel pu weychafe. Feymu pu weychafe müley ñi kimal chew tañi peal rüfngechi dungu. Eymi kay, ¿chew peafuymi rüfngechi dungu? Jewba wülkey rüfngechi dungu ti Biblia mew. Tüfa kelluaeymew tami ngünenkanoaetew Weküfü ñi welulkakünuelchi dungu (2 Timotew 3:16, 17).

Weküfü kimniey tüfa. Feymew tañi ngünenieel mu, fill rakiduamtukulelkeeiñmew taiñ papeltunoafiel ka chillkatunoafiel ti Biblia. Welu ¡eluwaiñ taiñ ngünenkanoaetew! (Efesio 6:11.) Ngelay taiñ wenche kimnienoal ti rüf dungu. Müley taiñ yafüluwal ñi küme kimafiel (Efesio 3:18). Rakiduamafuymi ñi feypin Noam Chomsky, kiñe wentru kimeltuchekelu, kidu feypi: “Iney no rume dikümtukulayaeymu tami longkontukuafiel ti rüf dungu. Eymi müley tami kintuafiel”. Feymu tami kintuafiel ti rüf dungu, fill antü chillkatuafimi ti Biblia (Hecho 17:11).

Weküfü ayükelay tami küme rakiduamal ka küme ngüneduamafiel tami feypingeel, ¿chumngelu? Kiñe lifru feypi tati pu che eluwnole ñi rakiduamal, doy küdawngelayay ñi feyentual welulkakünuelchi dungu (Media and Society in the Twentieth Century). Feymew  pekanka feyentulayaymi kom tami feypingeel (Proverbios 14:15). Chaw Dios elueymu tami rakiduamal ka ngüneduamal, feymu yafüluwnge tami kimtukual ñi rüfngen tami feyentukeel (Proverbios 2:10-15; 2 Timotew 1:7).

Kiñe weychafe feyentule ti welulkakünuelchi dungu, llükaleay ka müte eluwlayay ñi weychayal. Kafey, tüfachi dungu mew yafkawafuy tañi chaf weychafe engün kam püntüwafuy. Kiñe longkolechi weychafe Alemania tuwün-ngelu, feypi rupalu ti Wünen Fütra Weychan kom Mapu püle, Alemania wewngey tati welulkakünuelchi dungu mew. Feypi tati pu che ñi küymilen reke fente ñi feyentukeel ti welulkakünuelchi dungu. Famülke mu ka femngechi femkey ti Weküfü ñi kiñewkülenoal Jewba ñi trokiñche. Ngüchaltukukey taiñ yafkawal pu peñi ka lamngen iñchiñ. Kam rakiduamelafeiñmew Jewba tañi trokiñche ñi nor femkenon, femngechi taiñ püntütripayal.

Eluwkilnge tami ngünenkangeal. Inafinge Biblia tañi ngülam tami kiñewküleal pu peñi ka lamngen engün. Biblia ta ngülamtukeeiñmew taiñ eluwküleal ñi welukonkechi wiñoduamuwal ka taiñ kümelkawfemtual (Kolosense 3:13, 14; Matew 5:23, 24). Ka feypikeeiñmew taiñ püntüwnoal pu peñi ka lamngen mu (Proverbios 18:1). Pepikawnge tami ngünenkanoaetew Weküfü ñi welulkakünuelchi dungu. Ramtuwnge: “Ñi weda duameletew mu kiñe peñi kam lamngen, ¿chem chumün? Tañi femün mu, ¿ayüwülfiñ ta Jewba kam ti Weküfü?” (Galata 5:16-26; Efesio 2:2, 3).

Kiñe weychafe maneluwnole tati longkolelu mew, küme weychalayay. Feymew pu kayñe entukeyngün welulkakünuelchi dungu, femngechi tati pu weychafe ñi maneluwnoal pu longkolelu mew. Welulkawle pu longkolelu, pu kayñe feypiayngün: “¡Manelfalngelayngün! ¡Eluwkilnge tami wedalkayaetew!”. Weküfü ka femngechi femkey. Kidu ayüley taiñ maneluwnoal pu wentru mew Jewba ñi elfalkünufiel tañi trokiñche mu.

¿Chumngechi eluwaymi tami ngünenkangenoal? Eluwnge tami püntünoal Jewba ñi trokiñche mew. Maneluwnge ka kelluntukufinge pu wentru Jewba ñi elfalkünufiel, welulkawle engün rume (1 Tesalonisense 5:12, 13). Tati pu püntütripalu ka kayñetutufilu Jewba kam kakelu che dalluntukuafuyngün Jewba ñi trokiñche (Tito 1:10). Welu eluwkilnge tami welulkayaetew engün tami rakiduam, rüfngelu  trokifalngefule rume ñi feypin engün (2 Tesalonisense 2:2). Doy may, inange Pablo ñi ngülamtufiel ta Timotew: “Amulenge tüfey tami dew kimyeelchi küme dungu mew”, ka longkontukunge “iney tami kimeltuetew” (2 Timotew 3:14, 15). Epe pataka tripantu mu, Jewba kimeltukeeiñmew ti rüf dungu ti kim manelfal kona mew, feymew rakiduamnge chumngelu feyentuafuymi tüfa (Matew 24:45-47, TNM; Ebrew 13:7, 17, TNM).

Kiñeke mu, doy kimfalngey chumngechi tami küpa ngünenkayaetew Weküfü. Kidu llükalkakeeiñmew, tüfa kiñe “welulkakünuelchi dungu fütra kuyfi tuwün-ngelu” (Easily Led—A History of Propaganda). Kiñe wentru kimeltuchekelu Inglaterra mu, Philip Taylor pingelu, feypi tati pu asirio ñi llükalkakefiel tañi pu kayñe ka ñi entukeel welulkakünuelchi dungu, fey ñi ngünenieafiel engün. Ka femngechi femkey Weküfü, küpa llükalkakeeiñmew taiñ püntünentuaetew Jewba mu, kidu ayüley taiñ llükayafiel pu che, ti kayñetun dungu kam tati lan (Isaías 8:12; Jeremías 42:11; Ebrew 2:15).

¡Eluwkilnge tami femngechi ngünenkayaetew Weküfü! Jesus feypi: “Feypiwayiñ tamün llükanoafiel ta tüfeychi pu che tati ayükelu tamün langümaetew. Dew femle ngelayay ñi doy chumafel” (Luka 12:4). Jewba feypikünuy tami kuñiwtukuaetew, eluaetew “fütra pepiluwün”, ka tami kelluaetew ñi chaftuafiel ti Weküfü, feymu kom piwke mu maneluwnge Kidu mew (2 Korintio 4:7-9; 1 Pedro 3:14).

Kiñeke mu, ngañwadküleafuymi kam llükaleafuymi. Welu longkontukunge Jewba ñi feypifiel ta Josue: “Yafüluwnge ka newenkülenge. Eluwkilnge tami ngünenieaetew ti llükan ka pellken, tami Chaw Ngünechen Jewba mülelu am eymi mu chew rume tami amuken” (Josué 1:9). Fill rakiduamkülelmi, müchay müten ngillatuafimi ta Jewba ka nütramkayafimi chumngechi tami duamkülen. Kidu eluaeymu llemay tañi “fütra küme tüngün”, tüfa ‘yafülnieñmayaeymew tami piwke ka tami rakiduam’. Femngechi yafüluwküleaymi tami feyentunoal Weküfü ñi welulkakünuelchi dungu (Filipense 4:6, 7).

¿Akordaymi ti welulkakünuelchi dungu ñi feypiel Rabsake, pu asirio ñi werken, ñi llükalkayafiel Jewba ñi pu che? Küpa rakiduamelfi pu che iney no rume ñi montulafetew, Jewba no rume. Feypi Jewba ñi werküfiel pu asirio tañi apümkayafiel Jerusalen. Feymu Jewba, ¿chem feypifi ta Juda ñi longko ülmen? “Llükalekilnge tami allküelchi dungu mu, tati Asiria longko ülmen ñi pu kona tañi feypielchi dungu weda dunguyeenew” (2 Reyes 18:22-25; 19:6). Fey Chaw Dios werküfi kiñe küme püllü ñi langümafiel 185.000 asirio kiñe pun mew müten (2 Reyes 19:35).

¿Adkintufimi kiñe che ngüneduamnolu ñi ngünenkamekengen? Küpa wirarelfimi chi: “¡Feyentukilnge! ¡Ngünenkamekengeymi!”. Ka femngechi pu kümeke püllü wirarelmekeeymew reke: “¡Eluwkilnge tami ngünenkayaetew Weküfü!”.

Feymew llemay, feyentukilnge Weküfü ñi welulkakünuelchi dungu (Proverbios 26:24, 25). Allkütufinge ta Jewba ka rumel maneluwnge Kidu mew (Proverbios 3:5-7). Kidu piwkeyeeymu ka feypieymu: “Kimchengeaymi, iñche ñi fotüm, ka ayüwülelman tañi piwke” (Proverbios 27:11). Femngechi femülmi, ¡kuñiwtukuafimi tami rakiduam ñi ngünenkangenoal!