Inayentuafiyiñ ta Jewba, taiñ Chaw Ngünechen yafültukuchekelu
“Püramyekefiyiñ ta Ngünechen [...]. Kisu ta yafülkeeiñmew kom taiñ kutrankawün mew” (2 KORINTIO 1:3, 4).
1. Adan ka Eva ñi kayñetun mu, Jewba ¿chumngechi yafültukufi itrokom che?
TAIÑ Chaw Jewba yafültukuchekey. Kidu afkentu femkey tüfa, kulpalu Adan ka Eva ka fantepu mu. Feymu ñi kayñetuetew engu, pürüm müten Jewba eli kiñe pelon dungu ñi yafültukuafiel pu küpaleyechi che ka ñi eluafiel maneluwün. Tüfa wirintukuley Génesis 3:15 mu, ka feypi ñi apümkangeal Weküfü ka kom tañi pepikaelchi wedake dungu (1 Juan 3:8; Apokalipsi 12:9).
JEWBA YAFÜLTUKUFI TAÑI PU POYEKEETEW KUYFI MU
2. Jewba, ¿chumngechi yafültukufi ta Noe?
2 Rakiduamafuiñ Jewba chumngechi ñi yafültukufiel ta Noe, tañi poyekeetew. Feychi mu, pu che kewafengefuy ka femkefuy pekan kudumuwün, feymu Noe ka tañi pu che müten poyekefuy ta Jewba. Tüfa ngañwadelkefeyew chi (Génesis 6:4, 5, 11; Juda 6). Feymu Jewba yafültukufi ta Noe ka newentukufi, tüfa kellueyew ñi amuleal tañi küme chengen ka tañi poyekefiel ta Chaw Dios (Génesis 6:9). Kidu feypifi ta Noe ñi apümkangeal pu wedake che, ka kimeltulelfi chem chumal ñi mongetripayal tañi pu che (Génesis 6:13-18). Jewba yafültukufi llemay ta Noe.
3. Jewba, ¿chumngechi yafültukufi ta Josue? (Inaduamnge ti adentun ellaka mu mülelu).
3 Amulechi tripantu mu, Jewba ka yafültukufi ta Josue. Kidu elfalelngefuy kiñe fütra küdaw: adnieafiel pu israelche ñi nüafiel ti feypikünuelchi mapu ka weychayafiel ti fütrake trokiñche ñi mülekefel üyew. Kom tüfa llükalkapelaeyew ta Josue, feymu Jewba feypifi ta Moyse: “Elfalkünufinge ta Josue, fey yafültukufinge ka newentukufinge, kidu am wüne konalu, fey inaleay tüfachi trokiñche, ka kidu ñi femün mu llowayngün ti mapu tami peafiel” (Deuteronomio 3:28). Fey wüla Jewba kütu yafültukufi ta Josue, feypilen mu: “¿Feypipelaeyu ama? Yafüluwnge ka newenkülenge. Eluwkilnge tami ngünenieaetew ti llükan ka pellken, tami Chaw Ngünechen Jewba mülelu am eymi mu chew rume tami amuken” (Josué 1:1, 9). Tüfa, ¿müna yafültukupelaeyew ta Josue?
4, 5. 1) Jewba, ¿chumngechi yafültukufi tañi trokiñche kuyfi mu? 2) Chaw Jewba, ¿chumngechi yafültukufi tañi Fotüm?
4 Jewba kafey yafültukufi tañi trokiñche. Yengelu pu israelche Babilonia mew, Jewba kimniefuy ñi duamnieel engün tañi yafültukungeal, feymu feypikünulelfi tüfa: “Llükakilnge, iñche am eymi mu mülen. Fill rakiduamkülekilnge, iñche am eymi tami Ngünechen. Iñche ta yafülaeyu, may, iñche ta kelluaeyu; iñche llemay nünieaeyu tañi man kuwü nor dungu mew” (Isaías 41:10). Rupalechi tripantu mu Jewba ka yafültukufi pu wünenke kristiano. Famülke mew ka femngechi yafültukukeeiñmew ta iñchiñ (papeltunge 2 Korintio 1:3, 4).
5 Jewba ka yafültukufi tañi Fotüm Jesus. Fey fawtisawlu wüla, allküy tañi Chaw ñi dungun wenu mu nagpalu: “Fey tüfa ta iñche ñi sakin Fotüm, ñi fentren manelnieel” (Matew 3:17). Amuldunguyawlu Jesus Mapu mu, müna yafültukupelaeyew tüfa.
JESUS YAFÜLTUKUFI TA KAKELU
6. Jesus ñi nütram tati rume falichi moneda mu, ¿chumngechi yafültukuafeiñmu?
6 Jesus inayentufi tañi Chaw, feymu yafültukukefuy pu che ñi nor piwkeyeafiel ta Jewba. Femi tüfa nütramkalu kiñe ülmen wentru mu ka tati moneda rume falilu. Fey nütramkay chem ñi feypifiel ti ülmen wentru tañi epu küme kona: “Rume kümey. Rume küme kona ta eymi ka külfün wentru ta eymi. Dew am küme femlu eymi pichin mew, doy alün pülata ta elfalkünuaeyu. Konpange ka kiñentrür nieayu ayüwün” (Matew 25:21, 23). ¡Müna yafültukufi tüfa tañi pu inanieetew ñi küme küdawülnieafiel ta Jewba!
7. Jesus, ¿chumngechi yafültukufi tañi pu apostol, doyelchi may ta Pedro?
7 Jesus ñochi chengefuy, pu apostol mekerkefulu rume ñi notukadunguwün iney tañi longkoletual kidu engün mew. Jesus ngülamtufi engün ñi ñom chengeal, Luka 22:24-26). Fentren rupa Pedro welulkakefuy ka weñangkülfi ta Jesus (Matew 16:21-23; 26:31-35, 75). Welu Jesus turpu famentulaeyew, doy may yafültukueyew ka elfalkünueyew kütu ñi yafülduamafiel ta kakelu (Juan 21:16).
poyecheal ka ñidolkawnoal (KUYFIKE POYEKEFILU TA JEWBA YAFÜLTUKUCHEKEFUY
8. Esekias, ¿chumngechi yafültukufi pu che ka pu longkolechi weychafe?
8 Petu ñi miyawpanon Jesus taiñ kimeltuaetew ñi yafültukucheal, pu poyekefilu ta Jewba afkentu kimniefuy ñi duamfalngen tañi yafültukucheal. Rakiduamaiñ Esekias ñi femün mu pu asirio aneltumekefilu pu che Jerusalen mew. Biblia feypi: “Fey wüla elfalkünuyefi longkolechi weychafe ñi adnieafiel ti trokiñche, ka trapümfi engün ti pülasa mew chew ñi trawüluwken pu che wülngiñ waria mu, fey yafültukufi feypilen mew: ‘Ñiwaleaymün ka newenkülemün. Llükakilmün ka müllmüllkilmün ti Asiria longko ülmen ka tañi che ñi duam mu, iñchiñ mu am doy mülelu ta kidu engün ñi nieel mew. Kidu engün mu müley che ñi newen, welu iñchiñ mu müley ta Jewba, taiñ Chaw Ngünechen, taiñ kelluaetew ka kewayal taiñ weychan’. Fey tati pu che eluwi ñi newentuwal Esekias tañi dungun mew, tati Juda longko ülmen” (2 Crónicas 32:6-8).
9. Job, ¿chumngechi kimeltukeeiñmew yafültukucheal?
9 Ngüneduamaiñ Job ñi femün. Kidu ngañwadkülefuy, welu tañi pu küpa yafültukuetew weda entuyngün ñi feypin ka nüngayeleyew ta Job. Fey kidu kimeltulelfi chumngechi yafültukucheal. ‘Eymün weda duamkülefulmün, iñche tañi feypin mu yafültukuwafuyiñ tamün küme duamküleal’ pifi (Job 16:1-5). Fey wüla Eliu ka Jewba kütu yafültukufi ta Job (Job 33:24, 25; 36:1, 11; 42:7, 10).
10, 11. 1) Jefte tañi ñawe, ¿chumngelu duamniefuy ñi yafültukungeal? 2) Famülke mu, ¿iney yafültukuafuiñ?
10 Jefte tañi ñawe ka duamniefuy tañi yafültukungeal. Jefte jusgachekefuy Israel mu, fey ñi wewafiel pu amonche, feypikünufi ta Jewba: ‘Wiñotuli wüla ñi ruka mew, ti wünen che tañi trafpaetew wülkünuafiñ ñi küdawal tami tolto ruka mew’ pifi. Fey, ¿iney am trafmeeyew? Tañi kiñen ñawe, fey allfüy reke Jefte tañi piwke. Welu mupi ñi feypikünuel, feymu werküfi tañi ñawe Jewba ñi tolto ruka mu tañi küdawülafiel kom ñi mongen mew (Jueces 11:30-35).
11 Tüfa müna weñangküleyew ta Jefte, welu doy weñangküleyew tañi ñawe. Femngelu rume, kidu eluwi ñi femal tañi chaw ñi feypikünuel (Jueces 11:36, 37). Feymu turpu fütangelay ka nielay püñeñ, fey tañi chaw nielay yomelche. Feley llemay, müna duamniefuy ñi yafültukungeal Jefte tañi ñawe. Feymu Biblia feypi pu israelche ñi wimtun: “Fill tripantu, pu üllchake domo Israel tuwün-ngelu amukefuyngün yafültukumeafiel Jefte ti galaadche ñi ñawe, meli antü fill tripantu” (Jueces 11:39, 40). Jefte tañi ñawe reke, famülke mew müley fentren peñi ka lamngen nienolu afkadi, femngechi ñi doy küdawülafiel ta Jewba. Feymu, ¿kümelayafuy am sakiafiel ka yafültukuafiel engün? (1 Korintio 7:32-35).
PU APOSTOL YAFÜLTUKUFI TAÑI PU PEÑI KA LAMNGEN
12, 13. Pedro, ¿chumngechi yafültukufi tañi pu peñi ka lamngen?
12 Ti pun petu ñi lanon Jesus, kidu feypifi ta Pedro: “Simon, Simon, allkütunge. Weküfü ta ngillatupefuy eymün tamün chiñükayaetew kachilla reke. Welu iñche ta llellipupefiñ ta Ngünechen eymi mew, femngechi tañi afnoael tami mupiltun iñche mew. Fey eymi, dew wiñotulmi ta iñche mew, kelluafimi tami pu peñi tañi newentuleael engün” (Luka 22:31, 32).
Pu apostol ñi wirintukuel yafültukufi pu peñi ka lamngen wünen siglo mu, ka femngechi yafültukukeeiñmu ta iñchiñ. (Inaduamnge parrafo 12-17).
13 Lalu wüla Jesus, Pedro kiñe wünen longkolelu trokingekefuy ti trawünche mu (Galata 2:9). Pu peñi ka lamngen yafültukuwingün ngüneduamlu ti apostol ñi fütra piwkengen Pentekoste mu ka kakelu rupa. Fentren tripantu rupalu ñi küdawülkefiel ta Jewba, wirintukulelfi pu trawünche: “Wirifiñ tamün ngülamuwafiel [yafültukuwafiel, TNM] ka femngechi tamün küme kimael tamün llowelchi küme felen mew rüf dungu mew kimfali Ngünechen tañi piwkeyechen. ¡Fey rumel küme inaniefimün Ngünechen tañi piwkeyechen!” (1 Pedro 5:12). Kom ñi wirintukuel Pedro müna yafültukufi pu peñi ka lamngen. Famülke mew ka yafültukukeeiñmu, epechi taiñ peniefiel reke ñi femtripan Jewba ñi feypikünun (2 Pedro 3:13).
14, 15. Juan tañi wirintukuel, ¿chumngechi yafültukukeeiñmu?
14 Apostol Juan ka wünen longkolelu Juan 13:34, 35).
trokingekefuy ti trawünche wünen siglo mu. Kidu wirintukuy kiñe ayüfalchi lifru nütramkalu Jesus ñi amuldungun mu. Amulechi tripantu mu, feychi wirintukun müna yafültukukefi pu inaniefilu ta Jesus, ka femngechi yafültukukeeiñmew famülke mu. Juan ñi wirintukuel müten pengeli Jesus ñi feypin chumngechi tañi kimfalngeal ñi pu rüf inanieetew: ñi piwkeyeniewken mu engün (papeltunge15 Juan tañi küla wirielchi karta mu ka müley falinke rüf dungu. Weñangküleliyiñ taiñ rakiduamtukuniefiel mu taiñ kulpan, yafültukuafeiñmew kimal Jesus ‘tañi mollfüñ taiñ liftutuetew kom kulpan mew’ (1 Juan 1:7). Welu amulele taiñ kulpantuwken, yafüduamelafeiñmew taiñ papeltual ‘Ngünechen ñi doy fentrelen iñchiñ taiñ piwke mew’ (1 Juan 3:19, 20). Biblia mu, Juan müten wirintukuy tüfa: “Ngünechen am ta piwkeyen ürke” (1 Juan 4:8, 16). Kafey tañi epungechi ka külangechi karta mu, sakifi pu peñi ka lamngen “ñi küme amulen rüf dungu mew” (3 Juan 3, 4; 2 Juan 4).
16, 17. Pablo, ¿chumngechi yafültukufi pu weke kristiano?
16 Apostol Pablo inayentufali tañi yafültukucheken mu. Pichi rupalu Jesus ñi lan mu, epe kom pu apostol mülenagi Jerusalen mu, chew ñi mülekefel ti kiñewkülechi ngünenielu (Hecho 8:14; 15:2). Pu kristiano Judea mu, amuldungukefuy Jesus mu pu dew feyentulu ñi mülen ta Ngünechen. Welu Jewba ñi newen adniefi ta Pablo ñi amuldungumeafiel pu griegoche, romache ka kakelu che poyekefilu ta fentreken dios (Galata 2:7-9; 1 Timotew 2:7).
17 Pablo ka miyawi Grecia, Italia ka Turquia pingechi trokiñ mapu mu. Üyew amuldungufi pu judiungenolu ka adniefi pu we kristiano ñi trawünchengerpual. Welu tüfa engün ñi pu tuwünche wedalkamekefeyew, feymu duamniefuyngün ñi yafültukungeal (1 Tesalonisense 2:14). Feychi 50 tripantu püle, Pablo wirilelfi kiñe karta ñi yafültukuafiel ti we trawünche Tesalonika mu, feypilu: ‘Rumel mañumtuniekefiyiñ ta Ngünechen itrokom eymün mew, ka rakiduamtukuniewkeyiñ taiñ ngillatun mew. Fill antü rakiduamtukuniewkeyiñ iñchiñ taiñ Chaw Ngünechen ñi adkiñ mew, kom fente küme mupiltulen mew küdawkeymün ta eymün ka fentre küme piwkeyen mew welukonkechi kelluwküleymün ka femngechi yafüluwün mew maneluwkülekeymün’ (1 Tesalonisense 1:2, 3). Kafey ngülamtufi: “Yafültukuwmün ka welukonke newentuwkülemün” (1 Tesalonisense 5:11).
TI KIÑEWKÜLECHI NGÜNENIELU YAFÜLTUKUCHEKEY
18. Ti kiñewkülechi ngünenielu, ¿chem chumi ñi yafültukuafiel ta Felipe?
18 Jewba ñi duam mu, ti kiñewkülechi ngünenielu yafültukukefi pu longkolelu ka kom pu koneltulu ti trawünche wünen siglo mew. Tüfa kelluntukufi ta Felipe ñi amuldungufiel pu samariache Jesus mu. Feymu werküfingün ta Pedro ka Juan, epu peñi koneltulelu ti kiñewkülechi ngünenielu mu, ñi llellipual pu we kristiano tañi llowal Jewba ñi newen (Hecho 8:5, 14-17). Feyngey tati, tañi kelluntukuetew ti kiñewkülechi ngünenielu müna yafültukueyew ta Felipe ka pu weke peñi ka lamngen.
19. Pu wünenke kristiano papeltulu ti kiñewkülechi ngünenielu ñi karta, ¿chum duamnagi engün?
19 Fey wüla ti kiñewkülechi ngünenielu mülefuy ñi dullial chem chumal tüfachi falin dungu mew: pu kristiano judiu tuwün-ngenolu, ¿müley ñi sirkunsidangeal tañi inafiel Moyse ñi ley? (Hecho 15:1, 2). Ti kiñewkülechi ngünenielu ngillatufi ta Jewba ñi eluaetew tañi newen ka chillkatuy ñi chem pilen Jewba tañi Dungu, fey ngüneduami ñi duamfalngenon tañi sirkunsidangeal engün. Fey wüla ti kiñewkülechi ngünenielu wirintukuy kiñe karta feypilu tañi dulliel, ka werküfi kiñeke peñi ñi eluafiel pu trawünche. Papeltulu feychi karta, pu peñi ka pu lamngen “rume ayüwi engün ñi rume yafültukuetew mew tati wirin dungu” (Hecho 15:27-32).
20. 1) Famülke mu ti Kiñewkülechi Ngünenielu, ¿chumngechi yafültukukeeiñmew? 2) ¿Chem ramtun inaduamaiñ ti küpalechi chillkatun mu?
20 Famülke mu, ti Kiñewkülechi Ngünenielu pu Dungukelu Iney Ngen Jewba mew, yafültukukefi pu fill antü femkelu sakin küdaw, pu küdawkelu Fetel mu ka kom iñchiñ. Pu peñi ka lamngen wünen siglo mew reke, ¡müna ayüwmakeeiñmu taiñ yafültukukeetew ti Kiñewkülechi Ngünenielu! Kafey 2015 tripantu mu entuy ti papil Jehová desea que vuelva, femngechi ñi yafültukuafiel tañi wiñotual pu püntüwlu Jewba mew. Welu, ¿pu longkolelu müten müley ñi yafültukucheal ti trawünche mu? Ngüneduamaiñ tüfa ti küpalechi chillkatun mew.