1, 2. ¿Chem fill rakiduamelafeymu? ¿Chem dungu mu reke feleymi? (Inaduamnge ti adentun ellaka mu mülelu).

RAKIDUAMNGE tami küpa amun kiñe falin-ngechi trawün ka mapu mu. Tami puwal, duamfali tami amual mikro mu. We akulmi terminal mew, fill rakiduamküleafuymi chi mülelu am fentren che ka alünke mikro. Welu tüngduamküleaymi küme kimnielu am chew küpa amuymi ka chem mikro yeaeymu. Tami ñamkiyawnoal, pekan mikro mu püralayafuymi.

² Ka femngechi feley ta mongen, ka eymi weche feleymi feychi pu che reke mülelu terminal mew. Kiñeke mu, müley fillke dungu tami dullial, feymu fill rakiduamafuymi. Welu küme kimülmi chew tami amual, küdawtulayaymi tami küme dullial. Fey, ¿chem rüpü inayaymi tami mongen mu?

3. ¿Chem kelluaeymu küme dullial tami mongen mew?

³ Tüfachi chillkatun yafültukuafeymu tami eluwal ñi tuteafiel ta Jewba. Tami femal tüfa, duamfali inayal Jewba ñi ngülam tami dullial ti educacion, ti küdaw, nieal kam nienoal afkadi ka pichikeche, ka chem dungu rume tami  mongen mew. Kafey müley tami rakiduamal chumngechi doy küdawülafiel ta Jewba, ka yafüluwal tami femürpuafiel. Fey eluwkülelmi tami poyeafiel ta Jewba, kidu kümelkayaeymu ka kelluaeymu tami küme tripayal. Biblia feypi: “Jewba mew elkünuaymi kom tami femken, fey küme tripayay tami pepikakünuel” (Proverbios 16:3).

4. ¿Chem inaduamaiñ tüfachi chillkatun mu?

⁴ ¿Chumngelu kümey tami rakiduamal chumngechi doy küdawülafiel ta Jewba? Tüfachi chillkatun mew inaduamaiñ küla dungu taiñ wiñoldungual tüfa. Tati epu wünenke dungu pengelaeymu tüfa: eluwülmi tami doy küdawülafiel ta Jewba, doy küme weniyeafimi. Ka ti af dungu pengelaeymu chumngelu fente kümey rakiduamal tami chumal petu tami wechengen mu.

5. ¿Chem doy falin dungu müley taiñ eluwal ñi doy küdawülafiel ta Jewba?

⁵ Feypiafuiñ ñi mülen fillke dungu taiñ eluwal ñi doy küdawülafiel ta Jewba, welu tati doy falin-ngelu fey tüfa: taiñ mañumafiel fente taiñ piwkeyeetew ka kom ñi femel taiñ kümelkayaetew. Kiñe wirintukulu salmo feypi: “Kümey taiñ mañumafiel ta Jewba [...]. Tami femken mew eymi ayüwülkeen, awem Jewba; tami dewman mew iñche wirarkülen ayüwün mu” (Salmo 92:1, 4). Feymu weche, rakiduamnge kom tami eluetew Jewba: ti mongen, ti Biblia, ti trawünche ka ti maneluwün tami rumel mongeleal ti we Mapu mu. Kafey elueymu tami kimafiel ta kidu ka tañi rüf dungu. Feyngey llemay, eluwkülelmi tami doy küdawülafiel ta Jewba, pengelaymi fente tami mañumfiel, fey doy küme weniyeafimi.

6. 1) Tami yafüluwken ñi doy küdawülafiel ta Jewba, ¿chumngechi tüfa kelluaeymu tami doy weniyefiel? 2) Pichikalu rume eymi, ¿chem rakiduamafuymi tami femal?

⁶ Inan mew, yafüluwülmi tami femürpual tami rakiduamel, femaymi kümeke dungu Jewba mew, tüfa kelluaeymu tami doy weniyeafiel. Ti apostol Pablo feypikünuy: “Ngünechen am nor dungukelu, ka ngüyünentulayay eymün tamün femelchi dungu ka ti piwkeyewün tamün pengelelfiel” (Ebrew 6:10). Welu “rume pichikan iñche, fey ¿chem femafun ñi doy poyeafiel ta Jewba?”, feypilayaymi. Rakiduamnge chem ñi femel tüfachi wechekeche: Christine niefulu 10 tripantu, eluwi ñi papeltual kiñeke che ñi mongen nor piwkeyekefilu ta Jewba. Toby niefuy 12 tripantu eluwlu ñi papeltual kom Biblia petu ñi fawtisawnon. Maxim niefulu 11 tripantu ka tañi deya Noemi niefulu 10 tripantu fawtisawingu. Fey elduamingu ñi küdawal Fetel mu. Tañi yafüluwal engu ñi femürpual tüfa, tañi traf ruka mew elkünuyngu ti papel duamfalngelu ñi werküafiel tañi pengelal ñi küpa küdawal Fetel mu. Eymi kay, ¿chem rakiduamafuymi tami femal ñi doy küdawülafiel ta Jewba? Ka, ¿chumngechi yafüluwaymi tami femürpual? (Papeltunge Filipense 1:10, 11).

7. Adkünulmi chem chumal tami mongen mew, ¿chumngelu tüfa kelluaeymu tami dullial?

⁷ Inaduamaiñ ti af dungu pengelkelu chumngelu fente kümey rakiduamal  tami chumal. Tami wechengen mu, müley tami dullial chem educacion nieal, chew küdawal ka kakelu femngechi dungu. Rakiduamnge tüfa, üngkü amulelmi welu ka rüpü pelmi, küdawtulayaymi chem rüpü inayal küme kimülmi chew tami küpa amun. Ka femngechi, küme kimülmi chem tami küpa femün tami mongen mew, newe küdawtulayaymi dullial tami chumal. Proverbios 21:5 feypi: “Chem ñi adkünuel tati küme küdawkelu, küme tripayay llemay”. Feymu, matu rakiduamülmi chumngechi doy küdawülafiel ta Jewba, müchay müten küme tripayaymi. Femngechi rupay Damaris, duamnielu ñi dullial kiñe falin dungu tañi wechengen mu. Inaduamaiñ ñi rupan.

8. ¿Chumngelu kiñe üllcha domo dulli ñi amunoal universidad mu?

⁸ Damaris müna küme tripay tañi chillkatuwe mu, feymu dewlu ‘amuafuymi universidad mu tami abogadongerpual, fey kullilayaymi rume’, pingey. Welu kidu dulli ñi küdawal rangiñ antü, ¿chumngelu? Petu pichikalu, kidu dulli tañi wünelerpual amuldungun mu. Feymu duamniefuy ñi küdawal rangiñ antü müten. Kidu feypi: “Amufuli universidad ñi abogadongerpual, küme kullingeafun, welu pepi küdawlayafun rangiñ antü”. Famülke mu, Damaris yeniey 20 tripantu ñi wüneleken amuldungun mew. ¿Wiño witrawkey ñi dulliel mu? Femlay. Kidu feypi: “Chew ñi küdawken iñche, kimfiñ fentren abogado, tüfa engün femkey ti küdaw ñi femafel iñche amufuli universidad mew. Welu fentren engün ayüwülkelaeyew ñi küdaw. Dullilu iñche ñi wüneleal amuldungun mu, femngechi weda duamkelan, ka rume ayüwülkeenew ñi küdawülkefiel ta Jewba kom tüfachi tripantu”.

9. ¿Chumngelu sakifali taiñ pu wechekeche?

⁹ Taiñ puke trawünche wall Mapu mu, fentren wechekeche sakifali, eluwlu engün am ñi weniyeafiel ta Jewba ka küdawülafiel kom piwke mew. Kidu engün ayüwküley ñi mongen mu, ka küpa inakeyngün Jewba ñi ngülam tañi dullial ti educacion, chew küdawal, nieal kam nienoal familia, ka kom dungu tañi mongen mew. Salomon feypi: “Maneluwnge Jewba mew kom tami piwke mu [...]. Kom tami rüpü mew rakiduamanieafimi, ka kidu norümaeymu chew tami miyawal” (Proverbios 3:5, 6). Feymu weche, piwkentukunge tüfa: ¡Jewba müna piwkeyeeymu! Kidu falintukeeymu, feymu ingkañpeaeymu, adnieaeymu ka kümelkayaeymu.

10. 1) ¿Chumngelu müley taiñ doyümafiel ti amuldungun küdaw? 2) ¿Chem femafuymi tami doy küme nütramkayal tami feyentun mew?

¹⁰ Eluwülmi tami tuteafiel ta Jewba, fey yafüluwaymi tami amuldungucheal. Jesus feypi: “Petu ñi puwnon ñi afael ta antü, tati montun werkün dungu feley tañi kimelngeael ta kom chüf mapu mew” (Marku 13:10). Feymu feley ñi pürüm femngeal taiñ amuldungun küdaw ka müley taiñ doyümafiel taiñ mongen mew. Fey weche, ¿rakiduamafuymi tami doy amuldungual? ¿Wüneleafuymi amuldungun mew? Welu, ¿müte ayüwülnoelmu amuldungucheal? ¿Chumngechi doy küme nütramkayafuymi tami feyentun mew? Epu dungu  femafuymi: küme pepikawnge, ka fentekünukilnge tami nütramkayafiel ta kakelu Jewba mew. Femülmi tüfa, afmatuafuymi fente tami ayüwülaetew amuldungucheal.

11. ¿Chumngechi pepikawafuymi tami wiñoldungual chem tami ramtungeel?

¹¹ Wüne, pepikawafuymi tami wiñoldungual kiñeke dungu tami ramtuafetew tami pu kompañ. Tüfa ta kiñe: “¿Chaw Ngünechen ngüneduamniekey taiñ kutrankawmeken? ¿Chem rakiduamimi?”. Tami wiñoldungual tüfa, müley fillke dungu tami kelluaetew jw.org mu. Kintuafuymi BIBLIA ÑI KIMELTUKEEL > WECHEKECHE > KIÑEKE KELLU TAMI CHILLKATUAL > ¿CHEM AM TATI RÜF DUNGU CHAW NGÜNECHEN MEW? (TROKIÑ 1). Fey peaymi kiñe kellu tami chillkatual feypilelu “Kutrankawliyiñ, ¿duamtuniepeeiñmu may Chaw Ngünechen?”. Tüfa pepikayaeymu tami wiñoldungual. Fey ngüneduamafuymi tüfachi versikulo Biblia mu tami nütramkayal: Santiaw 1:13, Génesis 6:5, 6 ka 1 Juan 4:8. Kafey ngüneduamülmi kakelu kellu tami chillkatual, pepikawküleaymi tami wiñoldungual fillke ramtun (papeltunge 1 Pedro 3:15).

12. Kiñe weche wentru, ¿chem rupay chillkatuwe ruka mew?

¹² Feypilelafuymi tami pu kompañ ñi ngüneduamal jw.org. Femngechi femi Luca. Tañi chillkatuwe ruka mu ngüneduamniengefuy fillke religion. Welu ti lifru ñi ngüneduamngeel welulkay ñi feypin pu Dungukelu Iney Ngen Jewba mu. Luca fill rakiduamkülefuy, welu feypifi tati profesor ‘¿pengelelafun tañi pu kompañ chumngelu ñi welulkalen ti lifru?’ pifi. Fey Luca kimelelfi tañi pu kompañ chem ñi feyentukeel ka pengelelfi taiñ pagina internet. Fey wüla ti profesor feypifi kom pu wechekeche ñi ngüneduamal ñi ruka mu ti video ¿Chumngechi tami ngüfeñpewal chaftunon mu? Müna küme duampelay Luca nütramkalu Jewba mu ti chillkatuwe ruka mew.

13. ¿Chumngelu afeluwlayaiñ rupaliyiñ küdawün-ngechi dungu mu?

 ¹³ Rupalmi küdawün-ngechi dungu mu, afeluwkilnge, doy may amulenge tami femürpual chem tami küpa femal ñi doy küdawülafiel ta Jewba (2 Timotew 4:2). Femngechi femi Katharina. Nielu 17 tripantu, ‘amuldunguafiñ kom tañi pu kompañ’ pi tañi rakiduam mu. Kiñe kompañ fentren rupa lukatueyew, welu Katharina afeluwlay ñi femal tañi ayünieel. Tañi küme femün rakiduamelfi ta kangelu kompañ, Hans pingelu, feymu kidu eluwi ñi papeltuafiel taiñ papil, chillkatuy Biblia, ka fawtisawi. Katharina kimlafuy ñi rupan tüfa, kidu am wiñamtuwlu kañpüle. Welu 13 tripantu rupalu kidu mülelu Trawünwe Ruka mu tañi pu che engün, ¡Hans akurkey ñi wewpitual! Katharina rume ayüwi ngüneduamlu ñi chum tripan tañi afeluwnon.

14. Kakelu che ngüchaltukuelmew tami femal kidu engün reke, ¿chem müley tami longkontukual?

¹⁴ Tüfachi chillkatun dew yafültukueymu tami eluwal ñi tuteafiel ta Jewba ka rakiduamal chumngechi doy küdawülafiel. Welu fentren wechekeche ayükeyngün ñi küme rupaleal müten, ka ngüchaltukuafeymu tami ka femngechi femal. Welu longkontukunge: puway ti antü tami pengelal tunte ñi falin-ngen eymi mu tami doy küdawülafiel ta Jewba. Feymu eluñmakilnge kakelu tami katrütuaetew. Rakiduamnge tüfa, mülefulmi feychi terminal mew taiñ nütramkapeel, ka ngüneduamfulmi ñi küme rupameken pu che kiñe mikro mu, ¿pürayaymi feychi mikro mu yenoelmu rume chew tami küpa amun? ¡Femlayaymi llemay!

15. ¿Chumafuymi kakelu ngüchaltukuelmew?

¹⁵ Feymu, kakelu che ngüchaltukuelmew tami inayentuafiel engün, ¿chumafuymi? Kimnielmi tami küdawtuken ñi ngünewal kiñeke dungu mu, kiñepülekünufinge (Proverbios 22:3). Kafey, rakiduamnge fente ñi weda tripayal tami weda femün (Galata 6:7). Ka, ñom piwke mew, eluwnge tami ngülamtungeal. Feymu, allkütufinge tami chaw, ñuke ka pu kümeke kristiano mülelu tami trawünche mu (papeltunge 1 Pedro 5:5, 6).

16. Christoph ñi rupan, ¿chumngechi pengeli ñi fente falin-ngen ñom piwkengeal?

¹⁶ Ngüneduamaiñ Christoph ñi rupan. Kidu ñi ñom piwkengen mew, küme llowi ñi ngülamtungeel. Pichi rupalu ñi fawtisawün mu, eluwi ñi amual kiñe gimnasio mu. Üyew kakelu wechekeche mangeleyew ñi koneltual tañi trokiñche deportekelu. Christoph nütramkalelfi tüfa ta kiñe longkolelu, ka tüfa feypieyew ‘rakiduamnge ti wedake dungu tami kontuafetew, ayürpuafuymi tami re wewal’. Welu Christoph koneltukay müten. Fey wüla, ngüneduami feychi deporte ñi nien kewan dungu ka ñi kuñiwün-ngen kütu. Fey, ka rupa nütramkay pu longkolelu engün, ka kidu engün ngülamtueyew Biblia mu. Christoph feypi: “Jewba eluenew kümeke ngülam, ka iñche allkütufiñ ta kidu, pürüm femnofuli rume”. Eymi kay, ¿ñom piwkengeymi tami küme llowal tami ngülamtungeel?

17. Weche, ¿chem ayüniey Jewba tami feleal?

 ¹⁷ Biblia feypi: “Ayüwkülenge, weche, petu tami wechengen mew, ka ayüwkülepe tami piwke petu tami wechengen” (Eclesiastés 11:9). Feley llemay, Jewba ayüniey tami ayüwküleal. Tüfachi chillkatun mew, kimtukuymi chem tami ayüwülafetew: doy küdawülafiel ta Jewba ka inayal ñi ngülam tami dullial chem chumal. Feymu, müchay müten femülmi tüfa, müchay müten Jewba adnieaeymew, ingkañpeaeymew ka kümelkayaeymew. Rakiduamnge kom tati kümeke ngülam tami eluetew Biblia mew, ka femnge tüfa: “Tami wechengen mu longkontukufinge tami Doy Fütra Dewmaetew” (Eclesiastés 12:1).

18. Ñi ayüwküleal tami femken mu, ¿chumafuymi fewla, petu tami wechengen mu? Feypinge kiñe che ñi rupan.

¹⁸ Pu wechekeche pürüm tremkeyngün, fey fütrake wentrurpukeyngün ka domorpukeyngün. Welu fentren engün dew tremlu, ‘eluwkafuli nga ñi doy küdawülafiel ta Jewba’, pikeyngün. Eymi kay, fewla eluwülmi ñi doy küdawülafiel ta Jewba, ayüwküleaymi tami femken mu. Femngechi femi Mirjana. Üllchangelu kidu, fente küme deportekefuy, feymu mangelngey ñi konal Juegos Olimpicos ñi femngeken pukem mu. Welu kidu doyümi ñi küdawülafiel ta Jewba fill antü. Ka petu femkey tüfa tañi wentru engu, dew rupalu rume 30 tripantu. Mirjana feypi ñi ayüwkülenon tati pu che ayülu ñi küme üytunchengeal, sakingeal, rikungeal ka ngüneniecheal. Welu may feypi ñi doy falin-ngen küdawülafiel ta Jewba ka kelluafiel pu che ñi kimafiel ta kidu.

19. ¿Chumngelu fente kümey doy küdawülafiel ta Jewba petu tami wechengen mu?

¹⁹ Rupalu rume küdawün-ngechi dungu mu, eymi eluwkeymi tami doy küdawülafiel ta Jewba. ¡Feymu fente sakifalngeymi! Rakiduamkeymi chumngechi doy küdawülafiel ta Jewba, yafüluwkeymi tami femürpuafiel, ka müna falintukeymi ti amuldungun küdaw. Kafey elukelaymi tami katrütuaetew kakelu. Longkontukunge: refalta newentumekelaymi. Kafey kom iñchiñ müna piwkeyewiyiñ ka kelluntukuwkeyiñ. Feymu “Jewba mew elkünuaymi kom tami femken, fey küme tripayay tami pepikakünuel”.