1. Kom pu poyekefilu ta Chaw Dios, ¿chem dungu doy ayünieyngün ñi femal? Ka ¿chumngelu (chemu)? (Inaduamnge ti adentun wünen pagina mu).

JESUKRISTO feypifi tañi pu inanieetew: “Amumün, kom chüf mapu müleyechi pu che mew. Ka kimeltuafimün femngechi tañi kimaetew engün ka iñche ñi disipulungeael engün” (Mat. 28:19). Kom pu poyekefilu ta Chaw Dios kom piwke mu ayünieyngün ñi kimal chumngechi küme femal tüfachi küdaw (2 Tim. 4:5). Müna falin-ngey amuldungual, doy ayüwülkeeiñmu ka doy duamfali ta kakelu dungu mew. Feymu kom iñchiñ ayüafuiñ fill antü amuldungual, welu küdawngeafuy femal kom taiñ ayünieel.

2. ¿Chem wedake dungu katrütuafeiñmu taiñ doy küme küdawelafiel ta Jewba?

² Duamnieiñ tiempo ka newen taiñ femal kakelu falin dungu. Fentren ora küdawkeiñ chi taiñ eluafiel taiñ pu che kom ñi duamnieel. Ka kutranafuiñ chi, depresion kutran nieafuiñ kam kakelu kutran kontuafeiñmu füchan mu iñchiñ ka taiñ pu che. Rupaliyiñ femngechi dungu, ¿chumngechi doy küme küdawelafuiñ ta Chaw Jewba?

3. Ñi feypin Matew 13:23 mu, ¿chem dungu kimniey Jesus?

³ Chem dungu rume katrütueliyiñmu taiñ doy küme küdawelnoafiel ta Jewba, weda duamkülelayaiñ. ¿Chumngelu? Jesus kimniey tañi pu inanieetew kakerumeafuy ñi femkeel engün (papeltunge Matew 13:23). Feymu eluwliyiñ taiñ femal kom taiñ pepilnieel, Jewba müna falintunieay kom taiñ femken ñi doy küme küdawelafiel ta kidu (Eb. 6:10-12). Iñchiñ chem no rume katrütulayafeiñmu taiñ doy küdawelafiel ta Jewba. Feymu tüfachi chillkatun mew, ngüneduamaiñ chumngechi doyümafuiñ ti amuldungun küdaw. Kafey  chumngechi ülmen-ngenochi mongen yenieafuiñ ka chumngechi doy küme amuldungucheafuiñ ka kimeltucheafuiñ. Wüne, ¿chumafuiñ ñi doy küme küdawelafiel ta Jewba?

4. ¿Chumafuiñ ñi doy küme küdawelafiel ta Jewba?

⁴ Taiñ doy küme küdawelafiel ta Jewba, eluwaiñ taiñ femal kom taiñ pepilnieel ñi amuldungucheal ka kimeltucheal. Welu fey ka müten no, Chaw Jewba ka müna falintukey chem duam mu amuldunguchekeiñ. Feymu fente taiñ piwkeyeniefiel ta Jewba ka tati pu che, küdawelkefiyiñ ta Chaw Dios kom taiñ piwke mu * (Mar. 12:30, 31; Kol. 3:23). Küdawliyiñ kom taiñ newen ka adümuwün mu, pengelaiñ taiñ küdawelkefiel kom taiñ piwke mu. Falintuniefiliyiñ ti amuldungun küdaw, yafüluwaiñ taiñ amuldungulelafiel itrokom pu che ti kümeke dungu.

5, 6. Kiñe che, ¿chumafuy ñi doyümafiel ti amuldungun küdaw? Feypinge kiñe nütram.

⁵ Rakiduamnge tüfa: kiñe papay müna ayükefi ñi ngürekayal. Niele tiempo, ngürekakey. Afchi semana feria mu fendekey ñi dewmael. Welu kullingelu rume, tañi plata puwülkalay afchi küyen. Feymu lunes puwlu viernes küdawelfi kiñe domo ñi küme adkünuafiel ñi ruka. Epe fill antü küdawlu rume feychi ruka mu, kom ñi piwke mu ayüniey ñi ngürekayal. Feymu eluwküley ñi doy küme adümuwal, fey ñi küdawal feychi dungu mew müten. Welu pepi femnolu rume, kidu elantükünukey ñi ngürekayal, pichin tiempo niefule rume.

⁶ Ka femngechi eymi kom piwke mu ayünieafuymi amuldungucheal fill antü, welu pepi femlaymi, ¿chumafuymi? Fente tami ayüniefiel tüfa, eluwafuymi tami doy küme amuldungucheal ka kimeltucheal ti kümeke dungu. Welu fentren duam nielmi, “¿chumngechi doyümafun ti amuldungun küdaw?” piafuymi chi.

7, 8. Amuldunguliyiñ, ¿chumngechi inayentuafuiñ ta Jesus?

⁷ Jesus doy inayentufali ñi femün tañi amuldungucheal. Kidu kom ñi mongen mu doyümi ñi amuldungulelafiel pu che Chaw Dios ñi Ngünenien mu (Juan 4:34, 35). Jesus fentren pataka kilometro trekay ñi amuldungulelafiel fentren che. Ka ngünamkalay ta antü, doy may kintuy chumngechi doy küme amuldungual pu che tañi ruka mu ka chew ñi rupaken engün. Kom ñi femkeel ta Jesus pengeli ñi doyümkefiel ti amuldungun küdaw.

⁸ Pepilfalngele, fill antü eluwaiñ taiñ kintual chumngechi doy küme amuldungulelafiel pu che ti kümeke dungu, femngechi pengelaiñ taiñ inayentuniefiel ta Kristo. Kafey duamfalngele, famentuaiñ taiñ ayünieel ka taiñ küme felen, femngechi taiñ doy küme amuldungucheal (Mar. 6:31-34; 1 Ped. 2:21). Kiñeke peñi ka lamngen wüneleafuyngün amuldungun mew 120, 70, kam 50 ora. Kakelu kristiano kimürpuyngün kangelu kewün ñi amuldungucheal, kakelu peñi ka lamngen wiñamtuwingün kangelu trawünche mu doy duamnielu kellu. Welu fentren amuldungukelu femngechi dungu pepi femlayngün, ka eluwingün ñi femal kom tañi pepilnieel ñi kelluntukual. Tüfa engün femkey epe kom ti amuldungun küdaw. Feymu fentren kam pichin dungu femliyiñ rume, Jewba falintukey kom taiñ femkeel piwke mu. Kidu ayüniey taiñ ayüwküleal amuldungulu iñchiñ “ti afmatufal werkün dungu ñi wülkeel ti ayüwün-ngechi Ngünechen” (1 Tim. 1:11, Traducción del Nuevo Mundo [TNM]; Deut. 30:11).

9. 1) Pablo dewmakelu rume tolto ruka, ¿chumngechi doyümi ti amuldungun küdaw? 2) Ñi feypin Hecho 28:16, 30, 31, ¿chem eluwi ñi femal Pablo tañi amuldungucheal?

⁹ Ka inayentufali Pablo ñi femün, kidu kom ñi mongen mu doyümi ñi amuldungucheal. Miyawlu Korinto waria mu, pichin plata niefuy, feymu eluwi ñi dewmayal tolto ruka fey ñi fendeal. Welu doyümlay tüfachi küdaw, doy may doyümi ñi amuldungual. Pablo küdawi ñi nieal tañi duamnieel fey ñi amuldungulelafiel pu korinto che tati kümeke dungu, fey ñi ‘kofrawnofiel plata’ (2 Kor. 11:7). Dewmakelu tolto ruka rume, fill sabado amuldunguchekefuy, femngechi pengeli ñi doyümkefiel ti amuldungun küdaw. Rupalu chi antü, müte küdaw-welay fey eluwi ñi doy amuldungual. Kafey “eluwi ñi kiñe rume küdaw ñi inayael tañi kimeltuael ti werken dungu müten, ka ñi küme feypiafiel tati pu judiu Jesus tañi Cristongen” (Hecho 18:3-5; 2 Kor. 11:9). Roma mew, Pablo püresuntukungey tañi ruka mu epu tripantu, feychi mu amuldungulelfi tati pu che ñi witranmaetew ka wirintukuy fillke karta (papeltunge Hecho 28:16, 30, 31). Feley tati, Pablo eluwi ñi famentuafiel chem dungu rume ñi katrütuafetew tañi amuldungucheal. Kidu wirintukuy: “Iñchiñ ta ngañwadkelaiñ, [...] tüfachi küdaw taiñ wewpiyeafiel tati küme dungu” (2 Kor. 4:1). Ka femngechi iñchiñ Pablo reke fentren küdaw nieiñ, welu ka doyümafiyiñ ka falintuafiyiñ ti amuldungun küdaw taiñ mongen mu.

10, 11. Kutranküleliyiñ, ¿chumngechi doy küme küdawelafuiñ ta Jewba?

¹⁰ Füchaleliyiñ kam kutranküleliyiñ, küdawngeafuy amuldungual fill ruka püle, welu femafuiñ kakelu dungu taiñ amuldungucheal fey taiñ ayüwküleal. Wünen siglo mu, pu kristiano amuldungukeyngün chew rume ñi miyawken engün. Kafey amuldungumeyngün fill ruka püle ka chew ñi rupan alünke che, fey kimelelfingün ti rüf dungu “tati trawüluwkechi pu che” (Hecho 17:17; 20:20). Newe küme trekanoliyiñ, wangkutuafuiñ fey amuldunguafuiñ chew ñi rupan ta che.  Ka chew rume miyawliyiñ amuldunguafuiñ pu che, kafey wirintukuafuiñ karta kam amuldunguafuiñ telefono mu. Fentren peñi ka lamngen weda kutrankülelu ka ayüwküleyngün ñi femngechi amuldunguken.

¹¹ Feymu kutranküleliyiñ rume, küme küdawelafuiñ ta Chaw Jewba. Wiño inaduamaiñ Pablo ñi femün. Kidu feypi: “Chem rupale rume, tañi elukeetew newen kellukeenew ñi yafüluwküleal” (Filip. 4:13, TNM). Amuldunguyawlu Pablo kutrani, feymu duamniefuy ñi newentukuaetew Chaw Jewba. Fey feypifi pu galacia che: “Eymün ta dew kimnieymün tüfachi dungu, feychi nga wüne wewpileluwiyiñ ti kimelün montuluwün dungu, fey femngechi femün tunte kutrankülefun rume” (Gal. 4:13). Ka femngechi iñchiñ kutranküleliyiñ, amuldunguafuiñ pu doctor ka kakelu che taiñ kuydakeetew. Feychi pu che epe fill antü küdawküley, feymu pu amuldungukelu pelayafeyew kidu ñi ruka mu.

12. Jesus, ¿chem feypieiñmu taiñ femal?

¹² Jesus feypi: “Tami nge kiñe pelontuwe reke feley tami kuerpu mew, fey puwkülele kintun kiñe küme rakiduam mew [kintuniefile ülmen-ngenochi mongen, TNM], kom tami kuerpu mew müleay reke ta pelon” (Mat. 6:22). Femngechi Jesus feypieiñmu taiñ ülmen-ngenochi mongen yenieal ka doyümal kiñe falin dungu müten, fey longkontukunieafiel tüfa. Jesus kom ñi mongen mu pengeli ñi doyümkefiel ti amuldungun küdaw, ka kimelelfi tañi pu disipulu ñi doyümal küdawelafiel ta Jewba ka tañi Ngünenien.  Inayentuafiyiñ ta Jesus, femngechi pengelaiñ taiñ doyümniefiel ‘Ngünechen tañi Ngünenien ka tañi nor dungu’ (Mat. 6:33).

13. ¿Chem dungu kelluaeiñmu taiñ doyümafiel ti amuldungun küdaw?

¹³ ¿Chem duamnieiñ taiñ doyümafiel ti amuldungun küdaw? Ülmen-ngenochi mongen yenieal. Femngechi femliyiñ, kelluafiyiñ fentren che ñi kimafiel ka piwkeyeafiel ta Jewba *. Feymu ramtuwafuiñ: ¿doy küme adkünuafun tunten ora küdawken, femngechi tañi doy amuldungual semana mu? ¿Doy küme adkünuafun fillke dungu tañi katrütunoaetew ñi doy amuldungual?

14. Kiñe kurewen, ¿chumi ñi doy amuldungual?

¹⁴ Tüfa ñi femün kiñe longkolelu Elias pingelu tañi domo engu. Taiñ peñi feypi: “Wünelelafuyu amuldungun mu. Welu kiñeke dungu femafuyu tayu doy amuldungucheal. Feymu eluwiyu tayu doy amuldungual tunte tayu pepilnieel. Kiñeke dungu tayu femün, fey ta doy küme adkünufiyu tayu llowelchi plata, famentuyu kiñeke dungu tayu katrütuetew doy amuldungual ka feypifiyu tati ngen küdaw tayu eluaetew pichin küdawal. ¿Chum tripay tayu femel? Nagantü mu amuldungukeyu, fentren che chillkatulelkefiyu Biblia ka epu rupa küyen mu adkünuyu tayu küdawnoal, fey tayu amuldungual. ¡Rume ayüwülmakeeyumu!”.

15, 16. Ñi feypin 1 Timotew 4:13, 15, ¿chumngechi doy küme adümuwafuiñ taiñ amuldungucheal? (Peaymi ti wichulechi dungu feypilelu “ Fillke dungu tami kelluaetew ñi doy küme küdawelafiel ta Jewba”).

¹⁵ ¿Ka chem chumafuiñ taiñ doy küme küdawelafiel ta Jewba? Doy küme adümuwaiñ  chumngechi taiñ amuldungucheal. Kiñeke küdaw mu pepikangekey ta pu che ñi doy küme kimafiel ka adümafiel tañi küdaw. Ka femngechi tati pu kristiano duamnieyngün doy küme adümuwküleal tañi amuldungucheal (Prov. 1:5; papeltunge 1 Timotew 4:13, 15).

¹⁶ Welu, ¿chumngechi doy küme adümuwafuiñ taiñ amuldungucheal? Küme allkütuaiñ kom ñi feypingeel ka ngülamtungeel ti trawün Taiñ Mongen ka Taiñ Amuldungukeel pingelu. Tüfachi falin trawün müna kimeltukeeiñmu ka kellukeeiñmu taiñ doy küme amuldungucheal. Trawün mu tati longkolelu ngülamtukefi pu peñi ka lamngen elfal küdawkülelu, iñchiñ küme allkütuaiñ ka inayaiñ ñi ngülamtuel. Femngechi amuldunguliyiñ, adümkantuaiñ tüfachi ngülam. Ka ramtuafuiñ tati Longkolelu ti trokiñche mu amuldungukelu: “¿Kelluafen ñi doy küme amuldungucheal?”. Ka mür amuldunguafuiñ kiñe wünelekelu amuldungun mew, kiñe kristiano doy adümuwkülelu ka ti witran-ngepakechi longkolelu. Kafey doy küme adümafuiñ fillke papel ka lifru mülelu tati trokiñ Fillke kellu taiñ kimeltucheal. Femliyiñ tüfa, doy ayüwülmayaeiñmu amuldungucheal ka kimeltucheal.

17. Eluwülmi tami doy küme küdawelafiel ta Jewba, ¿chum duamküleaymi?

¹⁷ Jewba elueiñmu taiñ ‘kiñentrür küdawal’ kidu iñchiñ, feymu müna sakikeeiñmu (1 Kor. 3:9, TNM). Dulliliyiñ “tati doy kümechi dungu” ka doyümfiliyiñ ti amuldungun küdaw, ‘rumel ayüwküleaiñ’ taiñ küdawelkefiel ta Chaw Jewba (Filip. 1:10; 4:4). Feley llemay, eymi rüf küme küdawniefimi ta Jewba, feymu maneluwaymi kidu mu tami newentukuaetew tami doy küme amuldungucheal chem weda dungu rupalmi rume (2 Kor. 4:1, 7; 6:4). Feymu eymi fentren kam pichin amuldunguafuymi, welu kom piwke mu femülmi, rumel ayüwküleaymi (Gal. 6:4). Eluwülmi tami doy küdawelafiel ta Jewba, pengelaymi fente tami piwkeyefiel ta kidu ka tati pu che, femngechi “kisutu ta montuluwaymi ka femngechi montuay tüfey engün tami allkütukeetewchi pu che” (1 Tim. 4:16).