Matew nütramkalu Jesus ñi choyüngen ka ñi wünenke tripantu trürlay Luka ñi feypin mu, Matew doy nütramkalu am Jose ñi rupan, welu Luka doy nütramkay Maria ñi rupan mu.

Matew nütramkay Jose tañi chumün kimlu Maria ñi niepüñeñkülen ka chem ñi feypietew kiñe küme püllü kiñe pewma mew, ka nütramkay Jose ñi inafiel ti küme püllü ñi feypin (Matew 1:19-25). Kafey pengeli kiñe küme püllü ñi ngüfetufiel ta Jose kiñe pewma mew tañi lefmawal Egipto mapu mew ñi pu che engün, ka pengeli Jose ñi inafiel tañi feypingeel. Fey wüla Matew feypi Jose ñi pewman ka kiñe rupa, fey kiñe küme püllü feypieyew ñi wiñotual Israel mu, feymu Jose wiñotuy ka mülenagi Nasaret mu tañi pu che engün (Matew 2:13, 14, 19-23).

Luka nütramkay ti küme püllü Gabriel ñi pemefiel ta Maria, ka pengeli Maria ñi witranmafiel tañi reñmanieelchi domo Isabel (Elisabet) ka ñi püramyefiel ta Jewba (Luka 1:26-56). Kafey nütramkay Simeon ñi feypifiel ta Maria ñi kutrankawal Jesus küpalechi antü mu. Fey wüla, nütramkay Jesus nielu 12 tripantu ñi amun ti ngillatuwe ruka mu tañi pu che engün. Feychi nütramkan mew Luka feypilay Jose ñi feypin, welu may pengeli Maria ñi feypin ka ñi kutrantupiwken ti rupaelchi dungu mu (Luka 2:19, 34, 35, 48, 51). Feymew llemay, Matew doy küme pengeli Jose ñi rakiduam ka ñi femün, welu Luka doy nütramkay Maria ñi rupan ka ñi rakiduam mu.

Jesus ñi tuwünche ñi wirintukuel Matew ka Luka kakerumey. Matew wirintukuy Jose ñi tuwünche, ka pengeli Jose ñi küpan Salomon mew, ti longko ülmen David ñi fotüm. Femngechi pengeli Jesus ñi koneltuleel ley dungu mew ñi llowal David ñi ngünenien, Jose fotümyefilu kay ta Jesus (Matew 1:6, 16). Welu Luka wirintukuy Maria tañi tuwünche, ka pengeli Jesus ñi rüf ngen-ngeel tañi ngünenieal, kidu am “tati longko ülmen David ñi tuwünngelu” (Romanu 1:3, 4). ¿Chumngelu? Maria küpalu am Natan mew, David tañi fotüm (Luka 3:31, 32). Welu, Maria Eli ñi ñawengefuy, feymu ¿chumngelu Luka feypi Jose ta Eli ñi fotümngen? Tati pu wirintukun ñi elkünukefel ti gobierno niefuy tati pu wentru ñi üy müten. Feymu Luka wirintukulu Jose ta Eli ñi fotümngen, pu che kimniefuy Jose ta Eli ñi chedkuyngen (Luka 3:23).

Matew ka Luka ñi wirintukuel Jesus ñi tuwünche, küme pengelkey Jesus tati Mesiangen, Chaw Dios ñi feypikünuel. Küme kimniengefuy Jesus ñi küpan ti longko ülmen David mu, feymu tati pu farisew ka sadusew no rume feypilayafuyngün ñi rüfngenon tüfa. Matew ka Luka ñi pengelkeel Jesus ñi tuwünche, kellukeeiñmew taiñ feyentual kom piwke mu ka maneluwal ñi femtripayal kom ñi feypikünuel Chaw Dios.