MÜNA küdawngetuy ta mongen epe puwkülelu am “ñi afael ta antü”. Feymu fente duamnieiñ taiñ ñochi duampiwkengeal famülke mu (2 Timotew 3:1-5). Fentren che ñochi duamngelay. Welu may kidutu duamuwkeyngün müten, notukachekey ka kim ngüneniewkelay. Feymu fente falin-ngey taiñ ramtuwal: “¿Inayenturpun pu ñochi duamngenolu? ¿Chumkey tati rüf ñochi duampiwkengelu? ¿Chumafun ñi ñochi duamngeal chem rupale rume?”.

Biblia ñi feypin mu, tati ñochi duamngelu yafüluwkey rupalu wedake dungu * (inaduamnge ti kimal dungu). Welu fey ka müten no, kafey fentekünukelay tañi maneluwkülen ñi kümelkalerputual ti dungu. Kidutu duamuwkelay müten, doy may ngüneduamkefi chumngechi ñi duamkülen kake che. Ka duamkefi tañi weda femetew kütu, fey maneluwkey ñi kümelkawtual feychi che engün. Feymu Biblia feypi ñi ñochi duamngen tati piwkeyechefengelu * (inaduamnge ti kimal dungu) (1 Korintio 13:4). Tati llowkelu Ngünechen ñi newen, kafey ñochi duampiwkengey (Galata 5:22, 23, TNM). Welu ¿chumafuiñ taiñ rüf ñochi duamngeal?

Chaw Jewba elukefi ñi newen kom tañi pu ngillatuetew ka pu maneluwkelu kidu mu. Feymu taiñ ñochi duampiwkengeal, falin-ngey ngillatuafiel taiñ eluaetew ñi newen (Luka 11:13). Tüfa müna kelluafeiñmu, welu ka müley taiñ femal chem taiñ ngillatukeel (Salmo 86:10, 11). Feymu fente taiñ pepilel yafüluwaiñ taiñ ñochi duamngeal fill antü, ka fentekünulayaiñ taiñ femngechi chengen chem rupale rume. Welu kiñeke mu welulkayafuiñ. Fey, ¿chem kelluafeiñmu taiñ ñochi duampiwkengeal?

Chillkatuaiñ Jesus ñi femün ka inayentuafiyiñ. Apostol Pablo nütramkay ñi ñochi duamngen tati pu nielu “we mongen”, fey feypifi pu peñi ka lamngen: “Cristo ñi küme tüngün ngünenieñmayaeymünmew tamün piwke” (Kolosense 3:10, 12, 15). Ñi rupayal tüfa, duamfalngey inayafiel ta Jesus, ka maneluwal Chaw Dios ñi küme elkünutuafiel ti wedake dungu puwchi antü mew. Femngechi femliyiñ, ñochi duampiwkengeaiñ chem rupale rume (Juan 14:27; 16:33).

Kom iñchiñ müna ayüleiñ ñi pürüm akual ti we mapu. Welu ngüneduamliyiñ Jewba ñi ñochi duampiwkengen, kimürpuaiñ taiñ ka femngechi chengeal. Biblia feypi: ‘Ñidol müte aporiawkelay ñi femael tañi feypikünuelchi dungu chumngechi kiñekentu rakiduamkey ñi mupikenon ñi dungu, welu may ñochi duampiwkengey ta eymün mew, fey ayülenolu am iney no rume ñi layael, welu kom che ñi wiñorakiduamtuael ta Ngünechen mew’  (2 Pedro 3:9). Feymu, rakiduamliyiñ Jewba ñi ñochi duampiwkengen iñchiñ mu, ka ñochi duampiwkengeaiñ kakelu che mu (Romanu 2:4). Welu, ¿chem dungu mu duamfalngey taiñ ñochi duamngeal? Inaduamaiñ.

Fill antü duamnieiñ taiñ ñochi duamngeal. ¿Chem dungu mew? Rakiduamliyiñ ñi falin-ngen chem taiñ feypial, ñochi duamngeaiñ taiñ katrütudungunoafiel ta kakelu (Santiaw 1:19). Kafey kiñe che weda duameleliyiñmu, müley taiñ ñochi duamngeal. Lladküfemlayaiñ, doy may rakiduamaiñ Jewba ka Jesus ñi chumken mu. Welulkawlu iñchiñ, kidu engu ngüneduamniekelay taiñ re weda femün. Doy may ngüneduamniekey taiñ küme femken, feymu ñochi duamngeyngu ka üngümkeyngu taiñ doy küme chengerputual (1 Timotew 1:16; 1 Pedro 3:12).

Kafey ñochi duamngeaiñ kiñe che feypintukueliyiñmu taiñ weda femün kam weda feypin. Ellaka mu lladküafuiñ chi kam küpa feypiafuiñ chumngelu taiñ femngechi femün. Welu Biblia pengeleleiñmu chem taiñ femafel: “Doy kümey tati ñochi duamngechi che ta kiñe mallmangelu ñi piwke mu. Lladküfemkilnge, pu wedwed kimfalngelu am ñi lladküfemken mu” (Eclesiastés 7:8, 9, kimal dungu). Koyla dalluntukungeliyiñ rume, müley taiñ ñochi duamngeal ka küme rakiduamal chem chumal. Femngechi femi Jesus koyla dalluntukungelu (Matew 11:19).

Doyelchi may, pu chaw ka ñuke duamniey ñi ñochi duamngeal, femngechi norümtuafiel tañi pu yall küme rakiduamnole kam weda illutule. Inaduamaiñ ñi rupan kiñe peñi fewla küdawkülelu Fetel Europa mu, Mattias pingelu. Weche konangelu, tañi pu kompañ kolegio mu ayentukefeyew tañi feyentun mew. Ellaka mu, tañi chaw ka ñuke kimlafuy chem ñi rupan, welu fey wüla ngüneduamingu Mattias ñi newe feyentulenon tañi kimelchi dungu. Mattias tañi chaw, Gillis pingelu, feypi: “Iñche ka tañi domo müna duamniefuyu ñi ñochi duamngeal”. Mattias fillke dungu ramtukefuy, tüfa ta kiñeke: “¿Iney am ta Chaw Dios? ¿Rüf tuwpey may Chaw Dios mu Biblia ñi feypin? ¿Chumngechi kimafun Chaw Dios pemay tañi feypietew chem chumal?”. Kafey feypikefuy tañi chaw: “¿Chumngelu weda pingeafun rakiduamkülenoli kam feyentunoli eymu reke?”.

 Gillis feypi: “Tañi fotüm kiñeke mu lladkülen entukefuy ñi feypin, welu lladkütulaeyumu, doy may lladkülefuy ñi kimniefiel mu tati rüf dungu, rakiduamkefulu am ñi rupan küdawngechi dungu tañi kimfiel mu”. Fey Gillis, ¿chumngechi kellufi tañi fotüm? Kidu feypi: “Fentren rupa alüñma anülefuyu tayu nütramkawal”. Gillis epe kom rupa re allkütukefuy tañi fotüm, ka ramtukefuy kiñeke dungu ñi kimal tañi rakiduamken ka chumngechi ñi duamkülen. Kiñeke mu feypikünukefuy ta Mattias kiñeke dungu ñi rakiduamal, fey tañi wiño nütramkayal feychi dungu rupalu kiñeke antü. Kafey Gillis duamniefuy ñi rakiduamal chem tañi feypietew ñi fotüm. Fentren rupa nütramkawkelu engu am, Mattias adümürpuy Jewba ñi femün tañi montulcheal, fente taiñ piwkeyeetew ka ñi ngen-ngeel taiñ ngünenieaetew. Gillis feypi: “Alüñmayu, ka kiñeke mu küdawngefuy. Welu Mattias doy piwkeyerpufi ta Jewba ñochikechi. Kidu rupalu küdawngechi dungu tañi weche konangen mu, iñche ka tañi domo ñochi duam mu yafüluwiyu tayu kelluafiel. Tayu femün müna küme tripay ka puwi kidu ñi piwke mu, feymu müna ayüwküleyu”.

Gillis ka tañi domo ñochi duam mu kellufi tañi fotüm, welu ka maneluwkefuyngu ñi kelluaetew Chaw Dios. Feymu Gillis feypi: “Fente tayu piwkeyefiel ta Mattias, doy ngillatukefiyu ta Jewba ñi kellu adümafiel ti rüf dungu. Feypikefiñ tüfa tañi fotüm”. Gillis ka tañi domo müna ayüwküleyngu ñi ñochi duamngen mu ka fentekünukenon tañi maneluwkülen.

Kafey müley taiñ ñochi duampiwkengeal petu kuydafiliyiñ kiñe taiñ pu che kam weni kutrankülelu, welu nienolu lawen. Inaduamaiñ ñi rupan kiñe lamngen Europa mu, Ellen pingelu * (inaduamnge ti kimal dungu).

Ellen tañi wentru kontueyew kiñe kutran ñi wedalkakefiel tañi müllo, feymu pepi ayüwkülewelay, weñangküwekelay ka kuñillwekelay. Yeniey 8 tripantu ñi femngechi felen mu. Tüfa müna küdawngey, feymu Ellen feypi: “Duamnien ñi rume ñochi duamngeal ka müna ngillatuafiel ta Chaw Dios”. Kidu ka feypi: “Kiñe versikulo tañi doy ayünieel rume yafültukuenew. Tüfa ta Filipense 4:13, feypilu: ‘Chem rupale rume, tañi elukeetew newen kellukeenew ñi yafüluwküleal’” * (inaduamnge ti kimal dungu). Jewba kellukefi ka yafültukukefi ta Ellen, feymu kidu ñochi duam mu chaftukey tüfachi küdawngechi dungu (Salmo 62:5, 6).

Chaw Jewba doy inayentufalngey tañi ñochi duamngen mu (2 Pedro 3:15). Biblia fentren rupa pengeli Jewba ñi ñochi duamngen (Nehemías 9:30; Isaías 30:18). Kiñe rupa Abraam ramtukafi ta Jewba ñi apümkapeafiel may pu che Sodoma mew. Fey ngüneduamfali Jewba ñi femün. Kidu katrütudungulafi ta Abraam feypilu kom tañi rume rakiduameletew, doy may ñochi duam mu allkütufi kom tañi feypin. Fey Jewba pengeli ñi allkütufiel ta Abraam ka feypifi ñi apümkanoafiel ta Sodoma mülefule üye mew 10 norngechi wentru (Génesis 18:22-33). Feley llemay, Jewba rumel allkütukey ñochi duam mu ka lladküfemkelay.

Kom iñchiñ müley taiñ nieal “we mongen” reke. Taiñ femal tüfa, müna falin-ngey taiñ ñochi duamngeal. Müna yafüluwliyiñ taiñ femngechi chengeal, püramyeafiyiñ taiñ Wenu Chaw Jewba, kidu am ñochi duampiwkengelu ka duamyechekelu. Fey feleaiñ feychi pu che reke ‘ñochi duampiwke mew ka mupiltun mew llowniefilu Ngünechen tañi feypikünuletewchi dungu’ (Ebrew 6:10-12).