1. ¿Chem femafuiñ taiñ kiñentrür küdawal Jewba iñchiñ?

JEWBA dewmafilu pu che, ayükefuy ñi kiñentrür küdawal kidu engün. Feymu kulpafe chengeliyiñ rume, iñchiñ pu nor piwkeyefilu ta Jewba, kiñentrür küdawafuiñ Chaw Dios iñchiñ fill antü. ¿Chumngechi femafuiñ tüfa? Amuldungukefiyiñ tati kümeke dungu küpalu Chaw Ngünechen mu ka kellukefiyiñ pu che ñi disipulungerpual (1 Korintio 3:5-9). Taiñ Wenu Chaw, tati Doy Alüpüralelu, elfalkünueiñmu ñi femal tüfachi falin küdaw, ¡müna sakinieeiñmu llemay! Welu kake dungu femafuiñ. Kelluafuiñ taiñ pu che ka taiñ trawünche, küme llowchefengeafuiñ ka fürenecheafuiñ, kellukonafuiñ fillke küdaw ñi femngeel Jewba ñi trokiñche mu ka eluwafuiñ ñi doy küdawülafiel ta Jewba. Tüfachi chillkatun mew kimürpuaiñ chumngechi kiñentrür küdawal Jewba iñchiñ tüfachi meli dungu mu (Kolosense 3:23).

2. ¿Chumngelu (chemu) trürümlayafiyiñ chem taiñ femkeel Jewba ñi duam mew kakelu che ñi femün mu?

² Petu taiñ ngüneduamfiel tüfachi chillkatun, longkontukuaiñ kom iñchiñ ta trürlaiñ: kakerumey taiñ mongen, müley füchakeche ka wechekeche, kiñeke doy tremolekey welu kakelu doy kutrankey, ka kakerume dungu pepilkeiñ.  Feymu chem ñi femkeel iñchiñ Jewba ñi duam mu trürümlayafiyiñ ta kakelu che ñi femün mu. Ti apostol Pablo feypi: “Feley ta kake kiñeke che kisutu tañi inaduamuwael tañi femkeelchi dungu. Fey ka femngechi ngelay tañi trürümtukumekewael kangelu che ñi femkeelchi dungu mew” (Galata 6:4).

3. Pu ngüneytukefilu tañi pu che kiñentrür küdawkey Jewba engu, ¿chumngelu feypiafuiñ tüfa?

³ Jewba ayüniey taiñ ngüneytuafiel taiñ pu che. Rakiduamnge tüfa, kiñeke küdawkey ñi eluafiel tañi pu che kom ñi duamnieel. Fentren domo mülenagkey ruka mu ñi kuydayafiel tañi pu püñeñ. Kafey kiñeke kristiano müley ñi dapiafiel tañi fütakeche kidutu pepiluwnole engün. Kom tüfa duamfalngey. Fey Biblia feypi: “Iney rume ta [...] inaduamnole kisu tañi rukañmanieelchi pu reñma, fey ta llumumaniey tañi mupiltun [famentuniey tañi feyentukeel, TNM] ka doyelküley tati pu feyentulenolu mew” (1 Timotew 5:8). Feymu duamfalngele ñi femngechi ngüneytuafiel tami pu che, müte küdawül-layafuymi ta Jewba chumngechi tami ayükeel. Welu ¡weda duamkülekilnge! Elufilmi tami pu che chem ñi duamnieel engün, ayüwülafimi ta Jewba (1 Korintio 10:31).

4. Pu chaw ka ñuke, ¿chumngechi doyümafuyngün Ngünechen ñi Ngünenien tañi mongen mu? ¿Chum tripay tüfa?

⁴ Pu chaw ka ñuke kiñentrür küdawayngün Jewba engün, kellufile tañi pu yall ñi rakiduamal chem chumal ñi doy küdawülafiel ta Jewba. Fentren kristiano femngechi femingün, ¿chum tripay tüfa? Rupalu chi antü, tañi pu yall eluwingün ñi küdawülafiel ta Jewba fill antü, alü kamapu kütu tañi ruka mu. Kiñeke werküngey ka mapu ñi amuldungual, kakelu wünelekeyngün amuldungun mu chew duamniengelu kellu ñi amuldungungeal, kam kakelu küdawkeyngün Fetel mu. Rüfkünu may, pu yall alü kamapulelu kay tañi pu chaw ka ñuke mew, newe pew-wekelayngün kuyfi reke. Welu pu chaw ayülefule rume ñi doy pülleleal, kidutu duamuwkelayngün, doy may yafültukufingün tañi pu yall ñi fentekünunoal tañi küdaw. ¿Chumngelu am? Müna ayüwülkeeyew tañi pu yall ñi doyümniefiel ta Jewba tañi mongen mew (3 Juan 4). Fentren chaw ka ñuke duamkülepelayngün Ana reke, kidu feypi tañi püñeñ mew “iñche arelelfiñ ta Jewba”. Kidu engün müna falintuniefingün ñi femngechi küdawken kiñentrür Jewba engün (1 Samuel 1:28).

5. ¿Chumngechi kelluafuymi pu peñi kam lamngen tami trawünche mu? (Inaduamnge ti adentun ellaka mu mülelu).

⁵ Welu duamfalngenofule ñi femngechi ngüneytuafiel taiñ pu che, kelluafuiñ pu peñi ka lamngen füchalelu, kutrankülelu kam duamnielu kellu. Kafey kelluafuiñ pu dapikefilu feychi che. Taiñ trawünche mu ngüneduamafuiñ iney duamniey femngechi kellu. Rakiduamnge kiñe lamngen dapikefilu tañi füchalechi chaw. Iñchiñ kellu dapiafuiñ tañi chaw, femngechi ti lamngen femafuy kakelu dungu. Kafey, yeafuiñ kiñe peñi kam lamngen trawün mu, kompañafuiñ ñi ngillakayal kam ñi witranmayafiel kiñe che pital mu. Femngechi femliyiñ,  küdawafuiñ Jewba iñchiñ ñi wiñoldungulelafiel chem ñi llellipuel feychi pu peñi kam lamngen (papeltunge 1 Korintio 10:24).

6. ¿Chumngechi küme llowcheafuiñ ka fürenecheafuiñ?

⁶ Pu kiñentrür küdawkelu Jewba engu kimngekey tañi küme llowcheken ka fürenecheken mu. Griegu Wirintukun mu, ti dungu rulpadungungelu ‘llowchefengeal’ ka feypiafuy “füreneafiel kimnoelchi che” (Romanu 12:13). Biblia mew, ngüneduamafuiñ fillke nütram kimeltukelu chumngechi femal tüfa (Génesis 18:1-5). Kom iñchiñ kelluafuiñ ta kakelu, feymu duamfalngele müley taiñ füreneafiel itrokom che, koneltulenole rume “taiñ pu peñi ka lamngen feyentulelu ta Cristo mew” (Galata 6:10).

7. Küme llowfiliyiñ pu fill antü küdawülkefilu ta Jewba, ¿chem kümeke dungu nieafuiñ?

⁷ Kiñeke mu pu fill antü küdawülkefilu ta Jewba duamniey chew ñi umayal, feymu küme llowfiliyiñ taiñ ruka mu, ka küdawafuiñ kiñentrür Jewba engu (papeltunge 3 Juan 5). Biblia feypi: “Fey iñchiñ müley taiñ küme llowafiel feychi pu che, femngechi taiñ kelluntukual ñi küme amulerpual ti rüf dungu” (3 Juan 8, TNM). Femal tüfa kelluaeiñmu “taiñ welukonkechi yafüluwael” (Romanu 1:11, 12). Nütramkayaiñ Olaf ñi rupan. Wechengelu kidu, kiñe witran-ngepakechi longkolelu kurengenolu amuy tañi trawünche mu. Feychi peñi duamniefuy chew ñi umayal, welu iney no rume ti trawünche mu pepi llowlaeyew. Olaf tañi chaw ka ñuke koneltukelafuy Jewba ñi pu che mu, welu kidu ramtufi ñi umañelafiel ti witran-ngepakechi longkolelu. “Femaymi” pingey Olaf, “welu eymi umayaymi ti sillon mew”. Femngechi femi Olaf, welu wiño witrawlay. ¿Chumngelu? Olaf petu piwkentukuniey fente ñi küme rupan feychi semana. Kidu feypi: “Iñche ka ti witran-ngepakechi longkolelu puliwentu witrakefuyu, fey ayüfalchi nütram niekefuyu petu tayu yafütun. Fente ñi yafültukungen, eluwün ñi küdawülafiel ta Jewba fill antü”. Fey rupachi 40 tripantu mu, Olaf werküngey fillke mapu mu ñi amuldungual.

8. ¿Chumngelu müley taiñ fürenecheal mañumtungenoliyiñ rume ellaka mu? Feypinge kiñe rupan dungu.

⁸ Fillke dungu femafuiñ ñi füreneafiel kimnoelchi pu che, mañumtungenoliyiñ rume ellaka mu. Nütramkayaiñ chem ñi rupan Yesica. Tüfachi domo tuwlu Ecuador mu, mülekey España mapu mu, fey mu kiñe lamngen kimeltuleyew Biblia. Kiñe antü petu tañi chillkatumeken, Yesica fütra ngümakawi. Fey ti lamngen ramtueyew chumngelu ñi ngüman. Yesica nütramkalelfi chem ñi rupan kuyfi petu ñi puwnon España mew. Kidu rume pofrengefuy, fey kiñe antü nielafuy chem iyael no rume ñi eluafiel tañi domo püñeñ, ko müten niekefuy. Petu ñi umawelfiel tañi püñeñ, llellipufi ta Chaw Dios ñi kelluaetew. Fey wüla, epu Dungukelu Iney Ngen Jewba akuyngu Yesica ñi ruka mew, fey elufingu kiñe chillka. Welu Yesica che trokilaeyew engu, ka wichafkafi ti chillka. Fey feypieyew: “¿Tüfachi dungu am  eluafiñ tañi püñeñ ñi iyafiel?”. Pu lamngen eluwingu ñi tüngduamelafiel, welu Yesica allkütulaeyew. Pichin rupalu, pu lamngen elkünuyngu wülngiñ ruka mu kiñe külko nielu iyael. Feymu Yesica fentren ngümakawi petu ñi chillkatumeken España mu, kidu kimtukuy Chaw Dios ñi wiñoldunguetew chem ñi llellipuel, welu duamtulafi rume. Fewla Yesica eluwi ñi poyeafiel ta Jewba. Feley llemay, fente küme tripay pu lamngen ñi fürenecheken (Eclesiastés 11:1, 6).

9, 10. 1) Kuyfi mew, ¿chem küdaw mu kellukefuyngün pu israelche? 2) Famülke mu, ¿chem dungu mu kelluafuyngün pu peñi ti trawünche mu?

⁹ Kuyfi mew, pu israelche fillke küdaw mu kellukefuyngün (Éxodo 36:2; 1 Crónicas 29:5; Nehemías 11:2). Famülke mu, fillke dungu femafuiñ ñi kelluafiel taiñ pu peñi ka lamngen, fey wülafuiñ taiñ tiempo, plata ka taiñ pepilel. Femngechi femliyiñ, müna ayüwküleaiñ ka Jewba kümelkayaeiñmu.

¹⁰ Chaw Dios ñi Dungu ngülamtukefi pu wentru ñi longkolerpual ti trawünche mu kam konakechi kellulerpual (1 Timotew 3:1, 8, 9; 1 Pedro 5:2, 3). Pu femngechi femlu küpa kellukefingün tañi pu peñi ka lamngen ñi poyeafiel ta Jewba, ka kakelu duamfalchi dungu mew (Hecho 6:1-4). Pu longkolelu feypiafuy pu peñi tañi adkünucheal, küme adnieal ti Trawünwe Ruka, adkünual ñi wülngeal ti papil ti trawünche ka ti amuldungun küdaw, kam kakelu femngechi küdaw. Pu peñi femngechi kellukelu feypikeyngün ñi rume ayüwülkeetew femal tüfa.

11. Kiñe lamngen kellukonlu ñi dewmarukayal, ¿chumngechi kümelkangey?

¹¹ Pu kellukonkelu fillke küdaw ñi dewmarukayal, fillke rupa doy weni nierpukey. Kiñe lamngen Margie pingelu,  18 tripantu mu kellukefi ñi dewmayafiel fillke Trawünwe Ruka. Kom feychi tripantu mu, kidu duamtukefi ka pepikakefi fentren üllchake lamngen. Femngechi femün mu, welukonkechi yafüluwkefuy pu lamngen engün (Romanu 1:12). Fey Margie rupalu wedake dungu tañi mongen mew, kom feychi lamngen kellueyew. Eymi kay, ¿eluwimi tami kellukonal ñi dewmarukayal? Müte pepiluwnolmi rume tüfachi küdaw mu, eymi ka kelluafuymi llemay.

12. Rupan mu kiñe fütra weda dungu, ¿chumngechi kelluafuiñ?

¹² Rupale kiñe nüyün, kürüftuku mawün kam kakelu femngechi weda dungu, iñchiñ kelluafuiñ taiñ pu peñi ka lamngen, femngechi kiñentrür küdawaiñ Jewba iñchiñ. ¿Chumngechi femafuiñ tüfa? Wülafuiñ taiñ plata (Juan 13:34, 35; Hecho 11:27-30). Kafey, kellukonafuiñ ñi liftual ka küme elkünutual chem ñi wedalkangeel. Kiñe lamngen Polonia mapu mew, Gabriela pingelu, ñamümi epe kom ñi nieel mangiñmalu am tañi ruka. Welu pu peñi ka lamngen kellupayngün, tüfa rume küme duameleyew. Kidu feypi: “Nütramkalayan chem ñi ñamümel, tüfa ta re chemkün müten. Welu may, nütramkayan kom ñi wewel. Iñche ñi rupan küme pengelenew fente ñi falin-ngen konal Jewba ñi pu che mew ka fente ñi ayüwülkeetew”. Ka femngechi duamkeyngün fentren peñi ka lamngen kellungelu rupalu kiñe fütra weda dungu. Ka müna ayüwküleyngün pu küdawkelu Jewba engu ñi kelluafiel feychi pu peñi ka lamngen (papeltunge Hecho 20:35; 2 Korintio 9:6, 7).

13. Kellukonliyiñ fillke küdaw mew, ¿chumngelu doy piwkeyeafiyiñ ta Jewba? Feypinge kiñe rupan dungu.

¹³ Estados Unidos mapu mew, kiñe lamngen Stephanie pingelu ka kakelu amuldungukelu kiñentrür küdawingün Jewba engün, ¿chumngechi? Kellufingün pu peñi ka lamngen lefmawlu ñi mapu mew, mülelu kay weychan (awkan). Fey kellufi engün ñi kintual ruka ka nieal mueble. Kidu feypi: “Inaduamlu engün fente ñi piwkeyeetew pu peñi ka lamngen wall Mapu mu, müna mañumkülefuyngün ka ayüwkülefuyngün, tüfa pürapapiwkelenew. Feychi pu familia rakiduamkeyngün iñchiñ taiñ kellufiel engün, welu rüfkünu may, kidu engün doy kellueiñmew. Inaduamlu iñchiñ ñi piwkeyen, kiñewkülen, feyentukeel ka maneluwkeel Jewba mew, iñchiñ doy piwkeyerpufiyiñ ta Jewba. Ka doy falintukefiyiñ kom taiñ eluetew kidu ñi trokiñche mew”.

14, 15. 1) ¿Chem küme rakiduam niekefuy Isaia? 2) ¿Chumngechi inayentuafuiñ Isaia ñi eluwkülen?

¹⁴ ¿Ayüpeafuymi may tami doy küdawal Jewba engu? ¿Wiñamtupeafuymi may chew ñi duamniengeel doy amuldungukelu? Feley, duamfalngelay taiñ wiñamtuwal ñi wülal taiñ nieel ka fürenecheal. Welu kiñeke peñi ka lamngen pepi femingün tüfa. Kidu engün eluwküleyngün Isaia reke. Jewba ramtuy: “¿Iney am werküafiñ ka iney amuay iñchiw tayu duam mu?”, fey ti pelon wentru Isaia feypieyew: “¡Tüfa mu mülen! ¡Werküen llemay!” (Isaías 6:8). Fey ayülmi tami doy küdawal Jewba  ñi trokiñche mu ka pepi femülmi tüfa, ¿chumngechi am kelluafuymi?

¹⁵ Jesus nütramkalu ñi amuldungucheal ka kellucheal ñi disipulungerpual, feypi: “Pütrüley ta kosecha, welu küdawfe rume pichiley. Feymew ngillatuafimün ta eymün tati ngenngelu tati ngan ketran mew ñi werküael küdawfe tañi kosechayael ti fün ketran” (Matew 9:37, 38). Feymu, ¿wüneleafuymi amuldungun mu chew duamfalngelu doy amuldungukelu? Kam, ¿kelluafuymi ta kakelu ñi femal tüfa? Fentren peñi ka lamngen feypikeyngün: ‘Ñi pengelal taiñ piwkeyefiel ta Jewba ka taiñ chafche, doy kümey taiñ wüneleal amuldungun mu chew duamfalngelu’. Müley fillke dungu tami doy küdawülafiel ta Jewba. Femngechi femülmi, müna ayüwküleaymi.

16, 17. ¿Ka chem femafuymi ñi doy küdawülafiel ta Jewba?

¹⁶ ¿Eluwafuymi ñi kellual Fetel mu kam ñi dewmarukayal? ¿Küdawafuymi kiñeke semana kam kiñeke küyen? ¿Kam küdawafuymi kiñe antü kam mufüke antü semana mew pemay? Jewba ñi trokiñche rumel duamniekey peñi ka lamngen eluwkülelu ñi kellual chew duamfalngelu ka ayünielu femal chem küdaw rume. Fey elfalkünungeafuiñ ñi femal kiñe küdaw taiñ adümkenofiel, pepiluwliyiñ rume kakelu küdaw mu. Longkontukuaiñ, famentuliyiñ taiñ ayükeel, femngechi ñi kellual chew duamniengelu, Jewba rume falintuaeiñmu (Salmo 110:3).

¹⁷ Tami doy küdawülafiel ta Jewba, ¿ayüpeafuymi may tami doy pepikangeal? Wirintukuafuymi ti papel tami amual Pu Amuldungukelu Ngünechen ñi Ngünenien tañi Chillkatuwe. Tüfachi chillkatuwe mu amuafuy pu peñi ka lamngen küme weniyekefilu ta Jewba ka dew küdawülkefilu ta Jewba fill antü. Feyta mu pepikangekeyngün ñi doy küdawal Jewba ñi trokiñche mu. Pu peñi ka lamngen amulu feychi chillkatuwe mu, eluwküleyngün ñi werküngeal chew rume duamfalngelu. ¿Ayüafuymi doy küdawülafiel ta Jewba femngechi dungu mu? (1 Korintio 9:23).

18. Kiñentrür küdawliyiñ Jewba iñchiñ fill antü, ¿chem kümeke dungu nierpuaiñ?

¹⁸ Iñchiñ Jewba ñi pu chengen fürenechekeiñ, küme piwkengeiñ, ka piwkeyechefengeiñ. Iñchiñ duamniefiyiñ ta kakelu fill antü. Tüfa ayüwülkeeiñmew ka küme tüngduamelkeeiñmew (Galata 5:22, 23, TNM). Feymu chem dungu rume rupaliyiñ, inayentuafiyiñ Jewba ñi fürenecheken ka kiñentrür küdawaiñ Jewba iñchiñ, femngechi ayüwküleaiñ llemay (Proverbios 3:9, 10).