1. Marta, ¿chem küme kimniefuy? (Inaduamnge ti adentun ellaka mu mülelu.)

MARTA küme weniyefi ta Jesus ka inakefi. Fewla layeluwün mew rupay, lalu am tañi lamngen Lasaru. Rüf duamniefuy ñi yafültukungeal. Fey Jesus feypikünueyew: “Eymi tami lamngen ta wiñomongetuay”. Re allkütufiel müten tüfa küme duamlay, welu maneluwi Jesus ñi feypikünuetew, feymu feypi: “May, dew kimnien tañi wiñomongetuael, feychi tati pu la wiñomongetule ti afaelchi antü mew” (Juan 11:20-24). Kidu küme kimniefuy tañi lamngen ñi wiñomongetual küpalechi antü mu. Welu Jesus, feychi antü wiñomongeltufi.

2. ¿Chumngelu (chemu) duamnieiñ maneluwal Marta reke?

² Iñchiñ ka rupapelaiñ layeluwün mu lalu taiñ kuyfike che, chaw, ñuke, taiñ afkadi, yall kam püñeñ. Rume duamnieiñ ñi pangkoafiel, nütramkayafiel ka kiñentrür küme rupaleal. Welu üngümkülelayafuiñ ta Jesus kam Jewba ñi wiñomongeltuafiel taiñ pu che famülke mu. Fey Marta reke, ¿maneluwküleiñ ñi wiñomongetual engün küpalechi  antü mu? Kidu reke, maneluwün mu feypiafuiñ: “Kimnien tañi wiñomongetual”. Welu kom iñchiñ müley taiñ rakiduamal chumngelu maneluwafuiñ.

3, 4. Jesus nütramkafilu ta Marta, ¿chem afmatun dungu fempefuy? Tüfa, ¿chumngechi kellufi ta Marta ñi doy maneluwal?

³ Jesus wiñomongeltufi kiñe lantu domo ñi püñeñ, inafül Nain waria Galilea mapu mew. Kafey wiñomongeltufi Jairo ñi ñawe, Kapernaum waria mu peno. Kom pu mülelu üye mu kimfuyngün “ñi dew lan ti pichidomo”. Welu Jesus nüfi ñi kuwü ka feypifi: “¡Pichidomo! ¡Witratunge!”. Feymew müten wiñomongetuy (Luka 7:11-17; 8:41, 42, 49-55). Marta mülekefuy inafül Jerusalen mu, feymu pelafi chi Jesus ñi femün tüfa, welu allküpelay tüfachi epu afmatun dungu. Kidu ka tañi lamngen Maria kimniefuyngu Jesus ñi tremolkefiel pu kutran, feymu rakiduamingu Jesus mülefule üye mu, Lasaru lalayafuy. Welu lalu kay, ¿chem rupayafuy? Marta feypi Lasaru ñi wiñomongetual küpalechi antü mu, “ti afaelchi antü mew”. ¿Chumngelu fente maneluwkefuy Marta? Eymi kay, ¿chumngelu maneluwafuymi ñi müleal wiñomongetun, fey ñi witratual tami pu che?

⁴ Fentren dungu müley taiñ kellukeetew ñi doy maneluwal ti wiñomongetun mew. Fewla inaduamaiñ kiñeke. Tüfa rakiduamelafeymu kiñeke dungu Biblia ñi feypiel tami ngüneduamkenofel, fey kelluafeymu tami doy maneluwal ñi wiñopetuafiel tami pu che lalu.

5. Marta, ¿chumngelu fente maneluwkefuy ñi wiñomongetual tañi lamngen?

⁵ Marta feypilay: “Pewmangen witratupe tañi lamngen”. Doy may feypi: “Kimnien tañi wiñomongetuael”. ¿Chumngelu fente maneluwkefuy Marta? Kidu kimniefuy kiñeke che ñi wiñomongetun kuyfi. Petu pichikalu, kimeltulelngepelafuy tüfa tañi ruka kam ti sinagoga mu. Fewla inaduamaiñ küla che ñi wiñomongelngetuel Biblia ñi nütramkan.

6. ¿Chem afmatun dungu kimniepelafuy Marta?

⁶ Fewla inaduamaiñ tati wünen che wiñomongeltulu ñi feypiel ti Biblia. Feychi mu Jewba elufi newen ta Elia ñi femal afmatun dungu. Pikun Israel mu, Sarepta waria Fenisia mapu mu, kiñe lantu domo küme llowkefuy tati pelon wentru Elia. Feymu Jewba fürenefi ka femi kiñe afmatun dungu: tañi rüngo ka ti aseyte aflay, femngechi ñi lanoal ti lantu domo ka ñi püñeñ (1 Reyes 17:8-16). Rupalu ta antü, ti pichi wentru kutrani, fey lay. Welu Elia kellueyew, fey ngillatuy: ‘Chaw Ngünechen Jewba, tüfachi pichi wentru ñi mongen wiñotupe kidu mew’. Jewba allkütufi ta Elia ka wiñomongeltufi ti pichi wentru (1 Reyes 17:17-24). Marta kimniepelafuy ñi rupan tüfachi afmatun dungu.

7, 8. 1) Elisew, ¿chumngechi kellufi kiñe domo layeluwün rupalu? 2) Elisew ñi femün, ¿chem pengelkey Jewba mu?

⁷ Ti pelon wentru Elisew wiñomongeltufi ti epungechi che ñi feypiel ti Biblia. Sunem waria mu mülefuy kiñe  domo, kidu nielafuy püñeñ ka füchalefuy tañi wentru. Tüfachi domo küme llowkefuy ta Elisew, feymu Jewba kümelkaeyew ka elueyew kiñe püñeñ. Welu rupalu kiñeke tripantu, ti pichi wentru lay. ¡Müna weñangkülepelafuy ti domo! Fente weda duamkülefulu, miyawi 30 kilometro ñi yemeafiel ta Elisew Carmelo wingkul mu. Fey Elisew wüne werküy tañi kona Geasi ñi wiñomongeltuafiel ti pichi wentru. Welu tüfa pepil-lay. Fey inalen akuy Elisew tati domo engu (2 Reyes 4:8-31).

⁸ Elisew koni ti ruka mu chew ñi mülen ti lachi pichi wentru, fey ngillatuy. Jewba allkütueyew, fey wiñomongeltufi ti pichi wentru. ¡Rume ayüwkülepelafuy ti domo pefiel tañi püñeñ ñi mongetun! (2 Reyes 4:32-37.) Rakiduampelafuy Ana ñi ngillatun mu. Ana pepi niepüñeñlafuy, welu Jewba elueyew kiñe püñeñ, tüfa ta Samuel. Fey yeñpüramfi ta Jewba, kidu am witrañpüramtufilu ti che Rüngan mew (1 Samuel 2:6). Sunem mu, mongetun mew Jewba witrañpüramtufi ti pichi wentru, femngechi pengeli ñi nieel ti pepiluwün tañi wiñomongeltuafiel pu lalu.

9. ¿Ka chem afmatun dungu pengeli Biblia?

⁹ Kangelu afmatun dungu rupay dew lalu Elisew. Kidu 50 tripantu pelon wentrungefuy, fey kutrani ka lay. Rupalu ta antü tañi foro müten mülewefuy. Kiñe antü kiñeke israelche rüngaltukufuyngün kiñe lachi wentru. Welu perumeyngün ñi küpalen kiñeke kayñe. Fey ñi pürüm lefmawal, ütrüftukufingün ti alwe ti lolo mu chew ñi elkünungeel Elisew. Biblia feypiley: “Fey ti lalechi wentru topantukuyefilu Elisew ñi foro, wiñomongetuy ka witrapüray” (2 Reyes 13:14, 20, 21). Kom tüfachi nütram kimeltufi ta Marta Chaw Dios ñi nieel pepiluwün tañi wiñomongeltucheal. Tüfa ka kelluafeiñmew ta iñchiñ taiñ kimal Jewba itrokom ñi pepilnieel.

10. Lalu Tabita, ¿chem chumi Pedro?

¹⁰ Ti Griegu Wirintukun ka pengeli kiñeke poyekefilu ta Jewba ñi wiñomongeltuchen. Ngüneduampeiñ Jesus ñi femün Nain waria mu ka Jairo ñi ruka mew. Kiñeke tripantu rupalu, ti apostol Pedro wiñomongeltufi kiñe lamngen Dorka pingefulu, Tabita ka üytukulelngefulu. Pedro koni ti katrüntuku mu chew ñi mülen ti lachi domo, ngillatuy ka feypi: “¡Tabita, witratunge!”. Feymew müten ti domo wiñomongetuy, ka Pedro “pengeltufi ñi mongetun” tati pu kristiano mülelu üye mu. Ñi rupan tüfa, “pütrün che feyentuy ta Ñidol Jesus mew”. Tüfachi weke disipulu amuldunguafuyngün Jesus mu ka Jewba ñi pepiluwün tañi wiñomongeltucheal (Hecho 9:36-42).

11. Ti lawentuchefe Luka, ¿chem feypi ñi rupan kiñe weche wentru? Tüfa, ¿chumngechi kellufi pu adkintulu?

 ¹¹ Müley kangelu wiñomongetun ñi pefiel fentren che. Kiñe rupa ti apostol Pablo trawüluwi kakelu kristiano engün kiñe katrüntuku wenu ruka mew, Troa waria mu, fachantü Turquia pingey feychi mapu. Pablo rangi puni ñi wewpitun. Kiñe weche wentru Ewtiko pingefulu allkütulerkefuy, ka anülefuy kiñe fentana mu. Welu fütra kon umawtuy, fey ütrüfnagpay küla pisu wenu ruka mew. Luka wüne akupelay chew ñi ütrüfnagün ti weche wentru. Kidu lawentuchefengefulu kay, ngüneduami ñi allfülenon müten ka tañi rupanon ñi duam, ¡ti weche rüf lalerkey! Fey Pablo ka nagpay. Pangkofi ti weche, fey feypi: “Mongelekay tati”. ¡Müna afmatupelay pu che adkintulu ñi rupan tüfa! Ka müna yafüluwingün ngüneduamlu ti weche ñi wiñomongetun (Hecho 20:7-12).

12, 13. Taiñ ngüneduampeel ñi wiñomongetun kiñeke che, ¿chem ramtuwafuiñ?

¹² Tati nütram taiñ ngüneduampeel ka kelluafeiñmew taiñ maneluwal Marta reke: Jewba elukey ta mongen, feymu wiñomongeltuafuy pu layelu. Welu rakiduamafuiñ kom tüfa ñi rupan kuyfi Jewba femkelu fütra afmatun dungu Mapu mew, ka ñi rumel mülekefel kiñe wentru poyekefilu ta Jewba, tüfa ta Elia, Jesus, Pedro kam kakelu. Feymu ramtuwafuiñ: ¿kakelu che kay lalu kake antü mew? Pu poyekefilu ta Jewba, ¿maneluwafuyngün ñi wiñomongetual pu layelu küpalechi antü mew? ¿Inayentuafuyngün Marta ñi maneluwün feypilu: “Kimnien tañi wiñomongetuael, feychi tati pu la wiñomongetule ti afaelchi antü mew”? ¿Chumngelu Marta maneluwkefuy ñi müleal wiñomongetun  küpalechi antü mu? Iñchiñ kay, ¿chumngelu maneluwafuiñ?

¹³ Kiñeke poyekefilu ta Jewba kuyfi, ka maneluwkefuyngün ñi müleal wiñomongetun küpalechi antü mu. Feymu inaduamaiñ kiñeke nütram Biblia mew.

14. Abraam ñi rupan, ¿chem kimeltukeeiñmu ti wiñomongetun mu?

¹⁴ Jewba feypikünufi ta Abraam tañi yomelche ñi kümelkayafiel kom pu che Mapu mew (Génesis 13:14-16; 18:18; Romanu 4:17, 18). Ka feypi tüfachi yomelche ñi küpayal Isaak mew, kidu tañi fotüm (Génesis 21:12). Feymu rakiduamnge chumngechi ñi duamnagün Abraam Jewba ñi feypietew chem chumafiel ta Isaak, ti fotüm ñi fente üngümkefiel: “Yefinge ta Isak, tami kiñen fotüm, feyti tami fente piwkeyeel, fey [...] chalintukulelpuaen kiñe kulliñ reke” (Génesis 22:2). Langümfule tañi fotüm, ¿chumngechi femtripayafuy Jewba ñi feypikünun? Chaw Dios ñi duam mew, Pablo wirintukuy Abraam ñi maneluwken Chaw Dios ñi nien ta pepiluwün tañi wiñomongeltuafiel ta Isaak (papeltunge Ebrew 11:17-19). Biblia feypilay Abraam ñi rakiduamken Isaak ñi wiñomongetual rupale kiñeke ora kam kiñeke antü müten. Feley, Abraam kimlafuy chumül ñi wiñomongetual Isaak. Welu maneluwkefuy Jewba ñi femal tüfa.

15. ¿Chem mew maneluwkefuy Job?

¹⁵ Ti küme wentru Job ka kimniefuy ñi müleal wiñomongetun küpalechi antü mew. Kimniefuy kiñe anümka katrüngefule, wiño choyotuafuy, fey kiñe we anümka reke feleafuy. Welu femngechi mu felelayafuy pu che (Job 14:7-12; 19:25-27). Kiñe che lafule, kidutu eluwlayafuy mongen (2 Samuel 12:23; Salmo 89:48). Chaw Dios keta elutuafeyew mongen. Feymu Job maneluwkefuy Jewba tañi rakiduamtukuaetew. Kidu kimlafuy chumül  ñi rupayal tüfa. Welu maneluwkefuy tañi rakiduamtukuaetew ka ñi wiñomongeltuaetew Jewba, ti Wülkelu mongen. Biblia feypi: “¡Awem, pewmangen ellkakünuen ti Rüngan mu, pewmangen llümumaen rupale wüla tami illkun, pewmangen mediantükünuaymi, fey akordayaymi iñche mu! Lale kiñe wentru, ¿ka wiñomongepetuafuy may? Fill antü tañi dikümtuku küdaw mew üngümkülean, akule wüla tañi neykümngetual. Eymi mütrümaymi, iñche llowdunguaeyu. Ayüaymi tami femün kidu tami kuwü mew” (Job 14:13-15).

16. Kiñe küme püllü, ¿chumngechi yafültukufi ta Daniel?

¹⁶ Rakiduamaiñ kangelu küme wentru mew, tüfa ta Daniel. Kidu kom ñi mongen mu poyefi ta Jewba nor piwke mew, fey Jewba kellukefeyew. Kiñe rupa, kiñe küme püllü “rume falichi wentru” pifi ta Daniel, ka feypifi “kümelkalenge” ka “newentulenge” (Daniel 9:22, 23; 10:11, 18, 19).

17, 18. Jewba, ¿chem feypikünufi ta Daniel?

¹⁷ Daniel nielu pataka tripantu, rakiduampelay chi ñi chumlerpual, epe puwlu am tañi layal. Fey, ¿maneluwkepefuy may ñi wiñomongetual? ¡Femi llemay! Af mew Daniel wirintukuy chem ñi feypikünuetew Jewba: “Eymi kay, amulenge puwle wüla ti antü. Eymi ürkütuaymi” (Daniel 12:13). Daniel kimniefuy tati pu layelu ñi ürkütulen, ka ñi mülenon “adkünun, ngüneduamün, ka kimün” ti Rüngan mu (Eclesiastés 9:10). Epe puwlu rume ñi layal Daniel, Jewba elueyew kiñe fütra maneluwün ñi llowal küpalechi antü mew.

¹⁸ Jewba ñi küme püllü feypifi ta Daniel: “Küpalechi antü mu witratuaymi ñi llowal chem tami ngen-ngeel”. Daniel kimnolu rume chumül ñi rupayal tüfa, ngüneduami ñi puwal tañi layal ka ñi ürkütual. Welu feypingelu “witratuaymi ñi llowal chem tami ngen-ngeel”, kidu kimürpuy ñi wiñomongetual. Tüfa rupayafuy fentren tripantu wüla ñi lan mu, feypilu am “küpalechi antü mu”.

19. Taiñ ngüneduampeel tüfachi chillkatun mew, ¿chumngechi nüwküley Marta ñi feypin mu?

¹⁹ ¡Feley llemay! Marta fentren dungu mu rüf maneluwkefuy tañi küme lamngen Lasaru ñi “wiñomongetuael, feychi tati pu la wiñomongetule ti afaelchi antü mew”. Jewba ñi feypikünufiel ta Daniel, kafey Marta ñi küme maneluwken ti wiñomongetun mu, kelluafeiñmew taiñ doy küme maneluwal ñi wiñomongetual tati pu layelu.

20. ¿Chem inaduamaiñ küpalechi chillkatun mew?

²⁰ Ngüneduampeiñ rüf kuyfike nütram, tüfa kimeltukeeiñmu ñi wiñomongetual pu layelu. Ka inaduampeiñ kiñeke poyekefilu ta Jewba ñi maneluwken tañi müleal wiñomongetun küpalechi antü mew. Welu fütra kuyfi feypikünungefule rume ñi wiñomongetual kiñe che, ¿chem kelluafeiñmu ñi kimal tañi rüf rupayal tüfa? Kimfalngefule, doy maneluwafuiñ ñi müleal ta wiñomongetun. ¿Chumül rupayay tüfa? Inaduamafiyiñ ti küpalechi chillkatun mew.