FÜRENEELIYIÑMU ka duamtueliyiñmu pu che, müna yafülduamelkeeiñmu ka ayüwülkeeiñmu. Feymu kümeafuy taiñ ramtuwal: ¿chumafuiñ taiñ füreneafiel kakelu che?

Pu fürenechekelu rüf duamtuniefi pu che, pengelkey tüfa tañi femkeel ka ñi dungukeel mu. ¿Chumngelu femkeyngün tüfa? Re wenche piwke mew müten no, welu may rüf piwkeyefi pu che ka kimniey ñi chum duamkülen engün. Pu che llowkelu Ngünechen ñi newen femngechi femkey (Galata 5:22, 23, TNM). Jewba ayükey taiñ fürenecheal, feymu ngüneduamaiñ chumngechi fürenechekey kidu ka tañi Fotüm, ka chumngechi inayentuafuiñ tañi femken engu.

Jewba fürenekefi kom pu che, ‘tati mañumkenolu ka tati wesa piwkengelu’ kütu (Luka 6:35). Biblia feypi Jewba ñi wülkeel “antü kom tati kümeke dungu femkelu mew ka tati wesake dungu femkelu mew, ka wülkey tañi mawün ti pu nor piwkengelu mew ka ti wesake piwkengelu mew” (Matew 5:45). Jewba fürenekefi kom pu che, feymu kiñe che feyentunole rume ñi dewmaetew Jewba ayüwküleafuy ñi mongen mu pichin rewall.

Jewba müna kimfalkünuy ñi fürenecheken, feychi kulpalu Adan Eva  engu. Kidu engu ‘ñüdüfüy tapül igera’, femngechi ñi takuwal. Welu wekuntu Eden pingechi mülewe, malisiangey ta mapu, wefkey “pülliñ ka troltro”. Feymu Adan ka Eva duamniefuy doy kümeke takun. Jewba kimniefuy tüfa, fey dewmalelfi engu “trülke kulliñ takuwün” ñi kuñiwtukuaetew (Génesis 3:7, 17, 18, 21).

Jewba fürenekefi ‘tati kümeke dungu femkelu ka tati wesake dungu femkelu’, welu doyelchi may fürenekefi tañi pu nor piwkeyeetew. Feychi petu pelon wentrungelu ta Sakaria, kiñe küme püllü rume rakiduamküley, pu israelche fentekünufilu am ñi dewmamekefiel Jewba ñi ngillatuwe ruka Jerusalen mu. Jewba allkütuñmafi ñi feypietew tati küme püllü, fey küme wiñoldungufi ka yafülduamelfi (Zacarías 1:12, 13). Jewba ka femngechi femfi ta Elia. Rume weda duamkülefulu feypifi ta Jewba tañi müntüñmayaetew ñi mongen. Jewba kimniefuy ñi chum duamkülen ta Elia, duamtuniefi, feymu werküy kiñe küme püllü tañi yafültukuafiel. Ka feypikünufi ñi kidulekenon. Jewba fürenefilu am ta Elia, kidu küme duamkületuy ka femürpuy ñi küdaw (1 Reyes 19:1-18). Fey, ¿iney doy küme inayentufi Chaw Dios ñi fürenecheken?

Mülepalu Jesus Mapu mew, pu che ngüneduami kidu ñi fürenecheken. Jesus turpu weda duamelkelafi pu che ka dikümtukukelafi engün ñi femal tañi ayüel kidu. Duamtufi pu che, feymu feypi: “Küpamün iñche mew kom eymün tati kansalelu tañi küdaw mew ka fanetulelu, fey iñche ta kansatuluwayiñ” (Matew 11:28-30). Fente tañi fürenecheken Jesus, pu che inanieeyew chew rume amule. Jesus kutranpiwkeyefi  engün, elufi iyael, tremoltufi ka kimeltufi “fentren dungu” tañi Chaw mu (Marku 6:34; Matew 14:14; 15:32-38).

Jesus kimniefuy ñi chum duamkülen pu che, fey küme duamelkefuy. Küpa ürkütufulu rume, Jesus fürenekefi kom pu che tañi pepaetew (Luka 9:10, 11). Rakiduamnge chem ñi rupan tati domo katrürkenolu ñi mollfüñ ñi kuerpu mew. Kidu ayüniefuy ñi tremoltungeal, feymu idañmafi Jesus tañi takun. Welu ünungelu trokiñmangefuy tañi kutran, feypikünungelu am tati ley elungelu ta Moyse (Levítico 15:25-28). Fey, ¿chumi Jesus? Illkulay, küme dungufi. Ngüneduami ñi llükalen tati domo, kutranduamyefi 12 tripantu kutrankülefulu. Fey feypifi: “Papay, tami feyentun mew ta tremotuymi. Küme tüngduamkechi amuñmutunge. Dew tremolewetuymi tami kutran mew” (Marku 5:25-34). ¡Jesus rüf fürenechekefuy!

Jewba ka Jesus ñi femün engu kimeltueiñmu taiñ kelluafiel ta che, femngechi rüf fürenecheaiñ. Jesus feypilu ti nütram tati küme piwkengechi samariache mew kimeltuy fente ñi falin-ngen fürenecheal. Kiñe judiu saltiangey, wülelkangey ka epe langümkünungey rüpü mew. Kiñe samariache rupay, fey pefilu, rume kutranpiwkeyefi, pu samariache ka pu judiu kayñewen-ngefulu rume. Welu ti samariache wimtulelu kay ñi fürenecheal, kellufi ti wentru allfülelu, liftulelfi ñi allfeñ ka yefi kiñe umañtuwe ruka mew. Fey kullifi ta kiñe wentru ñi dapiafiel tati judiu, feypifi: “Tami gastaelchi pülata, iñche wiñomeli, kullipatuaeyu” (Luka 10:29-37).

Fürenecheliyiñ, duamtuafiyiñ pu che ka yafültukuafiyiñ, welu taiñ femün mu müten no, kafey taiñ dungun mu. Biblia feypi: “Ñi fill rakiduamkülen kiñe wentru ñi piwke, weda duamelkeeyew, welu kiñe küme dungun mew yafülduamkey” (Proverbios 12:25). Fürenecheliyiñ ka küme chengeliyiñ, yafülduamelafiyiñ pu che taiñ dungun mu, femngechi ayüwülafiyiñ engün * (inaduamnge ti kimal dungu). Küme nütramkafiliyiñ pu che, kimayngün taiñ duamniefiel, fey newenkontuayngün rupan mu wedake dungu (Proverbios 16:24).

Kom iñchiñ elungeiñ taiñ inayentuafiel ñi chumngen ta Chaw Ngünechen, fey kidu reke fürenecheafuiñ (Génesis 1:27). Rakiduamnge ñi femün Julio, kiñe longkolelu pu roma weychafe, yefi tati apostol Pablo Roma mew, kidu küme piwke mu fürenefi ta Pablo, “fey elufi ñi witranngemeael ñi pu weni mew ka ñi poyengeael” Sidon waria mu (Hecho 27:3). Feychi ñamkonlu ñi farku, Pablo ka tañi pu kompañ puwingün Malta pingechi wapi mu, pu che rume füreneeyew, fey ‘kütraltuyngün, ka feypieyew engün ñi eñumtupual’ (Hecho 28:1, 2). Julio ka pu maltache fürenechelu müna kümelkayngün. Fey kümey kiñe che tañi fürenecheal kiñeke mu rewall, welu ñi rüf ayüwülafiel ta Jewba, müley ñi wimtuleal ñi fürenenieafiel ta che.

Jewba ayükey taiñ eluwküleal ñi füreneafiel pu che kom taiñ piwke mu. Welu kiñeke mu küdawngeafuy fürenecheal. ¿Chumngelu? Yewenchengeiñ chi, müte dungukelaiñ chi kam kiñeke mu rume kidutu duamuwkeiñ chi, feyngele tüfa müte fürenechekelayaiñ. Kafey weda femeliyiñmu pu che, küpa fürenelayafuiñ chi. Welu ngillatufiliyiñ ta Jewba taiñ eluaetew ñi newen ka inayentufiliyiñ, kidu kelluaeiñmu taiñ fürenecheal (1 Korintio 2:12).

¿Chumngechi kimafuymi chem femal tami doy fürenecheal? Ramtuwnge: “¿Küme allkütukefiñ may pu che? ¿Eluwkülen may tañi kimal  ñi chum duamkülen engün? Duamnien mu kellu kakelu che, ¿ngüneduamken may? ¿Tunteñma rupay ñi fürenefiel kakelu che iñche tañi reñmayenofiel ka weniyenofiel?”. Fey wüla rakiduamaymi chem tami chumal, doy kimafuymi kakelu che, doyelchi may tami trawünche. Femngechi kimaymi chem ñi rupameken ka chem ñi duamnieel engün. Fey wüla füreneafimi kakelu che chumngechi ta ayükeymi tami küme füreneaetew engün (Matew 7:12). Af mew, ngillatuafimi ta Jewba, “kelluen tañi rüf fürenecheal” piafimi. Fey kidu kelluaeymu llemay tami fürenecheal (Luka 11:13).

Pablo inayentufalngey ñi fürenecheken mu. Biblia feypi kidu “llowkefi kom che tañi peyawülmeetew”, femngechi fürenefi llemay (Hecho 28:30, 31). Pablo fürenechekefuy tañi dungukeel ka femkeel mu, feymu pu che tutekefeyew, kidu engün kimniefuy ñi duamnieetew. Ka femngechi iñchiñ, fürenecheliyiñ, pu che küpa kimürpuafuy Chaw Dios ñi rüf dungu. Fürenefiliyiñ itrokom che, taiñ pu weda femetew kütu, küme duamelafuiñ, fey wüla doy küme llowafeiñmu (Romanu 12:20). Rupale chi antü, küpa kimürpuafuyngün chi Biblia mu.

Küme elkünungetule ti Mapu, kom pu che welukonke füreneway. Pu wiñomongetualu ka fürenengeay, kiñeke tüfa kuyfi turpu fürenengekelafuy. Feymu kidu engün ka fürenechepelayay. Rüfkünu llemay, kiñe che fürenechenole ka pinole kellucheal, elungelayay ñi mongeleal ngünenietule Chaw Ngünechen. Pu fürenechefe ka piwkeyechefe müten elungeay ñi rumel mongeleal ti Küme Mülewe mu (Salmo 37:9-11). Femtripale tüfa, ¡rüf küme feleaiñ! Welu petu akunole feychi antü, iñchiñ ka kümelkangeaiñ fürenecheliyiñ, ¿chumngechi kay?

Biblia ta feypi: “Kiñe küme wentru [fürenechekelu] kidutu kümelkawkey” (Proverbios 11:17). Kiñe che fürenechekelu ka femngechi fürenengekey, kafey kakelu che ayükey ñi fülkontuaetew. Jesus feypi: ‘Pu che medilaeymünmew tamün chumngechi medilkefiel engün’ (Luka 6:38, TNM). Pu fürenechekelu küdawtukelay tañi nierpual kümeke weni ka ñi weniyenieafiel rupale ta antü.

Tati apostol Pablo feypifi pu koneltulu efeso trawünche: “Küme piwkengeaymün ka welukonke kutranpiwkeyewaymün ka welukonkechi wiñoduamawaymün” (Efesio 4:32). Kom iñchiñ welukonke fürenewliyiñ ka kutranpiwkeyewliyiñ, taiñ trawünche doy kiñewküleay ka yafülduamküleay. Turpu weda dunguyelayafiyiñ, yewelkalayafiyiñ ka weda duamel-layafiyiñ taiñ pu peñi ka lamngen, “re ayekan dungu müten” pifuliyiñ rume. Doy may küme dunguafiyiñ pu che taiñ yafültukuafiel ka kelluafiel (Proverbios 12:18). Femngechi femliyiñ, taiñ peñiwen-ngen ka lamngenwen-ngen ayüwünkechi poyeafiyiñ ta Jewba.

Dew kimürpuiñ, pu fürenechekelu pengelkey tañi femngechi chengen tañi dungukeel ka tañi femkeel mu. Fey fürenecheliyiñ, inayentuñmayafiyiñ Jewba tañi fürenecheken ka piwkeyecheken (Efesio 5:1, TNM). Kafey yafültukuafiyiñ taiñ trawünche ka kelluafiyiñ kakelu che ñi poyeafiel ta Jewba. Feymu kom taiñ pepilnieel fürenecheaiñ, femngechi kimfalngeay ñi fürenecheken pu Dungukelu Iney Ngen Jewba.