1. Jewba ¿chem elfalkünufi pu chaw ka pu ñuke?

CHAW JEWBA dewmafilu Adan Eva engu elufi ñi küpa nieal ta pichikeche. Feymu tati Biblia feypiley: “Tati pu yall kiñe yewün [regalo] Jewba mu küpalu” (Sal. 127:⁠3). ¿Chumngelu (chemu) tati Biblia feypi tüfachi dungu? Rakiduamnge kiñe pengelün dungu, kiñe weni feypieymu: “Iñche tripayan, ngüneduamelafen tañi ruka”. Eymi küme duamafuymi, fente tami manelnieetew tami weni. Welu ka rakiduamafuymi chumngechi küme ngüneduamnieafiel ti ruka, fey ñi kontunoaetew iney no rume. Ka femngechi Jewba, taiñ doy küme Weni, elfalkünufi pu chaw ka ñuke ñi küme tremümafiel pu pichikeche ka küme duamelafiel engün, tüfa engün doy falin-ngey chem ruka mew rume.

2. ¿Chem ramtun ngüneduamaiñ tüfachi chillkatun mu?

² Tüfachi chillkatun mu peaiñ kiñeke ngülam Biblia mew mülelu, tüfa kelluafi tati pu kurewen ñi küme dullial tañi chem chumal. Kafey ngüneduamaiñ kiñeke ramtun: ¿iney feypiaeyew kiñe kurewen ñi nieal pichikeche kam ñi nienoal? ¿Iney feypiaeyew chumül ñi nieal pichikeche kiñe kurewen? ¿Chumafuy pu chaw ka ñuke ñi ayüwküleal tañi pichikeche?

3. 1) ¿Iney feypiaeyew kiñe kurewen ñi nieal pichikeche kam ñi nienoal? 2) We niewlu epu che, ¿chem epu texto müley ñi longkontukunieal tañi pu weni ka tañi pu che?

³ Kiñeke trokiñ mapu mew, tati pu che rakiduamkey pu we niewlu müley ñi pürüm nieal ta pichikeche. Feymu kiñeke kurewen dikümtukungekey (fülümtukungekey) ñi femngechi femal. Kiñe peñi Jethro pingelu,⁠⁠ * Asia mapu mew müley, feypi: “Tañi trawünche  mu, kiñeke chaw ka ñuke feypikefi pu kurewen nienolu pichikeche ñi nieal engün”. Kangelu peñi Asia mapu mew tuwlu, Jefri pingey, feypi: “Kiñeke kurewen nienolu pichikeche feypingekey iney no rume ñi cuidanoaetew füchale engün”. Welu kiduke tati pu kurewen müley ñi dullial ñi nieal ta pichikeche kam ñi nienoal (Gal. 6:⁠5). Rüfkünu may, we niewlu epu che, tañi pu weni ka tañi pu che ayüniey kidu engu ñi ayüwküleal, welu kom iñchiñ müley taiñ kimtukunieal tati kurewen müten koneltuley tañi dullial tüfachi dungu mu (1 Tes. 4:⁠11).

4, 5. 1) ¿Chem dungu müley ñi nütramkayal pu niewalu ka pu kurewen? 2) ¿Chumül am doy kümeafuy ñi nütramkawal feytachi dungu mu? ¿Chumngelu?

⁴ Pu niewalu kam tati pu kurewen feypile ñi nieal ta pichikeche müley ñi nütramkayal chumül doy kümeafuy ñi nieal pichikeche ka tunten nieayngu. Welu, ¿chumül am doy kümeafuy ñi nütramkawal feytachi dungu mu? ¿Chumngelu fente falin-ngey tañi nütramkawal engün?

⁵ Petu ñi niewnon epu che, kümeafuy ñi nütramkayal ñi nieal kam nienoal pichikeche. ¿Chumngelu? Rume falin-ngey ñi kiñewal tañi rakiduam engu tüfachi dungu mew. Kafey müley ñi ngüneduamuwal ñi pepikawkülepen may ñi tremümafiel pu pichikeche. Akurumele ta pichikeche, pu chaw ka ñuke wülay fentren tiempo ka newen ñi küme tremümafiel. Feymu kiñeke we kurewen rulpakünukey kiñe tripantu kam epu tripantu, fey ñi nieal ta pichikeche. Tüfachi pu kurewen feypikey: “Femngechi doy küme wimtuayu tayu kurewen-ngen ka doy piwkeyewayu petu tayu nienon pichikeche” (Efes. 5:⁠33).

6. Mülelu am iñchiñ afaelchi antü mew, ¿chem eluwkey ñi femal kiñeke kurewen?

⁶ Kakelu pu cristiano inayentukefi Noe ñi küla fotüm ka tañi pu domo engün. Kidu engün eluwlay ñi pürüm nieal pu pichikeche (Gén. 6:⁠18; 9:⁠18, 19; 10:⁠1; 2 Ped. 2:⁠5). Jesus trürümfi taiñ mülen antü mu “feychi mongelelu ta Noe”. Kimfali llemay taiñ mülen afaelchi antü mu, feymu pütrüley “kuñiwün-ngechi dungu” (Mat. 24:⁠37; 2 Tim. 3:⁠1). Feymu kiñeke kurewen feypikey ñi nienoal pichikeche, femngechi ñi doy küdawelafiel ta Chaw Ngünechen.

7. ¿Chumngechi kelluafeyew pu niewalu tati ngülam mülelu Luka 14:⁠28, 29 ka Proverbios 21:⁠5?

⁷ Pu niewalu nütramkalu ñi nieal kam nienoal pichikeche ka tunten nieayngün, müley ñi ‘anükünuwal ñi nentucuentayal’. Femngechi pengelayngün tañi kimchengen (papeltunge Luka 14:⁠28, 29). Pu kurewen dew tremümfilu ta pichikeche kimnieyngün ñi duamfalngen nieal plata, tiempo ka newentuleal. Feymu petu  nienon mu pichikeche kümeafuy pu niewalu ñi ramtuwal: “¿Mür küdawpeafuyu may, fey tayu eluafiel chem ñi duamnieel pu pichikeche? ¿Kiñewkülepeayu may tayu rakiduam mu chem dungu tayu duamtunieel? Mür küdawliyu, ¿iney am cuidalelaeiñmu tayu pichikeche? ¿Iney ñi rakiduam ka wimtun ayünieyu ñi nieal tayu pichiche?”. Pu niewalu ramtuwlu tüfachi fillke ramtun, longkontukunieyngün chem ñi feypilen Proverbios. Biblia feypi: “Chem ñi adkünuel tati küme küdawkelu, küme tripayay llemay, welu tati matukawfe fillalerpuay” (Proverbios 21:⁠5).

8. 1) ¿Chem küdawngechi dungu rupayafuy pu kurewen? 2) Tati füta, ¿chumay fente ñi piwkeyefiel tañi domo?

⁸ Tati chaw ka tati ñuke müley ñi wülal fentren antü ka newen ñi küme tremümafiel tañi pu pichikeche. Tati kurewen diwkülele tañi pu pichikeche, fey küdawtuafuyngu ñi eluafiel tañi duamnieel kake kiñeke tañi pichikeche, femngechi ñi küme tremümafiel engün. Kiñeke kurewen femngechi rupalu, feypingün: “Kimlafun chem rakiduamal ka chem femal”. Pu ñuke rume ürküafuy fente ñi küdawün, fey küdawtuafuy ñi küme chillkatual, llellipual ka pepi amuldungual fill antü engün. Kafey küdawtuafuy ñi longkontukual chem ñi feypingeken trawün mew, femngechi tañi yafültukuaetew. Welu tati füta fente ñi piwkeyefiel tañi domo, kelluafi trawün mew ka ruka mew. ¿Chumngechi kelluafuy ti füta? Yafüluway ñi kelluafiel tañi domo ñi femal fillke duam tañi ruka mew, kafey küme pepikaway ñi ayüwülafiel tañi pu che kiñentrür poyefile ta Jewba fill semana, ka yafüluway ñi kiñentrür amuldungual tañi pu che engün.

9, 10. Pu chaw ka pu ñuke, ¿chem müley ñi femal tañi tremümafiel ñi pu pichikeche?

⁹ Pu chaw ka pu ñuke, ¿chumafuy ñi kelluafiel tañi pu yall ñi piwkeyerpuafiel ta Jewba? ¿Chumafuyngün ñi wedalkanoaetew tati kuñiwün dungu ñi mülen tüfachi Mapu mew? Peafiyiñ chem femafuy pu chaw ka pu ñuke.

¹⁰ Ngillatuafimün ta Jewba tamün kelluaetew. Ngüneduamaiñ chem ñi femün Manóah ka tañi domo. Manóah kimlu ñi nieal tañi fotüm Sanson pingelu, llellipufi ta Jewba ñi feypiaetew chumngechi tañi tremümafiel ñi fotüm.

11. Tati pu chaw ka pu ñuke, ¿chumngechi inayenturpuafuy Manóah ñi küme femün nütramkalu Jueces 13:⁠8 mew?

¹¹ Taiñ peñi Nihad pingelu ka tañi domo Alma pingelu, müleyngu Bosnia-Herzegovina mapu mew. Feypingu: “Manóah reke, llellipufiyu ta Jewba tayu kelluaetew küme chaw ka ñuke ngerpual. Fey Jewba kellukeeyumu tati Biblia mu, fillke papel mew, trawün mu ka fütrake trawün mu”. Biblia feypi: “Manóah llellipufi ta Jewba: ‘Füreneen Jewba, ka kiñe rupa werküfinge tami poyekeetew tami werküpeel, fey tayu kimeltupayaetew chumngechi  tremümafiel ti pichiche ñi choyüal’” (Jueces 13:⁠8).

12. Jose Maria engu, ¿chumkefuyngu ñi inayentuaetew tañi pu pichikeche?

¹² Inayentufalngeaymün tamün femün mew. Pu chaw ka pu ñuke falin-ngey chem tamün feypifiel tamün pichikeche, welu doy falin-ngey chem tamün femün. Tüfa kümelkayafuy kam wedalkayafuy tamün pu pichikeche. Kuyfi mu, Jose Maria engu tañi femün mu rume küme kimeltufingu ta Jesus ka tañi pu peñi ka deya. Jose rume küme küdawfe ngefuy tañi eluafiel tañi pu che chem tañi duamnieel engün. Welu ka femngechi kimeltufi tañi pu che ñi piwkeyeafiel ta Jewba (Deut. 4:⁠9, 10). Tati Ley feypikelafuy pu wentru ñi yeal kom tañi pu che engün Jerusalen waria mu ñi poyemeafiel ta Jewba, welu Jose “fill tripantu” yekefuy kom tañi pu che femngealu tati Paskua (Luka 2:⁠41, 42). Jerusalen waria rume kamapulefuy, fey rume küdawngefuy ka falifuy puwal üye mu. Feymu peno kiñeke chaw Jose ñi antü mew, yekelafuy tañi pu che Jerusalen mew. Küdawtufule rume, Jose falintukefuy tañi weniyewün Jewba engu ka falintulelfi tañi pu pichikeche femngechi ñi femal. Maria kay küme kimniefuy chem ñi feypilen tati Wirin Chillka. Kidu tañi küme femün mu ka tañi feypin mew kimeltufi tañi püñeñ ñi piwkentukuafiel Ngünechen ñi dungu.

13. ¿Chem femi kiñe kurewen ñi inayenturpuafiel Jose ka Maria ñi femün?

¹³ Tati kurewen taiñ dew üytupefiel Nihad ka Alma pingelu engu, ayüniefuyngu inayentuafiel Jose ka Maria ñi femün, femngechi ñi kelluafiel tañi fotüm ñi piwkeyeafiel ka ñi poyeafiel ta Jewba. Kidu engu feypi: “Yafüluwiyu tayu mongen mew pengelelafiel tayu püñeñ fente kümen ñi inayal Biblia ñi ngülam”. Taiñ peñi Nihad ka feypi: “Ayüliyiñ taiñ pichikeche ñi weniyerpuafiel ta Jewba, iñchiñ may müley taiñ küme weniyeafiel ta Jewba”.

14. Pu chaw ka pu ñuke, ¿chumngelu duamfali tañi kimal iney engu weniyewkey tañi pu pichikeche?

¹⁴ Kelluafimün tamün yall ñi nieal kümeke weni. Eymi chaw ka eymi ñuke müley tami kimal iney engu weniyewkey tami pichikeche ka chem femkeyngün. Kafey müley tami kimal iney engu nütramkawkey redes sociales mew ka telefono mew. ¿Chumngelu duamfali tami kimal tüfa? Tami pichikeche rume kümelkayafeyew kam wedalkayafeyew ñi pu weni chem tañi rakiduamal ka chem tañi femal engün (1 Kor. 15:⁠33).

15. Pu chaw ka pu ñuke, ¿chem kimürpuafuy taiñ peñi Jessie ñi femün mew?

¹⁵ ¿Chem femafuy tati pu chaw müte adümnofile tati computador ka kakelu electronico chemkün? Kiñe chaw Jessie pingelu, Filipinas mapu mew müley, feypi: “Müte adümnolu rume tati electronico chemkün, tañi domo iñchiw femkünuwlayu tayu kimeltuafiel tayu pu yall chumngelu kuñiwün-ngey konal tüfachi dungu mew”. Taiñ peñi feypilafi tañi pu pichikeche ñi pünenoafiel tüfachi electronico chemkün kidu tañi adümnienofiel mew. Doy may kidu feypi: “Feypifiñ tañi pu yall ñi kümen püneafiel feychi electronico chemkün tañi kimürpuafiel kangelu kewün dungu, pepikawal trawün mew ka papeltual Biblia fill antü”. Taiñ pagina jw.org^® wingkadungun mu, müley tati trokiñ “Jóvenes” pingelu, tüfa mu pu chaw ka pu ñuke peafuyngün kümeke ngülam ñi longkontukungeal, fey ñi werküal kam mandayal mensaje ka foto. ¿Inaduampefuymün may tüfachi kümeke ngülam tamün pu yall engün? Kafey müley tati video feypilelu Tami electronico chemkün, ¿eymi ngünenieeymu, kam eymi ngüneniefimi? ka tati video feypilelu Adümfilmi redes sociales kuñiwtukuwküleaymi.⁠⁠ * ¿Trür ngüneduamkefuymün tüfachi epu video tamün pu yall engün? Kom tüfachi kimeltun kelluafeymünmew küme kimeltuafiel tamün  pu pichikeche ñi küme püneafiel tati electronico chemkün (Prov. 13:⁠20).

16. ¿Chem femkey fentren chaw ka ñuke? ¿Chumngechi tripakey tañi küme femün?

¹⁶ Fentren chaw femkey fillke dungu, femngechi tañi pu yall ñi küme rupaleal feychi pu peñi ka pu lamngen engün küme küdawelkefilu ta Jewba. Femngechi femingu taiñ peñi Dani ka tañi domo Bella pingelu, Costa de Marfil mapu mew mülelu. Kidu engu mangelkefuy tati witran-ngepakechi longkolelu ñi umayal tañi ruka mew. Taiñ peñi Dani feypi: “Ñi umañpaken tati witran-ngepakechi longkolelu rume kellufi tayu pichi wentru. Fey tremlu, wünelerpuy amuldungun mu ka fantepu mew kiñeke mu elfalkünungekey ñi witranmayafiel kiñeke trawünche ti witran-ngepakechi longkolelu ñi femken reke”. Eymün pu chaw ka pu ñuke, ¿femngechi kellupeafuymün may tamün pu yall?

17, 18. ¿Tunten mew tati pu chaw doy kümeafuy ñi kimeltuafiel tañi pu yall?

¹⁷ Petu pichikalu tamün pu yall, kimeltuafimün. Tati pu chaw ka pu ñuke doy pürüm eluwle ñi kimeltuafiel tañi pu yall, doy kümeafuy (Prov. 22:⁠6). Femngechi femi Timotew tañi ñuke, Eunise pingelu, ka tañi chuchu Loyda pingelu. Kidu engu kimeltufi ta Timotew “pichi wentrungelu müten” (2 Tim. 1:⁠5; 3:⁠15). Rupalu ta antü, Timotew amuy ti apostol Pablo engu ñi amuldungual fentren trokiñ mapu mew.

¹⁸ Kangelu kurewen Costa de Marfil mapu mew mülelu, John ka tañi domo Paula pingey, kimeltufingu tañi kayu pichikeche ñi piwkeyeafiel ka küdawelafiel ta Jewba. ¿Chem kellueyew tüfachi kurewen? Inayentufingu ñi femün Eunise ka Loyda. John ka tañi domo feypi: “Pichikalu müten tayu pichikeche, kimeltulelfiyu Ngünechen ñi dungu” (Deut. 6:⁠6, 7).

19. ¿Chumngechi müley ñi kimeltulelngeal pu fotüm ka ñawe?

¹⁹ Deuteronomio 6:⁠7 feypi: “Müley tami kimeltulelafiel tami pu fotüm ka ñawe”. Welu, ¿chumngechi müley ñi kimeltulelngeal engün? Ebrew kewün mu feychi texto feypiley pu pichikeche ñi feypingeal fentren rupa kiñe kimeltun, femngechi ñi küme longkontukual. Feymu pu chaw ka ñuke müley ñi müleal tañi pu pichikeche engün ñi femngechi kimeltulelafiel. Kiñeke mu pu chaw afeluwafuy ñi müchayke kimeltulelafiel tañi pu yall. Welu pu chaw ka pu ñuke müley ñi longkontukual tüfachi kimeltun mu kellukefi tañi pu yall ñi kimafiel ka inayafiel Ngünechen tañi dungu.

20. Salmo 127:⁠4, ¿chem kimeltulelfi pu chaw ka pu ñuke?

 ²⁰ Küme kimafimün tamün pu yall. Ti Salmo 127 trürümfi tati pu yall tati “flecha reke”. Biblia feypi: “Petu wechengelu kiñe chaw, tañi pu yall flecha reke feleyngün kiñe newen wentru ñi kuwü mu” (Salmo 127:⁠4). Kakerumey chumngechi ñi dewmangeken tati flecha, kiñeke doy alükey, kakelu doy pichikey. Ka femngechi kakerumey ñi femngen pu pichikeche. Feymu pu chaw ka pu ñuke müley ñi rakiduamal chumngechi ñi kimeltulelafiel kiduke tañi pu yall. Famülke mu, kiñe kurewen Israel mapu mew mülelu, kellufi tañi epu yall ñi poyeafiel ta Jewba. ¿Chem kellueyew tüfachi kurewen? Kidu engu feypi: “Wichuke kimeltulelkefuyu Biblia tayu pu yall”. Fey kiduke tati ngen familia dulliay ñi wichuke kimeltulelngeal Biblia tati pu pichikeche kam ñi femnoal.

21. Chaw Jewba, ¿chumngechi kellukefi pu chaw ka pu ñuke?

²¹ Küdawngey ñi küme tremümngeal tati pu pichikeche, feymu kiñeke mu tati pu chaw ka ñuke ürküafuy. Welu Jewba mu küpay tati pu yall, feymu kidu eluwküley ñi kelluafiel tati pu chaw ka pu ñuke. Jewba küme allkütuñmakefi ñi ngillatun engün ka wiñoldungukefi, feymu adkünukefi kakelu chaw ka ñuke dew tremümfilu tañi pu yall, fey ñi kelluafiel pu nielu pichikeche. Kafey Jewba eli kümeke ngülam Biblia mu ka taiñ fillke papel mew.

22. ¿Chuchi am kiñeke tati doy kümeke dungu ñi elungeafel tati pu yall?

²² Kiñeke che feypikey: “Pu yall puwül-le 20 tripantu, duamniewelay ñi kimeltuaetew tañi pu chaw”. Welu feyngelay tati. Pu chaw müley ñi piwkeyeafiel tañi pu yall, eluafiel ñi tiempo ka kümeke ngülam Biblia mew tuwlu, tüfa kiñeke tati doy kümeke dungu ñi elungeafel tati pu yall. Kiduke tati pu yall dulliay chumngechi ñi allkütuñmayafiel tañi pu chaw ñi kimeltukeetew. Kiñe lamngen Anna pingelu, Asia mapu mew müley, feypi: “Rakiduamken chumngechi ñi kimeltuetew tañi chaw ka ñuke, mañumkülen tañi kelluetew ka ngülamtuetew engu ñi poyeafiel ta Jewba. Kidu engu eluenew ta mongen, welu doy falintukefiñ tañi kimeltukeetew chumngechi ayüwküleal tañi mongen mew” (Prov. 23:⁠24, 25). Ka femngechi fentren peñi ka lamngen pichikalu müten kimeltulelngey ñi poyeafiel ta Jewba, feymu rume mañumküleyngün tañi chaw ka ñuke mu.