Tati ley ñi feypin Deuteronomio 22:⁠25-27 wirintukungey tañi kimfalkünual ñi ñiwañpenon ti domo. Dew kimniengefuy ñi ñiwañpen tati wentru, feymu tüfachi ley wirintukungelay ñi kimfalkünual feychi dungu. ¿Chumngelu feypiafuiñ tüfa? Ngüneduamaiñ ti kakelu versiculo.

Ti versiculo 23 ka 24 feypiley kiñe wentru waria mu kudumfile kiñe domo fütangealu, ñiwañpey pingekefuy tüfachi wentru. ¿Chumngelu? Feychi antü mu, pu domo fütangealu dew fütangelu trokingefuy. Tati domo wirarfule, kakelu che allküafeyew ka ingkañpeafeyew. Welu wirarnofule tati domo, ñiwañpe domo pingekefuy. Feymu culpalu trokingekefuy ti wentru ka ti domo wirarnolu (Deut. 22:⁠23, 24).

Welu ti versiculo 25 puwlu 27 feypiley chumngechi trokingekefuy ti domo ka dungu rupalu. Feypi: “Welu lelfün mew kiñe wentru pefile kiñe üllcha domo fütangealu, fey nüntukafile, fey tati wentru müten müley ñi langümngeal. Tati üllcha domo mülelay chem no rume ñi femngeal. Kidu chem no rume culpalay, feymu koneltulelay tañi langümngeal. Tüfachi dungu ñi rupael trürümküley tati wentru ñi langümfiel tañi chafche. Tüfachi wentru pefilu am tüfachi üllcha domo lelfün mew. Tüfachi üllcha domo fütangealu wirarfuy, welu ngelafuy iney no rume ñi montulaetew” (Deut. 22:⁠25-27).

Feymu kiñe domo nüntukangele lelfün mew, pu juez feypikefuy tüfachi üllcha domo wirarpelafuy, “welu ngelafuy iney no rume ñi montulaetew”. Feymu ñiwañpey pingekelafuy tüfachi domo. Welu ti wentru ñiwañpey ka nüntukadomoy pingekefuy.

Tüfachi ley wirintukungey tañi kimfalkünual ñi ñiwañpenon ti domo nüntukangelu lelfün mew, welu küme feypiley tati wentru ñi ñiwañpen ka ñi nüntukadomon. Mülen mu nüntukan dungu, tati pu juez küme ngüneduamkefuyngün chem ñi rupan ka juzgakefuyngün tati wentru ka tati domo chumngechi ñi adkünuel ta Ngünechen (Éx. 20:⁠14; Deut. 13:⁠14; 17:⁠4).