KÜMEAFUY kiduke iñchiñ taiñ ramtuwal: “¿Kim mañumkepen may?”. Tati Biblia feypikünuy fentren che ñi kim mañumkenon fantepu mu (2 Tim. 3:⁠2). Kiñeke che re leliniey ñi kümelkangeal ka fürenengeal müten, feymu mañumkelayngün rume. Welu iney no rume ayükelay femngechi che.

Welu Jewba feypikefi tañi pu poyekeetew: “Mañumtulekeaymün” (Kol. 3:⁠15). Kim mañumliyiñ, rume kümelkangeafuiñ. ¿Chumngelu? Ngüneduamaiñ kiñeke dungu.

¿Chumngelu fente kümelkakeeiñmu taiñ kim mañumal? Kim mañumal kelluafeiñmu taiñ doy falintuwal. Tati che mañumkelu küme duamkey, ka femngechi femkey tati che mañumtungekelu. ¿Chumngechi fel? Rakiduamnge tüfachi dungu mew. Kiñe che eluwle taiñ füreneaetew, pengelay taiñ duamnieetew ka falintunieetew. Ngüneduamfiel mu tüfa iñchiñ, doy falintuwafuiñ. Ka femngechi duampelay ta Rut. Boos küme llowfi ta Rut, feymu kidu rume ayüwmapelay pefilu ñi küme trokituetew tüfachi wentru (Rut 2:⁠10-13).

Doyelchi may müley taiñ mañumafiel ta Chaw Ngünechen (1 Tes. 5:⁠18). Kiñeke mu rakiduamtripakeiñ itrokom taiñ eluniekeetew Jewba taiñ kümelkaleal ka taiñ kimafiel (Deut. 8:⁠17, 18; Hecho 14:⁠17). Feymew müley taiñ küme rakiduamtukupayal chumngechi taiñ kümelkakeetew Jewba iñchiñ mu ka taiñ pu che mew. Femngechi femliyiñ, doy mañumafiyiñ ta Jewba ka doy maneluwküleaiñ kidu taiñ piwkeyenieetew ka falintunieetew (1 Juan 4:⁠9).

Welu re rakiduamlayaiñ müten chumngechi taiñ kellukeetew Jewba, doy may ka müley taiñ mañumafiel (Sal. 100:⁠4, 5). Tati kim mañumtukelu ayüwkey ka ayüwülkefi ta kakelu che.

Kim mañumliyiñ, ¿ka chem kümelkan llowafuiñ? Doy weniyewafuiñ kakelu che engün. Kom iñchiñ duamnieiñ taiñ falintungeal. Rüf piwke mu mañumtufiliyiñ kiñe weni taiñ küme femetew, doy küme weniyewafuiñ (Rom. 16:⁠3, 4). Ka femngechi pu che mañumtukelu doy eluwkey ñi kümelkayafiel ta kakelu che. Tüfa engün kimtukukeyngün tañi fürenengen, feymu ka ayüniey ñi füreneafiel ta kakelu che. Kafey Jesus feypi: “Doy kümey ta wülael ta llowün mew” (Hecho 20:⁠35). Feymu kümelkafiliyiñ ta kakelu che, doy ayüwküleaiñ.

Kiñe wentru Robert Emmons pingelu, küdawkey ti Universidad de California pingelu, kelluntukuy ñi ngüneduamal chem dungu rupakey mañumuwün mu. Kidu feypi: “Taiñ kim mañumtual, müley taiñ longkontukual ñi duamfalngen tañi müleal kelluwün. Kiñeke mu iñchiñ kümelkakefiyiñ pu che. Ka kiñeke mu, iñchiñ kümelkangekeiñ”. Feley llemay, taiñ mongeleal ka kümelkaleal duamniefiyiñ kakelu che taiñ kümelkayaetew chem dungu mew rume. Kiñeke mu duamnieafuiñ kiñeke che taiñ eluaetew iyael kam taiñ lawentuaetew (1 Kor. 12:⁠21). Pu kim mañumtukelu ngüneduamkey chumngechi ñi kümelkakeetew kakelu che. Femngechi felerkelu am ti dungu, müley taiñ rumel mañumtuleal.

Ngüneduamaiñ ka kiñe dungu chumngelu kümelkakeeiñmu mañumchefe ngeal. Kim mañumliyiñ, longkontukunieafiyiñ ti kümeke dungu ñi rupaken. Taiñ rakiduam trürümafuiñ ta kiñe chaytuwe. Feymu dulliafuiñ chem dungu ñi mülenagal taiñ rakiduam mu ka chem dungu ñi famentuafiel. Kim mañumliyiñ, müte longkontukunielayafiyiñ taiñ weda rupameken, doy may rakiduamtukunieaiñ ti kümeke dungu taiñ rupaken. Mañumchefe ngeliyiñ, doy kümeke dungu peaiñ, feymu doy mañumchefe ngeaiñ. Doyümfiliyiñ mañumchefe ngeal taiñ mongen mu, fey tüfa kelluaeiñmu taiñ ‘rumel ayüwküleal’ chumngechi ñi feypin ti apostol Pablo (Filip. 4:⁠4).

Kim mañumal kelluafeiñmu taiñ rakiduamnoal wedake dungu. Kim mañumtuliyiñ, eluwlayafuiñ taiñ weñangküleal, ütrirafiel kam illkutunieafiel ta kakelu che. Kafey pu kim mañumtulu ayüwkülekey tañi nieel mew, feymu diñmatukelay tañi doy nieal itrofillem (Filip. 4:⁠12).

Iñchiñ taiñ cristiano ngen, kimnieiñ tati Weküfü ayüniey taiñ weñangküal ka yafüngewenoal fente taiñ rupaken wedake dungu mu. Weküfü ayüniey taiñ küme rakiduamnoal ka chem dungu no rume taiñ tuduamnoaetew. Feychi rakiduam niefuliyiñ, pu che allkütulayafeiñmu amuldungun mew. Welu kim mañumtuliyiñ, pengelaiñ taiñ llowken Ngünechen tañi newen, feymu ayüwülaeiñmu kom taiñ elukeetew Jewba ka maneluwküleaiñ ñi feypikünuel mu (Gal. 5:⁠22, 23, TNM).

Ngünechen tañi pu che ngen, feyngelu trokikefiyiñ taiñ ngüneduampeel ti mañumtun dungu mew. Welu ka ngüneduamuwiyiñ taiñ küdawtuken ñi mañumtual ka küme rakiduam nieal. Welu femkünuwlayaiñ taiñ yafüluwal. Kom iñchiñ kim mañumturpuafuiñ. ¿Chumngechi? Fill antü elantükünuafuiñ taiñ rakiduamal chem dungu mu taiñ mañumtual. Doy rakiduamliyiñ tüfachi dungu mu, doy wimturpuafuiñ taiñ mañumtual. Kafey doy ayüwküleaiñ ta kakelu pu che mew ñi rakiduamken tañi weda rupaken mu müten. Rakiduamafuiñ tunten kümeke dungu femi Chaw Ngünechen ka kakelu che taiñ yafültukuaetew, kom tüfa rume ayüwülkeeiñmu. Fill antü wirintukuafuiñ epu kam küla dungu taiñ mañumtual.

Kiñeke adümuwün-ngechi che chillkatulu tüfachi dungu feypikeyngün: “Pu che doy mañumtukelu, doy küme elkünukey tañi rakiduam, feymu küdawtukelay ñi küme rakiduam nieal tañi mongen mu”. Pu che mañumtukelu doy ayüwküleyngün. Feymu llemay rakiduamtukunieaiñ kom kümeke dungu taiñ nieel, ayüwmayaiñ rupan mu kümeke dungu ka rumel mañumtulekeaiñ. Ngünam rulpakünulayaiñ kom taiñ niekeel, doy may mañumafiyiñ ta Jewba ñi küme piwkengen mew. Feley llemay, ¡rumel mañumtulekeaiñ! (1 Crón. 16:⁠34; Kol. 3:⁠15).