Femlafuy peno. Tati Weküfü dungufilu kiñe filu mew, feypilafi ta Eva: “Ifilmi ti fün tami inoafel, layay tami cuerpo müten, welu tami püllü mongelepuay kañpüle”. Welu femngechi feypilay tati Weküfü. Doy may, feypifi ta Eva chumkawnorume ñi lanoal. Fey rakiduamelfi ñi doy küme mongen nietual ka ñi duamnienoel tañi ngünenieaetew Chaw Ngünechen (Gén. 2:⁠17; 3:⁠3-5).

Feymew llemay ti kimeltun ñi mongeleken kañpüle pu layelu tuwlay Eden lof mu. Fey ¿chew am tuwi tüfachi koyla kimeltun? Rüf küme kimnielaiñ. Welu kimnieiñ kom tati koylake feyentun ñamtuy Noe ñi antü mew. Küpalu ti Fütra Mangin Ko, Noe ka tañi pu che müten montuyngün. Kom engün poyekefuyngün ta Jewba, feymu aftuy ti koylake kimeltun.

Dew rupalu ti Fütra Mangin Ko, tati pu che rakiduamürpuy kañpüle ñi mongeleketun pu layelu. Chaw Ngünechen eluyefi fill kakerumechi dungun pu che Fafel mew, fey “wall mapu ta püdi engün” ka femngechi yetuy engün tati koyla feyentun kañpüle ñi mongeleketun pu layelu (Gén. 11:⁠8, 9). Feymu küme kimlaiñ chumül ñi feyenturpun pu che tüfachi koylake dungu. Welu küme kimnieiñ may tati Weküfü mew “tripakey kom koyla dungu”. Feymu kidu mew tripay tüfachi koyla feyentun ka rume ayüwkey pefiel wall püle ñi puwün tañi koylatuel (Juan 8:⁠44).