1, 2. Tüfachi tripantu mew, ¿chem trawün mu kiñewküleay fentren che? Ka, ¿chumngelu (chemu) müna sakifali? (Inaduamnge ti adentun ellaka mu mülelu).

TÜFACHI tripantu mew, 31 konle marzo küyen, fentren millon pu che wall Mapu mew amuay kiñe falin trawün femngekelu kiñe rupa fill tripantu mu. Dew konle ti antü, pu Dungukelu Iney Ngen Jewba ka kakelu pu che trawüluwayngün ñi akordangeal Jesus ñi lapan iñchiñ mu. Afmatufalngey chumngechi ñi kiñewkülen pu che amun mu tüfachi trawün mew fill tripantu. Ngelay kangelu trawün femkelu tüfa.

² Müna ayüwkepelay Jewba ka Jesus pefiel fentren pu che wall Mapu mu ñi amuken tüfachi falin trawün. Biblia pengelkey “fentren pu che kom trokiñke mapu tuwlu, kakerume tuwünngelu, kakerume dungun nielu”. Kom engün feypikey: “¡Iñchiñ taiñ Ngünechen [...], ka femngechi tati Korderu montuleiñmew!” (Apokalipsi 7:9, 10). Femngechi püramyengey Jewba ka Jesus pu che amulu ti Trawün  Jesus tañi lan ñi akordangeal fill tripantu. ¡Müna sakifali!

3. ¿Chemke ramtun wiñoldungungeay tüfachi chillkatun mu?

³ Tüfachi chillkatun mu ngüneduamaiñ meli ramtun: 1) Taiñ rüf kelluaetew ti Trawün Jesus tañi lan ñi akordangeal, ¿chumngechi pepikawafuiñ? 2) Tüfachi falin trawün, ¿chumngechi kellukeeiñmu taiñ kiñewküleal kom pu poyekefilu ta Jewba? 3) ¿Chem chumafuiñ ñi kiñewküleal Jewba tañi pu che? 4) ¿Mülepeay may kiñe antü ñi femngewenoal ti Trawün Jesus tañi lan ñi akordangeal? Feyngele, ¿chumülfel tüfa?

4. Ti Trawün Jesus tañi lan ñi akordangeal, ¿chumngelu fente falin-ngey?

⁴ ¿Chumngelu am müna falin-ngey taiñ amual ti Trawün Jesus tañi lan ñi akordangeal? Femngechi poyeafiyiñ ta Jewba, chumngechi taiñ femken kom taiñ trawün mu. Kafey küme kimnieiñ Jewba ka Jesus ñi ngüneduamkefiel iney ñi newentulen tañi amual ti doy falin-ngechi trawün ti tripantu mew. Feley llemay, müna duamnieiñ Jewba ka Jesus ñi pefiel taiñ trawüluwün feychi antü, feymu kiñe fütra weda dungu müten katrütuafeiñmew. Taiñ femkeel mu pengelafiyiñ ta Jewba fente taiñ falintuniefiel taiñ trawüken, fey kidu doy küpa wirintukukünuay reke taiñ üy kiñe lifru mew, femngechi taiñ akordayaetew. Tüfa “tati mongen lifru” pingey, fey mu Jewba wirintukukey iney ñi eluafiel afnoachi mongen (Apokalipsi 20:15; Malaquías 3:16).

5. Petu ñi puwnon ti Trawün Jesus tañi lan ñi akordangeal, ¿chumngechi küme ngüneduamuwafuiñ taiñ rüf feyentulen?

⁵ Kiñeke antü petu ñi puwnon ti Trawün Jesus tañi lan ñi akordangeal, eluwküleafuiñ taiñ ngillatual ka taiñ ngüneduamal tunte taiñ weniyefiel ta Jewba (papeltunge 2 Korintio 13:5). Ti apostol Pablo feypifi pu kristiano: ‘Küme ngüneduamuwmün eymün kisutu, femngechi tamün inaduamael rüf dungu mew may tamün feyentulen’. ¿Chumngechi femafuiñ tüfa? Kümeafuy taiñ ramtuwal: “¿Küme feyentuken ñi koneltulen ti kiñen trokiñche Jewba ñi adkünufiel tañi femal kidu ñi ayükeel? ¿Kom tañi newen mew eluwkülen tañi amuldungual ka kimeltucheal ti rüf dungu? ¿Feyentulen tañi epe puwkülen ñi afal ta antü ka ñi pichilewen tañi apümkangeal Weküfü ñi ngünenien? ¿Pengelken tüfa tañi mongen mu? ¿Petu maneluwken Jewba ka Jesus mu chumngechi ñi femkefel ellaka mu?” (Matew 24:14; 2 Timotew 3:1; Ebrew 3:14). Taiñ ramtuwken tüfa, kelluaeiñmew ñi ‘ngüneduamuwal’ taiñ chem chengen.

6. 1) Taiñ llowal ti afnoachi mongen, ¿chem müley taiñ femal? 2) Ñi pepikayal tañi piwke kiñe longkolelu, ¿chumkey? Ka ¿chumngechi inayentuafuiñ?

⁶ ¿Chumafuiñ taiñ pepikawal petu ñi puwnon ti Trawün Jesus tañi lan ñi akordangeal? Chillkatuafuiñ ka rakiduamafuiñ kiñeke papil mu nütramkelu ñi fente falin-ngen tüfachi trawün (papeltunge Juan 3:16; 17:3). Feley, müley taiñ kimafiel ta Jewba ka feyentual kidu ñi sakin Fotüm mu, femngechi müten llowafuiñ afnoachi mongen. Feymu pepikayal taiñ piwke amual ti Trawün  Jesus tañi lan ñi akordangeal, adkünuafuiñ taiñ chillkatual kiñeke dungu taiñ doy fülkonal ta Chaw Jewba ka tañi Fotüm mu. Tüfa ñi femkeel kiñe peñi longkolelu ti trawünche mu fentren tripantu mu. Fey eluwi tañi ngülümafiel kiñeke chillkatun tripalu Ti Werken mu nütramkakelu taiñ piwkeyeetew Jewba ka Jesus, ka ngüneduamkelu ti Trawün Jesus tañi lan ñi akordangeal. Kiñeke antü petu ñi puwnon feychi falin trawün, kidu papeltukey ka küme ngüneduamkey chumngelu ñi fente falin-ngen tüfachi trawün. Kiñeke mu dullikey (ngümintuki) kiñe kam epu weke chillkatun ñi ka ngülümafiel. Kafey papeltukey ka küme rakiduamkey ñi chem pilen ti trokiñ Biblia nüwkülelu ti Trawün Jesus tañi lan ñi akordangeal. Femün mu tüfa, taiñ peñi feypikey ñi doy kimürpun fill tripantu. Doy may, ñi chillkatuel kellueyew ñi doy piwkeyeafiel ta Jewba ka Jesus. Iñchiñ ka femngechi chillkatuliyiñ, doy piwkeyeafiyiñ engu, doy mañumnieafiyiñ ñi femkeel ka doy kelluaeiñmew ti Trawün Jesus tañi lan ñi akordangeal.

7. 1) Feychi pun Jesus elkünulu ñi akordangeal tañi lan, ¿chem llellipuy? 2) ¿Chumngelu feypiafuiñ Jewba tañi allkütuñmafiel Jesus ñi llellipun?

⁷ Feychi pun Jesus elkünulu ñi akordangeal tañi lan, llellipuy ñi kiñewküleal tañi pu inanieetew chumngechi ñi kiñewkülen kidu tañi Chaw engu (papeltunge Juan 17:20, 21). Müna kimfali Jewba ñi allkütuñmafiel tañi sakin Fotüm ñi llellipuel. Taiñ fillke trawün pengelkey ñi kiñewkülen Jewba tañi pu che, welu tüfa doy kimfalngey ti Trawün Jesus tañi lan ñi akordangeal. Feychi sakin antü wall Mapu mu kiñewkülen trawüluwkey fentren pu che fillke mollfüñ ka tuwün nielu, ka pengelkey ñi feyentuken Jewba tañi werküelchi Fotüm mew. Kiñeke che turpu rakiduamlayafuyngün ñi poyeafiel tañi Chaw Ngünechen kiñentrür pu katripanche engün. Welu Jewba ka Jesus rakiduamkelay kidu engün reke, doy may müna ayüwülkeeyew engu taiñ kiñewkülen femngechi mu.

8. Jewba, ¿chem feypifi ta Esekiel?

⁸ Iñchiñ dew kimtukuiñ ñi kiñewküleal Jewba tañi pu che, taiñ Wenu Chaw feypikünulu am taiñ femngechi feleal elufilu tañi werkün dungu ta Esekiel. Biblia feypi: “Fey Jewba ka kiñe rupa dunguenew: ‘Eymi kay, wentru ñi fotüm, nüfinge kiñe mamüll, fey wirintukufinge kidu mew: “Tüfa ñi elungeal ta Juda ka kom tati pu israelche ñi mülen kidu engu”. Fey wüla nüfinge kangelu mamüll, fey wirintukufinge kidu mew: “Tüfa Efrain ñi mamüll, ñi elungeal ta Jose ka kom tati pu israelche ñi mülen kidu engu”. Fey trapümfinge tüfachi epu mamüll, femngechi ñi kiñengerputual müten eymi tami kuwü mew’” (Ezequiel 37:15-17). Ñi feypifiel tüfa ta Esekiel, Jewba feypikünuy tañi pu che ñi wiñotual tati feypikünuelchi mapu mew, fey ñi kiñewküleal. Welu ka feypikünuy ñi kiñewküleal Jewba tañi pu che epe puwkülele ñi afal ta antü. Femngechi feypi La Atalaya julio küyen 2016 tripantu mew, ti trokiñ “Preguntas de los lectores”.

9. Ñi rüf tripan Esekiel tañi feypikünuel, ¿chumngechi pengelkey ti Trawün Jesus tañi lan ñi akordangeal?

⁹ Dew konlu 1919 tripantu, Jewba eluwi tañi ñochikechi wiño adkünutuafiel  ka trawütuafiel pu amualu wenu Mapu mew. Kidu engün feychi mamüll ürke “ñi elungeal ta Juda”. Welu fey wüla inakoningün fentren che rumel mongelealu tüfachi Mapu mew. Kidu engün feychi mamüll ürke “ñi elungeal ta Jose”. Jewba feypikünuy tüfachi epu mamüll “ñi kiñengerputual” kidu tañi kuwü mew (Ezequiel 37:19). Feymu pu “kakelu ufisa” ka ti pu amualu wenu mapu mew, “kiñe kechan müten” ngerpuyngün Jewba ñi duam mu (Juan 10:16; Zacarías 8:23). Famülke mu tüfachi epu trokiñche kiñewküley ka kiñentrür poyekefi ta Jewba. Kom inakefingün tati Longko Ülmen Jesus, tüfa David pingey tüfachi pelon dungu mew (Ezequiel 37:24, 25). Trawüluwken mu fill tripantu taiñ akordayal Jesus tañi lan, ngüneduamkeiñ ñi kiñewkülen tüfachi epu trokiñche, chumngechi ñi feypikünuel Esekiel. Welu tañi amuleal ñi femngechilen Jewba tañi pu che, ¿chumafuiñ kidutu iñchiñ?

10. Taiñ kiñewküleal, ¿chumngechi kelluntukuafuiñ?

¹⁰ ¿Chumngechi kelluntukuafuiñ ñi kiñewküleal Jewba tañi pu che? Newentuleaiñ taiñ ñom chengeal. Miyawpalu Jesus Mapu mew, kimeltulelfi tañi pu inanieetew ñi duamfalngen tañi ñom chengeal (Matew 23:12). Epe kom che tüfachi Mapu mu doy falilu trokiwkey ta kakelu mew. Welu iñchiñ ñom chengeliyiñ, yamnieafiyiñ pu wentru taiñ adnieetew ti trawünche mu ka allkütuñmayafiyiñ ñi ngülam, femngechi müten kiñewküleay taiñ trawünche. Welu doyelchi may ñom chengerpuaiñ taiñ ayüwülafiel ta Chaw Dios, kidu am “katrütukefilu tati pu mallmawünngelu, welu fürenekefi tati pu ñom piwkengelu” (1 Pedro 5:5).

11. Ngüneduamfiel ñi rüf adentulen ti kofke ka ti kurü pulku, ¿chumngechi kellukeeiñmew taiñ kiñewküleal?

¹¹ ¿Chumngechi ka kelluntukuafuiñ ñi  kiñewküleal Jewba tañi pu che? Kom piwke mu ngüneduamaiñ chem ñi rüf adentulen ti kofke ka tati pulku ñi rulpangekeel ti Trawün Jesus tañi lan ñi akordangeal. Femaiñ tüfa petu ñi puwnon feychi trawün, ka doy may feychi pun ñi femngeal ti trawün (1 Korintio 11:23-25). Ti kofke adentuley Kristo ñi kulpangenochi kuerpu ka ti kurü pulku adentuley Jesus ñi mollfüñ. Welu fey müten duamlaiñ taiñ kimafiel. Duamnieiñ taiñ rakiduamtukual tüfa: Jesus ñi lan pengelkey tunte taiñ piwkeyeetew Jewba wülkünulu am ñi Fotüm iñchiñ mu, ka pengelkey Jesus taiñ piwkeyeetew kidu ñi pin mu wültukuwlu am. Rakiduamfiel tüfa yafültukukeeiñmew taiñ doy piwkeyeafiel engu, fey kom iñchiñ piwkeyefilu am ta Jewba, doy kiñewküleiñ.

12. Jesus tañi nütram, ¿chumngechi pengeli ñi falin-ngen taiñ wiñoduamtucheal?

¹² ¿Ka chem chumafuiñ taiñ kelluntukual ñi kiñewküleal Jewba tañi pu che? Eluwaiñ taiñ wiñoduamtucheal. Jesus lay taiñ wiñoduamtungeal, fey iñchiñ wiñoduamtucheliyiñ, pengelafiyiñ ta Jewba taiñ mañumniefiel kidu taiñ wiñoduamtukeetew. Fey tañi pengelal fente ñi falin-ngen taiñ wiñoduamtucheken, Jesus nütrami ñi chumün kiñe longko ülmen ka tañi pu küdawülkeetew. Papeltuafuymi Mateo 18:23-34, fey wüla ramtuwafuymi: “Jesus ñi kimeltuel, ¿yafültukuenew ñi wiñoduamtucheal? Iñche, ¿kuñillkefiñ tañi pu peñi ka lamngen ka pürüm illkufemkelan? Wedalkaelumu kiñe che, ¿eluwkülen tañi pürüm wiñoduamtuafiel?”. Rüfngey ñi mülen kiñeke welulkan doyelkülelu ta kakelu mew, ka taiñ kulpafengen mu, küdawngeafuy taiñ wiñoduamtuafiel kiñeke. Welu Jesus ñi nütram kimeltukeeiñmew taiñ femal Jewba ñi ayükeel (papeltunge Matew 18:35). Müna kimfali ñi kimeltuel Jesus: wiñoduamtunoliyiñ taiñ pu peñi ka lamngen rüf wiñorakiduamtulu, Jewba wiñoduamtulayaeiñmew. ¡Müna ngüneduamfali tüfa! Feymu duamfali taiñ newentuleal ñi wiñoduamtucheal chumngechi ñi kimeltuel Jesus, femngechi amul kiñewküleaiñ, tüfa ayüfali.

13. Küpa küme yeniewliyiñ kakelu engün taiñ kiñewküleal, ¿chem chumaiñ?

¹³ Wiñoduamtucheliyiñ, kelluntukuaiñ taiñ kümelkawküleal pu peñi ka lamngen iñchiñ. Ti apostol Pablo ngülamtueiñmew taiñ küdawal kom newen mu, femngechi taiñ amul kiñewküleal ka taiñ küme tüngküleal (Efesio 4:3). Feymu petu ñi puwnon ti Trawün Jesus tañi lan ñi akordangeal, ka doy may feychi pun ñi femngeal ti trawün, kom piwke mu ngüneduamaiñ chumngechi taiñ yewken kakelu engün. Fey ramtuwafuiñ: “Pu che ñi kimnieetew, ¿küme kimniey iñche tañi pürüm wiñoduamtucheken tañi weda duameletew? ¿Küme kimniey tañi kelluntukuken ñi kümelkawtual ka kiñewküleal pu peñi ka lamngen iñchiñ?”. Tüfa ngüneduamfali llemay.

14. Taiñ ‘welukonke küme duamtuniewal ta piwkeyewün mew’, ¿chem chumaiñ?

¹⁴ ¿Chumngechi ka kelluntukuafuiñ ñi kiñewküleal Jewba tañi pu che? Inayentuñmayafiyiñ Jewba ñi piwkeyechefengen (1 Juan 4:8). Fey turpu feypilayaiñ: “Peñiyefiñ ka lamngenyefiñ engün, feymu müley ñi piwkeyeafiel, welu rüf weniyekelafiñ”. Femngechi rakiduamliyiñ, inalayaiñ Pablo ñi ngülam taiñ ‘welukonke küme duamtuniewal ta  piwkeyewün mew’ (Efesio 4:2). Pablo feypilay müten “küme duamtuniewaymün”, doy may feypi taiñ femal tüfa “piwkeyewün mew”. Femngechi taiñ femafel. Rakiduamnge tüfa: Jewba kakerume che küpalfi tañi trokiñche mew (Juan 6:44). Kidu femkey tüfa kümeke dungu peñmafilu am kidu engün, feymu piwkeyefi, fey ¿chumngelu kay femnoafulu iñchiñ? Feymu llemay eluwaiñ taiñ piwkeyeafiel kom taiñ pu peñi ka lamngen, Jewba taiñ feypietew am ñi femal tüfa (1 Juan 4:20, 21).

15. Kiñe antü femngewelayay ti Trawün Jesus tañi lan ñi akordangeal, ¿chumngelu feypiafuiñ tüfa?

¹⁵ Akuay ti antü ñi femngewenoal ti Trawün Jesus tañi lan ñi akordangeal. ¿Chumngelu feypiafuiñ tüfa? Pablo feypifilu am pu kristiano amualu wenu mapu mew ñi trawüluwal tañi akordayafiel Jesus ñi lan “küpatule wüla ta Ñidol” (1 Korintio 11:26). Kafey Jesus feypikünulu chem ñi rupayal epe puwkülele ñi afal ta antü, ka nütrami kidu tañi küpayal. Feypi chem ñi rupayal ti küpalechi fütra kutrankawün mu: “Wenu mew pengeay tati Wentrukünuwpalu tañi afmafal dungu. Ka kom chüf mapu müleyechi trokiñche rume llükayay ka ngümayay, peafilu engün am tati Wentrukünuwpalu küpalelu ta wenu tromü mew kom newen mew ka fütra afmatufalchi pepiluwün mew. Fey kisu werküay tañi pu werken püllü ñi newentu dungulngeael tati kullkull, femngechi ñi trawüluwael tañi dullielchi pu che küpalu tati meli witran mapu püle” (Matew 24:29-31). Jesus yepayafi pu dullingelu petu mülewelu faw, femngechi ‘trawülafi tañi dullielchi pu che’ ñi amual wenu mapu mew. Tüfa rupayay dew konle ti fütra kutrankawün, welu petu ñi puwnon ti Armagedon weychan. Puwle tüfa, Jesus ka kom pu 144.000 engün, weychapayafingün ka wewpayafingün tüfachi Mapu mew müleyechi longko ülmen (Apokalipsi 17:12-14). Fey küpale Jesus ñi trawülafiel tañi dullielchi che, femngewelayay ti Trawün Jesus tañi lan ñi akordangeal.

16. Tüfachi tripantu mu, ¿chumngelu eluwküleymi tami amual ti Trawün Jesus tañi lan ñi akordangeal?

¹⁶ Tüfachi tripantu mew, amuaiñ llemay ti Trawün Jesus tañi lan ñi akordangeal femngealu ti sabado antü 31 konle marzo küyen, ka llellipuafiyiñ ta Jewba taiñ kelluaetew ñi amuleal taiñ kiñewkülen. Biblia feypi: “¡Ngüneduamaymün! ¡Müna kümey ka ayüfalngey pu peñi ka lamngen ñi kiñentrür müleal!” (Salmo 133:1). Kiñentrür trawüluwlu iñchiñ feychi sakin antü mew pengelkeiñ taiñ ayüfal kiñewkülen. Müna falintunieafiyiñ tüfa petu femngele Mapu mew ti Trawün Jesus tañi lan ñi akordangeal.