1. Jewba pefilu fentren che wall Mapu püle trawüluwlu akordayafiel Jesus tañi lan, ¿chem ngüneduamkey? (Inaduamnge ti adentun mülelu nagaltu).

RAKIDUAMNGE ñi chumken Jewba pefilu fentren che wall Mapu püle trawüluwlu akordayafiel Jesus tañi lan. Kidu re pekelafi müten trawülechi pu che, doy may ngüneduamkefi kake kiñeke pu che. Kiñeke amukey ti Trawün mu fill tripantu. Kiñeke engün amukey kayñetungelu rume. Kakelu müte amukelay taiñ trawün mu fill semana, welu falin dungu trokifi ti Trawün Jesus tañi lan ñi akordangeal, feymu amukeyngün. Jewba ka ngüneduamkefi feychi che turpu amukenofulu, welu fewla amuy re ngüneduamalu peno.

2. ¿Chem ngüneduamaiñ tüfachi chillkatun mu?

² Rüfkünu llemay, Jewba ayüwkey pefiel mu fentren che amukelu ti Trawün Jesus tañi lan ñi akordangeal (Luka 22:19). Welu kidu falintukefuy rume tunten che ñi amun ti trawün mu, doy falintukey chumngelu ñi amun feychi pu che. Tüfachi chillkatun mu, ngüneduamaiñ chumngelu amukeiñ ti Trawün Jesus tañi lan ñi akordangeal ka ti trawün mu taiñ pepikalelkeetew Jewba fill semana. Rume falin-ngey taiñ kimal tüfa.

3. ¿Chumngelu amukeiñ trawün mu?

³ Iñchiñ amukeiñ trawün mu doyelchi may femngechi poyekefilu iñchiñ ta Jewba. Kafey trawün mu Jewba ta kimeltukeeiñmu. Pu mallmangechi che duamfalngenolu tañi kimeltungeal trokiwkey (3 Juan 9). Welu Jewba tañi pu chengen, ayüwmakeeiñmu taiñ kimeltukeetew kidu ka tañi adkünuelchi trokiñche (Is. 30:20; Juan 6:45).

4. 1) Taiñ amuken trawün mu, ¿chem pengelkey? 2) Ñi feypilen 1 Korintio 11:23-26, ¿chumngelu fente falin-ngey taiñ amual ti Trawün Jesus tañi lan ñi akordangeal?

 ⁴ Taiñ amuken trawün mu pengelkey taiñ ñom piwkengen ka taiñ eluwkülen ñi kimeltungeal. Iñchiñ amukeiñ ti Trawün Jesus tañi lan ñi akordangeal, welu femkelaiñ re kimnielu müten iñchiñ ñi falin-ngen tüfachi trawün, doy may amukeiñ ñom piwke mu inafilu kay iñchiñ Jesus ñi werkün dungu: ‘Femkeaymün tüfa iñche tamün akordamuafiel’ (papeltunge 1 Korintio 11:23-26). Tüfachi trawün kellukeeiñmu doy maneluwküleal ñi mületual kümeke dungu küpalechi antü mu ka rakiduamelkeeiñmu fente taiñ piwkeyeetew ta Jewba. Welu kidu kimniey, müley taiñ yafültukungeal kiñe rupa tripantu mu müten no. Feymu elukeeiñmu kümeke trawün fill semana ka ngülamtukeeiñmu taiñ amual. Fey ñom piwkengelu kay iñchiñ, eluwküleiñ taiñ inanieafiel ñi feypin. Fill semana alün ora wülkeiñ taiñ pepikawal ka amual trawün mu.

5. ¿Chumngelu eluwkey pu ñomche ñi kimeltuaetew Jewba?

⁵ Jewba küpa kimeltukefi tati pu che, fey fill tripantu fentren ñomche eluwkey ñi kimeltungeal (Is. 50:4). Kidu engün ayüwünkechi amukey ti Trawün Jesus tañi lan ñi akordangeal, fey ka eluwkey tañi amual kakelu trawün mu engün (Zac. 8:20-23). Kom iñchiñ kiñentrür ayüwmakeeiñmu taiñ kimeltukeetew ka ngülamtukeetew Jewba, iñchiñ taiñ kellukeetew ka taiñ montulkeetew (Sal. 40:17). Rakiduamaiñ, Jewba ka tañi sakin Fotüm Jesus küpa kimeltukeeiñmu, fey ¿mülepeafuy may kiñe doy küme dungu taiñ llowal? (Mat. 17:5; 18:20; 28:20).

6. Kiñe wentru, ¿chumngechi kellueyew tañi ñom piwkengen ñi amual ti Trawün Jesus tañi lan ñi akordangeal?

⁶ Fill tripantu kom newen mu eluwkeiñ ñi mangelafiel fentren che tañi amual ti Trawün Jesus tañi lan ñi akordangeal. Fentren ñomche müna kümelkakey amulu ti trawün mu. Nütramkayaiñ kiñe rupan dungu. Kiñeke tripantu kuyfi, kiñe peñi mangelfi kiñe wentru ñi amual ti Trawün Jesus tañi lan ñi akordangeal, welu ti wentru feypieyew ñi pepi amunoal. Welu feychi pun femngelu ti Trawün, taiñ peñi afmatulewey pefilu ti wentru ñi konkülepan Trawünwe Ruka mu. Fey ti wentru rume afmatulewey ñi fente küme llowngen feychi trawün mu, feymu eluwi ñi amual taiñ trawün mu fill semana. Fey kiñe tripantu mu amuy kom trawün mu, küla rupa müten amulay. ¿Chumngelu kay femngechi femi? Kidu rume ñom chengey, feymu küme elkünutuy tañi rakiduam. Ka taiñ peñi ñi mangeletew feypi: “Müna ñom wentrungey tati”. Rüfkünu llemay, Jewba fültukufi tüfachi wentru ñi poyeaetew, fey fewla fawtisaley (2 Sam. 22:28; Juan 6:44).

7. Taiñ kimürpukeel trawün mu ka taiñ papeltukeel Biblia mu, ¿chumngechi kellukeeiñmu taiñ ñom chengeal?

⁷ Taiñ kimürpukeel trawün mu ka taiñ papeltukeel Biblia mu kellukeeiñmu taiñ ñom chengeal. Fülkülepale ti Trawün Jesus tañi lan ñi akordangeal, taiñ trawün mu doy ngüneduamkeiñ Jesus ñi femün ka ñi ñom piwkengen wülkünulu ñi mongen taiñ montulaetew. Ka feychi antü epe puwle ñi femngeal ti Trawün, ngülamtungekeiñ taiñ papeltual feychi trokiñ Biblia nütramkalu petu ñi langümngenon ta Jesus ka dew wiñomongetulu wüla. Taiñ kimürpukeel feytachi trawün mu ka ti nütram taiñ papeltukeel Biblia mu, kellukeeiñmu taiñ doy mañumal Jesus ñi femün iñchiñ mu. Feymu küpa inayenturpufiyiñ kidu tañi ñom piwkengen ka femal Jewba tañi ayükeel, tunte küdawtuliyiñ rume (Luka 22:41, 42).

8. Jesus, ¿chumngechi pengeli ñi llükakenon?

⁸ Iñchiñ ka küpa inayentukefiyiñ Jesus tañi llükakenon. Rakiduamaiñ fente ñi llükanon ta Jesus feychi antü pichilewelu tañi layal. Kidu küme kimniey tañi pu kayñe ñi yewelkayaetew, wülelkayaetew ka langümaetew (Mat. 20:17-19). Welu Jesus kidu tañi pin mu eluwi ñi langümngeal. Fey puwlu chi antü, kidu mülerkey tañi pu manelfal apostol engün Getsemani pingechi lelfün mu, fey feypifi: “Witrapüramün. Amutuiñ. Dewma fülpay tañi ngünenmayaetew” (Mat. 26:36, 46). Fey küpay che nielu ta weychawe tañi püresuntukuafiel ta Jesus, fey kidu fülkontueyew engün, kimfaluwi ñi iney ngen ka feypifi pu soltaw “elufimün ñi amutuael” tañi pu apostol (Juan 18:3-8). ¡Afmatufali ñi llükakenon ta Jesus! Famülke mu, pu dullin kristiano ka pu kakelu ufisa kom kiñentrür eluwkeiñ inayentuafiel Jesus ñi llükakenon. ¿Chumngechi?

9. 1) ¿Chumngelu duamfalngey taiñ llükanoal taiñ rumel amual trawün mu? 2) Taiñ femün, ¿chumngechi kellukefi taiñ pu peñi ka lamngen karselkonkülelu tañi feyentun mu?

⁹ Taiñ rumel amual trawün mu rupaliyiñ rume wedake dungu, duamfalngey taiñ llükanoal. Kiñeke taiñ pu peñi ka lamngen amukey trawün mu weñangkülelu, yafüngewenolu kam kutrankülelu rume. Kakelu amukey trawün mu weda kayñetuetew rume tañi pu che kam pu gobierno. Rakiduamnge tunte kellukefi taiñ femün pu peñi ka pu lamngen karselkonkülelu ñi feyentun mu (Eb. 13:3). Allkütufiel mu taiñ poyekefiel ta Jewba rupaliyiñ rume wedake dungu, kidu engün doy yafüluwkey ñi llükanoal ka ñi fentekünunoal tañi feyentun ka ñi nor piwkeyefiel ta Jewba. Apostol Pablo ka femngechi dungu rupay. Kidu püresulerkey Roma mu, fey müna ayüwi allkütulu tañi pu peñi ka lamngen ñi nor piwkeyefiel ta Jewba (Filip. 1:3-5, 12-14). Ka petu ñi neykümngenon kam dew lifreletulu wüla, Pablo wirintukulelfi pu ebrew kiñe karta. Feychi mu, feypifi: “Femkünuwkilmün tamün welukonke piwkeyewael” ka ñi femkünuwnoal tañi trawüluwal (Eb. 10:24, 25; 13:1).

10, 11. 1) ¿Iney mangelafiyiñ ñi amual ti Trawün Jesus tañi lan ñi akordangeal? 2) Ñi feypilen Efesio 1:7, 8, ¿chumngelu müley taiñ femal tüfa?

¹⁰ ¿Chumngechi pengelafuiñ taiñ llükakenon? Mangelafiyiñ taiñ pu che, taiñ pu chaf küdawfe ka taiñ pu karukatu ñi amual ti Trawün Jesus tañi lan ñi akordangeal. ¿Chumngelu mangelkefiyiñ engün? Iñchiñ rume mañumküleiñ ñi femün Jewba ka Jesus iñchiñ mu, feymu eluwkeiñ taiñ mangelafiel pu che tüfachi falin trawün mu. Kafey ayükeiñ kakelu pu che ñi kimal chumngechi ñi kümelkakeetew Jewba ñi “fentren piwkeyen” Jesus tañi lan mu (papeltunge Efesio 1:7, 8; Apok. 22:17).

¹¹ Pengel-liyiñ llükakenon taiñ trawüluwal pu peñi ka lamngen iñchiñ, pengelkeiñ ka falin dungu. Tüfa doy küme pengelkey Jewba ka Jesus fentren dungu mu.

12. 1) Taiñ amuken trawün mu, ¿chumngechi kellukeeiñmu taiñ doy piwkeyeafiel ta Jewba ka Jesus? 2) Ñi feypin 2 Korintio 5:14, 15, ¿chem müley taiñ femal taiñ inayentuafiel ta Jesus?

¹² Amukeiñ trawün mu piwkeyefilu kay iñchiñ ta Jewba ka Jesus. Ka femngechi taiñ kimürpukeel trawün mu, kellukeeiñmu taiñ doy piwkeyeafiel ta Jewba ka tañi Fotüm. Trawün mu feypingekeiñ ñi femün engu iñchiñ mew (Rom. 5:8). Ti Trawün Jesus tañi lan ñi akordangeal doy rakiduamelkeeiñmu fente ñi piwkeyefiel Jewba ka Jesus itrokom pu che, feychi pu kimnofilu rume fente ñi falin-ngen Jesus tañi lan. Fey müna mañumkülelu kay iñchiñ, eluwkeiñ fill antü inayentuafiel ta Jesus taiñ mongen mu (papeltunge 2 Korintio 5:14, 15). Kafey taiñ piwkeyen mu eluwkeiñ püramyeafiel ta Jewba taiñ montuletew Jesus tañi lan. ¿Chumngechi püramyeafuiñ? Rüf piwke mu wiñoldunguaiñ trawün mu.

13. ¿Chumngechi pengelafuiñ fente taiñ piwkeyefiel ta Jewba ka tañi Fotüm? Feypinge chem dungu mu femkeiñ tüfa.

¹³ ¿Chumngechi pengelafuiñ fente taiñ piwkeyefiel Jewba ka Jesus? Eluwaiñ taiñ famentual chem dungu rume kidu engu ñi duam mu. Taiñ amual trawün mu, duamfalngeafuy femal kakerume dungu. Fentren trawünche trawükey nagantü, fey pu peñi ka pu lamngen kom antü küdawingün chi, feymu ürkülepelay. Ka ti kangelu trawün femngekey afchi semana, feychi mu fentren che allmalltukey tañi ürkütual. Jewba ¿ngüneduamkepefi may taiñ trawüken ürküleliyiñ rume? ¡Femkey llemay! Longkontukuaiñ, Jewba müna falintukey kom taiñ femkeel ñi amual trawün mu (Mar. 12:41-44).

14. Jesus, ¿chumngelu inayentufali tañi piwkeyechen ka ñi kidutu duamuwnon?

¹⁴ Inayentuafiyiñ ta Jesus, kidu doy küme pengelkünuy chumngechi ñi piwkeyeafiel kakelu che fey ñi kidutu duamuwnoal. Jesus eluwi ñi layal tañi pu disipulu mu, welu fey ka müten no, fill antü eluwi ñi doyümafiel tañi kümelkaleal tañi pu disipulu. Rakiduamaiñ, ürkülelu ka weñangkülelu rume Jesus, trawükey tañi pu inanieetew engün (Luka 22:39-46). Kafey rakiduamkey chumngechi ñi füreneafiel ta kakelu che, fey rakiduamlay rume chumngechi tañi fürenengeal (Mat. 20:28). Femngechi piwkeyefiliyiñ iñchiñ ta Jewba ka taiñ pu peñi ka lamngen, eluwaiñ taiñ amual  ti Trawün Jesus tañi lan ñi akordangeal ka taiñ trawün mu fill semana.

15. ¿Iney engün doyelchi may küpa kellukefiyiñ?

¹⁵ Iñchiñ müten koneltuleiñ pu rüf kristiano mu, fey ayüwünkechi mangelkefiyiñ kakelu che ñi koneltuleal tüfachi trokiñche mu. Doyelchi may küpa kellukefiyiñ “taiñ pu peñi ka lamngen feyentulelu ta Cristo mew”, welu amuldunguwenolu ka trawüwenolu (Gal. 6:10). ¿Chumngechi pengelafuiñ taiñ piwkeyefiel? Mangelafiyiñ ñi amual taiñ trawün mu, doyelchi may ti Trawün Jesus tañi lan ñi akordangeal. Jewba ka Jesus reke, müna ayüwkeiñ wiñotun mu kiñe peñi kam lamngen Jewba mu, iñchiñ taiñ piwkeyen Chaw ka taiñ Kamañfe (Mat. 18:14).

16. 1) ¿Chumngechi yafültukuwaiñ taiñ pu peñi ka lamngen iñchiñ? 2) ¿Chumngechi kelluaeiñmu taiñ trawüken? 3) Jesus ñi feypin Juan 3:16 mu, ¿chumngelu kümeafuy fewla taiñ longkontukual?

¹⁶ Küpalechi semana mu, kom newen mu mangelafiyiñ pu che ñi amual ti Trawün Jesus tañi lan ñi akordangeal, viernes 19 nagantü konchi abril 2019 tripantu mu (inaduamnge ti wichulechi dungu “ ¿Mangelafiyiñ kakelu che?”). Ka kom tüfachi tripantu, eluwaiñ küpayal taiñ trawün mu, femngechi welukentu yafültukuwal taiñ pu peñi ka lamngen iñchiñ. Longkontukuaiñ, fülkülepay ñi afal kom wedake dungu, feymu doy duamnieiñ taiñ trawüluwal. Tüfa kelluaeiñmu ñom piwkengeal, llükanoal ka taiñ piwkeyeal (1 Tes. 5:8-11). Kafey kom piwke mu pengelaiñ fente taiñ mañumkülen Jewba ka Jesus taiñ fütra piwkeyeetew (papeltunge Juan 3:16).