1. Isaías 41:10 ñi feypin, ¿chumngechi kellufi taiñ lamngen Yoshiko?

KIÑE kristiana nor piwkeyefilu ta Jewba, Yoshiko pingey, feypingey wedake dungu. Tati doctora feypieyew “pichin küyen müten nieweymi tami mongeleal”. ¿Chumi taiñ lamngen? Yoshiko rakiduami tañi doy ayüelchi texto, tüfa feypi: “Llükakilnge, iñche am eymi mu mülen. Fill rakiduamkülekilnge, iñche am eymi tami Ngünechen. Iñche ta yafülaeyu, may, iñche ta kelluaeyu; iñche llemay nünieaeyu tañi man kuwü nor dungu mew” (Isaías 41:10). Tüngduamkülen mu, Yoshiko feypifi tati doctora ‘Jewba nünieñmaenew tañi kuwü, feymu llükalelan’. * Feychi versikulo yafültukueyew taiñ lamngen ka kellueyew ñi maneluwal Jewba mu kom piwke mew. Ka femngechi tüfachi versikulo kelluaeiñmu tüngküleal rupaliyiñ wedake dungu. Taiñ kimal chumngechi tüngduamelkeeiñmu tüfachi versikulo, wüne ngüneduamaiñ chumngelu (chemu) Jewba feypikünufi ta Isaia tüfachi dungu.

2. Jewba ñi feypin Isaías 41:10 mu, ¿ka iney am kellukefi?

² Wünelu mu, Jewba feypifi ta Isaia ñi wirintukual tüfachi dungu, femngechi ñi yafültukuafiel pu judiu yengealu Babilonia mu. Welu Jewba kafey eli ñi wirintukungeal tüfa, fey ñi kelluafiel kom tañi pu poyekeetew fantepu mu mülelu (Is. 40:8; Rom. 15:4). Famülke mu, müley “kuñiwünngechi dungu”, feymu doy duamnieiñ taiñ yafültukuaetew ti lifru Isaías (2 Tim. 3:1).

3. 1) Isaías 41:10, ¿chem feypikünueiñmu? 2) ¿Chumngelu duamnieiñ tüfachi feypikünun?

 ³ Tüfachi chillkatun mu, inaduamaiñ küla dungu taiñ feypikünuetew Jewba * mülelu Isaías 41:10, ti texto 2019 tripantu ngealu, tüfa kelluaeiñmu doy maneluwal kidu mu. ¿Chem küla dungu? 1) Jewba müleay iñchiñ mew, 2) iñchiñ taiñ Ngünechen-ngey, ka 3) kidu kelluaeiñmu llemay. ¿Chumngelu duamnieiñ tüfachi feypikünun? Yoshiko reke, kontupakeeiñmu wedake dungu taiñ mongen mu, doyelchi may ruparupangelu kay fentren wedake dungu Mapu mu. Kafey kiñeke iñchiñ kayñetukeeiñmu pu gobierno. Ngüneduamaiñ kiduke tüfachi küla dungu ñi feypiel Jewba.

4. 1) ¿Chem feypikünun inaduamaiñ wünelu mu? (Inaduamnge ti kimal dungu). 2) Jewba, ¿chumngechi pengelkey taiñ piwkeyenieetew? 3) Jewba ñi feypin, ¿chum duamelkeeymu?

⁴ Wüne, Jewba famngechi tüngduamelkeeiñmu: “Llükakilnge, iñche am eymi mu mülen”. * Jewba piwkeyenieeiñmu ka duamnieeiñmu, femngechi pengelkeeiñmu ñi mülen iñchiñ mew. Ñi pengelal fente taiñ piwkeyenieetew, kidu feypi: “Eymi falin-ngelu kay iñche tañi adkiñ mu, yamfalngeymi, ka iñche piwkeyeeyu” (Is. 43:4). Chem no rume ka iney no rume katrütulayafuy ta Jewba taiñ piwkeyewenoaetew. Jewba taiñ nor piwkeyeetew afkelay (Is. 54:10). Kimnieiñ taiñ weniyenieetew ka piwkeyenieetew, tüfa müna yafültukukeeiñmu. Chumngechi ingkañpekefi tañi weni Abram (Abraam), ka femngechi ingkañpeaeiñmu famülke mu. Jewba feypifi: “Llükakilnge, Abram, iñche lle no anta eymi tami ingkanieetew” (Gén. 15:1).

5, 6. 1) Jewba ayükey taiñ kelluaetew rupaliyiñ wedake dungu mu, ¿chumngelu kimnieiñ tüfa? 2) Yoshiko ñi rupan, ¿chem kimeltueiñmu?

⁵ Jewba ayükey taiñ kelluaetew rupaliyiñ wedake dungu mu, ¿chumngelu kimnieiñ tüfa? Kidu feypieiñmew: “Ngilarumelmi  ko mew, iñche mülean eymi mu, ka ngilarumelmi lewfü mu, tüfa mangiñmalayaeymu. Wente kütral mew rumelmi lüflayaymi, tati weywiñ kütral no rume kuninlayaeymu” (Is. 43:2). ¿Chem kimeltueiñmu tüfa?

⁶ Jewba feypikelaeiñmu “iñche katrütuafiñ chem rume tami wedalkakeetew”, welu may feypikeeiñmew taiñ rumel wedalkanoaetew kom feychi wedake dungu weywiñ kütral kam lewfü reke felelu. Jewba feypikünueiñmew ñi müleal iñchiñ mew, femngechi taiñ chaftuafiel. Kidu kelluaeiñmu taiñ llükawenoal, taiñ tüngduamküleal, femngechi laliyiñ rume püntütripalayaiñ kidu mew (Is. 41:13). Jewba femngechi kellufi ta Yoshiko, ti lamngen taiñ dew nütramkapeel. Tañi domo püñeñ feypi: “Taiñ ñuke yem rume tüngkülekefuy, tüfa afmatulkeeiñmu. Pefiyiñ reke ñi tüngduameletew Jewba. Lalu wüla tañi ñuke fentekünuy ñi nütramkalelkefiel ñi pu dapikeetew ka kakelu kutran Jewba tañi dungu”. Yoshiko ñi rupan, ¿chem kimeltueiñmu? Maneluwliyiñ Jewba ñi feypikünun mu “iñche mülean eymi mu”, tüfa newentuaeiñmu ka yafültukuaeiñmu rupan mu wedake dungu.

7. ¿Ka chem dungu feypikünueiñmu Jewba? Tüfa, ¿chem rakiduamelkeeiñmu?

⁷ ¿Ka chem feypikünueiñmu Jewba? Isaia wirintukuy: “Fill rakiduamkülekilnge, iñche am eymi tami Ngünechen”. Tati kewün dungu ñi wirintukungeel tüfachi trokiñ, rakiduamelkeeiñmu kiñe che welukeñpüle lelikey llükalelu kay ñi wedalkangeal, kam kiñe che pellkelelu rupan mu kuñiwün-ngechi dungu mu.

8. 1) Jewba, ¿chumngelu feypifi pu judiu yengelu Babilonia mew ñi fill rakiduamkülenoal? 2) Isaías 46:3, 4 mu, ¿chem feypi Jewba ñi tüngduamelafiel tañi pu che?

⁸ Jewba, ¿chumngelu feypifi pu judiu yengelu Babilonia mew ñi fill rakiduamkülenoal? Kidu kimi ñi llükaleal pu che mülelu feychi mapu mu. ¿Chumngelu llükaleafuyngün? Epe yeniele 70 tripantu ñi püresungeel pu judiu Babilonia mew, Medopersia weychayay ta Babilonia. Tüfachi fütra trokiñ weychafe mew, Jewba montulafi tañi pu che Babilonia mu (Is. 41:2-4). Kimlu pu babiloniache ka kakelu che ñi fülkülepan tañi pu kayñe, ñi tüngduamküleal welukonke feypiwingün ‘newentulenge’. Kafey dewmayngün kakelu koylake dios, “tüfake ta ingkañpeaeiñmu” pingün (Is. 41:5-7). Welu Jewba famngechi tüngduamelfi tañi pu che: “Eymi, awem Israel, iñche tañi serfikeetew [kakewme ngeymi kakelu trokiñche mew]”. Feymu ñi fill rakiduamkülenoal engün, feypifi: “Iñche am eymi tami Ngünechen” (Is. 41:8-10). Ngüneduamnge, Jewba feypi: “Iñche am eymi tami Ngünechen”. Femngechi Jewba kellufi tañi pu nor piwkeyeetew ñi fill rakiduamnoal, feypikafi reke: “Iñche akordaniewiyiñ eymün, ka iñche tañi trokiñche ngeymün”. Jewba feypikünufi engün ñi adnieaetew ka montulaetew. Müna yafüluwpelayngün pu judiu allkütulu tüfachi küme feypin. Biblia feypi: “Füchalmi rume, iñche kaletulayan; lingarkülele rume tami longko, iñche fentekünulayan tañi yafültukukefiel. Chumngechi ñi femkeel, ka femngechi adnieaeyu, yafültukuaeyu ka montulaeyu” (Isaías 46:4; 46:3).

9, 10. ¿Chumngelu ngelay taiñ llükayal? Feypinge kiñe pengelün dungu.

⁹ Famülke mu, doyelküley wedake dungu Mapu mu, feymu pu che fill rakiduamküley. Iñchiñ ka rupakeiñ wedake dungu mu. Welu ngelay taiñ llükaleal, ¿chumngelu? Jewba feypieiñmu: “Iñche am eymi tami Ngünechen”. Tüfachi feypin, ¿chumngelu fente tüngduamelkeeiñmu?

 ¹⁰ Rakiduamnge tüfachi pengelün dungu: epu che amuley mikro mu, Juan ka Carlos pingey. Welu ti mikro fütra nengümkawrumey wedalkalelu kay ti rüpü. Fey allküyngu kiñe wentru ñi feypin: “Iñche ngüneniefiñ tati mikro. Ka pichin amuleaiñ tüfachi weda rüpü mu, feymu anülekayaymün müten. Iñche kom küme ngüneduamnien, feymu llükalayaymün”. Welu Juan llükaley, feymu feypi “¿‘kom küme ngüneduamnien’ pipey ama?”. Fey ngüneduamfi ta Carlos ñi tüngkülen, fey ramtufi: “¿Chumngelu kay llükalelaymi?”. Carlos ayelen mu feypieyew: “Küme kimniefiñ tati ngüneniefilu ti mikro, iñche tañi chaw llemay. Feypiaeyu ñi chumngen, ñi fente pepiluwkülen, fey eymi ka tüngduamküleaymi”.

11. ¿Chem kimeltueiñmu feytachi pengelün dungu Juan ka Carlos engu?

¹¹ ¿Chem kimeltueiñmu tüfachi pengelün dungu? Carlos reke, iñchiñ küme kimnieiñ taiñ Wenu Chaw Jewba, feymu tüngküleiñ. Kimnieiñ taiñ kelluaetew rupaliyiñ fentren wedake dungu taiñ mülen mu afaelchi antü mew (Is. 35:4). Kakelu pu che fill rakiduamküley ka llükaley, welu iñchiñ maneluwkeiñ Jewba mu, feymu tüngduamküleiñ (Is. 30:15). Kafey, Carlos reke, kimeltulelkefiyiñ tati pu che chumngelu maneluwal Jewba mu. Femngechi kidu engün ka küme kimafuy ñi kelluaetew Jewba, chem weda dungu rupale rume.

12. 1) ¿Ka chem feypikünueiñmu Jewba? 2) Ti versikulo feypilu Jewba “tañi lipang”, ¿chem rakiduamelkeeiñmu?

¹² Inaduamaiñ tati küla dungu taiñ feypikünuetew Jewba: “Iñche ta yafülaeyu, may, iñche ta kelluaeyu”. Isaia dew wirintukuy chem femal Jewba tañi newentuafiel tañi pu che, feypi: “Jewba newen mu küpayay, ka tañi lipang ngünenieay kidu ñi duam mew” (Is. 40:10). Biblia mu fillke rupa feypilu “lipang” adentuley tati newen. Feymu Isaia ñi feypin rakiduamelkeeiñmu Jewba kiñe Longko Ülmen rume newen-ngelu. Kuyfi mu, kidu  tañi newen mu ingkañpekefi ka kellukefi tañi pu che. Ka femngechi famülke mu, amuley tañi kellukefiel ka ingkañpekefiel tati maneluwlu kidu mew (Deut. 1:30, 31; Is. 43:10).

13. 1) Jewba doyelchi may yafültukuaeiñmu rupale kiñe weda dungu, ¿chem am ta tüfa? 2) ¿Chem dungu elukeeiñmu maneluwün ka newen?

¹³ Jewba femürpuay tañi feypikünuel: “Iñche ta yafülaeyu”, doyelchi may kayñetungeliyiñ. Kiñeke trokiñ mapu mew, taiñ pu kayñe eluwkey taiñ katrütuaetew taiñ amuldungual, kam ley dungu küpa katrütukefi kom ñi femkeel Jewba ñi trokiñche feychi pais mu. Femngechi femngeliyiñ rume, tüfa fill rakiduamelkelaeiñmu, ¿chumngelu? Jewba ñi feypin elukeeiñmu maneluwün ka newen, kidu feypikünuy: “Chumngechi rume weychangelmi, wewngelayaymi” (Is. 54:17). Jewba ñi feypin ka rakiduamelkeeiñmu küla falin dungu mu.

14. ¿Chumngelu afmatulkelaeiñmu taiñ weychayaetew Jewba tañi pu kayñe?

¹⁴ Kiñe, taiñ kristianongen mu kimnieiñ taiñ üdengeal (Mat. 10:22). Jesus feypifi tañi pu inanieetew ñi rume kayñetungeal afaelchi antü mu (Mat. 24:9; Juan 15:20). Epu, Isaías ñi feypin kimeltueiñmu pu kayñe taiñ üdeaetew, welu kafey weychayaeiñmu fillke dungu mu. Tüfa ta kiñeke: koylatukey, welu rüf dungulu femfaluwkey, koylatukey iñchiñ mew, ka rume kayñetukeeiñmu (Mat. 5:11). Jewba katrütulayafi taiñ pu kayñe taiñ femngechi weychayaetew (Efes. 6:12; Apok. 12:17). Welu ngelay taiñ llükayal, ¿chumngelu?

15. ¿Chem am tati küla dungu taiñ longkontukual? Isaías 25:4, 5, ¿chumngechi pengelkeeiñmu tufa?

¹⁵ Tüfa tati küla dungu taiñ longkontukual: chumngechi rume weychangeliyiñ, “wewngelayaymi” pieiñmu Jewba. Chumngechi kiñe fütra kura malal ingkañpekeeiñmu kürüftuku mawün mu, Jewba ka femngechi ingkañpekeeiñmu taiñ pu kayñe mu, kürüftuku mawün reke felelu (Is. 25:4, 5). Taiñ pu kayñe turpu katrütulayafeiñmu taiñ nierpual afnoachi mongen (Is. 65:17).

16. Isaías 41:11, 12 ñi feypin mu, ¿chumngechi tripayay taiñ pu kayñe?

 ¹⁶ Taiñ kelluaetew ñi doy maneluwal kidu mu, Jewba feypieiñmu ñi chum tripayal taiñ “pu illkutukeetew”. Biblia feypi: “¡Tüfey! Kom tami pu illkutukeetew yewelkangeay ka illamkangeay engün. Kom tami pu kewatukeetew ngewelayay ka layay engün. Kintuafimi feychi pu wentru tami kewatukeetew, welu pelayafimi engün. Pu wentru tami weychakeetew ngewetulayayngün, mülewetulayayngün llemay” (Isaías 41:11, 12). Tunte kayñetueliyiñmu rume, kam doy weychaeliyiñmu rume, kom taiñ pu kayñe “ngewetulayayngün, mülewetulayayngün llemay”.

17, 18. 1) Papeltufiel Biblia, ¿chumngechi kellukeeiñmu taiñ doy maneluwal Jewba mu? Feypinge kiñe pengelün dungu. 2) ¿Chumngechi kelluafeiñmu rakiduamal ti texto mu 2019 tripantu ngealu?

¹⁷ Taiñ doy maneluwal Jewba mew, ¿chumaiñ? Müley taiñ doy küme kimafiel. Feymu küme papeltuafiyiñ Biblia ka rakiduamaiñ taiñ papeltupeel mu. Fillke rupa Biblia mu, nütramkangey chem femi Jewba ñi ingkañpeafiel tañi pu che kuyfi mu. Kom tüfachi nütram kelluaeiñmu taiñ doy maneluwal Jewba taiñ kelluaetew famülke mu.

¹⁸ Rakiduamaiñ tati ayüfalchi feypin mülelu Isaías mu, tüfa adentuley chumngechi ingkañpekeeiñmu Jewba: kidu kiñe ufisa kamañfe reke feley, ka iñchiñ, tati pu ufisa reke feleiñ. Isaías feypi Jewba ñi lipang mew trapümfi tañi pu pichike ufisa ka metayefi engün (Is. 40:11). Ngüneduamliyiñ chumngechi fültukupakeeiñmu reke Jewba tañi lipang mew, tüfa tüngduamelkeeiñmu, kimnieiñ taiñ ingkañpekeetew. Feymu taiñ tüngduamküleal rupaliyiñ rume fentren wedake dungu mu, tati kim manelfal kona eli ti texto 2019 tripantu ngealu fey ta Isaías 41:10: “Fill rakiduamkülekilnge, iñche am eymi tami Ngünechen”. Rakiduamaiñ tüfachi feypin taiñ tüngduamküleal. Tüfa newentukuaeiñmu taiñ chaftuafiel wedake dungu taiñ rupayal küpalechi antü mu.