Femngechi rakiduamkefuiñ ngüneduamfiel ñi feypin Ebrew 12:16. Tüfa feypi Esaw ñi illamtufiel “tati lif küme dungu”, fey kiñe rali korü mew fendefi ta Jakob “tañi wünenngefel”. Fey rakiduamkefuiñ elungelu Jakob ñi wünen fotümngeal, ka elungey ti Mesia ñi küpayal kidu ñi familia mew (Matew 1:2, 16; Luka 3:23, 34).

Welu doy küme ngüneduamfilu kakelu nütram Biblia mew, kimtukuiñ ñi duamfalngenon kiñe wentru tañi wünen fotümngeal, femngechi tañi familia mew ñi küpayal ti Mesia. Inaduamaiñ kiñeke:

Jakob ñi wünen fotüm Lea mew Ruben pingefuy, ka ñi wünen fotüm Rakel mew Jose pingefuy. Welu Ruben konlu pekan kudumuwün mu, müntuñmangey ñi llowafel tañi wünen fotümngen mu, fey elungey ta Jose (Génesis 29:31-35; 30:22-25; 35:22-26; 49:22-26; 1 Crónicas 5:1, 2). Welu ti Mesia küpalay Ruben ka Jose mew no rume. Welu may küpay Juda mu, ti melingechi fotüm Jakob ñi nieel Lea mu (Génesis 49:10).

Matew 1:5 ka pengeli meli wentru Mesia tañi kuyfike che mu, ka kom engün ti wünen fotümngefuy chi. Kiñeke tüfa ta Boos (Boas) ñi yallfiel ta Obed, fey tüfa ñi yallfiel ta Isay (Jese) (Rut 4:17, 20-22; 1 Crónicas 2:10-12).

Ka femngechi ti Mesia küpay David mu, Jese ñi fotüm, welu kidu ti wünen fotümngelafuy, doy may tati purangelu (1 Samuel 16:10, 11; 17:12; Matew 1:5, 6). Ka femi Salomon, David tañi fotüm, kidu mu ka küpay ti Mesia, welu wünen fotümngelafuy (2 Samuel 3:2-5).

Tüfa pengelkelay ñi falin-ngenon wünen fotümngeal kiñe wentru. Tati wünen-ngelu llowkefuy fillke falinke dungu ñi elungekenoel pu kakelu fotüm. Tüfa elkünungekefuy  ñi longkoleal ti reñma mew lan mu tañi chaw, ka epu rume llowkefuy ñi koneltulen tañi chaw ñi nieel mew (Génesis 43:33; Deuteronomio 21:17; Josué 17:1).

Welu kom tañi llowafel kiñe fotüm tañi wünen-ngefel mew elungeafuy ta kangelu fotüm. Femngechi femi Abraam famentufilu ta Ismael, fey Isaak elungey chem ñi llowafel tati wünen-ngelu (Génesis 21:14-21; 22:2). Kafey chumngechi ngüneduampeiñ, Jose elungey chem ñi llowafel Ruben tañi wünen fotümngen mu.

Fey, ¿chem küpa kimeltuy Pablo Ebrew 12:16 mu? Tüfa feypi: “Ngelay eymün tamün wedwedkawael ta domo mew ka wentru mew no rume [kon-noal pekan kudumuwün mu] ka tamün illamtunoafiel rume tati lif küme dungu chumngechi femi ta Esaw. Falintulay reke kisu tañi wünenngefel, fey fendefi kiñe rali korü mew müten”.

Tüfa mew Pablo nütramkalay Mesia tañi kuyfike che mu. Welu may ngülamtufi pu kristiano, feymu feypi: “Niemün may küme inakintufal kümeke femün”, fey ‘iney no rume faltalenoael Ngünechen ñi wülkeelchi fürenechen mew’. Tüfachi weda dungu rupayafuy konfule engün pekan kudumuwün mu (Ebrew 12:12-16). Femngechi inayentuafuyngün ta Esaw, kidu am illamtufilu “tati lif küme dungu” tañi femal kidu ñi illutukeel.

Chumngechi femngekefuy feychi antü mu, Esaw chalintukulelkepelafuy ta Jewba fillke mañumtun, kiñeke mu rangiñelwelelu am ta Jewba ka tañi pu che mu, müna falin dungu tüfa (Génesis 8:20, 21; 12:7, 8; Job 1:4, 5). Welu Esaw doyümfi tañi illutukeel müten, feymu illamfi chem ñi llowafel tañi wünen fotümngen mu, femngechi tañi elungeal kiñe rali korü. Jewba feypikünufuy Abraam tañi pu yomelche ñi kutrankawal, feymu Esaw küpa montuwi chi feychi kutrankawün mew (Génesis 15:13). Kafey pengeli ñi falintukenofiel ti lif kümeke dungu niewlu epu domo engu poyekenofilu ta Jewba, tüfa müna lladkülkafi ñi mongen mew tañi pu chaw (Génesis 26:34, 35). Feymu trürlay ta Jakob, kidu niewi kiñe domo engu poyekefilu ta Chaw Jewba (Génesis 28:6, 7; 29:10-12, 18).

¿Chem kimeltukeeiñmu kom tüfa Mesia ñi kuyfike che mu? Kiñeke ti wünen fotümngefuy, welu kakelu femlay. Pu judiu kimniefuyngün tüfa ka rüfngelu trokifingün, feymu feypikefuyngün ti Mesia ñi küpayal David mu, Jese tañi inan fotüm (Matew 22:42).