1. Pu chaw ka ñuke, ¿chem küpa kimkey petu tañi fawtisawnon ñi yall?

“FENTRENKE rupa feypikefun tañi chaw ka ñuke ñi küpa fawtisawün, fey fentren rupa nütramkakefuiñ tüfachi dungu mu. ‘¿Rüf kimniey ñi falin-ngen tañi chumal?’, ramtuwkefuyngu. Fey 31 konchi diciembre 1934 tripantu, puwi llemay ti doy falin antü tañi mongen mew”. Femngechi rupay taiñ lamngen Blossom Brandt küpa fawtisawlu. Famülke mew pu chaw ka ñuke küpa kellukefi tañi pu yall ñi küme dullial (ngümintol). Ti yall pepikawkülele, pu chaw rakiduamel-layafi ñi üngümal tañi fawtisawal, tüfa kuñiwün-ngey ka katrütuafeyew ñi küme weniyefiel Jewba (Santiaw 4:17). Feymu petu ñi fawtisawnon, pu kimke chaw ka ñuke küpa kimkey ñi pepikawkülen tañi pichikeche, fey tañi küme inanieafiel ta Jesus.

2. 1) Kiñeke witran-ngepakechi longkolelu, ¿chem dungu mu fill rakiduamküley? 2) ¿Chem inaduamaiñ tüfachi chillkatun mu?

 ² Kiñeke witran-ngepakechi longkolelu fill rakiduamküleyngün. ¿Chumngelu? Fentren wechekeche nielu 20 tripantu püle petu fawtisawlay, kimeltulelngelu rume ti rüf dungu petu pichikalu. Epe kom feychi wechekeche amukey trawün mu, amuldungukey, ka Dungukelu Iney Ngen Jewba trokiwkey engün. Welu, ¿chumngelu (chemu) pütrünmakeyngün ñi wülal tañi mongen Jewba mew ka ñi fawtisawal? Kiñeke chaw kam ñuke rakiduamelkefi tañi pu yall ñi pepikawkülenon. Feymu, ¿chumngelu kiñeke chaw yafültukukelafi tañi pu yall ñi fawtisawal? Tüfachi chillkatun mew ngüneduamaiñ meli dungu.

3. ¿Chem ramtuwkefuy Blossom ñi chaw ka ñuke?

³ Blossom ñi chaw ka ñuke ramtuwkefuyngu chi: ‘Pichikalu am tayu püñeñ, ¿kimniepey may fente falin-ngen ti fawtisawün ka kimniey tunte ñi küdawtuleal tañi femal ñi feypikünufiel ta Jewba?’. Feymu pu chaw ka ñuke, ¿chumngechi kimafuy ñi pepikawkülen tañi yall ñi wülal tañi mongen Jewba mew?

4. Pu chaw, ¿chumngechi kelluaeyew ñi chem pilen Matew 28:19, 20?

⁴ (Papeltunge Matew 28:19, 20). Biblia feypilay tunten tripantu ñi nieal pu che tañi fawtisawal. Welu müna falin-ngey pu chaw ñi rakiduamal Jesus ñi feypin Matew 28:19 mu: “Kimeltuafimün [...] iñche ñi disipulungeael engün”. Tüfa kimeltukeeiñmew taiñ eluwküleal ñi kelluafiel pu che Jesus tañi disipulungeal. Kiñe disipulu kimürpukey, adümkey ka küpa inakefi Jesus ñi feypin. Pu we püñeñ femlayafuy tüfa, feymu fawtisangelayafuy. Welu may Biblia pengelkey pu pichikeche ñi küme adümafiel ka piwkentukuafiel ti rüf dungu. Feymu kümeafuy pu chaw ñi eluwküleal tañi kimeltuafiel ñi pu yall, we püñeñ-ngelu rume, femngechi doy tremle engün, küpa wülay tañi mongen Jewba mew ka küpa inayafi ta Jesus.

5. Biblia ñi feypin, ¿chem rakiduamelkeeiñmew Timotew ñi femün mu?

⁵ Timotew kiñe disipulungefuy. Kidu tañi chaw poyekelafuy ta Jewba, welu tañi chuchu ka ñuke kellueyew ñi piwkeyeafiel Jewba tañi Dungu. Feymu müna küme feyenturpuy ka eluwi tañi poyeafiel ta Jewba petu weche wentrungelu. Rakiduamafuiñ tüfa apostol Pablo feypilu am Timotew ñi kimeltulelngeel Chaw Dios ñi Dungu “pichiwentrungelu müten”, we püñeñ-ngelu (2 Timotew 1:5; 3:14, 15). Fey Timotew nielu 20 tripantu püle, pepikawkülefuy ñi elfalelngeal sakinke küdaw tañi trawünche mew (Hecho 16:1-3).

6. Pu chaw ka ñuke, ¿chumngechi küme kelluafuy ñi pichikeche?

⁶ Kakerumekey pu pichikeche, feymu trürlay tunte ñi tremkülen kiduke engün. Kiñeke pichikalu rume, küme adümkey ti rüf dungu, küme dullikey ñi chumal ka “küpa fawtisawün” pikey. Kakelu duamniey ñi doy tremal tañi  fawtisawal. Pu kimke chaw ka ñuke dikümtukukelafi tañi pu yall ñi fawtisawal, welu may wüne ngüneduamkey ñi femngen ka tunte ñi tremkülen, fey elukefingün ñi duamnieelchi kellu. Feymu kimchengerpule ti yall, müna ayüwküleay tañi chaw ka ñuke. Biblia feypi: “Kimchengeaymi, iñche ñi fotüm, ka ayüwülelman tañi piwke, femngechi pepi wiñoldunguafiñ tañi ayentumekeetew” (Proverbios 27:11). Feymu, kümeafuy pu chaw ka ñuke ñi longkontukual tüfa: müley ñi eluwküleal tañi kelluafiel ñi pu yall tañi disipulungerpual. Welu ramtuwafuy engün: “Tañi yall ñi wülal tañi mongen Jewba mew ka fawtisawal, ¿tunte puwi ñi kimün?”.

7. Ñi fawtisawal ti che, ¿duamfalngey ñi kimal itrokom ñi kimeltuel Biblia? ¿Chumngelu kay?

⁷ Pu chaw ka ñuke kimeltulelfilu tañi pu püñeñ, kellukefingün ñi küme adümafiel ti rüf dungu. Femngechi küpa wülayngün tañi mongen Jewba mew. Welu ñi femal tüfa, duamfal-lay ti yall ñi kimürpual itrokom ñi kimeltuel Biblia. Kom pu inaniefilu ta Jesus doy kimürpukey dew fawtisawle wüla (papeltunge Kolosense 1:9, 10). Feymu, ¿tunte duamniey ñi kimal kiñe che petu tañi fawtisawnon?

8, 9. Tati longkolelu karsel mew, ¿chumi? Ka, ¿chem kimeltueiñmew ñi rupan?

⁸ Müna kelluafeyew pu chaw ka ñuke ngüneduamfiel ñi rupan kiñe familia kuyfi mu (Hecho 16:25-33). Ti epuchi rupa Pablo ñi amuldunguyawün fillke mapu püle, ngemey Filipo waria mu feychi 50 tripantu. Üyew Pablo ka Silas dallukantukungey ka karseltukungey. Welu feychi pun mu ruparumey kiñe fütra nüyün. Tati longkolelu karsel mew rakiduamürkey pu püresu ñi kom lefmawün, nülalu am kom tati wülngiñ. Feymu küpa langümuwi, welu Pablo katrütufi ñi femnoal. Fey wüla Silas engu kimeltulelfi ta tüfachi wentru ka tañi pu che ti rüf dungu Jesus mu. Müna falintuyngün tañi kimeltungeel Jesus mu, feymew pürüm fawtisawi engün. ¿Chem kimeltuafeiñmew tüfa?

⁹ Tati longkolelu karsel mew kimlafuy chi Jewba ñi Dungu, roma soltawngefulu am peno. Feymu tañi kristianongerpual mülefuy ñi kimürpual Biblia ñi doy falinke dungu ka ñi chumal tañi poyeafiel ta Jewba. Kafey duamfalngefuy ñi eluwal tañi inayal Jesus ñi kimeltun. Kom ñi kimürpuel feychi mu müten kellueyew ñi küpa fawtisawal. Welu doy kimürpuafuy fawtisawle wüla. Feymu tami yall feypielmu ñi küpa fawtisawün fente tañi piwkeyefiel ka tañi küpa allkütufiel ta Jewba, ¿chumaymi kay? Elufinge tañi nütramkayal pu longkolelu engün, fey kidu engün ngüneduamafuy ñi pepikawkülen kam ñi femnon * (inaduamnge ti kimal dungu). Fey kom pu fawtisawlu reke, tami yall doy kimürpuafi ta Jewba, tunte puwle ñi mongen ka rumel mu (Romanu 11:33, 34).

10, 11. 1) ¿Chem rakiduamkey kiñeke chaw kam ñuke? 2) ¿Chem kelluafeyew tami yall ñi ingkañpewal?

¹⁰ Kiñeke chaw ka ñuke famngechi rakiduamkey: “Petu ñi fawtisawnon tañi yall, doy kümeafuy ñi wüne konal universidad mew ka küme küdaw nieal”. Küme piwke mu feypipelay tüfa, welu kümeafuy ñi ramtuwal: “¿Kellupeafi may tüfa ñi rüf ayüwküleal tañi yall? ¿Chem kimeltukeenew Biblia tüfachi dungu mu? ¿Chumngechi ayükey Jewba yenieal taiñ mongen?”. Biblia feypi: “Feymu, tami wechengen mu longkontukufinge tami Doy Fütra Dewmaetew, petu ñi akunon ti wedake antü kam petu ñi akunon feychi tripantu tami feypiafel: ‘Ayüwmawekelaenew tüfa’” (Eclesiastés 12:1).

¹¹ Müna duamfali taiñ longkontukual tüfa: kom ñi mülen tüfachi Mapu mew chaftukefi Jewba ñi ayükeel ka tañi rakiduamkeel (Santiaw 4:7, 8; 1 Juan 2:15-17; 5:19). Feymu, ¿chem kelluafeyew tami yall ñi ingkañpewal? Küme weniyefile ta Jewba, küme chaftuafi ta Weküfü, ñi ngünenieelchi pu che ka ti weda rakiduam ñi nieel engün. Welu eymi, chaw ka ñuke, tami mongen mew rume falintufilmi ti universidad ka ti küme küdaw, tami yall ka doyümafuy tüfa, welu newe falintulayafuy tañi küme weniyefiel Jewba. Müna wedalkayafeyew tüfa. Eymi rüf piwkeyefimi tami yall, feymu ¿eluñmayafimi tüfachi Mapu müleyechi pu che ñi welu rakiduamelaetew? Rupale tüfa, ¿rüf ayüwkülepeafuy? Femlayay, ñi rüf küme tripayal ka ayüwküleal, müley ñi doyümafiel Jewba ñi dungu tañi mongen mew. Biblia feypi: “Welu may rume ayüwülkeeyew Jewba ñi ley dungu, antü ka pun mew papeltukey ñi ley ñochi dungun mu. Fey kiñe anümka reke ngerpuay mülelu inafül  wütrunko mew, fünkelu tañi medin antü mew ka tonfükenolu tañi tapül, ka kom ñi femken küme tripayay” (Salmo 1:2, 3).

12. Kiñeke chaw ka ñuke, ¿chumngelu ayükey tañi yall ñi petu fawtisawnoal?

¹² Tüfa ñi nütramkael kiñe ñuke ayükenofulu ñi fawtisawal tañi püñeñ: “Yewelen feypial tüfa, welu llükalefun ñi wemünentungeafel ñi püñeñ”. Tüfachi lamngen reke, kiñeke chaw ka ñuke rakiduamkey: “Pu wechekeche rume welulkakeyngün, feymu kümeafuy ñi fawtisawal doy tremle wüla” (Génesis 8:21; Proverbios 22:15). Rakiduamkeyngün chi: “Tañi yall fawtisawnole, wemünentungelayay”. Welu kidutu ngünenkawkey engün, ¿chumngelu feypiafuiñ tüfa? (Santiaw 1:22).

13. Kiñe che fawtisawnole rume, ¿entudungulayafuy ñi kulpan Ngünechen mew?

¹³ Feley, ti yall pepikawkülenole ñi wülal tañi mongen Jewba mew, ñi chaw ka ñuke ayülayay ñi fawtisawal. Welu ti chaw ayüle ñi fawtisawnoal tañi yall ñi entudungunoal tañi kulpan Jewba mew, tüfa ta kümelay. ¿Chumngelu? Ti yall kimle müten Jewba ñi feypin, müley ñi entudungual tañi kulpan kidu mew tañi feypintukuetew am (papeltunge Santiaw 4:17). Pu kimke chaw ka ñuke ngülamtukelafi ñi pu yall tañi fawtisawnoal, doy may eluwkey ñi inayentuaetew tañi yall. Ka pichikalu rume tañi yall, kimeltulelkefingün tañi piwkeyeafiel Jewba ñi ayükeel ka üdeafiel Jewba ñi ayükenoel (Luka 6:40). Femngechi ti yall piwkeyerpufile ta Jewba, küpa femay kidu ñi ayükeel, feymu kuñiwtukuway ñi weda kulpanoal (Isaías 35:8).

14. Pu longkolelu, ¿chumngechi kelluntukuafuy pu chaw ka ñuke ñi küdaw mew?

¹⁴ Pu longkolelu ti trawünche mu nütramkafile pu pichikeche ka wechekeche fente ñi ayüwün-ngen küdawülkefiel ta Jewba, femngechi kelluntukuafuy pu chaw ka ñuke ñi küdaw mew. Kiñe lamngen petu longkontukuniey ñi nütramkaetew peñi Russell. Taiñ lamngen feypi: “Nielu iñche 6 tripantu, 15 minuto mu kidu yafültukuenew ñi doy küdawal Jewba ñi trokiñche mew”. ¿Chumngechi kellueyew tüfa? Tüfachi lamngen wünelerpuy amuldungun mew, ka femi tüfa ¡doy 70 tripantu mu! Feyngey, yafültukufiliyiñ pu pichikeche, tüfa engün femürpuafuy kümeke dungu kom ñi mongen mew (Proverbios 25:11). Kafey pu longkolelu mangelafuy pu reñma ñi kelluntukual ti küdaw ñi femngeal ti Trawünwe Ruka mew. Ka elfalkünuafuy pu pichikeche kiñeke dungu ñi pepilkeel.

15. Kom iñchiñ, ¿chumngechi kelluafuiñ pu pichikeche ka wechekeche?

¹⁵ Kom pu koneltulelu ti trawünche mu, ¿chumngechi kelluntukuafuiñ? Duamtukeafiyiñ pu pichikeche ka wechekeche. Feymu ngüneduamafuiñ ñi küme femken tañi fülkonal Jewba mew. Rakiduamafuiñ tüfa: ¿küme entuy ñi feypin trawün mu? ¿Papeltuy Biblia kam eli kiñe pengelün  dungu ti trawün Taiñ mongen ka taiñ amuldungukeel pingelu? ¿Amuldungufi kiñe kompañ? Ngüchaltukungelu, ¿amuley ñi küme femün mu? Femngechi femle, ¡pürüm sakiafiyiñ llemay! Ka eluwaiñ ñi nütramkayafel kidu engün petu ñi ellakon-non ti trawün ka dewle wüla. Femliyiñ tüfa, “iñche koneltulen Jewba ñi trawünche mu” piafuy (Salmo 35:18).

16, 17. 1) Pu yall tañi fawtisawal, ¿chumngelu fente falin-ngey? 2) ¿Chem müna ayüwülafeyew pu chaw ka ñuke? (Inaduamnge ti adentun ellaka mu mülelu).

¹⁶ Pu chaw ka ñuke nieyey fillke sakinke küdaw, kiñe tüfa ta kimeltulelafiel tañi pu yall ñi piwkeyeafiel ta Jewba (Salmo 127:3; Efesio 6:4). Pu israelche tañi choyüngen mu müten koneltukefuy Jewba ñi trokiñche mu tañi poyeafiel. Welu femngechi femkelay pu yall famülke mu. Pu chaw piwkeyeafuy ta Jewba, welu tüfa mu müten ka femngechi femlayay tañi yall. Feymu we püñeñ-ngelu rume, pu chaw müley tañi eluwal ñi kelluafiel tañi disipulungerpual, wülal tañi mongen Jewba mew, ka fawtisawal. ¿Chumngelu fente falin-ngey? Kiñe che femle tüfa ka amulele ñi nor poyekefiel ta Jewba, femngechi mongetripayay akule ti fütra kutrankawün (Matew 24:13).

¹⁷ Küpa fawtisawlu taiñ lamngen Blossom Brandt, tañi chaw ka ñuke ayükefuy ñi kimal tañi rüf pepikawkülen. Fey kimtukulu tüfa, “kümey tami fawtisawal” pifi engu. Blossom nütrami chem ñi femün tañi chaw feychi pun petu tañi fawtisawnon: “‘Lukutumün’ pieiñmu ka ngillatuy. Feypifi ta Jewba fente ñi ayüwületew tañi pichi malen ñi wülün tañi mongen kidu mew”. Doy 60 tripantu rupalu Blossom feypi: “Rüfkünu llemay, fentren tripantu rupale rume, ¡turpu ngoymalayan feychi pun!”. Feymu pefilmün tamün pu yall ñi wülün tañi mongen Jewba mew ka tañi fawtisawün, küme duamküleaymün ka ayüwküleaymün llemay.