1. ¿Chumafuiñ taiñ nieal kimün? ¿Chumngechi kelluafeiñmu tüfa?

CHAW JEWBA mu küpay ta kimün, ka kidu rükükelay ñi eluafiel tati pu che. Feymu Santiaw 1:5 feypi: “Kiñeke eymün nienolmün Ngünechen ñi kimün, ngillatufimün ta kisu, fey Ngünechen ta eluaeymünmew. Kisu elukefi itrokom che ñi kimael kisu ñi küme dungu ka chem dungu rume ñi feypiel felekey müten”. Taiñ nieal kimün, müna falin-ngey eluwal taiñ norümaetew Jewba. Tüfa kelluaeiñmew taiñ femnoal wedake dungu ka doy weniyeafiel ta Chaw Dios (Proverbios 2:10-12). Kafey elukeeiñmew maneluwün taiñ rumel mongeleal (Juda 21).

2. ¿Chem kelluaeiñmu taiñ falintuafiel Chaw Jewba taiñ norümkeetew?

² Taiñ kulpafechengen mu ka chumngechi taiñ kimeltungeel pichikalu, kiñeke mu küdawtuafuiñ ñi eluwal taiñ norümngeal kam rakiduamlayafuiñ chi taiñ kellukeetew. Welu ngüneduamliyiñ tunte taiñ kümelkakeetew Chaw Jewba taiñ norümkeetew, fey falintuafiyiñ ka ngüneduamaiñ taiñ piwkeyeetew kidu. Proverbios 3:11, 12  feypi: “Iñche ñi fotüm, famentukefilnge tami norümaetew Jewba”. Ka feypi: “Jewba ngüfetukefilu am tañi pu piwkeyekefiel”. Feley llemay, Jewba ayükey taiñ kümelkaleal (papeltunge Ebrew 12:5-11). Taiñ Wenu Chaw müna küme kimnieeiñmew, feymu norümkeeiñmew chumngechi taiñ duamnieel ka yom amulkelay. Tüfachi chillkatun mu inaduamaiñ meli dungu ti norümngen mu: 1) taiñ kidutu ngüneniewal, 2) pu chaw ñi norümafiel tañi pu yall, 3) taiñ norümngeken trawünche mew, ka 4) kiñe dungu doyel-lu ti norümngeel mu.

3. Pu yall, ¿chumngechi kimürpuafuy ñi ngüneniewal? Feypinge kiñe pengelün dungu.

³ Taiñ kim ngüneniewal müley taiñ kidutu norümuwal, fey tüfa kelluaeiñmew ñi küme elkünutual taiñ femken ka taiñ rakiduam. Kim ngüneniewkelaiñ taiñ choyüngen mu müten, feymu duamfalngey kimürpual taiñ femal tüfa. Rakiduamnge tüfachi pengelün dungu: kiñe pichi wentru petu kim cicletakantule, tañi chaw küme nünieñmayaeyew tañi tran-noal. Welu rupale chi antü, ti pichiwentru allwe kim newentuay cicleta mu, feymew tañi chaw pichike kellunieaeyew. Fey ti chaw ngüneduamle ti pichi wentru ñi kim cicletaturpun, kelluwelayaeyew. Ka femngechi pu chaw ñochi piwke mu küme tremümfile ñi pu yall ka kimeltufile “ñi poyeafiel ta Ñidol”, kelluafingün ñi kimchengeal ka ñi kim ngünewal (Efesio 6:4).

4, 5. 1) Küme elkünutuafiel taiñ chumngen, ¿chumngelu duamfalngey taiñ kim ngüneniewal? 2) Welulkaliyiñ, ¿chumngelu ütrüfpiwkelayaiñ?

⁴ Ka femngechi femkey pu fütakeche kimürpufile ta Jewba. Kiñeke engün pichi kim ngüneniewkey chi, welu petu küme weniyelafingün ta Jewba. Feymu eluwle ñi “nietuael we mongen”, fey tüfa küme elkünutuafiel ñi chumngen, ka yafüluwle ñi inayentuafiel ta Jesus, fey küme weniyerpuafingün ta Jewba (Efesio 4:23, 24). Femal tüfa, müna duamfalngey taiñ kim ngüneniewal, ¿chumngelu? Tüfa kellueiñmew ‘taiñ elkünutuafiel ti wesake dungu ka taiñ illutuwenoael mapu mew mülechi fill wesake dungu. Ka femngechi kimeltueiñmew taiñ nieael tüfachi mapu mew küme rakiduam, nor mongen, ka taiñ nienoael pekanka rakiduam’ (Tito 2:12).

⁵ Welu kom iñchiñ kulpafe chengeiñ (Eclesiastés 7:20). Feymu welulkaliyiñ, ¿rakiduamafuiñ taiñ kim ngüneniewkenon, pichin rewall no rume? Ngüneduamaiñ ñi feypin Proverbios 24:16: “Tati nor chengelu tranafuy regle rupa, welu witratuay tati”. ¿Chumngechi witratuafuiñ? Iñchiñ taiñ newen mu müten no, welu may Chaw Ngünechen tañi newen mew (papeltunge 2 Korintio 4:7). Feymu llowliyiñ Ngünechen ñi newen, kim ngüneniewaiñ.

6. ¿Chem kelluaeiñmu taiñ doy ayüwülaetew chillkatukefiel Biblia? (Inaduamnge ti adentun ellaka mu mülelu).

⁶ Kafey müna falin-ngey taiñ ngillatual, chillkatuafiel Biblia ka rakiduamal taiñ papeltuel mew, tüfa kelluaeiñmew taiñ kim ngüneniewal. Welu, ¿müna  küdawtulmi tami chillkatual Biblia kam ayünofilmi? Ütrüfpiwkekilnge. Eluwülmi tami kelluaetew Jewba, kidu eluaeymu tami ayütunieafiel tañi Dungu (1 Pedro 2:2). Ngillatuafimi ta Jewba tami kelluaetew ñi kim ngüneniewal, femngechi elantükünuaymi tami chillkatual. Wünelu mu pichin chillkatuafuymi müten, fey rupale ta antü, müte küdawtulayaymi tami chillkatual ka ayürpuafimi. Fey müna ayüwülaeymu tami rakiduamken Jewba ñi feypin mu (1 Timotew 4:15).

7. Taiñ kim ngüneniewken, ¿chumngechi kelluafeiñmew ñi diturpual taiñ ayünieel ñi doy küdawülafiel ta Jewba?

⁷ Kim ngüneniewliyiñ, tüfa kelluaeiñmu ñi diturpual taiñ ayünieel ñi doy küme küdawülafiel ta Jewba. Rakiduamnge ñi chumün kiñe ngen reñma. Kidu ngüneduami ñi müte ayüwülkenoetew ti amuldungun, feymu “wünelean amuldungun mew” pi tañi duam. ¿Chumngechi kellueyew tañi kim ngüneniewken? Kidu eluwi ñi papeltuafiel fillke chillka nütramkalu pu wünelekelu amuldungun mu ka ngillatukefuy ta Jewba tüfachi dungu mu. Femün mu tüfa, doy küme weniyefi ta Jewba. Kafey kiñeke küyen mu wünelekefuy amuldungun mew 30 kam 50 ora. Eluwlay chem no rume ñi katrütuaetew ka longkontukuniefuy ñi ayünieel. Fey rupalu ta antü, ¡diturpuy llemay ñi wüneleal amuldungun mew!

8, 9. Pu chaw ñi kimeltuafiel tañi pu yall ñi poyeafiel ta Jewba, ¿chem kelluaeyew engün?

⁸ Jewba elfalkünufi pu chaw ka ñuke ñi norümafiel tañi pu yall ka kimeltuafiel “ñi poyeafiel ta Ñidol” (Efesio 6:4). Tüfa müna küdawngey famülke mu (2 Timotew 3:1-5). Ti pichiche kimlay chem ñi kümen ka kümenon, ka küme rakiduamkelay ñi dullial chem chumal. Feymu duamniey ñi norümaetew tañi pu chaw (Romanu 2:14, 15). Kiñe wentru adümuwkelu Biblia dungu mu wirintukuy tüfa: griego kewün mu feypingelu “norümngeal” rakiduamelafeiñmu ñi kimeltungeal ti pichikeche tañi küme chengerpual.

⁹ Pu chaw piwkeyen mu norümtufile tañi pu yall, fey tüfa ngüneduamay ñi kuñiwtukukeetew tañi pu chaw. Ka kimtukuayngün ñi mülen kiñeke dungu tañi femnoal ka ñi kontuaetew wedake dungu küme dullinole ñi chumal. Feymu fente falin-ngey pu chaw tañi inayal Jewba ñi kimün tañi küme kimeltuafiel ñi pu yall. Fillke mapu mu  kakerumey pu che ñi feypin chumngechi ñi tremümngeal pu pichikeche, ka kaletukey ñi rakiduam rupachi antü mu. Welu pu chaw inafile Chaw Ngünechen ñi kimün, ingentu ramtuwlayayngün chumngechi kimeltuafiel tañi pu yall ka maneluwlayayngün tüfachi Mapu mew mülechi kimün.

10. Noe ñi femün, ¿chumngechi kelluafuy tati pu chaw?

¹⁰ Müna kelluafeiñmew Noe ñi femün. Jewba feypifi ñi dewmayal kiñe fütra wampo ruka, kimnolu rume Noe chumngechi ñi dewmayafiel. Welu kidu “femürkey kom chumngechi tañi werküetew ta Ngünechen”, fente maneluwlu am Jewba mu (Génesis 6:22). Fey, ¿chem rupay? Dewmalu am ti fütra wampo ruka, Noe ka tañi pu che montuyngün. Kafey Noe küme chawngefuy fente tañi maneluwün Jewba ñi kimün mu. Kidu küme kimeltufi tañi pu fotüm ka inayentufalngefuy. Tüfa müna küdawngefuy, pu che am rume weda femkefulu feychi mu (Génesis 6:5).

11. Pu chaw, ¿chumngelu müley ñi yafüluwal tañi kimeltuafiel ñi pu yall?

¹¹ Eymi kay, chaw ka ñuke, ¿chumngechi inayentuafuymi ta Noe? Allkütuafimi ta Jewba. Kidu ngülamtueymu Biblia mu ka ti trawünche mew, feymu eluwnge tami kelluaetew. Rupale ta tripantu, ¡müna mañumkülepelayay tami pu yall! Kiñe peñi wirintukuy: “Müna mañumniefiñ tañi chaw ka ñuke chumngechi ñi kimeltuetew. Müna yafüluwi engu ñi puwal iñche tañi piwke mu”. Kidu ka feypi tañi pu chaw ñi kelluetew tañi küme weniyeafiel ta Jewba. Welu yafüluwle rume pu chaw ñi kimeltuafiel tañi yall, tüfa püntütripayafuy Jewba mu. Tüfa rupale, pu chaw ka ñuke femlu kom ñi pepilnieel tañi küme kimeltuafiel ñi yall, tüngküleafuy ñi rakiduam engün ka maneluwayngün tañi yall ñi wiñotuafel Jewba mew.

12, 13. 1) Kiñe yall wemünentungele trawünche mu, ¿chumngechi pengelafuy pu chaw ñi allkütukefiel Jewba? 2) Pu chaw ñi allkütufiel ta Jewba, ¿chumngechi kellufi tañi reñma?

¹² Ti yall wemünentungele trawünche mu, kiñeke chaw ka ñuke müna küdawtuafuyngün ñi feyentuafiel ta Jewba. Inaduamaiñ ñi rupan kiñe lamngen. Tañi püñeñ wemünentungey trawünche mu ka wiñamtuwi. Taiñ lamngen feypi: “Fillke papil mu kintukefun ñi eluñmaetew trawüluwal tañi püñeñ ka tañi chuchu iñchiñ. Welu ñi füta piwkeyen mu feypikefenew: ‘Tayu püñeñ dew tremküley tati, ka ngelay tayu katrütuafiel Jewba ñi norümfiel’”.

¹³ Kiñeke tripantu rupalu, tañi püñeñ wiño llowngetuy trawünche mu. Ti ñuke feypi: “Fewla fill antü nütramkawkeyu tañi püñeñ iñchiw. Kidu müna yamnieeyumu tayu nor piwkeyefiel mu ta Jewba. Müna küme yewkeiñ”. Feymu, tami yall wemünentungele ti trawünche mu, ¿‘maneluwaymi Jewba mew kom tami piwke mu’? Kam, ¿‘tami rakiduam mu reküluwaymi’? (Proverbios 3:5, 6). Longkontukuaymi tüfa: ñi norümcheken mu, Jewba pengelkey ñi piwkeyecheken ka fente ñi nieel kimün. Kafey Jewba wüli tañi Fotüm itrokom che mu, eymi tami yall mu kütu. Kidu ayüniey kom iñchiñ taiñ rumel mongeleal (papeltunge 2 Pedro 3:9). Feymu chaw ka ñuke, maneluwnge Jewba  ñi norümcheken ka ñi ngülam mu, kutrankawün-ngefule rume tami feyentukefiel. Llownge Jewba ñi norümcheken, chaftukefilnge.

14. Ti kim manelfal kona mew, ¿chumngechi norümkeeiñmu Jewba?

¹⁴ Jewba feypikünuy ñi ngüneytuafiel, kuniwtukuafiel ka kimeltuafiel tañi pu che. Fillke dungu mu kidu femkey tüfa. Feymu elfalkünufi tañi Fotüm ñi ngüneytuafiel ti trawünche, kafey Jesus elkünuy kiñe trokiñ wentru, kim manelfal kona pingelu, taiñ eluaetew Ngünechen ñi kimün puwchi antü mu (Luka 12:42). Tüfachi trokiñ wentru norümkeeiñmu. Fentren rupa kiñeke wewpin kam chillka kellupelaeymu ñi küme elkünutual tami chumngen kam rakiduam. Müna kümey tami femngechi femken, tüfa pengelkelu am tami eluwkülen ñi norümaetew Jewba (Proverbios 2:1-5).

15. ¿Chumafuiñ taiñ kümelkayaetew pu longkolelu ñi küdaw?

¹⁵ Jesus ka elkünufi tati pu longkolelu ñi ngüneytuafiel ti trawünche. Tüfa engün “yewün reke” feypingey Biblia mu (Efesio 4:8, 11-13, TNM). Iñchiñ, ¿chumafuiñ taiñ kümelkayaetew pu longkolelu ñi küdaw? Inayentuafiyiñ ñi mupiltun ka ñi küme femken, ka inayaiñ taiñ ngülamtuetew Biblia mu (papeltunge Ebrew 13:7b, 17). Pu longkolelu piwkeyeeiñmu ka ayüleyngün taiñ weniyeafiel ta Jewba. Feymu ngüneduamle taiñ müte trawükenon kam taiñ ayüwülkenoetew küdawülkefiel ta Jewba, fey eluwfemayngün taiñ kelluaetew, allkütuaeiñmew, yafültukuaeiñmew ka ngülamtuaeiñmew Biblia mu. Femngechi kelluelmu engün, ¿ngüneduamaymi Jewba tami piwkeyeetew?

16. ¿Chumngechi kelluafuiñ pu longkolelu ñi femal tañi küdaw ayüwün mu?

¹⁶ Kiñeke mu müna küdawtuafuyngün pu longkolelu taiñ ngülamtuaetew. Rakiduamnge ti pelon wentru Natan mu. Kidu norümtufi ti longko ülmen David küpa llumumafilu ñi weda kulpan. ¡Müna küdawtupelay ñi femal tüfa! (2 Samuel 12:1-14). Kafey kiñe rupa Pedro, Jesus ñi kiñe apostol, doyümfi pu kristiano judiu tuwün-ngelu, welu famentufi pu judiu tuwün-ngenolu. Feymu apostol Pablo norümtueyew, kidu fütra piwkekünuwi ñi femal tüfa (Galata 2:11-14). Feyngey, müna küdawtukey pu longkolelu ñi ngülamtucheal, feymu ¿chumngechi kelluafuiñ? Ñom piwkengeaiñ, kim mañumaiñ ka pepilfalngeaiñ. Longkontukunieaiñ tüfa: norümtueliyiñmu pu longkolelu, tüfa pengelay Jewba taiñ piwkeyeetew. Femliyiñ kom tüfa, iñchiñ kümelkaleaiñ ka pu longkolelu femayngün ñi küdaw ayüwün mu.

17. Pu longkolelu, ¿chumngechi kellufingün kiñe lamngen?

¹⁷ Inaduamaiñ ñi rupan kiñe lamngen. Tañi kuyfi rupaelchi dungu mu, müna küdawtukefuy ñi piwkeyeafiel ta Jewba, feymu müna weñangkünagi. Kidu feypi: “Duamniefun nütramkayal pu longkolelu engu. Tüfa engün weda pilaenew ka wedalkalu trokilaenew, doy may yafültukuenew. Fillke trawün mu kiñeke nütramkakefenew, fentren duam niele rume. Tañi kuyfi  rupan mu falin-ngenolu trokiwkefun ñi piwkeyeetew Jewba. Welu fillke rupa mu pu lamngen ka pu longkolelu pengelenew Jewba tañi piwkeyeetew. Llellipukefiñ ta Jewba tañi kelluaetew ñi turpu püntütripanoal kidu mew”.

18, 19. Norümngeliyiñ weñangküleafuiñ, welu ¿chem doyeli? Feypinge kiñe pengelün dungu.

¹⁸ Norümngeliyiñ weñangküleafuiñ, welu doyeli taiñ weda rupaken allkütunofiliyiñ ta Jewba taiñ norümetew (Ebrew 12:11). Inaduamafuiñ ñi weda femün Kain ka ti longko ülmen Sedekia. Jewba ngüneduami Kain ñi üdefiel tañi peñi ka ñi küpa langümfiel, fey feypifi: ‘¿Chumngelu anta fente lladküymi ka wesa kangewenagi tami ange? Fey küme dungu femülmi, ayüwküleafuymi, welu femnoluam eymi, tati kulpan üngümküley reke tami adkakayaetew. Welu eymi felefuy tami ngüneafiel tati kulpan’ (Génesis 4:6, 7). Kain allkütulafi ta Jewba, feymu langümfi tañi peñi, fey wedake dungu kontueyew kom ñi mongen mu (Génesis 4:11, 12). Kain eluwfule ñi norümaetew Jewba, fente weda rupalayafuy.

¹⁹ Sedekia weda chengefuy ka newen piwkengelafuy. Kidu ngünenielu, weda felefuy pu che Jerusalen mu. Ti pelon wentru Jeremia fillke rupa ngüfetueyew ñi küme elkünutual tañi femken. Welu Sedekia eluwlay ñi norümaetew Jewba, feymu müna weda dungu mu rupay (Jeremías 52:8-11). ¡Jewba ayükelay taiñ femngechi weda rupayal! Biblia feypi: “Tüfa ñi feypiel ta Jewba, tami Montuletew, tati Lifngelu Israel mew: ‘Iñche, ta Jewba, tami Ngünechen, Tami Kimeltukeetew eymi tami kümelkaleal, Tami Nguyulkeetew chem rüpü mew tami miyawal. ¡Ngüneduamniefulmi iñche tañi werkün dungu! Fey tami tüngün kiñe lewfü reke feleay, ka tami nor dungu tati lafken ñi rew reke feleay[’]” (Isaías 48:17, 18).

20. Pu eluwlu ñi norümaetew Jewba ka pu femkenolu, ¿chumletuayngün?

²⁰ Famülke mew fentren che illamtukey ñi norümaetew Jewba. Welu tati femngechi femkelu, pichilewey ñi rupayal doy wedake dungu mu (Proverbios 1:24-31). Feymu ‘eluwaiñ taiñ norümngeal, fey kimchengeaiñ’. Kafey Proverbios 4:13 feypieiñmew: “Nüwnge tami norümngeel; elkünukefilnge. Kuñiwtukufinge, tüfa am tami eluaetew mongen”.