1, 2. 1) Jesus, ¿chem rakiduamkefuy ti Ley mu? 2) Pu farisew ka pu kimeltukelu Moyse ñi Ley, ¿chumngelu küme inakelafuyngün ti Ley?

TI Ley ñi elungeel ta Moyse Jewba mu küpay. Feymu Jesus rume falintukefuy ti Ley, müna piwkeyefilu am tañi Chaw. Biblia pengeli Jesus tunte ñi piwkeyefiel ti Ley: “Awem ñi Chaw Ngünechen, rume ayüwülkeenew femal tami feypin, ka tami ley dungu ponwi iñche mew müley” (Salmo 40:8). Tañi feypin ka femün mu, Jesus pengeli Chaw Dios ñi Ley ñi welulkakenon, ñi kümelkacheken ka ñi mupiken tañi piel (Matew 5:17-19).

² Feymu Jesus weñangküpelay ñi pefiel pu farisew ka pu kimeltukelu Moyse ñi Ley ñi küme inanofiel ti Ley. Jesus feypi: “Wichuentulkefimün ta Ngünechen kiñe trokiñ mari puwlu mew tati menta, ka anis ka tati kuminu”, femngechi pengeli ñi inaniefiel engün tati newe falin-ngenochi dungu ti Ley mu. Welu ka feypi: “Ngüneduamkelafimün tati doy duamtufalchi dungu mülelu ti ley dungu mew: ñi müleael rüf nor dungu, tamün kutranpiwkeyecheael ka tamün rumel mupituleael kom  dungu mew” (Matew 23:23). Pu farisew ngüneduamkelafuyngün ñi kimeltukeel ti Ley, ka doy kümelu pu che mu trokiwkefuyngün. Welu Jesus kimniefuy chumngelu (chemu) ñi elkünungeel ti Ley ka chem ñi kimeltukeel Jewba mu ti werkün dungu ñi nieel.

3. ¿Chem inaduamaiñ tüfachi chillkatun mu?

³ Famülke mu, inakelaiñ Moyse ñi Ley (Romanu 7:6). Welu, Jewba ¿chumngelu wirintukukünufi Biblia mu? Ayükelu am taiñ ngüneduamal chumngechi ti Ley pengelkey kidu ñi rakiduamkeel, tüfa tati “doy duamtufalchi dungu”, ka taiñ inayafiel. Feymu ñi elkünungeel ti waria ñi ingkañpengeam che, ¿chem kimeltueiñmu? Rupachi chillkatun mu inaduamiyiñ chem ñi chumal tati langümfilu kiñe che tuntukufiel mu, ka chem kimeltun entuafuiñ. Fewla inaduamaiñ chem taiñ kimeltuetew tüfachi waria Jewba mu ka chumngechi taiñ inayentuafiel. Rakiduamaiñ chumngechi femal tüfa, inaduamliyiñ tüfachi ramtun: ti waria ñi ingkañpengeam che, ¿chumngechi pengeli Jewba ñi kutranpiwkeyechen, ñi rakiduamken ti mongen mu, ka ñi femken re nor dungu? Biblia feypi: “Feymu llemay inayentunierpufimün ta Chaw Ngünechen, sakin pu yall reke” (Efesio 5:1, TNM).

4, 5. 1) ¿Chem kelluafuy ti lefmawlu ñi küdawtunoal tañi puwal ti waria ñi ingkañpengeam? 2) Tüfa, ¿chem kimeltueiñmu Jewba mu?

⁴ Jewba elkünuy ti kayu waria ñi ingkañpengeam che tañi pürüm puwal ti langümchelu. Feypifi pu israelche ñi dullial küla waria man püle ti Jordan lewfü mu, ka küla waria wele püle. ¿Chumngelu? Femngechi tati lefmawlu ñi küdawtunoal tañi pürüm puwal üye mu (Números 35:11-14). Tati rüpü yenielu ti waria mu küme elkünungeketufuy (Deuteronomio 19:3). Pu kuyfike judiu feypikey ñi elkünungeel kiñeke letrero ti lefmawlu ñi peal ti waria. Mülen mu femngechi waria Israel mew, ti langümfilu kiñe che tuntukufiel mu lefmawlayafuy ka mapu mu ñi ingkañpengeam, chew ngüchaltukungeafuy ñi poyeafiel koylake dios.

⁵ Rakiduamnge tüfa: Jewba eli ñi langümngeal ti langümchelu. Welu kiñe che langümfile ta kangelu tuntukufiel mu, Jewba eli ñi kutranpiwkeyengeal ka ingkañpengeal. Kiñe wentru adümuwkelu Biblia dungu mu inaduami ti waria ñi ingkañpengeam che, fey feypi: “Kom küme elngey ñi adümfalngeal ka pepilfalngeal”. ¡Feley llemay! Jewba felelay kiñe weda piwkengechi kues reke, kintuyawülkelay ñi kastigayafiel  tañi pu che, welu may ‘rume kutranpiwkeyechekey’ (Efesio 2:4).

6. Pu farisew, ¿inayentukefuy Jewba ñi kutranpiwkeyechen? ¿Chumngelu feypiafuymi tüfa?

⁶ Welu pu farisew kutranpiwkeyechekelafuyngün. Pu kuyfike judiu feypikey pu farisew ñi wiñoduamtukenofiel kiñe che doy küla rupa welulkawlu femngechi dungu mu. Feymu ñi pengelal tunte ñi wedalkalen ñi femün engün, Jesus feypi kiñe nütram: kiñe farisew ñi ngillatulen inafül kiñe kofrakelu impuestu. Ti farisew feypi: “Ngünechen mañumkeeyu, iñche ta kakelu che reke ñi femngenon mew. Tüfa engün weñefengey ka ñiwaldomokeyngün. Ka tüfachi kofrakelu ta impuestu reke ta femngelan rume”. Tüfa pengeli pu farisew ñi ‘illamtukefiel kakelu pu che’ ka tañi kutranpiwkeyechekenon (Luka 18:9-14).

7, 8. 1) ¿Chumngechi inayentuafuiñ Jewba ñi kutranpiwkeyechen? 2) Taiñ wiñoduamtucheal, ¿chumngelu müley taiñ ñom chengeal?

⁷ Feymu inayentukefilnge pu farisew, welu may inayentufinge Jewba tañi kutranpiwkeyechen (papeltunge Kolosense 3:13). Kimfalngepe tami küpa wiñoduamtucheken, fey kakelu che küpa feypiaeymu “wiñoduamtuen” (Luka 17:3, 4). Feymu ramtuwnge: “¿Pürüm wiñoduamtukefiñ ta kakelu, fentren rupa wedalkaelimew rume? ¿Eluwkülen ñi kümelkawtual tañi weda femetew engu?”.

⁸ Taiñ wiñoduamtucheal, müley taiñ ñom chengeal. Pu farisew doy kümelu trokiwkefuyngün, feymu eluwkelafuyngün ñi wiñoduamtucheal. Welu iñchiñ inayentufilu am ta Jesus, ñom chengeiñ, “doy kümelu” trokikefiyiñ ta kakelu, ka wiñoduamtukefiyiñ (Filipense 2:3). Feymu ramtuwnge: “¿Inayentukefiñ ta Jewba, fey ñom chengen?”. Ñom chengelmi, kakelu che küpa feypiaeymu “wiñoduamtuen”, ka eymi doy eluwküleaymi tami wiñoduamtuafiel. Feymu eluwnge tami kutranpiwkeyecheal ka ngünewnge tami lladküfemnoal (Eclesiastés 7:8, 9).

9. Jewba, ¿chumngechi pengelelfi pu israelche fente ñi yamfalngen ta mongen?

⁹ Tüfa kiñe falin dungu chumngelu ñi elkünungeel ti waria ñi ingkañpengeam che: ñi kelluafiel pu israelche tañi kulpakon-noal ñi lan mu kiñe che Jewba ñi eluñmakenoel (Deuteronomio 19:10). Jewba falintukefi ta mongen, welu üdekey ti langümuwün (Proverbios 6:16, 17). Kidu re nor dungu femkey ka lif mongen-ngey, feymu ngoymakünulayafuy kiñe che ñi langümngeel, tuntukungelu rume. “Welu, ¿kutranpiwkeyengenoafulu ama tati langümfilu kiñe che tuntukufiel mu?”, ramtuwafuymi chi. Feyngey, welu tüfa re kutranpiwkeyengelayafuy. Wünelu mülefuy ñi nütramkalelafiel ñi rupan pu longkolelu. Tüfa engün rüf ngüneduamle ñi langümfiel ti che tuntukufiel mu, fey tüfa mülenagafuy ti waria mu  ñi ingkañpengeam, lale wüla ti longkolechi saserdote. Ti lefmawlu mülenagafuy chi ti waria mu kom ñi mongen mew. Ñi elkünungeel tüfa, küme pengelelkefuy pu israelche ñi yamfalngen ta mongen. Feymu ñi yamnieafiel Jewba, tati Wülkelu ti mongen, mülefuy ñi yafüluwal engün tañi tukunoafiel kuñiwün mu kakelu che ñi mongen.

10. Jesus ñi feypin mu, pu farisew ka pu kimeltukelu Moyse ñi Ley, ¿chumngechi pengelingün ñi falintukenofiel pu che ñi mongen?

¹⁰ Pu farisew ka pu kimeltukelu Moyse ñi Ley inayentulafingün ta Jewba ka pengelingün ñi falintukenofiel pu che ñi mongen. Feymu Jesus feypi: “Ngenngeymün reke ta kimün mew, welu eymün no rume küme kimün nielaymün ka elukelafimün ñi adümael tati ayülelu ñi kimael” (Luka 11:52). Feley llemay, pu farisew ka pu kimeltukelu Moyse ñi Ley mülefuy ñi kimeltuafiel pu che Chaw Dios ñi Dungu, ka kelluafiel engün ñi nieal afnoachi mongen. Welu küpa katrütufingün pu che ñi inanoafiel ta Jesus, tati “montulchealu” (Hecho 5:31). Femngechi yefingün reke tati pu che ñi apümkangeal. Tüfa engün mallma piwkengefuyngün, ka kidutu duamuwkefuyngün müten, duamtukelafuyngün pu che tañi mongen. ¡Müna kimfali ñi fente weda piwkengen!

11. 1) Ti apostol Pablo, ¿chumngechi pengeli ñi falintukefiel ti mongen Jewba reke? 2) ¿Chumngechi inayentuafiyiñ Pablo ñi eluwken tañi amuldungual?

¹¹ Taiñ inayentuafiel ta Jewba, ka inanoafiel pu farisew ka pu kimeltukelu Moyse ñi Ley, ¿chem chumafuiñ? Yamafiyiñ ka falintuafiyiñ che ñi mongen. Femngechi femkefuy ti apostol Pablo, feymu eluwkefuy ñi amuldunguafiel ta fentren che. Feymu feypi: “Iñche tañi yafkalenon [kulpalenon] kiñe che mew no rume” (papeltunge Hecho 20:26, 27). Welu, ¿chumngelu amuldungukefuy Pablo? ¿Tañi montuluwal ñi kulpakon-noal? ¿Ñi femal müten Jewba tañi feypietew? Femlay. Kidu piwkeyekefuy pu che, ka falintuñmakefi ñi mongen, feymu ayülefuy ñi nierpual engün afnoachi mongen (1 Korintio 9:19-23). Ka femngechi iñchiñ, falintuafiyiñ ta mongen Jewba reke, kidu ayükey kom che ñi wiñorakiduamtual ka nieal afnoachi mongen (2 Pedro 3:9). Feymu piwkeyecheaiñ ka kutranpiwkeyecheaiñ, femngechi kom piwke mu amuldunguaiñ ka ayüwküleaiñ taiñ femün mu tüfa.

12. Pu poyekefilu ta Jewba, ¿chumngelu fente falintukefingün ñi kuñiwtukuwün?

¹² Müley taiñ rakiduamal ñi falin-ngen kuñiwtukuwal iñchiñ ka kakelu che ñi mongen, femngechi taiñ falintuafiel ti mongen Jewba reke. Feymu kuñiwtukun mu küdawaiñ ka amulnieafiyiñ auto, doyelchi may dewmafiliyiñ chew ñi femngeken taiñ trawün, küme elkünutufiliyiñ, kam amuliyiñ üye mu. Kiñeke che kuñiwtukuwkelay ñi doy matu küdawal kam ñi ngünamnoal plata, fey weda tripayafuy tüfa. Welu doy falin-ngey pu che ñi mongen ka ñi kümelkalen. Jewba rumel küme femkey, feymu inayentuafiyiñ. Doyelchi may pu longkolelu müley ñi kuñiwtukuwal kidu ñi mongen ka kakelu che ñi mongen (Proverbios 22:3). Feymu kiñe longkolelu feypieliyiñmew chumngechi taiñ kuñiwtukuwal, inayaiñ ñi feypin (Galata 6:1). Jewba reke falintuafiyiñ ti mongen, fey kulpakonlayaiñ ñi lan mu kiñe che.

13, 14. Pu longkolelu Israel mew, ¿chumngechi inayentuafuyngün Jewba ñi femken nor dungu?

¹³ Jewba feypifi pu longkolelu Israel mew ñi inayentuafiel tañi femken  nor dungu. Feymu ñi jusgayal, pu longkolelu wüne mülefuy ñi küme kimal chem ñi rupan. Fey küme ngüneduamal ti langümchelu ñi duam, ñi rakiduam ka ñi femkefel kuyfi mew, femngechi tañi dullial ñi kutranpiwkeyeafiel ti che kam ñi femnoal. Mülefuy ñi ngüneduamal tüfa: ti langümchelu, ¿üdefi ka ayüfuy ñi langümafiel? (Números 35:20-24.) Kafey mülefule che pefilu chem ñi rupan, mülefuy ñi allkütungeal epu che ñi nütram, femngechi pengelngeafuy tañi langümfiel ti che kidu ñi ayün mu (Números 35:30).

¹⁴ Pu longkolelu dew ngüneduamlu chem ñi rupan, mülefuy ñi rakiduamal ti che mu, re rakiduamnoal ñi femün mu. Kafey duamniefuyngün ñi kim ngüneduamafiel chem rupay, ka chem yeeyew ñi femngechi femal. Ka doyelchi may, duamniefuyngün Jewba ñi newen ñi inayentuafiel tañi kim ngüneduamün, kutranpiwkeyechen ka femken nor dungu (Éxodo 34:6, 7).

15. Pu farisew ñi rakiduamken pu che mew, ¿chumngelu trürlay Jesus ñi rakiduamken mu?

¹⁵ Pu farisew kutranpiwkeyekelafuyngün ñi jusgayafiel pu che. Re ngüneduamkefuyngün pu che ñi kulpan, welu duamtukelafuyngün ñi chumngechi chengen. Feymu Jesus imekelu Matew ñi ruka mew, ramtuyngün: ‘¿Chumngelu am tamün kimeltufe kiñentrür imekey tati kofrakelu impuestu ka ti pu kulpafe engün?’. Jesus wiñoldunguy: ‘Tati külfünkülelu ka mongelelu duamlay engün ta lawentuchefe, welu tati pu kutran may ta duami ta lawentuchefe. Amumün ka kimtukuaymün ñi chem piel ta tüfachi wirin dungu: “Iñche may ta duamnien tamün kutranpiwkeyecheael, welu tamün chalintukumekenoael tati langümelchi kulliñ müten.” Iñche am küpanolu tati pu küme piwkekawünngelu mew, welu may tati pu kulpafe ñi wiñorakiduamtuael’ (Matew 9:9-13). Feley llemay, Jesus ayüfuy tüfachi pu che ñi wiñorakiduamtual. Tüfa kiñe falin dungu Jesus ñi amuldunguel (Matew 4:17). Kidu feypilay ñi wedalkalenon tüfachi pu che ñi kulpan, welu may ngüneduami kiñeke “kofrakelu impuestu ka ti pu kulpafe” ñi küpa norümfiel ñi mongen. Kidu engün amulayngün Matew ñi ruka mu tañi iyal müten, welu may ñi inaniefiel mu ta Jesus (Marku 2:15). Welu epe kom pu farisew ñi rakiduamken pu che mew, trürlafuy Jesus ñi rakiduamken mu. Pu farisew rakiduamkefuy pu che turpu ñi norümnoafiel ñi mongen ka ñi montulngenoal. Trürlayngün rume Jewba mew, kidu am nor piwkengelu ka kutranpiwkeyechekelu.

16. Ti trokiñ longkolelu ramtukadunguafilu ti kulpalu ñi norümngeal, ¿chem müley ñi ngüneduamal?

¹⁶ Famülke mu, pu longkolelu trawünche mew müley ñi inayentuafiel ta Jewba, kidu am piwkeyekefilu ti nor dungu (Salmo 37:28). Wüne müley ñi küme ngüneduamafiel ti dungu tañi kimal ñi rüf kulpan kiñe che. Rüfngele, inayafingün Biblia ñi feypin ñi kimal chem chumal (Deuteronomio 13:12-14). Konle engün ti trokiñ longkolelu mu ramtukadunguafilu ti kulpalu ñi norümngeal, müley ñi kuñiwtukuwal tañi ngüneduamafiel ñi rüf wiñorakiduamtun kam ñi femnon. Kiñeke mu küdawngeafuy. Müley ñi ngüneduamal engün ti kulpalu ñi duam, ñi rakiduamken tañi weda femün mu ka chem ñi mülen tañi piwke mu (Apokalipsi 3:3). Ti kulpalu müley ñi rüf wiñorakiduamtual tañi kutranpiwkeyengeal * (inaduamnge ti kimal dungu).

17, 18. Pu longkolelu, ¿chumngechi kimafuyngün tati kulpalu ñi rüf wiñorakiduamtun? (Inaduamnge ti adentun ellaka mu mülelu.)

 ¹⁷ Jewba ka Jesus pepi ngüneduamkefingu pu che ñi piwke, feymu küme kimnieyngu chem ñi rakiduamken. Welu pu longkolelu pepi femkelayngün. Feymu eymün pu longkolelu, ¿chumngechi kimafuymün kiñe kulpalu ñi rüf wiñorakiduamtun? Wüne ngillatumün ta Jewba tamün eluaetew kimün ka tamün kelluaetew ñi ngüneduamal ti dungu (1 Reyes 3:9). Fey wüla eluwmün tamün kelluaetew ti Biblia ka fillke papil ñi kimal chumngelu ñi weñangkülen ti che, rüf wiñorakiduamtulu am tañi weda femün mu, kam tañi weda rupanoal (2 Korintio 7:10, 11). Ngüneduammün chumngechi ti Biblia pengeli ñi chumün, ñi rakiduamün ka ñi duamnagün pu wiñorakiduamtulu ka pu femnolu.

¹⁸ Kafey müley tamün rakiduamal ti che mew, re rakiduamlayaymün tañi weda femün mu. Ramtuwmün: “¿Chumngelu femngechi chengey? ¿Chem yeeyew ñi femngechi dullial? ¿Chem chaftumekey?”. Biblia feypi chem ñi chumafel Jesus, tati longkolelu ti trawünche mu, kidu “ramtukadungulayay re ñi pefiel müten kiñe dungu, ka norümlayay ñi allkütuel müten ti dungu. Kidu nor dungu mu ramtukadunguafi pu fillalelu ka nor lelikadunguay ñi füreneafiel pu ñom piwkengelu Mapu mu” (Isaías 11:3, 4). Pu longkolelu, Jesus elfalkünueymünmew tamün ngüneytuafiel ti trawünche, feymu kidu kelluaeymünmew tamün kutranpiwkeyeal ka femal nor dungu tamün jusgayal ti trawünche mu (Matew 18:18-20). Kom iñchiñ ti trawünche mu, müna mañumküleiñ ñi mülen pu longkolelu taiñ dapikeetew ka taiñ kellukeetew ñi welukonke kutranpiwkeyewal ka yeniewal nor dungu mew.

19. Taiñ kimeltuetew ti waria ñi ingkañpengeam che, ¿chem inayafimi tami mongen mu?

¹⁹ Moyse ñi Ley niey “ti küme nor kimün ka tati rüfngechi dungu”. Kimeltukeeiñmew Jewba tañi chumngen ka tañi ngülam (Romanu 2:20). Feymu ti waria ñi ingkañpengeam che elkünungelu ti Ley mu, kimeltukefi pu longkolelu ñi jusgayal “rüf nor dungu mu” ka kimeltukeeiñmu kom iñchiñ taiñ welukonke nor piwkeyewal ka kutranpiwkeyewal (Zacarías 7:9). Jewba weluletukelay, feymu fantepu mu amuley ñi falintukefiel ti kutranpiwkeyen ka ti nor dungu, duamfalngenolu rume taiñ inayafiel Moyse ñi Ley. Feymu mañumküleiñ ñi femngechi femngen taiñ Chaw Dios. Fey inayentuñmayafiyiñ ñi chumngen ka eluwaiñ taiñ ingkañpeaetew.