1. Taiñ ülkantuken, ¿chumngechi kellukeeiñmew?

KIÑE wentru wirintukukelu ülkantun feypi: “Allkütulmi ñi dungungeel, tüfa rakiduamelaeymu, welu ülkantulmi, tüfake ta puway tami piwke mu”. Ka femngechi taiñ fillke ülkantun mu püramyekefiyiñ taiñ Wenu Chaw Jewba ka pengelkeiñ tunte taiñ piwkeyefiel. Fey doy fülkonkeiñ kidu mu. Feymu kimnieiñ fente ñi falin-ngen taiñ ülkantuken ñi poyeafiel ta Jewba, kidu ülkantuliyiñ kam taiñ pu peñi ka lamngen iñchiñ.

2, 3. 1) Kiñeke che, ¿chumngentukefi ñi ülkantuken trawün mu? 2) ¿Chem ramtun inaduamaiñ tüfachi chillkatun mu?

² Tami ülkantuken trawün mu, ¿chumngentukefimi? ¿Yewekeymi? Kiñeke lof mu, pu wentru weda duamkeyngün ñi ülkantun mu kakelu che ñi adkiñ mew. Kafey kiñeke mu, pu longkolelu trawünche mew ngellu ülkantukeyngün, kam adngelluwkeyngün ka dungu mu petu ñi ülkantungeken. Rupale tüfa, kom ti trawünche ngañwadürpuafuy (Salmo 30:12).

³ Taiñ poyeafiel ta Jewba, müna falin-ngey taiñ ülkantuken. Feymu petu ülkantungele trawün mu, yafüluwaiñ taiñ  müleal. Fey ramtuwaiñ: “¿Chumngentukefiñ ñi ülkantungeken trawün mu? ¿Chem chumafun ñi yewenoal tañi ülkantual? Ka, ¿chumngechi ülkantuafun kom piwke mu?”.

4, 5. Pu israelche ñi antü mu, ¿chumngechi adkünungefuy ñi ülkantungeal ngillatuwe ruka mu?

⁴ Pu poyekefilu ta Jewba afkentu ülkantukeyngün ka dungulkeyngün fillke ayekawe ñi püramyeafiel ta Jewba. Kuyfi mu, pu israelche küme weniyefilu ta Jewba, fey eluwkefuyngün ñi ülkantual tañi poyeafiel ta Chaw Ngünechen. Rakiduamnge David ñi femün mu. Kidu adkünufilu pu leviche ñi küdawal ti ngillatuwe ruka mu, elkünuy 4.000 leviche ñi püramyeafiel ta Jewba ülkantun mu. Tüfa engün mew mülefuy 288 küme pepikawkülelu ka adümuwkülelu ñi ülkantulelafiel ta Jewba (1 Crónicas 23:5; 25:7).

⁵ Kafey chalintukulelngelu ta Chaw Dios ti ngillatuwe ruka, müna falin-ngefuy ti ülkantun ka ñi dungulngeel fillke ayekawe. Biblia feypi: “Fey pu trompetatupelu ka pu ülkantupelu kiñentrür püramyefilu ka mañumfilu ta Jewba, ka dungulngelu ti trompeta, cimbalo ka kakelu ayekawe, ka püramyengelu ta Jewba”, fey Chaw Dios pengeli fente ñi ayüwmaetew tañi femün engün. Müna yafültukupelaeyew tüfa pu israelche (2 Crónicas 5:13, 14; 7:6).

6. Neemia ngünenielu Jerusalen, ¿chumngechi adkünuy ñi ülkantungeal ka dungulngeal fillke ayekawe?

⁶ Neemia adkünufi pu israelche ñi wiño dewmatuafiel ti kura malal Jerusalen mu. Ka adkünufi pu leviche ñi ülkantual ka dungulafiel fillke ayekawe. Ñi femün mew engün, pu che doy ayüwürpuy chalintukulelngelu ta Jewba ti fütrake kura malal. Neemia elkünufi epu fütrake trokiñ ülkantufe ñi mañumafiel ta Chaw Dios. Tüfachi epu trokiñ ülkantufe trekay wente kura malal mu, fey kiñe trokiñ amuy man püle ti kura malal mu, ka kangelu amuy wele püle, fey trawingu inafül ngillatuwe ruka mu. Ka alü kamapu allküngefuy ñi ülkantun engün (Nehemías 12:27, 28, 31, 38, 40, 43). Jewba müna ayüwpelay ñi allkütufiel tañi pu che tañi ülkantukeetew ayüwün mu.

7. Jesus, ¿chumngechi pengeli tañi pu disipulu ñi poyeafiel ta Chaw Ngünechen ülkantun mu?

⁷ Jesus ñi antü mu, ka falin-ngefuy ti ülkantun ñi poyeafiel ta Jewba. Jesus ka tañi pu disipulu ülkantulelfingün ta Jewba dew elkünulu ti trawün ñi akordangeal Jesus tañi lan, tüfa tati doy falin-ngechi antü ñi mülen (papeltunge Matew 26:30).

8. Pu wünenke kristiano, ¿chumngelu (chemu) inayentufalngeyngün ñi ülkantulelfiel ta Jewba?

⁸ Pu wünenke kristiano inayentufalngeyngün ñi poyefiel ta Jewba ülkantun mu. Kidu engün nielafuy kiñe fütra ngillatuwe ruka ñi poyeafiel ta Jewba pu israelche reke, welu trawüluwkefuyngün kiñe che ñi ruka mu. Feychi ruka afmatufalngelafuy ti ngillatuwe ruka reke, welu pu kristiano eluwingün ñi ülkantual ayüwün mu. Feymu, ti apostol Pablo feypifi tañi pu peñi ka lamngen: “Kimeltuwmün, ka yafültukuwmün welukonkechi kom küme kimün mew. Fütra küme  mañumtun mew ülkantulelfimün salmo ka himno ta Ngünechen, ka Ngünechen ñi kümeke ülkantun” (Kolosense 3:16). Ti “kim manelfal kona” wülkey Ngünechen ñi kimün puwchi antü mu, ka pepikakünufi taiñ ülkantun lifru, feymu “mañumtun mew” ülkantulelafiyiñ ta Jewba (Matew 24:45, Traducción del Nuevo Mundo [TNM]).

9. 1) ¿Chumngelu kiñeke che müte eluwlayafuy ñi ülkantual trawün mew? 2) ¿Chumngechi müley taiñ ülkantulelafiel ta Jewba, ka iney müley ñi doy inayentufalngeal? (Inaduamnge ti adentun ellaka mu mülelu.)

⁹ ¿Chumngelu müte eluwlayafuiñ taiñ ülkantual? Taiñ pu che wimtukelay chi ñi ülkantual, kam ülkantungekelay chi taiñ trokiñ mapu mew. Kafey trürümuwkeiñ chi pu küme ülkantukelu radio kam television mew, fey yeweafuiñ kam pepilnoalu trokiwafuiñ. Welu kom iñchiñ müley taiñ ülkantulelafiel ta Jewba. Feymu norümafiyiñ taiñ topel, adkiñ püramafiyiñ ti lifru ka kom piwke mew ülkantuaiñ (Esdras 3:11). Biblia feypi: “¡Püramyefimün ta Jewba! Kümey taiñ püramyeafiel taiñ Chaw Ngünechen ülkantun mew; ¡ayüfalngey ñi püramyengeal ka feley tañi femngeal!” (Salmo 147:1). Fentren Trawünwe Ruka mu müley fillke pantalla chew ñi pengelngeel taiñ ülkantual, tüfa kelluafeiñmew ñi doy küme entual taiñ ülkantun. Ka ngüneduamfalngey ñi ülkantungeken fewla ti Chillkatuwe ñi Pepikangeam pu Longkolelu. Tüfa pengeli fente ñi falin-ngen pu longkolelu ñi doy inayentufalngeal tañi ülkantuken trawün mew.

10. Yeweliyiñ taiñ newentu ülkantual, ¿chem longkontukualu iñchiñ?

¹⁰ Kiñeke yewekey ñi newentu ülkantual trawün mu, rakiduamkelu am ñi  küme ülkantukenon kam wirarmekelu ñi trokingenoal. Welu longkontukunge, kom iñchiñ welulkakeiñ, feymu kiñeke mu küme entukelaiñ taiñ dungun, welu dungukakeiñ müten (Santiaw 3:2). Ka femngechi, newe küme entunoliyiñ rume taiñ ülkantun, tüfa katrütukilpe taiñ ülkantual ñi püramyeafiel ta Jewba.

11, 12. ¿Chumngechi doy küme ülkantuafuymi?

¹¹ Yeweafuiñ taiñ ülkantual kimnolu kay chumngechi taiñ femal tüfa. Feymu taiñ doy küme entual taiñ ülkantun, inaduamaiñ kiñeke ngülam küdawngenolu taiñ inayafiel * (inaduamnge ti kimal dungu).

¹² Tami küme ülkantual, müley tami kim neyüal. Ñi küme üyküleal ti kütral, duamnieymi kümeke mamüll, ka femngechi tami küme ülkantual duamnieymi tami küme neyüal. Chumngechi tami dunguken, ka femngechi müley tami ülkantual kam doy newentu femafuymi * (inaduamnge ti kimal dungu). Biblia feypifi tati pu poyekefilu ta Jewba ñi wiraral ayüwün mu tañi ülkantulelafiel (Salmo 33:1-3).

13. ¿Chumngechi ülkantuafuymi llükanon mu?

¹³ Poyefilmi ta Ngünechen reñmawen mu, kam kidulelmi, femafuymi tüfa: taiñ lifru mu, dullinge kiñe ülkantun tami doy ayüniefiel, eluwnge tami newentu papeltuafiel llükanon mew, fey chumngechi tami newentu dunguel, ka femngechi kom papeltufemfinge kiñe trokiñ. Fey, ka femngechi newentu ülkantufinge feychi trokiñ (Isaías 24:14). Femülmi tüfa, doy newentu ülkantuaymi, tüfa ta kümey. Welu llükakilnge ka yewekilnge.

14. 1) Tami ülkantual, ¿chumngelu falin-ngey doy nülayal tami wün? (Inaduamnge ti wichulechi dungu “ Chumngechi doy küme ülkantuafuymi”.) 2) Ñochi dungulmi kam pichi rupale tami dungun, ¿chem ngülam kelluafeymu?

¹⁴ Kafey, tami newentu ülkantual, müley tami küme nülayal ti wün. Feymu, chumngechi tami dunguken, doy nülayaymi tami wün ñi ülkantual. Welu, ¿ñochi dungulmi kay, kam pichi rupale tami dungun? ¿Chumafuymi? Peafuymi  kümeke ngülam ti lifru Benefíciese de la Escuela del Ministerio Teocrático pagina 184, ti wichulechi dungu feypilelu “Cómo superar problemas específicos”.

15. 1) ¿Chem feypingey tati sakin trawün ñi femngen 2016 tripantu mu? 2) ¿Chumngelu entungey kiñe we ülkantun lifru?

¹⁵ Pu Dungukelu Iney Ngen Jewba fillke tripantu nieyngün kiñe sakin trawün octubre küyen mu. Tati trawün femngelu 2016 tripantu mu, taiñ peñi Stephen Lett koneltulelu ti Kiñewkülechi Ngünenielu mu, feypi ñi tripayal kiñe we ülkantun lifru Ayüwün mu ülkantulelafiyiñ ta Jewba pingealu. Tüfachi we lifru entungeafuy wiño inaduamngelu am ti Traducción del Nuevo Mundo de las Santas Escrituras gringudungun mu. Feymu fillke ülkantun entuñmangey kiñeke dungu ñi feypiwenoel ti we Traducción del Nuevo Mundo. Kafey, müley weke ülkantun nütramkalu ti amuldungun küdaw mu ka ti montulchen mew. Ka, fente falin-ngelu taiñ ülkantuken ñi poyeafiel ta Jewba, ti Kiñewkülechi Ngünenielu ayüy ñi doy küme dewmangeal ti weke ülkantun lifru. Feymu, ti tapa feleay tati we Traducción del Nuevo Mundo reke.

16, 17. ¿Ka chem dungu küme elkünungetuy ti we lifru mu?

¹⁶ Ñi küme adümngeal ti ülkantun  lifru, tati fillke ülkantun adkünungey nüwkülechi dungu mu. Feymu, tati wünenke 12 ülkantun nütramkay Jewba mu, tati inalechi 8 ülkantun nütramkay Jesus mu ka ti montulchen, ka kakelu ka femngechi adkünungey. Ka, ellaka ti lifru mu, wirintukuley kom tati nüwkülechi dungu. Tüfa kelluafuy pu peñi wewpitulu ñi dullial kiñe ülkantun, ka müna kelluafeiñmew kom iñchiñ.

¹⁷ Taiñ ülkantual kom piwke mu, küme elkünungetuy ñi feypilen kiñeke ülkantun. Feymu, doy küme rulpadungungey kiñeke dungu tañi küme adümngeal ñi rüf chem pilen, kiñe tüfa, fillke ülkantun feypiwelay “yafkan”, welu may feypi “kulpan”. Kafey ti ülkantun “Tati piwkeyen weway” pingelu, fewla feypiley “Piwkeyechengeaiñ”. Kafey ti ülkantun “Kuñiwtukuaymi tami piwke”, fewla feypiley “Kuñiwtukuafiyiñ taiñ piwke”. ¿Chumngelu femngey tüfa? Taiñ pu ñaña, pu wechekeche, pu we konlu Jewba ñi trokiñche mu ka pu Dungukelu Iney Ngen Jewba ngenolu ülkantulu tüfa, feypifingün ta kakelu chem ñi femal, fey yewekefuyngün. Feymu tüfachi ülkantun küme elkünungetuy.

18. ¿Chumngelu müley taiñ küme kimafiel tati ülkantun taiñ we lifru mu? (Ka inaduamafuymi ti kimal dungu.)

¹⁸ Fentren ülkantun tati we lifru mu wirintukuley kiñe ngillatun reke. Tüfa kelluafeymu tami feypiafiel ta Jewba ñi chum duamkülen tami piwke. Kakelu ülkantun yafültukuaeiñmew taiñ “doy piwkeyewael” ka “femael kümeke dungu” (Ebrew 10:24). Feymu eluwaiñ taiñ kimafiel ti ülkantun ñi feypilen, ñi chumlen ka ñi musica. Fey pepikayafiyiñ ruka mew, femngechi ülkantuaiñ piwke mu ka llükanon mew * (inaduamnge ti kimal dungu).

19. Trawünche mu, ¿chumngechi kom iñchiñ poyeafuiñ ta Jewba?

¹⁹ Longkontukuaiñ, müna falin-ngey taiñ ülkantun ñi poyeafiel ta Chaw Jewba. Femngechi pengelafiyiñ tunte taiñ piwkeyefiel ka mañumniefiel. Biblia feypi: “Püramyefimün ta Jewba ülkantun mew, kidu am femlu afmatufalchi dungu. Tüfa kimngepe kom Mapu mew” (Isaías 12:5). Ayüwün mu ülkantuliyiñ, kakelu inayentuaeiñmu. Trawünche mu, kom poyeafuiñ ta Jewba ülkantun mew, pu wechekeche, pu füchakeche ka pu we konlu Jewba ñi trokiñche mew. Feymu, eluwnge tami ülkantulelafiel ta Jewba piwke mu. Inayaymi ñi feypiel tati wirintukufilu ti salmo: “Ülkantulelfimün ta Jewba”. Feley llemay, ¡ayüwün mu ülkantulelafiyiñ! (Salmo 96:1.)