KIÑE pichi waria Gujarat mu (India), John tañi chaw fawtisawi ñi Dungukelu Iney Ngen Jewba ngeal, 60 tripantu kuyfi mew. Welu John ka tañi epu peñi, küla lamngen ka ñi ñuke konkefuyngün pu katoliko mu, feymu chaftukefingün tañi chaw ñi feyentukeel.

Kiñe antü, John tañi chaw feypieyew: ‘Yelelafuymi kiñe karta ta kiñe peñi konkelu tañi trawünche mu’. Welu feychi puliwen John allfüy tañi changüll kuwü petu nülafilu kiñe fütra palti pañillwengelu. Allfülelu rume, femi tañi chaw ñi feypietew, fey impolkünufi tañi changüll kuwü ka amuy tañi chaw ñi weni mu.

Puwlu John, elufi ti karta tati peñi ñi domo. Kidu konkey pu Dungukelu Iney Ngen Jewba mu. Tüfachi domo ngüneduami John ñi allfülen ka kellueyew. Fey tañi nieelchi lawen mu, liftufi John tañi allfen ka impolkünufi tañi changüll kuwü. Fey wüla, elufi ta John kiñe eñumkülechi te. Feychi domo piwkeyen mu nütramkalelfi ta John Biblia ñi dungu.

Tüfachi domo ñi fürenechen mu, John doy küme trokifi pu Dungukelu Iney Ngen Jewba. Feymu ramtulelfi epu dungu ñi trürngenon pu katoliko ka pu Dungukelu Iney Ngen Jewba ñi feyentun mu. Feypifi: ‘¿Jesus ka Chaw Dios kiñengeyngu? Pu kristiano, ¿müley ñi ngillatuafiel ta Maria?’. Tüfachi lamngen kimnierpuy nga John ñi kewün dungu, gujarati pingelu, feymu Biblia mu llowdungueyew kidu ñi kewün mu, ka elueyew ti papil “Estas buenas nuevas del Reino”.

John ngüneduamlu ti papil, kimtukuy ñi papeltumeken ti rüf dungu. Fey pemefi kiñe saserdote ka ramtulelfi feychi epu dungu tañi dew ramtulelfiel ti lamngen. Fey ti saserdote fütra illkuy ka ütrüftueyew kiñe Biblia, ka wirareleyew: “¡Weküfükünuwimi! Pengelen chem trokiñ Biblia mu feypiley Chaw Dios ka Jesus ñi kiñengenon engu. Pengelen chew feypiley ñi kümenon ngillatuafiel ta Maria. ¡Pengelelen!”. John afmatulewey tati saserdote ñi femün mu, feymu feypilelfi ñi amuwenoal kiñe iglesia catolica mu no rume. ¡Fey femwelay llemay!

John chillkatuy ti Biblia pu Dungukelu Iney Ngen Jewba engün, fey piwkentukuy tati rüf dungu ka eluwi ñi poyeafiel ta Jewba. Rupalu ta antü, kakelu tañi pu che ka femingün tüfa. Fey 60 tripantu rupalu wüla, John ngüneduamfilu ñi changüll kuwü, petu rakiduamtukukey feychi lamngen ñi fürenecheken, ka chumngechi tüfa kellueyew tañi poyeafiel ta Jewba kom ñi mongen mu (2 Korintio 6:4, 6).