1, 2. Lalu ta Moyse, ¿chem fütra küdaw elungey ta Josue?

JEWBA feypifi ta Josue: “Moyse, iñche tañi poyekeetew, dew lay. Fey witrange, ka rumeaymi Jordan lewfü, kom tüfachi pu che engün, fey amuaymi feychi mapu mew iñche tañi eluafiel pu israelche” (Josué 1:1, 2). ¡Rume kaletuy Josue ñi mongen! Kidu küdawelkefi ta Moyse epe 40 tripantu, welu fewla longkoletuay pu israelche mu.

² Fentren tripantu mu Moyse longkolekefuy pu israelche mu, welu Josue longkoleay fewla. Feymu Josue rume rakiduami chi, ‘¿llowaenew pu che ñi longkoleal?’ pikefuy chi (Deuteronomio 34:8, 10-12). Kiñe lifru nütramkay ñi chem pin Josué 1:1, 2, feypi: “Kuyfi ka famülke mu kiñe trokiñche rupakey doy küdawngechi antü mu mülen mu kiñe we longkolelu”.

3, 4. 1) Chaw Dios, ¿chumngechi kümelkafi ta Josue tañi maneluwün mu? 2) ¿Chem dungu ramtuwafuiñ?

³ Mülerkefuy dungu ñi rume rakiduamküleal ta Josue. Welu maneluwi Jewba mu ka eluwi ñi inanieal tañi feypin  (Josué 1:9-11). Chaw Dios kümelkafi ta Josue tañi maneluwün mu, feymu adkünuy kiñe küme püllü tañi adnieafiel ta Josue ka tati pu israelche. Feytachi küme püllü ti Dungun ngepelafuy, Chaw Ngünechen ñi kiñen Fotüm ürke (Éxodo 23:20-23; Juan 1:1, TNM).

⁴ Chaw Jewba ñi kellun mu, pu israelche küme llowi weke dungu ñi feypin Josue tañi ñidolkülen mu. Ka femngechi famülke mu, kaletukey fentren dungu Jewba ñi trokiñche mu. Feymu ramtuwafuiñ chi: “¿Rüf maneluwpeafuiñ may Jesus tañi Ñidolkülen mu?” (papeltunge Matew 23:10). Taiñ wiñoldungual tüfachi ramtun, ngüneduamaiñ chumngechi ta Jewba adniefi tañi pu che kuyfi kaletulu fentren dungu.

5. Josue, ¿iney perumefi inafül Jordan lewfü? (Inaduamnge ti adentun ellaka mu mülelu).

⁵ Pichi rupalu pu israelche ñi rumen Jordan lewfü mu, Josue perumey kiñe dungu. Biblia feypi: “Josue mülelu inafül Jeriko, pürakintuy fey pefi kiñe wentru witralelu kidu tañi adkiñ mu ka nüniefuy kiñe fütra kuchillu. Fey Josue trekalen fülkontupufi ka ramtufi: ‘¿Kiñewküleymi iñchiñ mu kam taiñ pu kayñe mew?’. Fey kidu feypi: ‘Femlan, welu iñche küpan longkolelu am Jewba ñi pu weychafe wenu mapu mu’. Feymu Josue lukutunagi ka lloyünagi mapu mew, fey feypifi: ‘Tañi ñidol, ¿chem küpa feypien ta iñche, eymi tami kona?’. Fey tati longkolelu Jewba ñi pu weychafe wenu mapu mu feypieyew ta Josue: ‘Pünoleymi lif mapu mu, feymu nentunge tami okota namun mu’. Fey mu ka müten femngechi femi ta Josue” (Josué 5:13-15). Kakelu versikulo feypi Jewba ñi dungufiel ta Josue, welu femkünupelay kiñe küme püllü ñi dungulelafiel ta Josue chumngechi ñi femün kakelu rupa (Éxodo 3:2-4; Josué 4:1, 15; 5:2, 9; Hecho 7:38; Galata 3:19).

6-8. 1) Ñi feypin tati küme püllü, ¿chumngelu (chemu) kangentungeafuy? 2 )¿Chumngelu am fente kümey ñi feypin tati küme püllü? (Inaduamnge ti kimal dungu).

⁶ Ti küme püllü küme feypifi ta Josue chumngechi ñi malonafiel ta Jeriko. Ellaka mu, kangentungeafuy kiñeke dungu ñi feypin ti küme püllü. ¿Chem dungu chi? Ti küme püllü feypi ñi sirkunsidangeal kom pu weychafe (awkafe), feymu pepi weychalayngün kiñe mufün antü. ¿Rüf kümelkalefuy ñi sirkunsidangeal engün feychi mu? (Génesis 34:24, 25; Josué 5:2, 8).

⁷ Pu weychafe ramtuwingün chi: “Weychapaeliyiñmu taiñ pu kayñe, ¿chumngechi ingkañpeafiyiñ taiñ pu che?”. ¡Welu ruparumey kiñe dungu ñi rakiduamnoel! Pu che mülelu ta Jeriko kewalafingün pu israelche, doy may llükafingün. Biblia feypiley: “Fey Jeriko waria küme rakümkülefuy pu israelche tañi duam mu; iney no rume konkelafuy ka tripakelafuy waria mu” (Josué 6:1). Pu israelche allkütulu tüfa, ¡doy maneluwpelayngün Ngünechen ñi feypin mu!

⁸ Ti küme püllü feypifi ta Josue ñi weychanoafiel pu che mülelu ta Jeriko. Doy may, feypifi: ‘Kiñe rupa trekaleaymün wallon ti waria mu kayu antü, fey afle ti kayu antü, regle rupa walloñmayafimün’. “¡Re ngünamka dungu femaiñ  ka ürküaiñ müten” pingün chi pu weychafe. Welu Chaw Jewba küme kimniefuy tañi chem fem-meken. Fey pu weychafe inafingün tañi chem pin ta Jewba, feymu doy maneluwingün kidu mu ka weychalafingün rume pu weychafe Jeriko mu (Josué 6:2-5; Ebrew 11:30) * (inaduamnge ti kimal dungu).

9. ¿Chumngelu inayaiñ kom ñi feypin Jewba tañi adkünuelchi trokiñche? Feypinge kiñe pengelün dungu.

⁹ ¿Chem kimeltukeeiñmu tüfachi nütram? Kiñeke mu, Chaw Jewba tañi adkünuelchi trokiñche kakünukey kiñeke dungu, fey iñchiñ kimlayafuiñ chumngelu ñi femün. Welu ngüneduamliyiñ fente ñi küme tripaken tüfa, doy feyentuleaiñ ka doy kiñewküleaiñ taiñ pu peñi ka lamngen engün. Rakiduamaiñ, feypingeiñ taiñ adümafiel elektroniko chemkün taiñ chillkatual, amuldungual ka trawüluwal. Ellaka mu, müte ayükelafuiñ chi, welu pepi adümfiliyiñ tüfachi elektroniko chemkün, fewla kimtukuiñ fente taiñ kümelkakeetew tüfa.

10. ¿Iney rüf adkünuy ti kiñewkülechi ngünenielu ñi falin trawün?

¹⁰ Dew rupay 13 tripantu ñi kristianongerpun ta Korneliu. Kidu judiu tuwün-ngelay ka sirkunsidangelay rume. Welu kiñeke kristiano judiu tuwün-ngelu feypikey ñi petu duamfalngen sirkunsidangeal pu kristiano (Hecho 15:1, 2). Antiokia waria mu pu peñi yafkawingün tüfachi dungu mu. Feymu pu longkolelu Antiokia mu, werküfingün ta Pablo Jerusalen waria tañi ramtuafiel ti kiñewkülechi ngünenielu ti sirkunsision dungu mu. Welu, ¿iney rüf adkünuy ñi  amual ta Pablo? Kidu feypi: “Fey amun Ngünechen am werküetew ñi amuael ta iñche”. Feley llemay, Ngünechen tañi newen mu Jesus adkünuy ti kiñewkülechi ngünenielu ñi norümal tüfachi dungu (Galata 2:1-3).

11. 1) Kiñeke kristiano judiu tuwün-ngelu, ¿chem rakiduamkefuy sirkunsision dungu mu? 2) Pablo, ¿chumngechi ñom piwke mu inafi ñi feypin pu longkolelu? (Inaduamnge ti kimal dungu).

¹¹ Kristo adkünufi ti kiñewkülechi ngünenielu, femngechi kimfalkünungey ñi duamfalngenon sirkunsidangeal pu judiu tuwün-ngenolu (Hecho 15:19, 20). Welu rupalu kiñeke tripantu pu kristiano judiu tuwün-ngelu amuley ñi sirkunsidakefiel tañi pu fotüm. Fey pu longkolelu Jerusalen mu allküyngün ñi feypingekeel Pablo ñi yamkenofiel Moyse tañi Ley, feymu feypifingün tañi chem chumal * (inaduamnge ti kimal dungu) (Hecho 21:20-26). Pablo feypingey ñi yeafiel meli wentru ti ngillatuwe ruka mu, femngechi kom che peafuy ñi yamniefiel ti Ley. Pablo feypiafuy chi: “Re ngünamka dungu müten. ¿Chumngelu chi femalu ta iñche? Pu judiu tuwün-ngelu adümkelayngün ti sirkunsision dungu, kidu engün may welulkaleyngün”. Welu Pablo kimniefuy pu longkolelu ayüniey tañi kiñewküleal kom pu kristiano, feymu ñom piwke mu inaniey ñi feypin engün. Welu rakiduamafuiñ chi: “Lalu ta Jesus duamfalngewelay ñi inangeal Moyse tañi Ley, fey ¿chumngelu Jesus pürüm müten norümtulafi?” (Kolosense 2:13, 14).

12. Kristo, ¿chumngelu chi pürüm norümtulafi ti sirkunsision dungu?

¹² Küdawngey may adümafiel kiñe we kimeltun. Pu kristiano judiu tuwün-ngelu alüñmayngün ñi adümal ñi duamfalngewenon inangeal Moyse tañi Ley (Juan 16:12). ¿Chumngelu kay? Kidu engün afkentu rakiduamkefuy ti sirkunsision ñi pengelkeel Chaw Dios ñi dullietew tañi sakin trokiñchengeal (Génesis 17:9-12). Kafey kiñeke judiu rakiduamkefuy: “Inawenofiliyiñ tati Ley, kayñetuaeiñmew kakelu judiu taiñ lof mu”, feymu llükalekefuyngün (Galata 6:12). Welu rupalu chi antü, Kristo wüli doy kimeltun Pablo tañi karta mu (Romanu 2:28, 29; Galata 3:23-25).

13. Taiñ inanieal Kristo ñi kimeltun, ¿chem rakiduamaiñ?

¹³ Famülke mu Jesus amuley ñi Ñidolkülen trawünche mu. Feymu küme adümnoliyiñ kiñeke dungu ñi kakünukeel Jewba ñi trokiñche, rakiduamaiñ chumngechi Kristo adniefi Chaw Dios ñi pu che kuyfi. Josue tañi antü mu ka pu apostol ñi antü mu, Kristo wüli küme kimeltun ñi ingkañpeafiel Ngünechen tañi pu che, fey kellufi tañi doy feyentuleal ka ñi doy kiñewküleal engün (Ebrew 13:8).

14-16. Ñi feypikeel ti “kim manelfal kona” pengelkey Kristo taiñ küpa kellukeetew ñi doy feyentuleal, ¿chumngechi kay?

 ¹⁴ Famülke mu ti “kim manelfal kona” yochi küme kimeltukeeiñmew (Matew 24:45, TNM). Feytachi küme kimeltun pengeli taiñ rume duamniekeetew ta Jesus. Marc niey kiñe fotüm ka küla ñawe, fey feypi: “Tati Weküfü kayñetukefi pu familia, femngechi ñi wedalkayafiel ti trawünche. Welu ngülamtungekeiñ ñi poyeafiel ta Jewba fill semana reñmawen mu. Feymu pu ngen familia kimnieiñ taiñ chem chumal: ingkañpeafiyiñ taiñ pu che”.

¹⁵ Kristo ayüniey taiñ küme feyentuleal, fey ngüneduamliyiñ chumngechi taiñ adniekeetew, kimürpuaiñ tüfa. Kiñe longkolelu Patrick pingey, feypi: “Ellaka mu, kiñeke peñi ka lamngen ayüwmakelaeyew ti trawünche ñi püntüyawal ñi amuldungual afchi semana mu”. Welu kidu feypi, tüfa pengeli Jesus ñi duamniefiel kom pu mülelu trawünche mu. Ka feypi: “Kiñeke peñi ka lamngen yewenchengey, kakelu müte tripakelafuy tañi amuldungual, welu fewla doy falilu trokiwkeyngün ka doy weniyefingün ta Jewba”.

¹⁶ Kristo ka kellukeeiñmu taiñ doyümafiel ti amuldungun, fey tüfa lle ti doy falin küdaw ñi mülen Mapu mu (papeltunge Marku 13:10). Andre we longkoley trawünche mu, afkentu eluwkey ñi inanieafiel kom ñi feypin Jewba ñi trokiñche, kidu feypi: “Ñi mülewetunon kiñeke peñi ka lamngen Fetel mu, rakiduamelkeenew taiñ mülen afaelchi antü mew ka ñi duamfalngen doyümafiel ti amuldungun küdaw”.

17, 18. ¿Chumngelu rakiduamaiñ fente ñi küme tripaken inayal tañi feypin Jewba ñi trokiñche?

¹⁷ Ti kimeltun küpalu taiñ Longko Ülmen Jesukristo, kellukeeiñmu famülke ka küpalechi antü mu. Jewba ñi trokiñche kakünukey fentren dungu, feymu eluwaiñ ñi rakiduamal chumngechi  taiñ kümelkakeetew tüfa. Poyefiliyiñ ta Jewba reñmawen mu, ngüneduamafuiñ chumngechi küme elkünungetukey taiñ trawün ka amuldungun, ka chumngechi tüfa kellukefi taiñ pu che.

¹⁸ Rakiduamaiñ fente ñi küme tripaken kom ñi feypin Jewba tañi trokiñche, femngechi küdawtulayaiñ ñi inayafiel tüfa ka doy ayüwküleaiñ. Rakiduamaiñ, famülke mu duamfalngelay ñi nentuwiringeal fentren papil ka lifru kuyfi reke, feymu ngünamkangekelay ta plata. Kafey taiñ pepilniefiel mu weke teknologia, amuldungulelkefiyiñ doy fentren che ti kümeke dungu. Eymi kay, ¿niepeafuymi may fillke papil ka lifru tami elektroniko chemkün mu müten? ¿Ngüneduampeafuymi may fillke audio ka video internet mu müten? Femngechi femliyiñ, kelluntukuafiyiñ ta Jesus, kidu ayünielu kay ñi küme amultukungeal ti wülngekeelchi plata.

19. ¿Chumngelu inayaiñ Kristo tañi feypin?

¹⁹ Inanieafiyiñ kom ñi feypin ta Kristo, femngechi kelluafiyiñ taiñ pu peñi ka lamngen ñi doy feyentuleal ka doy kiñewküleal engün. Andre ngüneduami ñi mülewetunon kiñeke peñi ka lamngen Fetel mu wall Mapu püle, kidu feypi: “Pu peñi ka lamngen feypingelu ñi elkünual Fetel, küme duam mu adkünuyngün tañi mongen. Ngüneduamal tüfa kellukeenew ñi doy maneluwal Kristo tañi Ñidolkülen mu ka doy yamniekefiñ pu mülekefulu Fetel mu. Kidu engün ayüwülkeeyew chem küdaw rume, femngechi femkeyngün Jewba tañi ayükeel”.

20, 21. 1) ¿Chumngelu maneluwafuiñ Kristo mu, iñchiñ taiñ Ñidol? 2) ¿Chem ngüneduamaiñ küpalechi chillkatun mu?

²⁰ Pichin mu müten taiñ Ñidol Jesukristo tripayay “ñi wewael”, fey femay fentren kümeke dungu (Apokalipsi 6:2; Salmo 45:4). Welu famülke mu pepikakeeiñmu taiñ mongeleal ti we Mapu mu ka taiñ femürpual kiñe falin küdaw. Üye mu kimeltuafiyiñ pu wiñomongetulu ka kelluntukuaiñ tañi küme mülewe ngetual ti Mapu.

²¹ Feymu chem dungu rupale rume maneluwaiñ Kristo mu, femngechi mülepuaiñ ti we Mapu mu. Biblia feypi: “Ngünechen fey taiñ ellkawpeyüm ka newen, kellufemkeeiñmew may müleyüm ta weñangkün” (Salmo 46:1). Welu kiñeke mu küdawtuafuiñ inayafiel weke dungu, doyelchi may kalerumetule taiñ mongen. Rupale tüfa, ¿chumngechi tüngküleafuiñ ka küme maneluwafuiñ Ngünechen mu? Küpalechi chillkatun mu ngüneduamaiñ tüfa.