1. ¿Chem falin küdaw doyümi Jesus? ¿Chumngelu (chemu)?

JESUS kiñe dewmarukafengefuy, ka rupalu chi antü küme kimeltuchefengefuy (Marku 6:3; Juan 13:13). Kom adümfi ñi femal tüfachi epu küdaw. Ñi dewmarukayal, niefuy fillke chemkün ñi kelluetew tañi femal tüfa, fey küme adümfi. Tañi kimeltucheal, fente küme kimi Chaw Dios ñi Dungu, tüfachi kimün mew kellufi pu che ñi kimal tati rüf dungu (Matew 7:28, 29; Luka 24:32, 45). Nielu 30 tripantu, fentekünuy ñi dewmarukayal, femngechi kom piwke mew eluwi ñi amuldungual tati kümeke dungu küpalu Chaw Ngünechen ñi Ngünenien mu. Kidu feypi tañi Wenu Chaw ñi werküetew tañi femal tüfa, feymu kimniefuy tüfa tati doy falin küdaw ñi femafel (Matew 20:28; Luka 3:23; 4:43). Tañi mongen mew, Jesus doyümfi amuldungual, ka ayüniefuy kakelu che ñi ka femngechi femal (Matew 9:35-38).

2. Taiñ küme küdawal kiñentrür Chaw Dios iñchiñ, ¿chem müley taiñ femal?

² Epe kom iñchiñ dewmarukakelaiñ, welu kom iñchiñ kimeltuchekeiñ tati kümeke dungu. Fente ñi falin-ngen tüfachi küdaw, Chaw Dios ka koneltukey ñi femal. Feymu, Biblia  feypi ta “kiñentrür küdawkeiñ Chaw Dios iñchiñ” (1 Korintio 3:9, TNM; 2 Korintio 6:4). Feyngey chem ñi feypiel kiñe wirintukukelu salmo: “Tami feypiel rüf dungu llemay” (Salmo 119:159, 160). Feley, Jewba ñi dungu rüf dungu tati. Feymu yafüluwkeiñ ñi ‘küme kimeltual ti werken kimelün dungu’ (papeltunge 2 Timotew 2:15). Ñi femal tüfa, eluwkeiñ taiñ doy küme adümafiel Biblia, tüfa tati doy falin kellu taiñ kimeltual ti rüf dungu Jewba mew, tañi Ngünenien ka Jesus. Kafey, taiñ doy küme kimeltucheal, Jewba ñi trokiñche elukeeiñmu fillke kellu, ka duamfalngey taiñ küme adümafiel. Tüfachi dungu müley tati “Fillke kellu taiñ kimeltucheal”.

3. 1) Pichin mu müten apümkangeay kom wedake dungu, feymu ¿chem eluwaiñ taiñ femal? 2) Ñi feypin Hecho 13:48, ¿chem che kintuafiyiñ?

³ Ramtuwafuiñ chi: “Tati Fillke kellu taiñ kimeltucheal, ¿chumngelu feypingekelay Fillke kellu taiñ amuldungucheal?”. Amuldungun mew, feypilelkefiyiñ ta kakelu che kiñe werkün dungu. Welu kimeltun mew, kellukefiyiñ pu che ñi adümafiel ti kimelün ka ñi inanieafiel tañi mongen mew. Pichin mu müten apümkangeay kom wedake dungu, feymu eluwaiñ ñi chillkatual Biblia pu che iñchiñ, ka kimeltulelafiyiñ tati rüf dungu, femngechi ñi inanieafiel ta Jesus. Feymu kom newen mu kintuafiyiñ tati pu che “eluwlu ñi rumel mongeleal”, fey kelluafiyiñ ñi poyenieafiel ta Jewba (papeltunge Hecho 13:44-47). Biblia feypi: “Allkülu tüfa pu kake tripanche, müna ayüwingün ka püramyefingün ta Jewba ñi dungu, fey kom pu eluwlu ñi rumel mongeleal feyentuyngün” (Hecho 13:48, TNM).

4. ¿Chumngechi kintuafiyiñ pu che “eluwlu ñi rumel mongeleal”?

⁴ ¿Chumngechi kintuafiyiñ pu che “eluwlu ñi rumel mongeleal”? Wünen siglo mew pu kristiano femkefuyngün tüfa amuldungun mu müten. Jesus feypifi tañi pu inanieetew: “Fey puwülmün ta eymün kiñe waria mew kam lelfün mew rume, kintuafimün kiñeke che küme piwkengelu” (Matew 10:11). Famülke mew iñchiñ ka femngechi femkeiñ. Welu allkütulayaeiñmu pu che küme piwkengenolu, mallmawkelu ka duamtukenofilu Ngünechen ñi dungu. Iñchiñ kintukefiyiñ pu che küme ka ñom piwkengelu, ka rüf ayülu kimal ti rüf dungu. Trürümafuiñ taiñ amuldungun küdaw Jesus ñi femün dewmarukakefulu. Wüne mülefuy ñi kintual küme mamüll. Fey wüla ñi dewmayal kiñe mueble, puerta kam kiñe yuku, duamniefuy ñi adümafiel fillke chemkün tañi kelluaetew ñi küdawal. Ka femngechi famülke mu, wüne kintuafiyiñ pu che küme piwkengelu ka küme adümafiyiñ taiñ fillke kellu ñi kimeltucheal, femngechi ñi kelluafiel pu che tañi disipulungerpual (Matew 28:19, 20).

5. ¿Chumal pepikangekey tati Fillke kellu taiñ kimeltucheal? Feypinge kiñe pengelün dungu (inaduamnge ti adentun ellaka mu mülelu).

⁵ Rakiduamaiñ, Jesus duamniefuy fillke chemkün ñi kelluaetew tañi dewmarukayal. Feychi chemkün dewmangey ñi amultukual kakerumechi dungu: kiñeke duamfalkey mediam, wirikünual ti mamüll, kangelu katrüam, katakünual, chumkünual rume kam trapümkünual. Ka femngechi famülke mu, tati Fillke kellu taiñ kimeltucheal pepikangey ñi kelluafiel kakerumechi dungu. Feymu ngüneduamaiñ chumngechi doy küme adümafiyiñ.

6. Eymi, ¿chumngechi wülkefimi feychi tarjeta ñi doy kimal jw.org?

⁶ Tarjeta ñi doy kimal jw.org. Tüfachi kellu pichikey, welu müna kellukeeiñmu ñi feypilelafiel pu che taiñ ineyngen, kam ñi konpual taiñ sitio internet jw.org. Feychi mu, pu che doy kimafuy iñchiñ mu ka “küpa chillkatuan Biblia” feypintukuafuy. Fantepu mew, jw.org mu doy 400.000 che feypintukuy ñi chillkatual Biblia. ¡Ka fill antü doy pataka che ka femngechi femkey! Feymu kümeafuy tami rumel yenieal kiñeke tarjeta, fey ñi nütramkayafiel pu che taiñ pefiel.

7. ¿Chumal wülkefiyiñ ti mangelün ñi amual taiñ trawün mu?

⁷ Mangelün. Tati mangelün ñi amual taiñ trawün mu feypi: “Eymi mangelküleymi tami chillkatual ti Biblia tati pu Dungukelu Iney Ngen Jewba engün”. Fey wüla feypi chumngechi femal tüfa: “Taiñ trawün mu” kam “kiñe kimeltuchekelu kelluafeymu” pi. ¿Chumal wülngekey ti mangelün? Tüfa feypilelfi tati pu che taiñ ineyngen, welu kafey, mangelkünufi pu “duamnielu ñi llowael Ngünechen ñi küme dungu” ñi chillkatual Biblia iñchiñ mu (Matew 5:3). Rüfkünu llemay, kom pu che mangelküley ñi amual taiñ trawün mu, chillkatunole rume Biblia iñchiñ mu. Trawüluwle, pu che ngüneduamay fente ñi kimafel Biblia mew.

8. ¿Chumngelu fente falin-ngey pu che ñi amual kiñechi rewall taiñ trawün mu? Feypinge kiñe rupan dungu.

⁸ Müna falin-ngey taiñ mangelafiel pu che ñi amual kiñechi rewall taiñ trawün mu. ¿Chumngelu? Amule taiñ trawün mu, ngüneduamay pu Dungukelu Iney Ngen Jewba ñi trürnon tati koylake religion, iñchiñ kimeltukeiñ ti rüf dungu mülelu Biblia mu ka kellukefiyiñ pu che ñi doy kimafiel ta Chaw Dios (Isaías 65:13). Femngechi rupay kiñe kurewen Estados Unidos mapu mew, Ray ka Linda pingey. Kidu engu feyentuyngu Chaw Dios mu, ka ayükefuyngu ñi doy küme kimafiel. Feymu ‘amuayu kom ti iglesia mülelu taiñ waria mew ka dulliayu kiñe’ piwingu. Welu feychi iglesia tañi dulliafel, mülefuy ñi femal epu dungu. ‘Ti iglesia müley tayu kimelaetew kiñe dungu, ka tati pu koneltulelu iglesia mew müley ñi küme tukutuwal, chumngechi ñi femel tati che poyekefilu ta Chaw Dios’ pi engu. Mufün tripantu mu, amuyngu kom pu iglesia waria mu mülelu, welu müna weda duamkülefuyngu, ¿chumngelu? Chem rume kimürpulay engu, ka pu koneltulelu iglesia mew weda tukutuwkefuy. Tripalu ti kiñelewechi iglesia, Linda küdawmey ka Ray wiñotuy ruka mew. Amuletulu, pey kiñe Trawünwe Ruka, fey “kümeafuy ñi konpual ka kimal ñi chumken engün” rakiduami. ¿Chum tripay tüfa? ¡Müna küme duami! Kom pu trawüluwlu kümeke chengey ka küme tukutuwkülefuy engün. Ray anükünuwi itrotripa chew ñi wewpitungen, ka müna ayüwüleyew chem ñi kimürpuel. Tüfa rakiduamelkeeiñmu chem ñi feypiel ti apostol Pablo, we trawüluwle ti che iñchiñ mu ‘rüfngey “Ngünechen ñi mülen ta eymün mew”’ pikey (1 Korintio 14:23-25). Fey mu ka müten, fill domingo Ray eluwi ñi amual trawün mu. Fey wüla amuy taiñ trawün semana mu. Linda ka eluwi ñi trawüluwal. Fey, doy  70 tripantu nielu rume, chillkatuyngu Biblia iñchiñ mew ka fawtisawingu.

9. ¿Chumngelu rume kümey tati pichike papil taiñ we nütramkayafiel pu che?

⁹ Pichike papil. Nieiñ pura pichike papil. Küdawngelay taiñ adümafiel, ka müna kellukeeiñmu ñi we nütramkayafiel kiñe che. Tüfachi pichike papil tripay 2013 tripantu, ka fantepu mu, ¡nentuwiringey doy 5.000 millon! Kom trür femngechi adküley. Feymu adümliyiñ chumngechi wülal kiñe, kom adümafiyiñ. ¿Chumngechi wülafuiñ tüfachi pichike papil ñi we nütramkayafiel kiñe che?

10. Feypinge chumngechi pengelafuymi amuldungun mew ti pichi papil ¿Chem am chi Chaw Ngünechen ñi Ngünenien?

¹⁰ Taiñ amuldungual, dulliafuiñ ti pichi papil ¿Chem am chi Chaw Ngünechen ñi Ngünenien? Fey pengelelafuiñ tati ramtun mülelu wünen pagina mew ka feypiafuiñ: “Ramtuwkeymi chi, ‘¿Chem am chi Chaw Ngünechen ñi Ngünenien?’ ¿Chem piafuymi eymi? ¿Chuchi tüfachi küla dungu dulliafuymi ñi feyngen?”. Welu feypilayafiyiñ ñi kümen kam ñi kümenon tañi wiñoldunguel, doy may inan pagina mew, pengelelafiyiñ ti trokiñ “Biblia ñi feypilen”, ka papeltuaiñ chem feypi Daniel 2:44 ka Isaías 9:6 wirikonkülelu ti papil. Epe afle taiñ nütramkan, pengelelafuiñ ti trokiñ “Ramtuwnge” mülelu furitu ti papil mew, feychi ramtun feypilu: “Chaw Ngünechen ngünenietule ti Mapu, ¿chumletuay ti mongen?”. Femngechi wiñoldunguafuiñ tüfachi ramtun wiño pemetufiliyiñ ti che. Wiño nütramkaliyiñ ti che iñchiñ, ngüneduamafuiñ ti regle kimeltun mülelu ti papil ¡Kümeke dungu küpalu Dio mew!, tüfa ka müley taiñ Fillke kellu taiñ kimeltucheal.

11. ¿Chumal adkünungey taiñ chillka, ka chem müley taiñ kimal tati chillka mew?

¹¹ Chillka. Ti Werken ka ¡Despertad! fey tati epu chillka doy rulpadungungelu ka doy wülngekelu wall Mapu mew. Fentren che papeltukey tüfachi epu chillka, feymu chem ñi nütramkael wünen pagina mew adkünungey ñi ayüfalngeal, femngechi fillke che ñi küpa papeltual. Iñchiñ müley taiñ wülal tüfachi chillka ñi kelluafiel pu che tañi doyümafiel tati doy falin dungu ñi mongen mew. Welu wüne, müley taiñ kimal iney ngealu kiduke ti chillka.

12. Ti chillka ¡Despertad!, ¿iney ngealu? ¿Chumal dewmangey?

¹² Ti chillka ¡Despertad!, ¿iney ngealu? Tati pu che pichi kimlu kam kimnolu chem no rume Biblia mew. Kimlayngün chi kristiano feyentun mew, maneluwkelay chi religion mew, kam petu kimlay chumngechi kelluafeyew Biblia ñi ngülam tañi mongen mu. ¿Chumal dewmangey tüfachi chillka? Kelluafiel ti papeltukelu ñi kimtukual ñi rüf mülen Chaw Dios (Romanu 1:20; Ebrew 11:6). Kafey küpa kellukefi ti che ñi maneluwal Biblia, “rüf dungu mew Ngünechen ñi küme dungu” tati (1 Tesalonisense 2:13). Femngechi feypingey tati küla chillka tüfachi tripantu ngealu: “El camino de la felicidad”, “12 claves para una familia feliz” ka “Ayuda para quienes están de duelo”.

13. 1) ¿Iney ngealu ti chillka Ti Werken? 2) Tami elufiel tüfachi chillka, ¿chem küme ayüwün dungu entuymi?

 ¹³ Tati chillka kom pu che ngealu Ti Werken, kimeltulelfi Biblia ñi dungu pu che yamkefilu ta Chaw Dios ka Biblia. Pichin kimniey chi Biblia mew, welu küme adümlayngün chem ñi kimeltuel (Romanu 10:2; 1 Timotew 2:3, 4). Tati küla chillka 2018 tripantu ngelu wiñoldungukey tüfachi ramtun: “¿Kellupeafeiñmu may Biblia famülke mu?”, “¿Chumlerputuay tami mongen?” ka “Chaw Dios, ¿duamniepeeymu may?”.

14. 1) Tati meli video mülelu taiñ Fillke kellu taiñ kimeltucheal, ¿chumal dewmangey? 2) Pengelelfilu tüfachi video tati pu che, ¿chem küme ayüwün dungu entuymi?

¹⁴ Video. Jesus tañi antü mu, pu dewmarukafe niekefuy kuwü mu müten küdawümchi chemkün, serrucho, barreno ka asuela reke. Welu famülke mu müley electrico chemkün: serrucho electrico, taladro ka lijadora. Ka femngechi iñchiñ, niekeiñ fillke papil, welu kafey nieiñ ayüfalchi video ñi pengelelafiel pu che amuldungun mu. Müley meli video taiñ Fillke kellu taiñ kimeltucheal: ¿Chumngelu am müley tami chillkatual ta Biblia?, Kiñe chillkatun Biblia mu, ¿chem dungu rupakey?, ¿Chumkeyngün am pu Dungukelu Iney Ngen Jewba tañi Trawünwe Ruka mu?, ka Pu Dungukelu Iney Ngen Jewba, ¿chem che ngeiñ? Wüne nütramkaliyiñ kiñe che iñchiñ, pengelelafuiñ tati video puwnolu epu minuto. Tati video doy puwalu, pengelelafuiñ wiño pemetufiliyiñ ti che kam nütramkafiliyiñ ti che nielu doy tiempo. Tüfachi kümeke kellu yafültukuafuy pu che ñi chillkatual Biblia ka trawüluwal iñchiñ mew.

15. Feypinge kiñe rupan dungu pengelkelu pu che ñi chumngentukefiel ti video kidu ñi kewün mu.

¹⁵ Ngüneduamaiñ kiñeke dungu rupalu, pengelelkeeiñmu fente ñi kellucheken ti video. Kiñe lamngen pemefi kiñe domo küpalu Micronesia mapu mew, ka yapes dungulu. Fey ti lamngen pengelelfi yapes kewün mu ti video ¿Chumngelu am müley tami chillkatual ta Biblia? We pefilu ti video, ti domo feypi: “¡Afmatulewen, iñche ñi kewün dungu tati! Ti wentru dungukey pu che reke mülelu ti wapi chew ñi tuwün iñche. ¡Kidu dungukey iñche tañi kewün!”. Fey ti domo feypi ñi papeltuafiel ka peafiel itrokom ñi mülen jw.org yapes kewün mu (ka ngüneduamafuymi Hecho 2:8, 11). Kafey ngüneduamaiñ chem ñi rupan kiñe lamngen Estados Unidos mapu mew. Tañi palu ka mapu müley, fey werkülelfi chumngechi peal feychi video tañi kewün dungu mu. Dew pefilu ti video, tañi palu mandalelfi kiñe correo electronico feypilu: “Doy afmatulenew ti trokiñ kimeltulu ñi mülen kiñe weda püllü ngüneniefilu tüfachi Mapu. Feypintukun ñi chillkatual Biblia”. Tüfa müna kümey, feychi wentru mülelu kay kiñe mapu chew katrütungekey taiñ amuldungun küdaw.

16. Feypinge chumal dewmangey ti papil: 1) Allkütufinge ta Chaw Ngünechen tami rumel mongeleal. 2) ¡Kümeke dungu küpalu Dio mew! 3) ¿Iney engün am femmekey Jewba ñi ayükeelchi dungu famülke mu?

¹⁶ Papil. Kiñe che küme kimnole ñi papeltual kidu tañi kewün mu, kam mülenole papil Biblia mew tañi kewün mu,  ¿chumngechi kimeltulelafuiñ ti rüf dungu? Eluafuiñ ti papil Allkütufinge ta Chaw Ngünechen tami rumel mongeleal * (inaduamnge ti kimal dungu). Taiñ we kimeltulelafiel Biblia ta kiñe che, müley ti papil ¡Kümeke dungu küpalu Dio mew! Pengelelafuiñ ti che tati 14 dungu furitu ti papil mülelu, ka ramtuafuiñ: “¿Chuchi doy ayüafuymi kimal?”. Fey nütramkayafiyiñ feychi kimeltun. ¿Femkeymi tüfa tami wiño pemetufiel ti che? Kangelu papil taiñ kimeltucheal fey tati feypilelu ¿Iney engün am femmekey Jewba ñi ayükeelchi dungu famülke mu? Tüfachi papil dewmangey ñi kimeltulelafiel pu chillkatukelu Biblia chumngey taiñ trokiñche. Tami kimal chumngechi kimeltucheal tüfachi papil mu, ngüneduamnge Taiñ Mongen ka Taiñ Amuldungukeel, ti papel taiñ pepikawam tripalu marzo 2017 mu.

17. 1) ¿Chumngechi kelluafi pu che tati epu lifru? 2) Tati chillkatukelu fawtisawle rume, ¿chem müley ñi femal? ¿Chumngelu?

¹⁷ Lifru. We amultukufiliyiñ kiñe papil taiñ kimeltuafiel Biblia, chumül rume amultukuafuymi ti lifru Tati Biblia ñi rüf kimeltukeel. Tüfachi lifru kelluafi pu che ñi kimal tati doy falinke kimeltun Biblia mew. Ti che afle ñi chillkatual ti lifru, ka küme amulele ñi weniyeafiel ta Jewba, ka chillkatuaiñ ti lifru “Rumel mülemün ta Ngünechen ñi piwkeyechen mew” * (inaduamnge ti kimal dungu). Tüfachi lifru kelluafi tati che ñi kimal chumngechi inayal Biblia ñi ngülam tañi mongen mew. Longkontukuaiñ, fawtisawle rume, tati che müley ñi chillkatual tüfachi epu lifru. Femngechi küme feyentuay ka nor piwkeyenieafi ta Jewba (papeltunge Kolosense 2:6, 7).

18. 1) Ñi feypin 1 Timotew 4:16, ¿chem müley taiñ femal, ka chum tripayay tüfa? 2) ¿Chem küpa femkeiñ taiñ kimeltucheal tüfachi fillke kellu mu?

¹⁸ Iñchiñ, pu Dungukelu Iney Ngen Jewba, müley taiñ kimeltulelafiel pu che “tati rüfngechi werken dungu”, femngechi pu che ñi rumel mongeleal (Kolosense 1:5; papeltunge 1 Timotew 4:16). Taiñ femal tüfa, nieiñ Fillke kellu taiñ kimeltucheal (inaduamnge ti wichulechi dungu “ Fillke kellu taiñ kimeltucheal”). Eluwaiñ taiñ doy küme adümafiel. Kiduke ta iñchiñ dulliaiñ chem kellu taiñ nütramkayafiel ta che, ka chumül doy kümeafuy taiñ femal. Welu longkontukuaiñ, re wülkelaiñ papil ka elulayafiyiñ pu che ayünolu ñi doy kimal. Doy may, küpa kellukefiyiñ ñi inanieafiel ta Jesus kom pu che küme ka ñom piwkengelu, ka rüf ayülu ñi doy kimafiel ta Chaw Dios, feychi pu che rüf “eluwlu ñi rumel mongeleal” (Hecho 13:48, TNM; Matew 28:19, 20).