1. ¿Chumleafuy ta mongen nienofuliyiñ ti Biblia?

¿CHUMLEAFUY ta mongen nienofuliyiñ ti Biblia? Nielayafuiñ kümeke ngülam taiñ küme miyawal. Kimlayafuiñ ti rüf dungu Chaw Dios mu, ti mongen ka chem ñi rupayal küpalechi antü mew. Ka kimlayafuiñ Jewba ñi femün kuyfi mu ñi kümelkayafiel pu che.

2. ¿Chem müley taiñ femal taiñ kümelkayaetew Biblia?

² Müna kümey femngechi ñi rupanon. Jewba elueiñmew ti Biblia ka feypikünuy ñi rumel müleal. Ti apostol Pedro nütrami Isaías 40:8 mu. Tüfa nütramkay Chaw Dios ñi ayükeel kom pu che mu, welu ka rakiduamelafeiñmew Biblia mu (papeltunge 1 Pedro 1:24, 25). Taiñ kümelkayaetew ti Biblia, müley taiñ papeltuafiel iñchiñ taiñ kewün dungu mew. Pu piwkeyefilu Biblia afkentu kimniefuyngün tüfa, feymu fentren tripantu mu yafüluwingün ñi rulpadunguafiel Biblia ka ñi wülafiel, küdawngefulu ka kayñetungefulu rume. Jewba “am ayünielu kom che tañi montuael ka tañi kimürpuafiel engün tati rüfngechi dungu” (1 Timotew 2:3, 4).

3. ¿Chem inaduamaiñ tüfachi chillkatun mew? (Inaduamnge ti adentun ellaka mu mülelu.)

 ³ Tüfachi chillkatun mu inaduamaiñ chumngechi montuy ti Biblia ñi apümkangenoal 1) kaletulu ti kewün dungu, 2) pu che dunguwenolu kidu ñi kewün kaletulu politiko dungu ka 3) kayñetungelu pu rulpadungukelu. Ngüneduamfiel tüfa kelluaeiñmu falintuafiel ti Biblia ka piwkeyeafiel ta Jewba, kidu am taiñ eluetew tüfa (Miqueas 4:2; Romanu 15:4).

4. 1) Ruparpulu chi antü, ¿chumngechi kaletukey ti kewün dungu? 2) ¿Chumngelu (chemu) kimnieiñ Chaw Jewba ñi dullintukenofiel kiñe kewün dungu ta kakelu mew? Kimfiel tüfa, ¿chum duamelkeeymu?

⁴ Ruparpulu chi antü ti kewün dungu kaletukey. Feymu kiñeke dungu ñi feypingeel kuyfi mu, fewla müte adümfalngelay. Femngechi rupapelay eymi tami kewün dungu mew. Ka femngechi rupay kuyfike kewün dungu mu. Famülke mu dungungekelay ebrew ka griegu kewün chumngechi ñi dungungekefel Biblia ñi antü mew. Epe kom che adümlay ti kewün dungu ñi wirintukungeel Biblia mu, feymew duamfalngey ñi rulpadungungeal. Kiñeke küpa kimürpuy kuyfi ebrew ka griegudungun ñi doy adümafiel ti Biblia, welu tüfa kellulayafeyew chi * (inaduamnge ti kimal dungu). Feymu müna mañumküleiñ ñi rulpadungungeel ti Biblia ka kiñeke trokiñ doy 3.200 kewün mu. Femngechi kimnieiñ Jewba ñi ayükeel “itrokom trokiñke mapu, ka tripanche, dungun ka trokiñche” ñi papeltuafiel ti Biblia, fey ñi kümelkaleal engün (papeltunge Apokalipsi 14:6). Kimfiel tüfa kellukeeiñmew taiñ doy fülkonal Chaw Jewba mu, kidu am piwkeyechefengelu ka dullintuchekenolu (ngümintuchekenolu) (Hecho 10:34).

5. ¿Chumngelu falin-ngefuy ti King James Version (Rey Jacobo ñi rulpadunguelchi Biblia)?

⁵ Tati kewün dungu rulpadungungelu ti Biblia ka kaletukey. Feymu we rulpadungungelu kiñe Biblia pepilfalngeafuy, welu rupalu chi antü adümfalngelayafuy. Ngüneduamafuiñ ti King James Version (Rey Jacobo ñi rulpadunguelchi Biblia), tüfa tripay 1611 tripantu mu. Fey tüfa tati doy kimngeelchi Biblia gringudungun mu. Feymu kiñeke dungu ñi feypiel tüfachi Biblia, fantepu feypikey pu che gringudungun mu. Welu tüfachi Biblia mu, pichin rupa müley Jewba ñi üy. Tati Ebrew Wirintukun mu chew ñi mülekefel Chaw Dios ñi üy, wirintukuyngün “LORD” (Ñidol) fütrake letra mu. Fey wüla, ka femngechi femingün kiñeke versikulo mew ti Griegu Wirintukun mu. Femngechi tüfachi Biblia pengeli chew ñi müleafel Chaw Dios ñi üy ti Griegu Wirintukun mu, Nuevo Testamento ka feypingelu.

6. ¿Chumngelu mañumküleiñ ñi rulpadungungeel ti Traducción del Nuevo Mundo?

⁶ Fentren tripantu rupalu, pu che dunguwelay chumngechi ñi wirintukungeel ti King James Version (Rey Jacobo ñi rulpadunguelchi Biblia). Ka femngechi rupay fillke rulpadungungeelchi Biblia mu kakelu kewün mu. Feymu müna mañumküleiñ ñi rulpadungungeel  ti Traducción del Nuevo Mundo de las Santas Escrituras fillke kewün dungu mew. Tüfachi Biblia kam kiñeke trokiñ rulpadungungey doy 150 kewün mu. Feymu epe kom che wall Mapu mu papeltuafuy ti Biblia kidu ñi kewün mu. Tüfa rulpadungungey chumngechi ñi dunguken pu che famülke mu, ka kimfalngey, feymu puwkey piwke mu (Salmo 119:97). Kafey wiño tukungetuy Jewba ñi üy chew ñi mülemum kuyfike wirin chillka mew, tüfa doy falin-ngey.

7. Tati külangechi siglo petu ñi mülenon Jesus, ¿chumngelu fentren judiu müte adümlafingün tati Ebrew Wirintukun?

⁷ Ti rupaelchi politiko dungu mu, kiñeke mu fentren che dunguwelay kidu ñi kewün, fey kiñe we kewün dungu nietuy. Welu Jewba adkünuy pu che ñi nieal kiñe Biblia tañi adümafiel. Rakiduamnge tüfa, tati wünenke 39 lifru Biblia mu wirintukungey ebrew ka arameo kewün mu ti pu judiu ñi papeltuafiel. Kidu engün wüne llowingün Chaw Ngünechen “ñi ley dungu” (Romanu 3:1, 2). Welu tati külangechi siglo petu ñi mülenon Jesus, fentren judiu kim ebrewdunguwelay. ¿Chumngelu? Kiñe wentru ngünenielu Grecia mu, Alejandro Magno pingelu, nüfi fentren trokiñke mapu, fey pu griegu ñi ngünenien puwi fillke mapu mu. Chem trokiñke mapu ñi ngünenieel pu griegu, tati pu che dungurpuyngün griegu kewün ka dunguwelayngün kidu ñi kewün (Daniel 8:5-7, 20, 21). Feymu fentren judiu dungukefuyngün griegu kewün müten, ka müte adümlafingün Biblia ebrew kewün mu. Fey, ¿chem rupay?

8. ¿Chem am tati Septuaginta?

⁸ Tati wünenke kechu lifru Biblia mu rulpadungungey griegu kewün mew, 250 tripantu püle petu ñi mülenon Jesus. Fey wüla, kom tati Ebrew Wirintukun rulpadungungey griegu kewün mu. Turpu rulpadungungelafuy kom ti Ebrew Wirintukun. Fey Septuaginta pingetuy tüfachi rulpadungungeelchi Ebrew Wirintukun griegu kewün mu.

9. 1) Ti Septuaginta ka kakelu rulpadungungeelchi Biblia, ¿chumngechi kellukefi pu papeltufilu Biblia? 2) ¿Chem trokiñ ti Ebrew Wirintukun mu doy ayükefimi?

⁹ Pu judiu griegudungukelu papeltukefuyngün ti Septuaginta, femngechi adümfingün ti Ebrew Wirintukun. ¿Rakiduamafuymi tunte ñi ayüwkülen engün allkütulu ka papeltufilu Chaw Dios ñi Dungu kidu ñi kewün mu? Rupalu chi antü tati Biblia kam kiñeke trokiñ rulpadungungey kakelu kewün mu ñi dunguken pu che, kiñeke tüfa ta siriaco, gotico ka latin. Feymu doy fentren che papeltufilu ka adümfilu ti Biblia, piwkeyerpufingün. Fey niepelafuyngün kiñeke versikulo ñi doy ayüwülkeetew, iñchiñ reke famülke mu. Feley llemay, pu che dunguwenolu rume ti kewün dungu ñi wirintukungeel ti Biblia, tüfa apümkangelay. Biblia feypi: “Iñche ayüwken tami feypin mu, kiñe che reke nüfilu fentren falinke chemkün. Iñche üdekefiñ ti koyla dungu, ünufalniefiñ, welu piwkeyeniefiñ tami ley. Regle rupa ti antü mew püramyekeeyu, eymi am jusgachekelu nor dungu mu. Fentren  tüngün nieyngün tati pu piwkeyekefilu tami ley; ka chem no rume welulkalayafeyew” (Salmo 119:162-165).

10. John Wyclef ñi antü mew, ¿chumngelu tati pu che pepi papeltukelafuy Biblia?

¹⁰ Rupalu ti tripantu, fentren che nielu awtoridad küpa katrütufi pu che ñi papeltunoafiel Biblia. Welu kiñeke wentru yamkefilu ta Chaw Ngünechen müna küdawkefuyngün ñi kelluafiel pu che tañi papeltuafiel Biblia kidu ñi kewün mu. Kiñe tüfa John Wyclef, kidu mülefuy Inglaterra mu 600 tripantu püle kuyfi mu. Kidu ayükefuy kom pu che ñi papeltuafiel Biblia. Welu kidu ñi antü mew, epe kom pu che Inglaterra mu allkütulafuy Chaw Dios ñi Dungu kidu ñi kewün mu. Rume falifuy ngillayal kiñe Biblia, ngenolu am makina ñi entuwiringeal lifru. Feymu, pichin che müten niefuy kiñe Biblia. Kafey epe kom pu che kim papeltulafuyngün rume. Ka ti iglesia mu papeltungekefuy ti Biblia latin kewün mu, welu pu che adümlafuy feychi kewün dungu. Feymu, ¿chem chumi Jewba tati pu che ñi papeltuafiel Biblia kidu ñi kewün mu? (Proverbios 2:1-5.)

11. ¿Chem rupay Wyclef rulpadungufilu ti Biblia?

¹¹ John Wyclef ka kakelu wentru eluwingün ñi rulpadunguafiel ti Biblia gringudungun mu 1382 tripantu mu. Pu inakefilu ta Wyclef müna falintufingün ñi rulpadunguelchi Biblia. Kidu engün piwkeyekefingün Chaw Dios ñi Dungu. Feymu namuntu amukefuyngün fillke lof mu kom Inglaterra püle, fey papeltulelkefingün Biblia tati pu che ka elukefingün kiñeke trokiñ kidu engün ñi wirintukuel. Ñi femün mu engün, tati Biblia wiño falintungekefuy.

12. Pu longkolelu ti Iglesia Catolica mu, ¿chem chumingün Wyclef ñi küdaw mu?

¹² Pu longkolelu ti Iglesia Catolica mu üdefingün ta Wyclef, tañi rulpadunguelchi Biblia ka tañi pu inanieetew. Feymu kayñetufingün pu inakefilu ta Wyclef ka apümfingün kom tañi rulpadunguelchi Biblia ñi pefiel engün. Dew lalu rume Wyclef, dalluntukuyngün kidu ñi kayñetufiel Iglesia Catolica. Fey rüngalentufingün  ñi foro, lüpümfingün ka ütrüfentufingün ñi trufken Swift lewfü mu. Welu chem femlu rume pu longkolelu ti Iglesia mew, katrütulafingün pu che tañi papeltufiel ka adümfiel Biblia. Feymu fentren tripantu rupalu, tati pu che fillke trokiñke mapu mew eluwi ñi rulpadunguafiel ka entuwiriafiel ti Biblia fillke kewün dungu mew pu che ñi adümkefiel.

13. 1) ¿Chem kimkeiñ Jewba ñi Dungu mu? 2) ¿Chem mu maneluwkeiñ?

¹³ Tati Biblia wirintukungey Chaw Ngünechen tañi adkünuel mew. Welu ti Septuaginta, Wyclef ñi rulpadunguelchi Biblia ka kakelu Biblia rulpadungungelu adkünungelay Chaw Ngünechen ñi newen mew. Welu ngüneduamfiel kom ñi rupan tañi rulpadungungeel ti Biblia, kimkeiñ ñi femürpuken Jewba ñi feypikünun tañi rumel müleal ñi Dungu. Tüfa kellukeeiñmew ñi maneluwal Jewba mew ñi femtripayal kom tañi feypikünun (Josué 23:14).

14. Ngüneduamfiliyiñ ti Biblia, ¿chumngelu doy piwkeyeafiyiñ ta Jewba?

¹⁴ Ngüneduamliyiñ Jewba ñi femün tañi rumel müleal ñi Dungu, doy maneluwaiñ kidu mew, ka doy piwkeyeafiyiñ * (inaduamnge ti kimal dungu). Jewba, ¿chumngelu elueiñmew ti Biblia ka feypikünuy ñi apümkangenoal? Kidu am taiñ piwkeyeetew ka küpa kimeltukeeiñmew taiñ kümelkaleal. Biblia feypi: “Tüfa ñi feypiel ta Jewba, tami Montuletew, tati Lifngelu Israel mew: ‘Iñche, ta Jewba, tami Ngünechen, Tami Kimeltukeetew eymi tami kümelkaleal, Tami Nguyulkeetew chem rüpü mew tami miyawal. ¡Ngüneduamniefulmi iñche tañi werkün dungu! Fey tami tüngün kiñe lewfü reke feleay, ka tami nor dungu tati lafken ñi rew reke feleay’” (Isaías 48:17, 18). Tüfa yafültukukeeiñmew taiñ piwkeyeafiel ka allkütuafiel ta Jewba (1 Juan 4:19; 5:3).

15. ¿Chem inaduamaiñ küpalechi chillkatun mew?

¹⁵ Müna piwkeyefiyiñ ti Biblia, feymu ¿chumngechi doy kümelkayafeiñmu taiñ papeltufiel? Amuldungun mu, ¿chumngechi kelluafuiñ pu che ñi doy falintuafiel Biblia? Ka tati pu kimeltukelu trawünche mew, ¿chumngechi kimeltuayngün Biblia ñi feypin müten? Tüfachi ramtun inaduamafiyiñ küpalechi chillkatun mew.