KÜPA kimfulmi chem orangen, ¿chem chumafuymi? Lelipelayafuymi kiñe reloj, ¿felelay? Rakiduamnge tüfa: dew rupay kiñe ora ka küla mari minuto rangiantü mew. Fey kiñe che “¿chem oray am chi?” pielmu. ¿Chem wiñoldunguafuymi kay?

Fillke lof mu kakerumey pu che ñi wiñoldungukeel. Kiñeke che feypikey: “Kiñe ora ka rangiñ nagchi rupan antü”, kakelu “kiñe ora ka küla mari minuto” pikey. Ka kiñeke che wingkadungun mu wiñoldungukeyngün: “Una y media” pikey.

¿Fütra kuyfi mu kay? Pu che, ¿chumngechi medikefuy antü? Ka femngechi kakerumekefuy chumngechi ñi mediantüken engün. Tati Ebrew Wirintukun pengeli pu che ñi feypikefel, fey tüfa ta kiñeke: “Puliwentu”, “rangiantüle”, “dewma ñi dumiñael” ka “rangi punlu” (Génesis 8:11; 19:27; 43:16; Rut 3:8). Welu kiñeke nütram mu, Biblia doy küme kimfalkünukey chem orangen.

Pu kuyfike israelche wüdamkefuy küla trokiñ mu ti pun. Welu mülepalu wüla Jesus Mapu mew, pu judiu inaniekefuy chumngechi ñi mediantükefel pu griego ka romache, fey wüdamkefuy meli trokiñ mu tati pun.

Tüfachi meli trokiñ fentren rupa müley ti meli lifru evangelio mu. Ti lifru Matew feypi: “Fey epe wünlu [tüfa tati meli trokiñ tañi wüdamngekeel pun], Jesus trekalen amuley wente ko”, fey fülkontupufi tañi pu disipulu ñi farku mew (Matew 14:25).

Kafey Jesus feypifi tañi pu inanieetew: “Trepeluwküleaymün, kimnolu am eymün chumül akualu tati ngen ruka, dew konle ti antü chi, rangi punle, doy rangi punle kam epe wünle chi”, fey tañi feypin pengeli tati pun ñi wüdamngekefel meli trokiñ mew (Marku 13:35, TNM, nota). Ti wünen tüfachi meli trokiñ, medingekefuy konlu ti antü puwlu ta aylla ora peno, fey tüfachi trokiñ ‘konlu ti antü’ pieyew Jesus. Ti epu trokiñ medingekefuy aylla ora peno puwlu ta rangi pun mu, fey tüfachi trokiñ ‘rangi pun’ pieyew Jesus. Ti küla trokiñ medingekefuy rangi pun mew puwlu ta küla ora peno petu ñi wün-non, fey tüfachi trokiñ ‘doy rangi pun’ pieyew Jesus. Tañi feypin “kakarale ti alka” ka rulpadungungekey. Tüfachi ora püle kakarapelay ti alka feychi pun tañi püresuntukungen ta Jesus (Marku 14:72). Ti meli trokiñ medingekefuy küla ora peno puwlu wünlu mew, fey tüfachi trokiñ ‘epe wünlu’ pieyew Jesus.

Fey pu kuyfike che nienolu rume ta reloj, ka medikefuyngün ti antü.