1, 2. 1) ¿Chumngelu (chemu) “weda dungu” feypingelayafuy ti Armagedon? 2) ¿Chem ramtun inaduamaiñ tüfachi chillkatun mew?

FENTREN che allküfiel mu “Armagedon”, “weda dungu” pikey. Kiñeke che rakiduamkeyngün Armagedon fey ta kiñe fütra weychan (awkan) bomba mew ñi apümkangeam ti Mapu. Kakelu che rakiduamkey kidutu ñi afal tati Mapu fente taiñ wedalkafiel, “fey ta Armagedon” pikeyngün. Welu Biblia kimeltukey ñi müleal kiñe fütra weychan Armagedon pingelu, tüfa mew müleay fentren kümeke dungu taiñ ayüwülaetew (Apok. 1:⁠3). Armagedon mew apümngelayay pu che, doy may montulngeay, ¿chumngechi?

² Biblia feypi ñi apümngeal tati pu gobierno ka tati pu wedake che, ka ñi montulngeal pu nor che müten Armagedon weychan mew. Kafey apümkangeayngün pu üñfitukefilu ti Mapu (Apok. 11:⁠18). Taiñ küme adümafiel tüfachi kimeltun inaduamaiñ meli ramtun: ¿Chem am tati Armagedon? ¿Chem rupayay pichilewele ñi akual ta Armagedon? ¿Chem femafuiñ taiñ montual akule Armagedon? Ka, ¿chem femafuiñ taiñ püntütripanoal Jewba mu petu ñi akunon?

3. 1) ¿Chem pin ta Armagedon? 2) Apokalipsi 16:⁠14, 16 mu, ¿chumngechi kimafuiñ ta Armagedon kiñe mülewe no?

³ (Papeltunge Apokalipsi 16:⁠14, 16). Ti feypin Armagedon kiñe rupa müten tripay Biblia mu, tüfa tuwi kiñe feypin ebrew kewün mu feypilelu “Meguido Wingkul”. Meguido fey ta kiñe kuyfi waria mülekefulu Israel mu (Jos. 17:⁠11). Welu Armagedon kiñe mülewe no tati. Doy may femngechi üytukulelngey feychi antü ñi trawüluwal “itrokom mapu mülechi pu longkolelu” ñi weychayafiel ta Chaw Ngünechen Jewba (Apok. 16:⁠14). Welu tüfachi chillkatun mu, ka feypiafiyiñ Armagedon feychi fütra weychan ñi müleal dew trawüluwle itrokom mapu mülechi  pu longkolelu. ¿Chumngechi kimafuiñ ta Armagedon kiñe mülewe no? Turpu mülekelay kiñe wingkul no rume Meguido pingelu. Kafey chew ñi mülen ta Meguido waria rume pichi, feymu konpulayafuy “itrokom mapu mülechi pu longkolelu”, tañi pu weychafe ka kom tañi pu weychawe. Kafey pu longkolelu Mapu mu weychafile Chaw Ngünechen tañi pu che, konay ta Armagedon weychan. Welu Chaw Dios tañi pu che wall Mapu püle müley, feymu tüfachi weychan rupalayafuy kiñe mülewe mew müten. Tüfachi chillkatun mu doy ngüneduamaiñ feychi dungu.

4. Chaw Jewba, ¿chumngelu Armagedon tukulelfi tañi fütra weychan?

⁴ Feley llemay, ti üy Armagedon nüwküley ta Meguido waria. ¿Chumngelu Jewba femngechi üytukulelfi tañi fütra weychan? Kuyfi mu, Meguido mapu mu fentren weychan femngekefuy, ka femngechi felekefuy ti fülkülechi laf mapu Jezreel pingelu. Kiñeke mu, Chaw Jewba kellufi tañi pu che ñi wewafiel ti weychan üye mu. Kiñe rupa, pu israelche weychawi tati pu kanaanche engün kiñe wütrunko mew fülmaniefilu ta Meguido. Barak longkolefuy pu israelche mu ka Sisara longkolefuy pu kanaanche mew. Feychi mu Jewba kellufi pu israelche tañi wewtripayal. Barak ka ti pelon domo Debora pingelu entuy kiñe ül tañi mañumtuafiel ta Jewba. Famngechi ülkantuyngu: “Wenu mapu mew pu wangülen [...] weychafingün ta Sisara. Ti Cison wütrunko apümkafi engün” (Juec. 5:⁠19-21).

5. ¿Chumngelu Armagedon weychan trürlayay ta Barak ñi weychan mu?

⁵ Barak ka Debora famngechi dewmayngu tañi ül: “Lape kom tami pu kayñe, awem Jewba, welu tami pu piwkeyeetew felepe ti antü reke püralu ñi afmatufalngen mu” (Juec. 5:⁠31). Barak ñi weychan mu, Jewba ñi pu kayñe layngün, welu montuyngün tañi pu poyekeetew. Ka femngechi rupayay Armagedon weychan mu. Welu trürlayay tüfachi weychan mu, ¿chumngelu? Barak ñi weychan mu, Chaw Dios tañi pu che duamniefuyngün ñi weychayal tañi montual. Welu Armagedon mu, Chaw Dios tañi pu che duamnielayayngün ñi weychayal ka ingkañpewnoal rume. Doy may tüngküleayngün, maneluwayngün Jewba mu ka tañi pu kümeke püllü ñi weychayal. Femngechi Jewba ñi pu che newen piwkekünuway (Is. 30:⁠15; Apok. 19:⁠11-15).

6. Jewba, ¿chem dungu femafuy tañi apümkayafiel tañi pu kayñe?

⁶ Jewba, ¿chumngechi apümkayafi tañi pu kayñe? Kakerume dungu femafuy. Chaw Dios ta püneafuy fütrake nüyün, tati pire (llay), tralkan ka tati llüfkeñ ñi apümafiel tañi pu kayñe (Job 38:⁠22, 23; Ezeq. 38:⁠19-22). Kafey welurakiduamelafuy tañi pu kayñe, fey ñi welukontu weychawal engün (2 Crón. 20:⁠17, 22, 23). Werküafuy pu kümeke püllü ñi langümafiel pu wedake che (Is. 37:⁠36). Chem dungu rume femle Jewba, kidu ta weway llemay. Kom tañi pu kayñe apümkangeayngün, welu tañi pu poyekeetew montuayngün (Prov. 3:⁠25, 26).

7, 8. 1) Ñi feypilen 1 Tesalonisense 5:⁠3, ¿chem feypiayngün Mapu mew müleyechi pu longkolelu? 2) Feychi dungu ñi feypingeal, ¿chumngelu fey ta kiñe fütra ngünenkan?

⁷ ¿Chem pin “Jewba ñi antü” tripalu 1 Tesalonisense 5:⁠2 mu? * Tüfa tati “fütra kutrankawün” (Apok. 7:⁠14). Pichilewele ñi akual ti fütra kutrankawün, ¿chem dungu rupayay? Biblia kimeleiñmu petu ñi akunon “Jewba ñi antü”, Mapu mew müleyechi pu longkolelu feypiayngün: “Kom kümelkaley. Ngelay chem dungu rume” (papeltunge 1 Tesalonisense 5:⁠3).

⁸ ¿Chumngelu feypingeay tüfa? Küme kimlaiñ. Pu longkolechi religioso, ¿ka femngechi  feypipeayngün may? Femkayafuy chi. Welu tüfa re ngünenkan tati, küpayalu pu weküfü mu. Femngechi rakiduamelafingün ta che ñi rupanoal chem weda dungu no rume, welu pichileweay ñi akual Jewba tañi antü. “Femngechi küparumeay kisu engün mew tati apümkangen, chumngechi akukey ñi kutran kiñe püñeñachi domo”. Welu Jewba tañi pu poyekeetew kay, ¿chumayngün? Küme pepikawküleayngün, welu afmatuafuyngün kimkenofulu kay chumül ñi akual ti fütra kutrankawün.

9. Jewba, ¿chumngechi apümafi ñi ngünenieel Satana?

⁹ Jewba kom apümfemlayafi tañi ngünenieel Satana, chumngechi ñi femün kuyfi Noe ñi antü mew. Doy may wüne apümafi tati Fütra Babilonia, tüfa ta kom koylake religion ñi mülen Mapu mew. Fey wüla, Jewba apümkayafi tati politiko dungu, negosian dungu ka fillke trokiñ weychafe. Kom tüfa apümkangeay akule ta Armagedon. Fewla ngüneduamaiñ chumngelu apümkangeayngün ka chumngechi femngeay.

10. Apokalipsi 17:⁠1, 6 ka 18:⁠24 ñi feypilen, ¿chumngelu Chaw Jewba apümkayafi tati koylake religion?

¹⁰ Ramtukadungungeay tati koylake religion (papeltunge Apokalipsi 17:⁠1, 6; 18:⁠24). Tati koylake religion weda dunguyefi ta Chaw Dios. ¿Chumngelu? Kimeltuchekey koylake dungu Chaw Ngünechen mu. Ka nor poyekelafingün ta Chaw Dios, doy may kelluntukukefingün fillke gobierno Mapu mew mülelu. Kafey tati koylake religion tañi awtoridadkülen mu wedalkakefingün ta che ka müntuñmakefingün tañi plata. Langümkefingün fentren che, kiñeke tüfa poyekefuyngün ta Chaw Jewba (Apok. 19:⁠2). Chaw Dios, ¿chumngechi apümkayafi tati koylake religion?

11. 1) ¿Chem am tati “kelü fütra kulliñ”? 2) ¿Chumngechi apümkangeay tati koylake religion?

¹¹ Jewba tañi pin mu, kiñe “kelü fütra kulliñ” nielu “mari müta” apümkayafi tati koylake religion. ¿Chem am ta tüfa? Feychi “kelü fütra kulliñ” adentuley tati trokiñche Naciones Unidas pingelu ka tati “mari müta” adentuley fillke gobierno kellukefilu feychi trokiñche. Kom feychi gobierno kayñetuafi tati koylake religion, müntuñmayafi kom tañi nieel ka pengelkünuay tañi fente wedañmangen, femngechi “apümkayafi ka triltrangkülen kisukünutuafi” reke. Jewba ta dulliay chem antü ñi femngeal tüfa (Apok. 17:⁠3, 16). Matu apümkangeay,  “kiñe antü mew” reke rupayay. Tati koylake religion feypikey: “Anülen ta tüfa mew kiñe longko ülmen domo reke. Lantu domo no ta iñche, ka kutrankawlayan rume”. Feymu tañi pu kellukeetew afmatuleweayngün inaduamle tañi apümkangen (Apok. 18:⁠7, 8).

12. Jewba, ¿chem katrütuafi ñi femnoal tati pu gobierno? Ka, ¿chumngelu femay tüfa?

¹² Chaw Jewba tañi pu che ayüwünkechi yeniey tañi üy ka püntütripayngün koylake religion mu, feymu Chaw Jewba katrütuafi tati pu gobierno ñi apümkanoaetew engün (Hecho 15:⁠16, 17; Apok. 18:⁠4). Kafey Chaw Ngünechen tañi pu che kellukefi ta kakelu che ñi püntütripayal tati koylake religion mu, feymu Jewba tañi pu che ingkañpengeay apümkangele tati koylake religion. Welu ka duamfalngeay ñi küme maneluwal engün Jewba mu.

13. 1) ¿Chem am ta Gog? 2) Ezequiel 38:⁠2, 8, 9 ñi feypilen, ¿chumül puway Armagedon weychan?

¹³ Gog lefkontuafi Jewba ñi pu che. Biblia feypi: “Eymi wentru ñi küpanche, leliwülfinge ta Gog tuwlu Magog mapu mu, kidu ta longkoley Mesec ka Tubal mew. Feypiafimi chem weda dungu ñi kontuaetew” (Ezequiel 38:⁠2). Fey Jewba werküfi ta Esekiel ñi feypiafiel ta Gog: “Fentren antü rupale, iñche ngüneduamaeyu. Afaelchi tripantu mu, notukayaymi ti mapu chew ñi mülen pu che allfülefulu engün fütra kuchillu mu. Feychi pu che trapümngey fentren trokiñ mapu mew ka yengeyngün Israel wingkul mew. Tüfachi wingkul fentren tripantu mew ñi wedalkangeel. Feychi pu che fentren trokiñ mapu mew ñi mülefel engün elungey ñi wiñotual engün, fey kom engün küme feleyngün. Chaftuafimi engün fütra kürüftuku reke, ka takuafimi ti mapu tromü reke. Femaymi kom tami pu weychafe ka fentren trokiñche eymün” (Ezequiel 38:⁠8, 9). Dew apümkangele kom ti koylake religion, pu poyekefilu ta Jewba müten müleweay. Fey Weküfü pofo illkuay, feymu adkünuay ñi weda dunguyengeal Ngünechen tañi pu che. Femngechi kiñe trokiñke gobierno kiñewkülealu allküle tüfachi koylake feypin wedake püllü mu küpalu, lefkontuafi Ngünechen tañi pu che (Apok. 16:⁠13, 14, TNM). Tüfachi trokiñke gobierno kiñewkülealu, “Gog tuwlu Magog mapu mu” pingey Biblia mew. Feychi trokiñke gobierno kiñewkülealu lefkontufile Jewba tañi pu che, puway ta Armagedon weychan (Apok. 16:⁠16).

14. ¿Chem ngüneduamay Gog?

 ¹⁴ Gog maneluway tañi pu weychafe mu (2 Crón. 32:⁠8). Welu iñchiñ maneluwaiñ taiñ Fütra Chaw Jewba mu. Wedwedkülelu trokiaeiñmu pu gobierno. ¿Chumngelu? Tati koylake religion rume newen-ngefuy, welu tañi pu dios montul-layaeyew ñi apümkanoaetew tati “wapo wesa kulliñ” ka tañi “mari müta” ngelu (Apok. 17:⁠16). Feymu Gog “küdawngelay tami wewafiel” piafi ta Ngünechen tañi pu che. Fey “tromü reke takumekefilu ta mapu”, fentren ngeay ti trokiñ weychafe ñi lefkontuafiel Jewba tañi pu che (Ezeq. 38:⁠16). Welu Gog kimtukuay tañi apümngeal ka ngüneduamay ñi weychamekefiel ta Jewba, chumngechi ñi ngüneduamün kuyfi ta Faraon ti Kelü Lafken mew (Éx. 14:⁠1-4; Ezeq. 38:⁠3, 4, 18, 21-23).

15. ¿Chumay Jesus Armagedon weychan mew?

¹⁵ Chumngechi ngüneduamiyiñ Jewba tañi doy fütra kayñe, Satana, adkünuay pu gobierno ñi kayñetuafiel Ngünechen tañi pu che Armagedon weychan mu. Welu Kristo ka tañi pu kümeke püllü ingkañpeafi Jewba tañi pu che ka apümkayafi Gog tañi pu weychafe (Apok. 19:⁠11, 14, 15). Fey Jesus ütrüftukuafi tati Weküfü tañi wedake püllü engün ti fütra dumiñ rüngan mew, warangka tripantu mu rakümküleayngün (Apok. 20:⁠1-3).

16. 1) ¿Chumngechi pengelafuiñ taiñ kimniefiel ta Jewba? 2) Pu kimniefilu ta Jewba, ¿chumngechi kümelkangeay Armagedon mu?

¹⁶ Tunten tripantu yenieliyiñ rume Jewba tañi trokiñche mu, duamfali pengelal taiñ kimniefiel ta Chaw Dios ka allkütuafiel “taiñ Ñidol Jesus ñi werken montuluwün dungu”, femngechi taiñ montual Armagedon mu (2 Tes. 1:⁠7-9). Kimniefiliyiñ ta Chaw Dios, kimaiñ chem tañi ayükeel ka tañi ayükenoel ka kimaiñ tañi ngülam. Welu, ¿chumngechi pengelafuiñ taiñ kimniefiel ta Jewba? Piwkeyeafiyiñ ta Jewba, allkütuafiyiñ ka kidu müten poyeafiyiñ (1 Juan 2:⁠3-5; 5:⁠3). Femngechi femliyiñ Jewba ‘küme kimnieaeiñmu’ iñchiñ, weniyeaeiñmu (1 Kor. 8:⁠3). Feymu montulaeiñmu Armagedon weychan mew.

17. ¿Chem femkeiñ allkütufiel mu “taiñ Ñidol Jesus ñi werken montuluwün dungu”?

¹⁷ ¿Chem am “taiñ Ñidol Jesus ñi werken montuluwün dungu”? Tüfa kom ñi kimeltuel Jesus  mülelu Biblia mu. ¿Chem femkeiñ allkütufiel mu Jesus ñi kimeltun? Inakefiyiñ taiñ mongen mu. Feymu doyümkefiyiñ Jewba tañi dungu, yenieiñ taiñ mongen chumngechi ñi ayükeel ta kidu ka amuldunguchekeiñ tati kümeke dungu (Mat. 6:⁠33; 24:⁠14). Femngechi kelluntukukefiyiñ ñi femken falinke küdaw pu dullingelu ñi amual wenu mu (Mat. 25:⁠31-40).

18. Pu dullingelu mületule engün wenu mu, ¿chumngechi füreneafi tati “kakelu ufisa”?

¹⁸ Pichin mu pu dullingelu füreneafi tati “kakelu ufisa” tañi kelluetew mu (Juan 10:⁠16). ¿Chumngechi füreneafi tati “kakelu ufisa”? Petu ñi puwnon Armagedon weychan, pu dullin kristiano petu mülewelu Mapu mu mülepuayngün wenu mu ka lakenochi püllü ngetuayngün. Pu kümeke püllü ka kom tati 144.000 dullin kristiano weychayafingün ta Gog ka apümkayafingün, femngechi ingkañpeafi “fentren pu che” poyekefilu ta Jewba, ufisa reke felelu (Apok. 2:⁠26-28; 7:⁠9, 10). Rume ayüway kom feychi pu che tañi kellufiel mu pu dullingelu mülekefulu Mapu mu.

19, 20. Kontupaeliyiñmu rume wedake dungu, ¿chem kelluaeiñmu taiñ püntütripanoal Jewba mu?

¹⁹ Afaelchi antü mew müleiñ, feymu kontupakeeiñmu fentren wedake dungu, welu ayüwün mu newenküleafuiñ (Sant. 1:⁠2-4). ¿Chem kelluaeiñmu taiñ newenküleal? Rumel ngillatunieafiyiñ ta Chaw Jewba (Luka 21:⁠36). Fill antü papeltuaiñ Biblia ka rakiduamaiñ taiñ papeltukeel mu, chillkatuafuiñ chem pelon dungu femtripamekey famülke mu (Sal. 77:⁠12). Kafey kom taiñ newen mu amuldungucheaiñ. Femliyiñ kom tüfachi dungu, amuleay taiñ feyentulen ka maneluwkülen Chaw Jewba mu.

²⁰ Apümkangele tati koylake religion ka dew rupale Armagedon weychan, rumeñma ayüwküleaiñ, ¿felelay am? Kafey rume ayüwküleaiñ kom pu che yamniefile ta Jewba ka tañi ngünenieel (Ezeq. 38:⁠23). Feymu llemay pu kimniefilu ta Chaw Ngünechen, ka püntütripanolu kidu mu ka allkütufilu ta Jesus rume ayüniey ñi akual ta Armagedon (Mat. 24:⁠13).