Chaw Dios, ¿chemu allkütulayafuy ñi llellipuel kiñe che?
Rüf piwke mew llellipufiliyiñ taiñ Wenu Chaw, kidu allkütuaeiñmu. Welu Chaw Dios kom che wiñoldungukelafi tañi llellipukeel, ¿chumngelu am? Ngüneduamaiñ kiñeke ngülam mülelu Biblia mu.
“Ngillatulmün ka wiñome feypikefilmün tamün dew ngillatuelchi dungu” (Matew 6:7).
Kuñiwtukuwnoliyiñ, fill antü femngechi dungu müten ngillatuafuiñ ta Chaw Dios, kam re papeltuafuiñ müten taiñ ngillatukefiel. Chaw Dios ayükelay taiñ femngechi femal, doy may ayükey taiñ kom piwke mu nütramkalelafiel. Rakiduamnge tüfa: kiñe tami weni fill antü femngechi dungu müten nütramkaelmu, ¿ayüafuymi tañi femngechi femün tami weni? ¡Femlayafuymi! Pu kümeke weni femngechi femkelayngün. ¿Chem kimeltueiñmu tüfa? “Weniyefiñ ta Jewba” piliyiñ, kom piwke mu ngillatuafiyiñ.
‘Ngillatufulmün, welu llowkelaymün, küme ngillatukelaymün’ (Santiaw 4:3).
Ngillatufiliyiñ ta Chaw Dios taiñ kelluaetew femal kidu ñi ayükenoel, ¿allkütupeafeiñmu? ¡Femlayafuy! Rakiduamnge tüfa: kiñe che femngechi ngillatufile ta Chaw Dios: “¡Kelluen! ¡Eluen suerte tañi wewal fentren plata!”, ¿allkütupeafuy may Chaw Dios? Femlayafuy. Chaw Dios ayükelay taiñ diñmatual ta plata kam feyentual tati suerte kam kakelu femngechi dungu mew (Isaías 65:11; Luka 12:15). Feymu llemay, chem taiñ ngillatukeel nüwkülepe Jewba tañi ayükeel mew. ¿Chumngechi kimafuiñ ñi ayükeel ta Chaw Dios? Biblia mew kimürpuafuiñ.
‘Küme kimnieiñ Ngünechen tañi allkütukenofiel tati pu culpafe’ (Juan 9:31).
Biblia feypi, kuyfi mew feyti pu che inakenolu Chaw Jewba tañi feypin, kidu allkütukelaeyew (Isaías 1:15, 16). Fantepu mew, Chaw Jewba kaletukelay tañi rakiduam (Malaquías 3:6). Feley llemay, inaliyiñ Chaw Jewba tañi feypin, kidu allkütuaeiñmu taiñ llellipun. Welu iñchiñ feypiafuiñ: “Fentren wedake dungu femkefun kuyfi, fey Ngünechen turpu allkütulayaenew”. ¿Rüfngepey may tüfa? Femlay tati. Rüf arrepentiuküleliyiñ ka eluwküleliyiñ taiñ ayüwülafiel, kidu perdonayaeiñmu ka allkütuaeiñmu (Hecho 3:19).
