“Eymi Allkütukelu tati llellipun, eymi mu küpayay fillke tuwün-ngechi che” (Salmo 65:⁠2).

Fentren che maneluwkelay Chaw Dios ñi allkütukeetew. Femngechi rakiduamlu rume, ka ngillatukefingün ñi doy küme duamküleal. Rüfngey llemay, llellipufiliyiñ ta Chaw Dios, doy küme duamküleafuiñ, welu fey ka müten no. Biblia feypi: “Jewba⁠ * fülmaniefi kom ñi pu mütrümkeetew, kom pu mütrümkeetew rüf dungu mu. [...] Llellipukelu engün kellun mu, kidu allkütukefi ka montulkefi” (Salmo 145:⁠18, 19).

Feley llemay, Chaw Jewba eluwküley ñi allkütuafiel tañi pu feyentukeetew. Tüfa ñi feypin Chaw Dios: “Eymün mütrüm-muan ka küpayaymün, ka ngillatumuan ka iñche allkütuwayiñ” (Jeremías 29:⁠12).

“Rumel yafüluwkülemün tamün ngillatuleal” (Romanu 12:⁠12).

Fentren rupa, tati Biblia ngülamtukeeiñmu taiñ ngillatuafiel ta Chaw Dios. Tüfa pengeli Chaw Jewba ayükey taiñ ngillatuafiel (Matew 26:⁠41; Efesio 6:⁠18).

Welu eymi ramtuwafuymi: “Chaw Dios, ¿chumngelu fente ayükey taiñ ngillatuafiel?”. Rakiduamnge tüfa: kiñe chaw küme kimniey chem ñi duamnieel tañi pichikeche. Fey tati pichikeche ‘kelluen’ feypielieyew tañi chaw, ¿chum duamnagay ti chaw? Rume ayüway. ¿Chumngelu? Ti pichikeche pengeli ñi maneluwkülen tañi chaw mu. Ka femngechi iñchiñ ngillatufiel mu ta Chaw Jewba, pengelkeiñ taiñ maneluwkülen kidu mew (Proverbios 15:⁠8; Santiaw 4:⁠8).

“Elkünumün Ngünechen mew kom tamün fill rakiduamelnieetewchi dungu, kidu am ta piwkeyenieetew ta eymün” (1 Pedro 5:⁠7).

Chaw Dios rume piwkeyeeiñmu ka duamtunieeiñmu, feymu ayükey taiñ ngillatuafiel. Kidu fente küme kimniey kom taiñ rupameken, fey küpa kellukeeiñmu.

Kuyfi mu mülekefuy kiñe Rey, David pingelu. Kidu rume ngillatulekefuy ta Chaw Dios mu. Nütramkalelkefi tañi chum duamkülen ka kimelelfi tañi chem rakiduamkülen (Salmo 23:⁠1-6). ¿Allkütupey may ta Chaw Dios? Femi llemay. Chaw Dios rume piwkeyekefuy ta David ka eluwkülekefuy ñi allkütuafiel (Hecho 13:⁠22). Ka femngechi Chaw Dios rume piwkeyeeiñmu, feymu eluwküley taiñ allkütuaetew.

Kuyfi mew kiñe wentru Biblia mew wirintukuy tüfa: “Piwkeyeniefiñ ta Jewba kidu kay allkütuñmakeenew tañi dungun”. Feley llemay, tüfachi wentru kimniefuy Chaw Dios ñi allkütuñmaetew ñi ngillatun, fey tüfa rume yafültukueyew. Feymu weñangkülelu tüfachi wentru, llellipukefuy ta Chaw Dios, fey doy yafüluwkülekefuy ka fülmawkülekefuy kidu mew (Salmo 116:⁠1-9).

Ngoymalayaiñ Chaw Dios allkütukey taiñ llellipukeel. Longkontukufiliyiñ tüfa, fentekünulayaiñ taiñ ngillatukefiel. Peaiñ ñi femün kiñe wentru, Pedro pingelu, España mapu mew müley. Kiñe antü tañi fotüm miyawlu auto mu, chocay, fey lay. Rume lladkülewetuy tañi piwke tüfachi wentru. Welu ¿chumi? Kom piwke mu ngillatufi ta Chaw Ngünechen fey ‘kelluen, yafültukuen’ pifi. Fey ¿chem rupay? Pedro feypi: “Tañi pu peñi ka pu lamngen chaf feyentulu yafültukuenew iñche ka tañi domo. Kimtukun Chaw Jewba wiñoldunguenew tañi llellipukeel”.

Pedro ngillatuy rume, tañi fotüm wiñomongetulay. Welu ngillatun mu Pedro ka tañi familia, doy küme duamkületuy. Pedro tañi domo, Maria Carmen pingelu feypi: “Rume weñangkülefun, welu ngillatufiñ ta Chaw Jewba, fey doy küme duamküleketun ka tüngduamkületun. Chaw Dios rüf pepilkeenew llemay”.

Fillke dungu ñi rupan ta che ka Biblia ñi feypin, pengeli Chaw Dios allkütukefi pu che ñi llellipukeel. Welu Chaw Dios kom che wiñoldungukelafi tañi llellipukeel. ¿Chumngelu am? Peafiyiñ.