Ñi nütramcael pu amuldunguquelu Chau Dios ñi Gobierno

Quimürpui chem tañi chumal ñi mongen meu

JESÚS quimniefi tañi pu ufisa (Juan 10:14). Quiñe che cüme piuquengele ca ayüniele ti cümeque dungu, cüpa fülmayafi pu inaniequefilu Jesús engün, quimürpuai chem tañi chumal tañi mongen mu. Femngechi rupai quiñe domo Bélgica mapu mu, tüfa tañi rupan:

“Pu Dunguquelu Ineingen Jehová aculu tañi ruca mu rume hueñancülequefun, ayüfun tañi langümuhual. Ayüfiñ ñi feipieteu engün chumngechi cüme elcünungetuai huesaque dungu. Huelu Chau Ngünechen müten femai tüfachi dungu feipieneu engün, tüfa ta ayülan. Pura tripantu ngeuyei tañi amuhuenon iglesia mu. Ayüquelafun ñi cüme piuquefaluuquen pu che iglesia mu. Huelu ngüneduamün ñi rüfngen chem ñi feipieteu pu Dunguquelu Ineingen Jehová ca ngüneduamün pu che ñi duamniefiel ta Chau Ngünechen.

Quiñeque rupa müten nütramcafiñ pu Dunguquelu Ineingen Jehová, huelu fei hula pehuelafiñ engün. Rume huesa duamfun, epu cajetilla pütremtuquefun fill antü, fei drogatuquefun cütu. Ayüquefun ñi nütramcayafiel tañi abuelo yem, fei conquefun calcu dungu mu, müna huesalcaeneu. Quisulelu iñche pun meu codemequefeneu pu huecüfü, fentren cüyen mu femngechi felefun, rume llicalefun ñi quisuleal pun meu.

Quiñe antü tripan tañi pasiameal, huelu cañpülecünuhun. Fei puhun cheu deumamequengefui quiñe fütra ruca. Fentren che cüdaucülefui, afmatulehuen. Fülconpulu, pefiñ pu Dunguquelu Ineingen Jehová deumamequelu quiñe Trahunhue Ruca. Acordan tañi pemequefeteu engün ruca mu, com pu che femngechi yenieafui tañi mongen pin.

Rume ayüquefun tañi huiñotual engün tañi ruca mu, feimu nütramcafiñ quiñeque cüdaumequelu feiti püle. Llellipufiñ ta Chau Dios, fei mari antü rupalu acui tañi ruca mu ti huentru tañi nütramcaeteu ellaca mu. Huiño chillcatuafuyu Biblia pieneu, cümei pin iñche. Müchai müten mangeleneu ñi amual Trahunhue Ruca mu, fei amun. Turpu pequelafun femngechi dungu. Fentreñma mu quintuyauquefun pu che ayüucülelu ca hueluquentu piuqueyeuquelu, feulaque ta pefiñ femngechi che.

Fei eluhun ñi amual com ti trahun mu. Cüla semana rupalu pütremtuhuelan, ütrüfentufiñ fillque lifru astrologia mu ca ti huesaque ülcantun ñi allcütuquefel, fei codehuelaeneu pu huecüfü. Eluhun ñi inayal Jehová ñi ngülam tañi mongen mu. Cüla cüyen rupalu amuldungulelquefiñ caquelu che Chau Dios ñi cümeque dungu. Cayu cüyen rupalu fautizahun, fei epu antü hula eluhun ñi huneleal amuldungun mu.

Mañumtufiñ ta Chau Jehová chumngechi tañi quellueteu. Quimürpun chem tañi chumal tañi mongen mu. Jehová tañi üi quiñe alüpürachi ruca reque felei cheu tañi ellcahuam (Proverbios 18:10). Iñche duamcülequen quiñe huentru reque huirintucufilu salmo, fei feipi: ‘¡Mülen mu quiñe antü tami ruca meu doi cümei ta müleal huaranca antü cheu rume! Dulliquen müleal tañi Ngünechen ñi hulngiñ ruca meu, dulliquelan müleal caquelu ruca cheu ñi femngequeel huesaque dungu’”.

Tüfachi domo cüme piuquengelu quimürpui ñi chumal tañi mongen mu. Ca femngechi feleai inei rume quintuniefilu ta Chau Jehová cüme piuque mu.