FERNANDO a fill raquiduamcülei, epu loncolelu ñi trahunche mu feipieyu ñi huichu nütramcayal. Deuma quiñeque rupai ñi huitranmapaeteu ti huitran-ngepaquechi loncolelu, fei nütramcangei chem mu mülei ñi doi cüdahual ñi loncolerpual. Rupalelu cai chi tripantu, ramtuuquei: “¿Puupeai mai chi antü ñi loncolerpual?”. Feula ca quiñe rupa cüpai ti huitran-ngepaquechi loncolelu. Ti pu loncolelu, ¿chem feipiaeyu chi?

Quiñe loncolelu feipieyu chem ñi feipilen 1 Timoteo 3:1, fei feipieyu quisu ñi ca loncoleal. Fernando afmatulehuei, feimu ramtui: “¿Rüfcünu? ¿Iñche?”. Mai pieyu ti peñi. Fei Fernando rume ayühui. Feimu feipingelu ti trahunche ñi loncolen ti peñi Fernando, ¡com rume ayühuingün!

Ti pu peñi, ¿huesa dungu pemai ayüle ñi loncoleal ti trahunche mu? Femlai llemai. Apostol Pablo huirintucui: “Quiñe huentru yafüluule ñi loncoleal trahunche mu, müna cüme cüdau ayüniei” (1 Tim. 3:1). Inafiel mu tüfachi troquiñ, fentren peñi cüdauqueingün ñi loncoleal trahunche mu. Feimu huall mapu Jehová ñi troquiñche mu, mülei fentren loncolelu ca fentren quelluquefilu pu loncolelu. Huelu Jehová ñi troquiñche tremcülelu, duamniengei ñi müleal doi loncolelu. Feimu peafiyiñ epu ramtun: pu peñi, ¿chumafuingün tañi loncoleal? ¿Cümepeafui mai ñi raquiduamcüleal chumül ñi elungeal feichi cüdau Fernando reque?

Biblia mu feipilu “quiñe huentru yafüluule ñi loncoleal”, griego quehun mu trürümngei ta quiñe che huinuuquelu reque ñi tumeal quiñe anümca ñi fün. Huelu Pablo cüpa feipilai pu peñi ñi loncoleal tañi doi falintuhual. Quintuquelaingün tañi ngünenieafiel ñi pu peñi, doi mai cüpa quelluquefingün tati trahunche.

Ti pu peñi ayünielu ñi loncoleal mülei ñi cüme inayal ñi feipin 1 Timoteo 3:2-7 ca Tito 1:5-9. Quiñe peñi fentren tripantu yenielu ñi loncolen Raymond pingelu, feipi: “Falin-ngefui cüme quimeltual ca hulal cümeque hueupin, huelu doi falin-ngei taiñ chumngechi chengen. Pu loncolelu mülei ñi cüme yenieal ñi mongen, femngechi ñi dunguyengenoal. Ca mülei ñi quim ngüneniehual, cüme raquiduam nieal, cüme adnieal tañi mongen, poyechefengeal ca ñom piuquengeal”.

Quiñe peñi rüf ayüniele ñi quelluafiel tati trahunche, mülei ñi cüme yenieal ñi mongen. Feimu nor chengeai com dungu mu ca famentuafi chem podngechi dungu rume. Mülei ñi quim ngüneniehual, cüme raquiduam nieal ca cüme adnieal tañi mongen. Femngechi ti trahunche maneluhuai feichi peñi mu, ñi cüme adnieaeteu ca ñi quelluaeteu rupan mu huesaque dungu mu engün. Poyefe chengei, feimu yafültucuquefi pu hueche ca pu hue conlu ti trahunche mu. Cafei nehuentucuquefi ca quelluquefi pu füchaqueche ca pu cutrancülelu. Com femquei ta tüfa ñi cümelcayafiel ti trahunche, femquelai tañi doi pürüm loncolerpual. b

Pu loncolelu tami trahunche mu ngülamtuafeimu ca yafültucuafeimu, huelu eimi mai mülei tami cüdahual tami loncolelulerpual trahunche mu. Henry fentren tripantu yenielu ñi loncolen trahunche mu, feipi: “Ayülmi tami loncoleal, pengelnge tami femün mu tami deu pepicaucülen”. Feimu feipiquei chem ñi huirintuculen Eclesiastés 9:10 mu: “‘Com dungu tami femal tami cuhu mu, femnge com tami nehuen mu’. Feimu ti pu loncolelu elfalcünuelmu chem cüdau rume, com tami nehuen mu entufinge. Ayühunquechi femaimi chem cüdau rume, lepüal ngele rume. Femngechi femülmi, ti trahunche inaduamai tami cüme cüdaucülen”. Rüfcünu, ayülmi loncolerpual, cüme cüdaufengeaimi ca cüme entuaimi tami elfalcünungeel. Checahun-ngelayaimi ca quintulayaimi tami ngünenieafiel pu peñi ca pu lamngen, doi mai quimfalngepe tami ñom piuquengen (Mat. 23:8-12).

Quiñeque peñi ayünielu ñi loncolerpual feipicantuquefi pu loncolelu cam cüme huenifaluuquei pu loncolelu engu. Ca quiñequentu huesa duamnagqueingün tati pu loncolelu ngülamtuelumu, huelu tüfa cümelai. Tüfachi pu peñi cümeafui tañi ramtuhual engün: “¿Cüpa loncolen tañi doi yamniengeal? Cam, ¿cüpa loncolen ñi quelluntucual adnieafiel ti pu trahunche?”.

Pu peñi ayünielu ñi loncolerpual ca mülei ñi acordanieal tüfachi ngülam: “Cüme femqueaimün tamün inayentuaeteu Chau Ngünechen ñi pu ufisa” (1 Ped. 5:1-3). ¿Chumngechi femngequei tüfa? Mülei ñi quiñepülecünuafiel huesaque raquiduam ca huesaque femquen. Mülei ñi ñom piuquengeal ca nor dungu femal, loncolele cam loncolenole ti trahunche mu. Rüfcünu, quiñe peñi loncolerpule rume petu culpan chengeai (Núm. 12:3; Sal. 106:32, 33). Quiñe peñi inaduamuulayafui rume chi, huelu caquelu peñi peñmaqueyu tañi huelulcauquen (1 Cor. 4:4). Feimu pu loncolelu ngülamtuelmu, cüme allcütuafimi fei tami illcunon, fei inayafimi tati ngülam.

Quiñeque peñi ayülelu ñi loncolerpual, rume fentren tripantu rupalu troquifingün. Eimi rume fentren tripantu ayülelmi tami elungeal elfal cüdau trahunche mu, ¿huesa duamnagqueimi quiñeque mu? Femngechi raquiduamülmi, acordange chem ñi feipin Biblia: “Ñi acunon mu tati üngümnieelchi dungu, cutranelquefi piuque. Huelu ñi femtripan ti ayüelchi dungu, quiñe anümca hulquelu mongen reque felei” (Prov. 13:12).

Quiñe che hueñancüafui acunole quiñe ayüelchi dungu. Femngechi dungu rupai Abrahán. Jehová feipicünufeyu ñi nieal quiñe fotüm, huelu rupalei chi tripantu, Abrahán engu Sara nielaingu yall (Gén. 12:1-3, 7). Abrahán füchalu feipifi ta Jehová: “Doi Fütra Ñidol Jehová, petu nielan fotüm, ¿chem am eluafen? [...] Petu elulaen fotüm”. Jehová huiño feipieyu ñi eluafiel quiñe fotüm. Huelu rupai mari meli tripantu, fei hula nierpui quiñe fotüm (Gén. 15:2-4; 16:16; 21:5).

Abrahán petu llounolu tañi üngümnieel, ¿quisu hueñancünquechi poyenierpupefi mai ta Jehová? Femlai llemai. Quisu maneluucülefui Jehová ñi femtripayal ñi feipieteu, feimu üngümcülei Jehová mu müten. Ti apostol Pablo huirintucui: “Feimu Abrahán tañi ñom piuquengen llohui chem tañi feipicünulelngeel” (Heb. 6:15). Af meu, Jehová elueyu fentren cümeque dungu ñi üngümquenofel rume. ¿Chem quimeltueiñmu Abrahán ñi femün?

Eimi ayülmi loncolerpual trahunche mu, huelu rupalei ti tripantu fei tami petu femnon, huesa duamquilnge. Maneluucülenge Jehová mu, ayühunquechi cüdahuelniefinge. Quiñe peñi William pingelu, fentren peñi quellufilu ñi doi cüdahuelafiel Jehová, feipi: “Duamfali tiempo ñi pepicaucüleal quiñe peñi. Quiñe peñi ñi feipin ca ñi femquen ñi elfal cüdau mu, pengelafui ñi pepicaucülen ñi loncolerpual. Quiñeque peñi nienole elfal cüdau trahunche mu, raquiduamafuingün ñi falintunoeteu Jehová. Tüfachi raquiduamün cümelai, ca yeafeiñmu taiñ ayüucülenoal. Taiñ rüf ayüucüleal mülei taiñ cüdahuelafiel ta Jehová com piuque mu, cheu müleliyiñ ca chem cüdau femliyiñ rume”.

Quiñe peñi üngümniefui mari tripantu ñi loncolerpual. Quisu feipi chem quimeltueyu Ezequiel capitulo 1: “Jehová adniefi ñi troquiñche ca quisu feipiquei chem dungu ñi femngeal. Iñche pepi dullilayafun chem antü ñi loncolerpual, Jehová mai dulliai chem antü. Falilai chem ñi ayüfel iñche, Jehová mai quimniei chem tañi duamnieel”.

Eimi ayülmi tami loncolerpual quiñe antü, eluucülenge tami quelluafiel caquelu pu che trahunche mu. Rume fentreñma troquifilmi tami üngümcülen, afeluuquilnge. Raymond taiñ deu nütramcapeel, feipi: “Eimi ayülmi tami falintungeal ca nieal autoridad, chumcaunorume ayüucülelayaimi. Re raquiduamcülelmi tami loncolerpual, ayüucülen cüdahuel-layafimi ta Jehová”. Eluunge tami adnieaeteu Jehová tañi nehuen, femngechi ñom piuquengeaimi. Yafültucunge tami huenihuen Jehová engu, chillcatuniefiel Biblia. Doi coneltunge amuldungun mu ca quimeltulelafiel Biblia caquelu che. Quelluafimi tami pu che ñi doi hueniyeafiel ta Jehová ca quiñentrür chillcatuaimün Biblia. Mülelmi pu peñi ca pu lamngen engün, ayüucülenge. Petu nehuentun mu cüdahulmi tami loncolerpual trahunche mu, ayühunquechi poyeniefinge Jehová.

Petu amulelmi quiñe antü tami loncolerpual, eluucülenge tami doi cüme cristianongerpual ca quelluntuculeal Jehová ñi trahunche mu. Jehová ca tañi trahunche ayülelai tami ayüucülenoal. Jehová cümelcaquefi ca quelluquefi com pu peñi ca lamngen cüme piuque mu cüpa cüdahuelfilu. Acordange, “Jehová tañi cümelcan [...] cutrancachequelai ñi elufiel mu” (Prov. 10:22).

Fentreñma yenielmi rume tami cüpa loncolerpual trahunche mu, petu doi quimürpuafuimi ca hueniyerpuafuimi Jehová. Petu cüdahuelmequelmi tami loncolerpual trahunche mu, quelluniefilmi caquelu peñi ca lamngen ca cüme dapifilmi tami familia, cüme quimimi Jehová ngoimanentulayai com tami femqueel quisu ñi duam mu. Ayühunquechi cüdahuelniefinge Jehová, chem elfal cüdau elungelmi rume.