1. ¿Chumngechi duamcüleiñ taiñ feyentun mu?

 COM che feyentuquelai (2 Tesalonicenses 3:2). Huelu Chau Jehová eluquefi tañi pu che ñi feyentual (Romanos 12:3; Gálatas 5:22). Feimu com pu feyentulelu mülei ñi mañumafiel ta Chau Dios.

2, 3. 1) ¿Chem cümeque dungu llohuafui pu feyentuquelu? 2) ¿Chem ramtun ngüneduamaiñ?

² Jesús feipi quisu tañi duam mu taiñ Fütra Chau cüpalquefi pu che. Feyentuliyiñ Jesús mu, rulpacünungeafui taiñ culpan, femngechi elungeafuiñ taiñ hueniyeafiel Jehová rumel meu (Juan 6:44, 65; Romanos 6:23). ¿Chem femiyiñ taiñ cümelcangeal? Chem no rume. Taiñ culpafe chengen mu mülefuiñ taiñ layal, huelu Jehová pefi chem cümeque dungu femafuiñ (Salmo 103:10). Fente tañi cutranpiuqueyechequen, nengümi reque taiñ piuque, fei taiñ llohual ti cümeque dungu. Femngechi femlu, eluuqueiñ taiñ feyentual Jesús mu, fei taiñ nieal rumel mongen (papeltunge 1 Juan 4:9, 10).

³ Huelu, ¿chumquei pu feyentulelu? ¿Quimafuiñ müten chumngechi cümelcayafeiñmu Chau Jehová? Doi mai, ¿chumngechi pengelafuiñ taiñ feyentulen?

4. ¿Chumquei pu che feyentulelu?

⁴ Pu feyentulelu quimniei chem ayüniei Chau Dios, huelu fei ca müten no. Cafei yafüluuqueingün tañi ayühulafiel. Chau Dios huli tañi Fotüm taiñ montulngeal, feimu pu feyentulelu Jesús mu ca amuldungulelfi pu che ti cümeque dungu. Ti apostol Pablo feipi: “Fei quisu tami hun meu feipilmi ‘Jesús tañi Ñidolngen’ itrocom dungu meu, ca tami piuque meu feyentulmi Ngünechen tañi huiñomongeltueteu, nieaimi ta montuluhun. Piuque meu feyentuquei ta che ñi niehuetunoal ta culpan, fei hun meu nütramyengequei ta Jesucristo tañi nieal montuluhun ta che” (Romanos 10:9, 10; 2 Corintios 4:13).

5. 1) ¿Chumngelu duamfali taiñ nieal feyentun? 2) ¿Chumafuiñ ñi nehuentuleal taiñ feyentun? Feipinge quiñe pengelün dungu.

⁵ Ayüliyiñ taiñ müleal ti hue mapu mu, duamfali taiñ nieal feyentun ca nehuentucuafiel. Ti feyentun trürümngeafui quiñe anümca reque. Ñi cüme tremal ti anümca, mülei taiñ hutrucoafiel, femnoliyiñ ancüai. Ca femngechi mülei taiñ cuidanieafiel taiñ feyentun ñi cüme tremal ca ñi nehuentuleal (Tito 2:2; 2 Tesalonicenses 1:3; Lucas 22:32; Hebreos 3:12).

6. Hebreos 11:1 ñi feipin mu, ¿chem epu dungu femquei tati feyentulelu?

⁶ Biblia feipi epu dungu ñi femqueel tati feyentulelu (papeltunge Hebreos 11:1, TNM). Hunelu mu feipi pu feyentuquelu Ngünechen mu “rüf maneluuquei ñi femtripayal tañi üngümnieel”. Üngümnieiñ ñi femtripayal Chau Dios tañi feipicünuel, maneluucüleiñ ñi afal huesaque dungu ca ñi müleal hue mapu. Biblia ca feipi pu feyentuquelu “cüme quimniei chem rüf quimfalcünuquei ñi mülen tati pequenoelchi dungu”. Iñchiñ pequelafiyiñ ta Jehová, Jesucristo, pu cümeque püllü ca Chau Ngünechen ñi ngüneniemequen huenu mu, huelu quimnieiñ ñi mülequen (Hebreos 11:3). ¿Feyentuqueimi cai Chau Dios ñi feipicünuel ca tati pequenoelchi dungu? ¿Chumngechi pengelafuimi tami feyentulen? Tami mongen mu, tami feipin ca tami femün.

7. Noé tañi femün, ¿chumngechi quimeltueiñmu ñi femquen tati feyentulelu? (Inaduamnge ti adentun huenulelu).

⁷ Noé ñi femün quimeltueiñmu ñi chumquen pu feyentulelu. Biblia feipi Chau Ngünechen quimelelfi ta Noé “chem ñi rupayal petu ñi pengenon” rume. Noé cüpa ayühulfi ta Chau Jehová ca feyentui ñi feipieteu, feimu “deumai quiñe huampo ruca ñi montulafiel tañi pu che” (Hebreos 11:7, TNM). ¿Ramtungepelai chumngelu ñi deumamequen? Biblia feipi Noé ñi amuldungulelfiel pu che (2 Pedro 2:5). Feipilelfi engün Chau Dios ñi cüpalafiel quiñe fütra mangiñ co ñi ngehuenoal huesaque che. Huldungui chi chem ñi feipieteu Jehová: “Iñche deu raquiduamcülen tañi apümafiel ta com che, quisu engün am rume huesalcamequequelu ta mapu meu”. Jehová ca feipifi ta Noé: “Iñche ta huercüan quiñe fütra tripacon. Fei com magiñmayai ta mapu. Ca apümafiñ itrocom tati nielu mongen com mapu meu. Com müleyelu mapu meu layai”. Jehová feipifi ta Noé ñi conal tati huampo ruca mu. Feimu Noé, ¿nütramcapelafi tati pu che ñi ca femngechi femal tañi mongetripayal? (Génesis 6:13, 17, 18).

8. ¿Chem pi Santiago ñi chumquen pu feyentulelu?

⁸ Pablo huirintuculelfi quiñe carta pu hebreo che, pichi rupalu peno Santiago ca huirintucui ñi chumquen pu feyentulelu. Feipi: “Pengelelen tami feyentun fei tami nienon ta fürenechen, fei iñche cai pengelelayu tañi feyentun tañi fürenechequeel meu” (Santiago 2:18). Quimeltueiñmu taiñ nieal feyentun, re feyentulayaiñ ñi mülen ta Chau Dios. Pu huecüfü quimnieingün ñi mülen ta Chau Dios, huelu rüf feyentulaingün quisu mu, doi mai rume caiñetuquefingün (Santiago 2:19, 20). ¿Chumquei tati pu feyentulelu? Cümeque dungu femquei tañi ayühulafiel ta Chau Dios. Femngechi femi Abrahán. Santiago huirintucui: ‘Ngünechen lloufi ta Abrahán, iñchiñ taiñ cuifi tuhun em, quiñe nor mongen-ngelu reque, quisu tañi femel meu feichi hultucufilu Ngünechen meu tañi sacrificayafiel ta Isaac, quisu tañi fotüm. Fei ngüneduamafimi ta Abrahán tañi femelchi dungu meu: quimfali quisu ñi rüf feyentulen tañi femelchi dungu meu, fei quisu ñi femelchi dungu meu fente cüme huechulentui ñi feyentun’. Fei hula Santiago quimeltui cümeque dungu femnole che, falilai tañi feyentun. Feipi: “Chumngechi tati cuerpo nienolu nehuen ñi mongeleal lalei, ca femngechi lalei taiñ feyentun Chau Dios mu femnoliyiñ cümeque dungu” (Santiago 2:21-23, 26, TNM).

9, 10. ¿Chumafuiñ taiñ feyentual Chau Dios ñi Fotüm mu?

⁹ Doi cüla mari tripantu rupalu Santiago ñi huirintucuel tüfa, Juan huirintucui tañi lifru ca cüla carta. Juan cüme quimniefui chumquei pu feyentulelu, chumngechi ca quimniefuingün caquelu huirintucufilu ti Biblia. Feimu fentren rupa pünei quiñe palabra griego quehun dungu mu, tüfa rulpadungungei “pu feyentuquelu”.

¹⁰ Juan feipi: “Pu feyentuquelu Ngünechen ñi Fotüm meu rumel mongeleaingün. Huelu pu allcütuquenofilu tati Fotüm rumel mongen nielayai, doi mai Chau Ngünechen rumel illcutunieaeyu engün” (Juan 3:36, TNM). Taiñ feyentual Chau Dios tañi Fotüm mu, duamfali taiñ inayal tañi feipin. Papeltulu com ñi huirintucuel ta Juan, quimtucunieiñ chem chumal taiñ nieal rumel mongen. Mülei taiñ feyentual Chau Dios mu ca tañi Fotüm pi Jesús (Juan 3:16; 6:29, 40; 11:25, 26; 14:1, 12).

11. Chau Jehová quimeleiñmu ti rüf dungu. ¿Chumngechi pengelelafuiñ taiñ mañumcülen?

¹¹ Chau Jehová tañi nehuen mu quelluqueiñmu taiñ adümafiel ti rüf dungu quisu ca tañi Fotüm mu. Ca quelluqueiñmu taiñ feyentual fei engu meu (papeltunge Lucas 10:21). ¿Chumngechi mañumafiyiñ ta Jehová tañi femün mu? Fei hueni troquiqueiñmu Jesús tañi duam mu, fei quelluqueiñmu ñi tutelcaleal taiñ feyentun (Hebreos 12:2). Feimu feipiafiyiñ Chau Dios fente taiñ mañumcülen. Cafei mülei taiñ llellipuafiel ta Chau Dios ca chillcatunieafiel ti Biblia. Femngechi nehuentucuafiyiñ taiñ feyentun (Efesios 6:18; 1 Pedro 2:2).

12. Feyentuliyiñ, ¿chumafuiñ?

¹² Rüf feyentuliyiñ ñi femtripayal Jehová ñi feipicünuel, femaiñ cümeque dungu. Amuldungulelafiyiñ pu che Chau Dios ñi ngünenietual mapu, quelluafiyiñ engün ñi inayafiel Jesús ñi femün, fentecünulayaiñ taiñ femal ‘cümeque dungu itrocom che meu, doyelchi mai taiñ pu peñi ca lamngen feyentulelu ta Cristo meu’ (Gálatas 6:10). Cafei amuleaiñ taiñ famentuafiel taiñ cuifi huesa mongen. Ayüquelaiñ chem no rume taiñ püntünentuaeteu Jehová mu (Colosenses 3:5, 8-10).

13. 1) ¿Chumngelu duamfali taiñ feyentual Chau Dios mu? 2) Biblia ñi feipin mu, ¿chumquei pu feyentulelu? ¿Chumngelu?

¹³ Ti Biblia feipi tati nienolu feyentun ayühul-layafi ta Chau Dios. Fei ‘quiñe che ayüle ñi fülpual ta Ngünechen meu, rüf meu felei ñi feyentual Ngünechen ñi mülen ca ñi fürenequefiel tüfei tañi manelqueteu’ (Hebreos 11:6). Biblia ca feipi tati hunenque dungu taiñ quimeltungeel, fei taiñ feyentual Chau Dios mu, femngechi müten pengelaiñ taiñ rüf inaquefiel ta Cristo (Hebreos 6:1). Huelu taiñ cüme hueniyeafiel ta Chau Dios, cafei duamfali taiñ femal caquelu dungu (papeltunge 2 Pedro 1:5-7; Judas 20, 21).

14, 15. ¿Chumngelu doi falin-ngei nieal piuqueyen?

¹⁴ Pu huirintucufilu ta Biblia doi nütramcaqueingün ti feyentun mu. Feimu pu cristiano, ¿re falintupeafuiñ mai ti feyentun? Ngüneduamaiñ.

¹⁵ Pablo nütramcai tati piuqueyehun ca ti feyentun mu. Feipi: “Nieli iñche fentren feyentun tañi nengümcayafiel ti fütraque huincul, huelu nienoli ta piuqueyechen, chem falilai rume ñi femqueel” (1 Corintios 13:2). Cafei quisu feipi taiñ piuqueyefiel ta Chau Dios, fei “tati hunen huercün dungu ca doi falilu com huercün dungu meu” (Mateo 22:35-40). Ti piuqueyen quelluqueiñmu taiñ femal fillque dungu taiñ ayühulafiel ta Chau Dios. Quiñe dungu: ti Biblia feipi tati nielu piuqueyen com feyentuquei. Feimu nieliyiñ piuqueyen, feyentuaiñ com taiñ feipieteu Jehová Biblia mu (1 Corintios 13:4, 7).

16, 17. 1) Biblia, ¿chumngechi pengeli ñi falin-ngen nieal feyentun ca piuqueyen? 2) Tüfachi epu dungu mu, ¿chuchi doi fali? ¿Chumngelu?

¹⁶ Biblia feipi rume falin-ngei ñi nieal feyentun ca piuqueyen. Feimu fentren rupa pu huirintucufilu Biblia trür nütramcaquei tüfachi epu dungu meu. Pablo feipifi pu peñi ca pu lamngen ñi ‘tucutuucüleal reque ta feyentun meu ca piuqueyehun meu’ (1 Tesalonicenses 5:8). Cafei Pedro feipi: “Eimün piuqueyefimün ta Jesucristo, tunte pequelafimün rume. Feyentuleimün ta quisu meu fei tamün pequenofiel rume” (1 Pedro 1:8). Santiago feipifi pu dullin cristiano: “Chau Ngünechen dullifi tati pu che pofre troquingelu tüfachi mapu meu ñi ricu chengeal reque feyentun mu, ca conpuaingün Chau Ngünechen ngünenietule ta mapu chumngechi ñi feipicünufiel tañi pu piuqueyeteu” (Santiago 2:5, TNM). Cafei Juan nütramcai chem taiñ feipieteu Chau Dios. Feipi: “Felei taiñ feyentual quisu tañi Fotüm Jesucristo meu, ca taiñ hueluconquechi piuqueyehual” (1 Juan 3:23).

¹⁷ Huelu Pablo ca feipi mülecai ‘tati feyentun, tati maneluhun ca ti piuqueyehun, huelu tati doi falilu fei ti cüla meu fei ta piuqueyehun’ (1 Corintios 13:13). ¿Chumngelu Pablo feipi doi fali ti piuqueyehun? Cüpalechi antü meu deu müleliyiñ ti hue mapu mu, duamfalngehuelayai taiñ nieal feyentun tüfachi dungu mu ñi feipicünuel Chau Dios. Huelu rumel duamfalngeai taiñ piuqueyeafiel Chau Dios ca tati pu che, amulerpuai taiñ doi piuqueyeafiel engün.

18, 19. Pu cristiano ñi nien feyentun, ¿chem dungu rupai? ¿Inei mülei ñi püramyengeal?

¹⁸ Pu rüf cristiano eluuqueingün ñi adnieaeteu Chau Ngünechen ñi nehuen. Feimu feyentuqueingün ca quelluntucuqueingün Chau Ngünechen ñi ngünenietual ta mapu. Cafei hueluconque piuqueyeuqueingün (Gálatas 5:22, 23). Feimu huall Mapu püle doi pura millon pu peñi ca pu lamngen quiñeucüleingün ca tüngcüleingün trahunche mu. Quimfali llemai, ti feyentun ca ti piuqueyehun rume cümelcachequei.

¹⁹ Chau Jehová ñi quellun mu müten quiñeucülei tañi pu che, feimu mülei tañi püramyengeal (Isaías 55:13). Rume mañumniefiyiñ ta Chau Jehová, ‘elungeiñ taiñ montual taiñ feyentulen meu’ (Efesios 2:8). Chau Jehová quellunieafi doi fentren che ñi nieal feyentun. Fei puule chi antü huall Mapu meu re müleai che nienolu culpan, nor chengeaingün, ayüucüleaingün ca rumel mu püramyeafingün ta Chau Jehová.